Amboara Ndraiky Fihavanan̈anao amy Jehovah

ISAKA taon̈o, maro olo voaray ho an̈isany fiangonan̈a. Ten̈a valera amy Jehovah iro ondrikondrikinany aby io. Miniminia hely baka ‘haravoan̈andro andan̈itry an̈y’, isaka misy ondrikondriky araiky mimpody amy Jehovah! (Lioka 15:7, 10) Ke izikoa vo tsy ela anao voaray, matokisa fa ravoravo mare Jesosy ndreky iro anjely aby io avio Jehovah mahita anao nimpody. Mety hiezaka anao hankafatatra fihavanan̈anao amy Jehovah, kanefa mety tsy mandeha ho azy raha zen̈y. Ino aby problemo sasany mety hiboaka, baka io ino raha han̈ampy anao?

PROBLEMO METY HIBOAKA

Maro rahalahy ndreky ranabavy kivy, ndray iro efa voaray. Izikoa anao karaha zen̈y, mety mitovitovy amy raha tsapany Panjaka Davida raha tsapanao. Ndray efa nambelany Jehovah hadisovan̈anany, karaha ty nambarany: ‘Nandonja zaho mare hadisovan̈anaka.’ (Sal. 40:12; 65:3) Olo araiky nimpody amy Jehovah mety mbala han̈ameloten̈a na ho men̈atra fo an̈atiny taon̈otaon̈o. Efa mandilatra 20 taon̈o nampavoaroaka Isabelle.a Karaha ty nambarany, izy koa fa voaray: “Sarotro taminaka nan̈eky fa Jehovah nan̈ambela hadisovan̈anaka.” Mety halemy arapan̈ahy ndraiky anao, izikoa anao kivy. (Ohab. 24:10) Aza ambela hahazo anao foeky raha karaha zen̈y.

Olo sasany ndraiky mavozo tsao tsy ho vitandro han̈ano raha jiaby tokony hatao hifandraisan̈a tsara ndraiky amy Jehovah. Karaha ty nambarany Antoine, tafaranizy voaray: “Karaha nadin̈ako aby raha jiaby nianarako ndreky nataoko taloha.” Mety tsy hahavita raha arapan̈ahy jiaby tokony hataony olo sasany, izikoa fa mahatsapa raha karaha zen̈y.

Iritrireta baka raha tsapanolo araiky niasa tran̈o tsara oe, kanefa raha io nirobatiny siklaony. Tsy hainy foeky raha sambôrin̈y fotony maro loatra asa miambin̈y izy ndreky fotoan̈a ho laniny hiasan̈a izio ndraiky. Robaka karaha zen̈y koa fihavanan̈anolo araiky amy Jehovah, izikoa izy nan̈ano fahotan̈a maventy. Ke mety hieritreritry izy fa tsy ho vitany foeky han̈ampody ndraiky fihavanan̈anany amy Jehovah, fotony mila ezaka be baka aminany raha zen̈y. Fa karaha ty: Aza miady manokan̈a!

Jehovah mitaon̈o anao karaha ty: “Avia atsika hifandamin̈y.” (Isaia 1:18) Efa niezaka anao ‘hifandamin̈y’ amy Jehovah, ke zen̈y mahavy izy tia anao. Miniminia baka! Satana tsy vôly mankaratsy Jehovah. Fa nohony anao niezaka nimpody aminany, Jehovah iziô afaka mivolan̈a amy Satana: “Anao ‘mavandy.’ ”—Ohab. 27:11.

Efa nan̈aton̈o Jehovah anao matoa tafimpody aminany. Ke mampan̈anten̈a izy fa izy han̈aton̈o anao koa. (Jak. 4:8) Ravoravo olo an̈ivony fiangonan̈a mahita anao voaray ndraiky. Kanefa tsy ampy zen̈y. Mila miezaka koa anao baka hitombo fitiavanao Jehovah, Babanao sady Namanao. Akory han̈anaovanao zen̈y?

MANÀN̈A TANJON̈O METY TAKARIN̈Y

Miezaha hanan̈a tanjon̈o mety ho takarin̈y. Mety mbala azonao onon̈o raha sasany nianaranao momba Jehovah, ndreky fikasan̈anany han̈ano tany ty paradisa. Kanefa, mbala mila mifen̈y fo anao baka ho zatra mitory, mivory tsy tapaka, avio miaraka amy piaramanompo. Diniha baka tanjon̈o sasany aby ty.

Mikoràn̈a matetiky amy Jehovah. Hainy Jehovah fa mety ho sarotro aminao hivavaka izikoa anao mbala man̈ameloten̈a mare. (Rom. 8:26) Kanefa, ‘mahareta fo mivavaka.’ Koràn̈a amy Jehovah fa anao ten̈a tiho kamaradiny. (Rom. 12:12) Karaha ty ho Andrej: “Nan̈ameloten̈a mare zaho sady nahatsiaro voabaraka. Kanefa, isaka zaho baka mivavaka, zaho mahatsiaro mahivankivan̈a. Ren̈iko nilamin̈y mare jerinaka.” Izikoa tsy hainao raha hikoran̈inao lera mivavaka, vakia Salamo faha-51 ndreky faha-65. Ao ahitanao vavaka nataony Panjaka Davida taminizy nibebaka.

Mianara Baiboly tsy tapaka. Zen̈y hankafatatra finoan̈anao sady han̈ampy anao ho tia Jehovah mare. (Sal. 19:7-11) Ho Felipe: “Nanjary nalemy arapan̈ahy zaho sady nandiso fan̈antinan̈a Jehovah, fotony zaho tsy nazoto namaky ndreky nianatra Baiboly. Tsy tiako havoa zaho man̈indroe eky raha zen̈y, ke tapakevitry zaho fa hianatra Baiboly tsy tapaka, fotony zen̈y hiaro zaho.” Zen̈y koa raha mety hataonao. Izikoa sarotro aminao hahita fotokevitry mety hianaran̈a lera mianatra manokan̈a, mangataha fan̈ampian̈a amy naman̈a matotro.

Mikamaradiana ndraiky amy piaramanompo. Sasany amindro voaray aby io mavozo tsao tsy hiraesinolo tsara. Karaha ty ho Larissa: ‘Men̈atra zaho hifandray tamy piaramanompo. Haiko fa nampalahelo iro raha nataoko. Ela be raha zen̈y vo nafaka tamy jerinaka.” Matokisa fa iro antipan̈ahy aby io ndreky iro naman̈a matotro an̈ivony fiangonan̈a von̈ono han̈ampy anao hanjary kamaradiny Jehovah ndraiky. (Zahava “Ino Raha Mety Hataony Antipan̈ahy?”) Ravoravo mare iro mahita anao nimpody amy Jehovah, avio tiandro ho sambatra anao.—Ohab. 17:17.

Akory hahavy anao hifankazatra ndraiky amy piaramanompo? Aza manapatapaka fivorian̈a avio miarasa amy piaramanompo, na amy fanompoan̈a zen̈y na amy raha hafa. Ino mahatsara zen̈y? Karaha ty ho Felix: “Efa tsy din̈iny piaramanompo hahita zaho himpody ndraiky amy Jehovah. Niraesindro tsara zaho. Nataondro tsapako tsarabe fa zaho iziô efa an̈isany fiangonan̈a ndraiky, avio efa nambelany Jehovah hadisovan̈anaka. Nampiandro koa zaho hatoky fa ho vitako fo hanompo Jehovah.”—Zahava “Ino Raha Mety Hataonao?”

AZA KIVY!

Satana tsy maintsy mitady fomba fo baka anao ho rivan̈a, ke tsy hihavan̈a tsara amy Jehovah. (Lioka 4:13) Miomàn̈a baka tsy ho tampoko aminao raha zen̈y. Ataova fo raha hampafatatra fihavanan̈anao amy Jehovah.

Jehovah mampan̈anten̈a ondrikondrikinany karaha ty: “Zaho hitsakaraka ondrikondriky very, baka io lan̈iany niala lalan̈a hampodiko ndraiky; lan̈iany maratra hasiako bandy, avio lan̈iany aosa hamezako angovo.” (Ezek. 34:16) Efa maro olo nampiany Jehovah ke tafianko ndraiky. Matokisa fa ho vitanao fo hankatsara ndraiky fihavanan̈anao aminany, fotony izy von̈ono han̈ampy anao.

Ino Raha Mety Hataony Antipan̈ahy?

Maro raha mety ataony antipan̈ahy han̈ampian̈a olo voaray, baka iro ho tsara fihavanan̈a amy Jehovah ndraiky. Ino aby sasany amy zen̈y?

Ameza toky iro. Hainy apostoly Paoly fa mety ‘ho tototrony alahelo mare’ olo araiky nan̈ano fahotan̈a maventy. (2 Kor. 2:7) Ke mety mbala han̈ameloten̈a ndreky ho kivy izy. Zen̈y nahavy Paoly nampirisiky Kristianin̈y ta Korinto, ‘ho tsara fan̈ahy’ aminolo karaha zen̈y ke ‘han̈ambela hadisovan̈anazy ndreky han̈amia korazy izy.’ Mila amezan̈a toky iro voaray aby io fa tia iro mare Jehovah ndreky piaramanompo. Tsy ho dekorazy iro, izikoa antipan̈ahy midera iro ndreky man̈ampy iro fo.

Mivavaha miaraka amindro. ‘Ten̈a mahery vavaka ataonolo marin̈y.’ (Jak. 5:16) Karaha ty ho Larissa, araiky nikoran̈intsika taloha tarỳ in̈y: “Nikoran̈iko taminy antipan̈ahy raha nampavozo ndreky nampiasaloha zaho. Iro nivavaka baka Jehovah han̈ampy zaho. Tsapako baka tamy zen̈y fa iro tsy neloko taminaka, sady iro ten̈a tihan̈ampy zaho hihavan̈a amy Jehovah ndraiky.” Karaha ty ho Theo: “Vavaka nataondro antipan̈ahy aby io nan̈amia toky zaho fa Jehovah ten̈a tia zaho, avio tsy toetry ratsinaka fo hitandro fa toetry tsaranaka koa.”

Ataova naman̈a iro. Mila naman̈a an̈ivony fiangonan̈a iro olo voaray aby io. Zen̈y raha nambarany antipan̈ahy araiky, Justin an̈arany. Ho izy: “Tahaoma hiaraka hanompo aminao iro, isaka anao mahita fomba han̈anaovan̈a zen̈y. Vangivangia matetiky iro, fotony naman̈a ny raha ten̈a ilaindro.” Karaha ty koa ho antipan̈ahy araiky hafa, Henry an̈arany: “Izikoa antipan̈ahy miezaka hinaman̈a amindro voaray aby io, ho hitanolo hafa an̈ivony fiangonan̈a raha zen̈y, ke halaindro tahaka koa.”

Ampianara mianatra iro. Kristianin̈y matotro afaka man̈ampy olo voaray ho zatra mianatra manokan̈a. Karaha ty ho Darko, antipan̈ahy izio: “Farandraha tiako eky mikoran̈a amindro hevitry mampahery hitako tamy fianaran̈a manokan̈a nataoko. Hazavaiko amindro antony itiavako mianatra Baiboly, baka io mangala lahatsoratra araiky zaho ianarako miaraka amindro.” Karaha ty koa ho Clayton, antipan̈ahy koa izy: “Nampirisihiko iro handiniky tantaranolo amy Baiboly, mitovitovy amy raha niain̈ana tamindro, baka io nirahiko nangala fianaran̈a baka tamy zen̈y iro.”

Aboaha fa anao ten̈a piambin̈y ondrikondriky ankitin̈y. Andraikitrinaro amy maha pitsara fo ny raha farany azonolo vo voaray onon̈o. Fa izioty ndraiky, mila hitandro fa piambin̈y ondrikondriky anaro. (Jer. 23:4) Tandrin̈esa tsarabe iro izikoa fa mivolan̈a, baka io aza misalasala midera iro. Mikoràn̈a matetiky amindro. Antipan̈ahy i Marcus. Karaha ty fataony lera izy man̈ano fitsidihan̈a ondry: “Zahay koa fa baka mikoran̈a hevitry amy Baiboly amindro, derainay iro. Amezanay toky iro fa ravoravo mare zahay, avio ravoravo koa Jehovah mahita iro niezaka mare nimpody aminany. Alohany zahay hody, koran̈inay amindro ombian̈a koa zahay hitsidiky iro.”

a Nivoan̈a an̈aranolo amy lahatsoratra ty.