‘Pan̈arivo Famindrampô’ Jehovah Zan̈aharintsika

1. Karakory ma olo mamindra fô zen̈y?

KARAKORY ma olo mamindra fô zen̈y? Mety ho avy amy jerinao donko olo tsara fan̈ahy, mitepô olo, mahay mahinakinaka, baka io tsy matity. Mety ho azonao onon̈o koa donko tantarany Samaritanin̈y tsara fan̈ahy nikoran̈iny Jesosy in̈y. Nahinakinaka lelahy samaritanin̈y io izikoa fa nahita Jiosy araiky nitafihinolo. Samby isany tany faviandro, fa izy nitepô Jiosy maratra io fo. Nikarakarainy tsara lelahy jiosy io, ziska izy janga. (Lioka 10:29-37) Ino toetry tsarany Jehovah hitantsika baka amy tantara io? Famindrampô. Mamindra fô amintsika fo Jehovah isanandra, fotony tiany atsika. Alô zahavantsika fomba han̈anaovany zen̈y.

2. Ino koa fomba hafa mety han̈aboahan̈a famindrampô?

² Misy fomba hafa koa mety han̈aboahan̈a famindrampô. Ohatra iziô misy olo araiky tokony hisazian̈a, olo araiky mamindra fô mety hanapakevitry tsy han̈asazy izy. Karaha zen̈y tsarabe ataony Jehovah amintsika. Karaha ty volan̈iny panoratra Salamo araiky: “Izy tsy mamaly atsika eraka fahotan̈a vitantsika.” (Sal. 103:10) Amy fotoan̈a hafa ndraiky, mety hisaziany Jehovah mare olo araiky nan̈ano fahotan̈a.

3. Ino aby fan̈ontanian̈a hidinihintsika ato?

³ Hamaly fan̈ontanian̈a telo aby ty atsika amy lahatsoratra ty ato: 1) Nan̈ino Jehovah mamindra fô? 2) Akory mety han̈aboahan̈a famindrampô lera man̈anatra na man̈itsy olo? Baka io, 3) ino raha han̈ampy atsika hamindra fô? Alô zahavantsika akory hamaliany Volan̈a Zan̈ahary fan̈ontanian̈a aby io.

NAN̈INO JEHOVAH MAMINDRA FÔ?

4. Nan̈ino Jehovah mamindra fô?

⁴ Jehovah foeky tia mamindra fô. Apostoly Paoly nanoratra fa Zan̈ahary io ‘pan̈arivo famindrampô.’ Nan̈azava izy taminio fa mamindra fô amindro voahosotro aby io i Jehovah, fotony namezany fan̈antinan̈a hiain̈y andan̈itry fo iro, ndray iro tsy lavorary. (Efes. 2:4-7) Kanefa, tsy iro fo namindrany Jehovah fô fa olo jiaby koa. Karaha ty ho Davida amy Salamo 145:9 ao: “Jehovah tsara fan̈ahy aminolo jiaby, ary hita aminy asanany jiaby fa izy mamindra fô.” Ten̈a be fitiavan̈a i Jehovah, ke mitady fomba han̈aboahan̈a famindrampô fo izy, isaka izy mahita antony han̈anaovan̈a zen̈y.

5. Akory nahaizany Jesosy fa Jehovah mamindra fô?

⁵ Tsisy olo mahay Jehovah mandilatra Jesosy. Hainy Jesosy fa Jehovah tia mamindra fô. Iro roe mianaka baka efa niaraka efa ela be tandan̈itry tan̈y, talohany naviany Jesosy tambony tany teto. (Ohab. 8:30, 31) Matetiky foeky Jesosy nahita Babany io namindra fô taminolombelon̈o panota. (Sal. 78:37-42) Ke Jesosy koa fa nampianatra, matetiky izy nikoran̈a momba toetriny Jehovah io.

6. Ino fan̈oharan̈a nampiasainy Jesosy han̈aboahan̈a fa Jehovah Babany io ten̈a mamindra fô?

⁶ Nandiniky fan̈oharan̈a momba zanaka adala atsika tamy lahatsoratra talohany araiky ty. Izin̈y nampianatra atsika fa Jehovah ten̈a mamindra fô. Nialany zanaka adala in̈y tantran̈ony babany, baka io ‘nilanilaniany tamy raha tsisy dikany fanan̈ananany.’ (Lioka 15:13) Tafara, tontohitry izy. Hainy fa ratsy mare raha nataony, ke nanetry ten̈a izy, baka io nody tamy babany tan̈y. Mety niasaloha mare zanaka adala io han̈ano akory fihetsikiny babany koa fa mahita izy. Ho Jesosy: ‘Mbala lavitry izy efa tsinjony babany, ke nahinakinaka mare babany nahita izy. Nilomoay babany nitolon̈o izy, baka io izy nirôfiny tampitiavan̈a.’ Babany tsy nangala baràka izy. Namindra fô taminany izy, ke niraesiny tsara zanany io. Ten̈a be fahotan̈any manafolahy io. Kanefa izy ten̈a nibebaka, ke nambelany babany hadisovan̈anany. Jehovah miran̈a baba be famindrampô io. Hita baka tamy fan̈oharan̈a nataony Jesosy io fa Jehovah von̈ono han̈ambela hadisovan̈a izikoa olo io ten̈a mibebaka ankitin̈y.​—Lioka 15:17-24.

7. Izikoa dinihin̈y fomba an̈aboahany Jehovah famindrampô, nan̈ino atsika mivolan̈a fa ten̈a hendry izy?

⁷ Tsisy olo hendry mandilatra Jehovah. Zay fanapahankevitry ataony, tsy maintsy mahatsara raha niasainy fo. Koran̈iny Baiboly fa “fahendrena baka an̈abo” io ‘be famindrampô ndreky man̈ano ny tsara.’ (Jak. 3:17) Karaha ataony raimandreny mahay raha mahatsara zanany, hainy Jehovah koa fa mahatsara atsika famindrampônany. (Sal. 103:13; Isaia 49:15) Mamindra fô amintsika i Jehovah, ke manjary man̈anten̈a raha tsara atsika, ndray mbala tsy lavorary. Mamindra fô fo izy isaka izy mahita antony han̈anaovan̈a zen̈y, fotony izy ten̈a hendry. Ndray zen̈y, misy limitiny famindrampônany. Izy tsy milefitry aminolo man̈ano raha tsy manjary.

8. Ino raha tsy maintsy atao ndraikindraiky, nan̈ino?

⁸ Ino raha tokony hataontsika izikoa misy panompony Jehovah tsy vôly man̈ano fahotan̈a maventy? Jehovah nan̈iraka Paoly hanoratra karaha ty: ‘Aza mifanerasera aminany.’ (1 Kor. 5:11) Voaroaka tsy ho an̈isany fiangonan̈a olo nan̈ano fahotan̈a io, izikoa izy tsy mibebaka. Fandroasan̈a io ilain̈y, fotony izio miaro lan̈iany piaramanompo tsy mivadiky. Izio koa ahitan̈a fa miezaka ho masin̈y atsika, karaha Jehovah. Fandroasan̈a io koa porofony famindrampôny Jehovah. Mety ho sarotro aminolo sasany han̈eky zen̈y. Asa nan̈ino? Zen̈y raha hidinihintsika iziô.

AMINDRÀN̈A FÔ KE ROASIN̈Y NDRAIKY?

9-10. Koa Hebreo 12:5, 6 zahan̈a, nan̈ino ma atsika mivolan̈a fa fandroasan̈a io porofony famindrampô? Man̈ameza ohatra.

⁹ Malahelo atsika izikoa fa maharen̈y filazan̈a fa “tsy Vavolombelon̈o Jehovah eky” olo araiky haintsika sady tiantsika. Mety ho lôso diniky atsika, tsao mba tsy tokony niroasin̈y aby izy. Matokisa anao fa fandroasan̈a io ten̈a porofony famindrampô. Nan̈ino ma? Fotony hendry sady mamindra fô, avio be fitiavan̈a atsika, izikoa man̈itsy olo araiky tokony hahitsy. (Ohab. 13:24) Ke fandroasan̈a io ma ten̈a man̈ampy olo voaroaka io hiova ndreky hibebaka ankitin̈y? Ia. Maro taminolo efa navy voaroaka nivolan̈a fa ten̈a nahatsara iro fandroasan̈a io. Izio koa ho iro, nampatontohitry iro fa ten̈a ratsy raha nataondro. Ke iro niova, baka io nimpody tamy Jehovah ndraiky.​—Vakia Hebreo 12:5, 6.

¹⁰ Diniha baka ohatra ty. Hitany piambin̈y ondrikondriky araiky fa marary mare ondrikondrikinany araiky, ke mila tahan̈a. Mila asitaka hely izio, ke tsy ho afaka hiaraka amindry namany. Ondrikondriky zen̈y farandraha tia miaraka aminy andiany eky, ke mety hialamboetry mare izio izikoa sarahin̈y amy namany. Hainy piambin̈y ondrikondriky raha zen̈y, fa nasintany fo araiky marary io. Zen̈y ma mivolan̈a fa ratsy fan̈ahy izy? Aha. Hainy fa ondrikondriky io koa tsy nasintany, hifindra aretin̈inany. Tiany piambin̈y io arovan̈a andiany ondrikondriky io ke zen̈y nahavy izy nan̈ano zen̈y.​—Ampiràn̈a amy Levitikosy 13:3, 4.

11. a) Nan̈ino ma olo voaroaka mety ampitovisin̈y aminy ondrikondriky marary? b) Ino raha mbala mety hataonolo voaroaka, avio ino aby fan̈ampian̈a mety ho azondro?

¹¹ Mety ampiran̈iny aminy ondrikondriky marary Kristianin̈y araiky voaroaka, fotony izy marary arapan̈ahy. (Jak. 5:14) Karaha aretin̈y sasany fo, mety hifindra koa aretin̈y arapan̈ahy io. Ke ndraikindraiky, mila asintaka na roasin̈y tsy ho an̈isany fiangonan̈a olo sasany marary arapan̈ahy. Marin̈y fa sazy izio, kanefa fandroasan̈a io fomba an̈aboahany Jehovah fitiavan̈a amy rahalahy ndreky ranabavy tsy mivadiky, an̈ivony fiangonan̈a. Izio koa mety hampatontohitry olo voaroaka fa ratsy ankitin̈y raha nataony, ke hahavy izy hibebaka. Ndray olo araiky voaroaka, mbala mety man̈aton̈o fivorian̈a fo izy, ke afaka mahazo hanin̈y arapan̈ahy ndreky fampahirezan̈a. Izy koa afaka mahazo boky ndreky gazety. Afaka mizaha Tele JW koa izy. Izikoa hitandro antipan̈ahy aby io fa miezaka ankitin̈y izy miova, iro mety han̈amia torohevitry izy tsindraikindraiky baka izy hahavita hihavan̈a ndraiky amy Jehovah, ke ho voaray an̈isany fiangonan̈a.b

12. Izikoa fa misy panota tsy mibebaka, akory an̈aboahany antipan̈ahy fa mamindra fô sady be fitiavan̈a iro?

¹² Ty raha tsy tokony hadin̈antsika: Matoa olo araiky voaroaka, dikanizen̈y izy tsy nibebaka. Hainy antipan̈ahy fa fandroasan̈a zen̈y tsy raha kidikidy, ke tsy maintsy efa nandiniky tsarabe iro alohany hanapakevitry handroaka olo araiky. Jehovah koa fa man̈itsy panomponany, ‘ataony lerany fo.’ Ke tiany hangala tahaka izy iro antipan̈ahy aby io. (Jer. 30:11) Tiandro antipan̈ahy aby io mare koa piaramanompo amindro, ke iro tsy tihan̈ano raha handrobaka fihavanan̈andro rahalahy ndreky ranabavy aby io amy Jehovah foeky. Mamindra fô salakady be fitiavan̈a iro antipan̈ahy aby io, izikoa adosondro tsy ho an̈isany fiangonan̈a antsendriky olo nanota io.

13. Nan̈ino ma Kristianin̈y araiky ta Korinto tan̈y nila niroasin̈y?

¹³ Diniha baka raha nataony apostoly Paoly, izikoa fa nisy panota tsy nibebaka, tamy taonjato voanalohany. Nisy Kristianin̈y araiky ta Korinto nangalatra vadiny babany. Zay raha nampangaroharo ankitin̈y! Hainy Paoly tsarabe didiny Jehovah tamindro Israelita aby io, mivolan̈a karaha ty: ‘Mampibonginy babany lan̈iany lelahy mandry amy vadiny babany. Tsy maintsy vonen̈a iro roeny mamaheliny io.’ (Lev. 20:11) Mazava ho azy fa tsy afaka han̈iraka fiangonan̈a hamono lelahy io i Paoly. Kanefa, nirahiny niroasin̈y lelahy io, fotony nisy vokany ratsy taminolo hafa fitondranten̈a ratsinany. Tsy nampan̈ino piaramanompo sasany foeky fahotan̈a maventy vitany lelahy io.​—1 Kor. 5:1, 2, 13.

14. Akory nan̈aboahany Paoly famindrampô tamy lelahy araiky voaroaka, baka io nan̈ino? (2 Korintianina 2:5-8, 11)

¹⁴ Koa fa nandeha fotoan̈a, ren̈iny Paoly fa niova mare lelahy io. Ten̈a nibebaka ankitin̈y izy! Marin̈y ndraiky fa nangala baraka fiangonan̈a raha tsy manjary nataony in̈y, kanefa karaha ty ho Paoly tamindro antipan̈ahy aby io: ‘Anaro aza sarôtiny loatra. Ambilanaro hadisovan̈anazy, baka io amezanaro korazy izy ... amy zen̈y izy tsy ho tototrony alahelo dila loatra.’ Nahinakinaka lelahy io mare Paoly. Tsy tiany halemy trôko izy, ke hieritreritry fa tsisy varany izy hangataka familankeloko amy Jehovah.​—Vakia 2 Korintianina 2:5-8, 11.

15. Akory han̈aboahany antipan̈ahy fa iro hentitry kanefa mamindra fô?

¹⁵ Tia mamindra fô karaha Jehovah iro antipan̈ahy aby io. Iro hentitry izikoa ilain̈a zen̈y, fa mamindra fô ndraiky iro isaka misy antony mety han̈anaovan̈a zen̈y. Izikoa ndraiky antipan̈ahy tsy man̈asazy olo nan̈ano ratsy, fa milefitry amy raha tsy manjary fo, dikanizen̈y iro tsy mamindra fô. Izio ma antipan̈ahy zaraiky fo mila mamindra fô?

INO RAHA HAN̈AMPY ATSIKA HAMINDRA FÔ?

16. Izikoa Ohabolana 21:13 zahan̈a, hataony Jehovah karakory ma olo tsy mamindra fô aminolo?

¹⁶ Kristianin̈y jiaby mila miezaka mamindra fô karaha Jehovah. Ino antony? Fotony Jehovah tsy mitandren̈y vavakanolo tsy mamindra fô. (Vakia Ohabolana 21:13.) Hay be fa tsy tiantsika izikoa vavakantsika tsy tandrin̈esany Jehovah. Ke zen̈y mahavy atsika mila mitandrin̈y mare tsao manjary manan̈a fô vato. Izikoa fa misy piaramanompo amintsika mijaly, atsika mila von̈ono fo hitandren̈y ‘tretrendro.’ Alaintsika onon̈o fo raha koran̈iny Baiboly ty: ‘Hitsarain̈y tsisy hinakinaka lan̈iany olo tsy mamindra fô.’ (Jak. 2:13) Ho moramora amintsika hamindra fô, izikoa atsika manetry ten̈a ke man̈eky fa ndray atsika koa mba mila famindrampô. Ten̈a mila mamindra fô atsika, intsaka eky izikoa fa misy panota araiky mibebaka, ke mimpody amy fiangonan̈a ndraiky.

17. Akory nan̈aboahany Davida fa ten̈a namindra fô izy?

¹⁷ Misy tantara amy Baiboly ao man̈ampy atsika hahay hamindra fô ndreky tsy hanan̈a fô vato. Ohatra araiky amy zen̈y Panjaka Davida. Matetiky izy namindra fô. Tiany Saoly vonen̈a izy, fa izy namindra fô tamy panjaka voahosotrony Jehovah io fo. Tsy navy tamy jerinany foeky hamaly faty.​—1 Sam. 24:9-12, 18, 19.

18-19. Ombian̈a aby Davida tsy namindra fô?

¹⁸ Ndray izy man̈ano zen̈y, nisy lera Davida tsy namindra fô. Tandraraiky, maramilany Davida koa fa nangataka hanin̈y tamy Nabala, iro tsy vitany tsy namezany hanin̈y fa mbala nitihitihiny koa. Tsy nan̈isy fôtiny iro foeky lelahy ratsy fan̈ahy io. Neloko nifaotafaota i Davida, ke tseky hivoneny i Nabala ndreky lelahy jiaby tantran̈ony Nabala tao. Nakiry Abigaila vadiny Nabala tio. Man̈angy io ten̈a tsara fan̈ahy sady naharidraha. Nan̈ano raha malaky izy beky Davida tsy hamono olo.​—1 Sam. 25:9-22, 32-35.

¹⁹ Tandraraiky, mbala tsy namindra fô koa Davida, izikoa fa nan̈anaovany Natana paminan̈y fan̈oharan̈a. Nivolan̈a Natana fa nisy lelahy pan̈arivo araiky nandrava ondrikondrikiny jiraninany. Masikiny lelahy io; tiany mare ondrikondrikinany io. Neloko mare Davida, ke ho izy: ‘Izikoa mbala velon̈o koa Jehovah, vain̈y maty olo nan̈ano raha zen̈y.’ (2 Sam. 12:1-6) Hainy Davida tsarabe Lalàn̈any Mosesy mivolan̈a fa lan̈iany olo mangalatra ondrikondriky araiky tokony han̈efa ondrikondriky efatra. (Eks. 22:1) Kanefa, Davida direkty nivolan̈a fa vain̈y maty olo io. Zay siaka! Nampiasa fan̈oharan̈a io i Natana hampatontohitry Davida fa ratsy raha nataony. Akory nataony Jehovah? Ten̈a namindra fô tamy Davida izy, fa tsy nan̈ano karaha nataony Davida tamy pangalatra tamy fan̈oharan̈any Natana in̈y.​—2 Sam. 12:7-13.

20. Ino ma raha ianarantsika baka amy Davida?

²⁰ Asa azonao onon̈o, Davida koa fa neloko mare, direkty izy fa mila hamono Nabala ndreky olonany. Tafara, nanjary nasiaka mare taminolo tamy fan̈oharan̈any Natana in̈y koa izy. Asa nan̈ino Davida nan̈ano raha karaha zen̈y kanefa izy olo mba tsara fan̈ahy? Hamaliantsika zen̈y, diniha baka raha nandalo. Davida taminio ninjehiny eritreritry mare. Hita baka amy zen̈y fa, matoa olo araiky masiaka avio hentitry mare izikoa fa mitsara olo, dikanizen̈y, efa tsy milamin̈y fifandraisan̈anany amy Jehovah. Ke zen̈y nahavy Jesosy namepetry pianatranany karaha ty: “Aza mitsara olo eky baka anaro tsy hitsarain̈a. Fotony arakaraka fomba itsaranaro olo, hitsaran̈a anaro; avio arakaraka eran̈andraha ampiasainaro, han̈iran̈ana anaro.” (Mat. 7:1, 2) Ke mila mitandrin̈y atsika baka tsy ho hentitry loatra, fa ho ‘pan̈arivo famindrampô’, karaha Jehovah Zan̈aharintsika.

21-22. Ino aby fomba mety han̈aboahantsika famindrampô?

²¹ Famindrampô zen̈y tsy raha amy vava fo. Olo mamindra fô zen̈y tsy vitany mahinakinaka mahita raha mahazo olo fo, fa mitady fomba han̈ampian̈a izy koa. Mety dinihintsika, ohatra, ino raha ilainy fianakavian̈antsika, na piaramanompo amintsika, avio olo man̈odidin̈y atsika. Asa azovy olo hainao fa kivy, ke mila fampaherezan̈a? Tsao mba misy raha mety ataonao han̈ampian̈a izy, ohatra man̈amia hanin̈y izy na raha hafa iritriretintsika fa mety ilainy. Mety misy olo vo voaray amy fiangonan̈anaro, ke mila naman̈a hankahery. Mitory vaovao tsara aminolo jiaby koa atsika, fotony hafatra toriantsika io ten̈a mamelombelon̈o. Araiky amy fomba ten̈a tsara mety han̈aboahantsika famindrampô aby izy hitantsika tio in̈y.​—Joba 29:12, 13; Rom. 10:14, 15; Jak. 1:27.

²² Hahita fomba maro han̈aboahan̈a famindrampô atsika, izikoa mandiniky raha mety ilainolo. Atsika koa mamindra fô, ho ravoravo Jehovah Babantsika andan̈itry an̈y, fotony izy ‘pan̈arivo famindrampô.’