Michan’uy e Rayog ni Nge Thiliyeg e Yafos Rom

“RI rayog ni ngam nameg ni ngam rin’ e tin nib fel’ ni yugu aram rogon ndariy Got rom.” Ereram e pi thin ni yog be’ ni agnostic. Ke yog ni ke ayuweg e pi bitir rok ni ngar nameged ni ngar rin’ed e ngongol nib fel’, ma aram kar yodoromgad ni ngar ayuweged e pi bitir rorad​—ma kan rin’ ni yugu aram rogon ni dariy e michan’ rorad ku Got.

Ere mang, biney e be dag ni de t’uf ni nge michan’uy ngak Got fa? Ba gagiyel ni aram rogon e lem rok e cha’ nem. Ma ba riyul’ ni gubin e girdi’ nde mich Got u wan’rad e gathi yad e girdi’ nib kireb. I weliy apostal Paul u murung’agen e “piin ni gathi yad piyu Israel” ndar nanged Got machane “yad ra ngongliy e tin ni be yog e Motochiyel ni yad e sum u lanin’rad ni ngar ngongliyed, ma aram e kar manged ba motochiyel ngorad.” (Roma 2:14) Gubin e girdi’​—nib muun ngay e piin ni agnostic—​e kan gargelegrad ni bay e nangan’ rorad ni yugu aram rogon nde mich Got u wan’rad ni ir fa en ni ke ta’ nga lanin’rad ngar nanged e tin nib fel’ nge tin nib kireb ban’en.

Machane, michan’ nib mudugil ku Got​—ni ba m’ag ko Bible—​e kab gel gelngin ni ngan rin’ e tin nib fel’ ko nangan’ nda ni pow’iy. Michan’ ni ba m’ag ko Thin rok Got e ma ayuweg e nangan’ ni nge nang e tin nib mat’aw ko tin nib kireb. (Hebrews 5:14) Maku, michan’ e ma ayuweg e girdi’ ni ngar rin’ed e tin nib mat’aw ko ngiyal’ nra yib e skeng ngorad. Ya amu lemnag nap’an e bin 20 e chibog, ni ke par e pi nam u tan pa’ e piin nib kireb ni kar towasariyed e piin nib fel’ ngar rin’ed e tin kireb. Machane, piin ni michan’rad ku Got e kar dabuyed ni ngar paged e tin nib fel’, ni mus ko ngiyal’ ni ngan li’rad ngar m’ad. Michan’ ni ba m’ag ko Bible e rayog ni nge yal’uweg e girdi’. Rayog ni nge ayuweg e girdi’ ni dariy fan e yafos rorad me pow’iyrad ni ngar siyeged e oloboch. Aram rogon boch e girdi’ ni baaray.

Michan’uy e Rayog ni Nge Ayuweg e Yafos ko Tabinaw

“Bochan e michan’ romew ma kam rin’ew ban’en ni baga’ ni dabiyog ni ngan rin’.” Aram rogon ni yog reb e tapuf oloboch nu England ko ngiyal’ ni ke turguy ko mini’ e ra un e bitir rok John nge Tania ngak. Nap’an ni ke tamilang e magawon ngak girdien e am, ma dawori un John nge Tania ko mabgol ma ba wagey e yafos ko tabinaw rorow. Ke mecham John ko drug ma i un ko gamble, ma aram me un ko bugel ni nge yog e salpiy ngak ko tin kireb ban’en ni ke mecham ngay. De ayuweg e pi bitir rok nge nina rorad. Ere mang e “maang’ang” ni ke m’ug?

U reb e rran, ke rung’ag John ni be weliy fak walagen u murung’agen Paradis. Kan pug e tafinay rok, me ere ke fith boch e deer ngak e gallabthir rok fare tir. Gallabthir rok fare tir e yow e Pi Mich Rok Jehovah, ma kar ayuwegew John ni nge nang murung’agen e paradis u Bible. Munmun, ma pi n’en nu Bible e ke mich u wan’ John nge Tania me ayuweg e yafos rorow. Kar unew ko mabgol u court mar pagew e ngongol nib kireb ni kar mechamgow ngay. Nap’an ni ke yan girdien e am ni ngar yaliyed e yafos ko tabinaw rorow ma kar guyed ban’en ndabiyog ni ngar guyed faram​—reb e tabinaw nib falfalan’ ma ba klin e naun, nge reb e tabinaw nrayog ni nge ayuweg e pi bitir riy ngar ilalgad. Ke sorok fare tafpuf oloboch ni ke yog ni aram e “maang’ang” ni ke pat John nge Tania ko bin nib biech e michan’ rorow.

Bokum i biyu’ e mayil u England, ma ke chugur ni nge buch ban’en nib kireb ngak reb e ppin u Ngek. Ke dugliy ni nge un ngak bokum i million e girdi’ u gubin ni yad ma n’ag e mabgol rorad u gubin e duw. Bay reb e bitir rok, machane pumoon rok e kab ilal ngak. Ma arfan ni ke yog e girdi’ rok ni nge pag e mabgol rok, ma aram ke fl’eg rogon ni nge rin’. Machane, ke un ko fol Bible ku reb e Mich Rok Jehovah. Nap’an ni ke rung’ag fare Mich rok Jehovah u murung’agen e magawon rok, me weliy boch e thin nu Bible u murung’agen e mabgol ngak​—ni bod, ni mabgol e aram e tow’ath rok Got ma susun ni dab ni n’ag. (Matthew 19:4-6, 9) Ke lemnag fare ppin, ‘Ba mit rogon e re ppin ney ya ir be’ nde nangeg ma be guy rogon ni nge ayuweg e tabinaw rog ni nge par u taabang ma pi fager rog e yad baadag ni nggu n’ag e mabgol rog.’ Michan’ rok ni kan fil ngak e ke ayuweg ni nge dabi n’ag e mabgol rok.

Ma ban’en nib m’ag ko yafos ko tabinaw ni ke kireban’uy ngay e ngan li’ e bitir ni ka bay u meyal’. Reb e report ni ke pi’ e United Nation e be sumarnag ni gonap’an 45 million e bitir ni yim li’ u meyal’ u gubin e duw. Gubin ngiyal’ ni ngan li’ reb e bitir u meyal’ e ba ngiyal’ ni nge kireban’uy ngay. Thin nu Bible ni ke tamilang u wan’ reb e ppin u Manile e ke ayuweg ni nge siyeg i li’ e bitir u meyal’ rok.

Ke mada’nag fare ppin e Pi Mich Rok Jehovah, me fel’ u wan’ ni nge fil e brochure ni Mang e Ba T’uf ni Ngad Rin’ed Ku Got?,a ma aram me fil e Bible. Ke yan in e pul, me weliy ko mang fan ni ke un ko fol Bible. Ke diyen fare ppin ko ngiyal’ ni ke yib e Pi Mich Rok Jehovah, machane kar dugliyew e pumoon rok ni yira li’ e bitir u meyal’ rok. Machane fare sasing ko reb e bitir ndawor ni gargeleg ni bay ko page 24 ko fare brochure e ke taw nga gum’erchaen fare ppin. Pi thin ko Bible riy e ke tamilangnag ni ba thothup e yafos ya ‘tapgin e yafos e Got’ me suruy laniyan’ ni dabi pag ni ngan li’ e bitir u meyal’ rok. (Psalm 36:9) Chiney ma ir reb e matin ko reb e madway nib gel mab pidorang.

Michan’uy e Ma Ayuweg e Girdi’ ni Yima Sap Nga But’ Nga Dakenrad

U Ethiopia, l’agruw e pumoon nib gafgow ko mad’ e kar uned ko muulung ni ke tay e Pi Mich Rok Jehovah. Tomren e muulung ma ke yan reb e Mich Rok Jehovah ni nge mada’nagrow. Fagali pumoon nem e kar ningew ban’en. Fare Mich Rok Jehovah e ke pi’ ban’en ngorow, ngathi salpiy, machane ban’en ni kab fel’. Ke pi’ e athamgil nga lanin’row ni nge mich Got u wan’row, ya aram “ban’en ni kab tolang puluwon ko gol.” (1 Peter 1:7) Bagayow e ke motoyil ngak me un ko fol Bible. Ke thil e yafos rok. Nap’an ni ke gel e michan’ rok, ke pag e tamagow, ta muun rum, ngongol nde yalen, nge khat (ni aram mit e drug ni yima mecham ngay). Ke fil rogon ni nge ayuweg ir me pag e taman ma chiney e be par nib klin mab madangdang.

U Italy ma kan turguy ni nge par reb e pumoon ni 47 e duw rok nib kalbus ko ragag e duw min tay nga lan e psychiatric aspital. Reb e Mich Rok Jehovah ni bay rogon ni nge yan nga lan e kalbus ni nge ayuweg e girdi’ ko tirok Got ban’en e ke fil e Bible ngak. Ba machreg ni ke mon’og iyan. Ke thil e yafos rok ni bochan e michan’ rok ma aram me ning yugu boch e kalbus e ayuw rok nga rogon ni ngar pithiged e pi magawon rorad. Pi polis u lan e kalbus e kar ted fan, mar pagedan’rad ngak ni bochan e michan’ rok.

De n’uw nap’an faram ma ke weliy e simbung u murung’agen e pi mahl u Africa. Kan k’aring e marus ko pi thin ni ke weliy murung’agen e pi pagal ni kan fil rogon e salthaw ngorad. Yima chingnagrad ko drug, min pirdiyrad, min towasariyrad ni ngar rin’ed e tin nrib kireb ngak girdien e tabinaw rorad ni fan ni nge tamilang u wan’rad ni ke mus ni yad ra yul’yul’ ko fare ulung ni yad be cham riy. Michan’ ko thin nu Bible e rayog ni nge thiliyeg e yafos rok e pi pagal nem fa? Arrogon ko l’agruw e pagal.

U Liberia, ke maruwel Alex ko altar u lan e Galesiya ko Katolic. Machane nap’an ni ke 13 e duw rok, me un ngak reb e ulung ni be togopuluw ko am me mang reb e salthaw nrib kireb e ngongol rok. Ke un ko pig ni fan ni dabi rus ko cham. Ke guy Alex boor e fager rok ni kar m’ad, machane ka ir ba fas. Nap’an e 1997, ke mada’nag e Pi Mich Rok Jehovah me tamilang u wan’ ni dar sapgad nga but’ nga daken. Ya kar ayuweged ir nge tamilang e pi n’en ni be yog e Bible u murung’agen e cham u wan’. Ke chuw Alex ko salthaw. Ma nap’an ni ke gel e michan’ rok, me fol ko fare thin nu Bible ni be tay chilin: “Thingari pi’ keru’ ko tin nib kireb nge rin’ e tin nib fel’, ma thingari gayiy e gapas ngii par riy.”​—1 Peter 3:11.

U taab ngiyal’, ma reb e pagal ni Samson fithingan ni reb salthaw kafram e ke yan nga donguch ni ma par Alex riy. Ma yon’ e tang ko choir machane nap’an e 1993 ke mang reb e salthaw me un ko drug, pig, nge ngongol nde yalen. Nap’an e 1997 ma kan pag ko salthaw. Be yan Samson nga Monrovia ni fan ni nge un ko reb e ulung i salthaw machane ke suruy reb e fager rok laniyan’ ni nge un ngak e Pi Mich Rok Jehovah ko fol Bible, ma aram rogon ni ke mich u wan’ e thin nu Bible. Re n’ey e ke ayuweg ni dabi rus ni nge pag e ngongol ko mahl. Chiney, Alex nge Samson e yow be par nib gapas ma yow be ngongliy e ngongol nib mat’aw. Ere mang, bay yugu ban’en ni gathi michan’ ko thin nu Bible nrayog ni nge thiliyeg e yafos rok e girdi’ ni kan gafgownagrad?

Michan’uy ni Ba Mat’aw

Pi girdi’ ney e yad boch ko boor e girdi’ ni be micheg ni ba gel gelngin e michan’uy ko thin nu Bible. Dabi siy ni gathi gubin e girdi’ ni ke mich Got u wan’rad e yad ma fol ko pi motochiyel rok Got. Ma boch e girdi’ nde mich Got u wan’rad e kab fel’ e ngongol rorad ko girdi’ ni yad ma yog ni yad e pi Kristiano. Aram rogon ni bochan e michan’ ko thin nu Bible e gathi ke mus ni nge mich Got u wan’.

Yog apostal Paul nra nge michan’dad ma “aram e ke pagan’dad ngay, ma ke michan’dad ko pi n’en ndarid guyed nga owchedad.” (Hebrews 11:1) Ere, ra nge michan’um ma ba t’uf ni nge pagan’um​—ko pi n’en ndarmu guy. Maku ba l’ag ngay ndariy e maruwar u wan’um ni bay Got, ma baadag ni nge ayuwegdad, ma ra flaabnag e girdi’ ni yad be rin’ e tin nib m’agan ngay. Maku i yog e apostal ni gaar: “En nra yib ngak Got e thingari mich u wan’ ni ba’ Got ma ra tow’athnag e piin ni yad be gayiy Got.”​—Hebrews 11:6.

Michan’ ni aram rogon e ke thiliyeg e yafos rok John, Tania, nge yugu boch e girdi’. Ke ayuwegrad ni nge pagan’rad ko Thin Rok Got, ni Bible, me ayuwegrad ngar dugliyed e tin nib fel’. Ke ayuwegrad ni ngar paged farad boch ma dar mel’eged e kanawo’ nib mom, ni aram e kanawo’ nde mat’aw. Gubin ban’en ni buch ngak e girdi’ e ba thil, machane taareb rogon ni ke tabab urngin. Reb e Mich Rok Jehovah e ke fil e Bible ngorad, ma kar guyed ni ba riyul’ e thin ko Bible ni be gaar: “Thin rok Got e ba fos ma ba’ gelngin ni ma maruwel.” (Hebrews 4:12) Gelngin e Thin Rok Got e ke ayuweg e girdi’ ni ngar ubunged e michan’ nib gel ni ke thiliyeg e yafos rorad nge yan ko kanawo’ nib fel’.

Be maruwel e Pi Mich Rok Jehovah u 230 e nam nge dunguch u fayleng. Yad be piningem ni ngam un ko fol Bible. Ko mang fan? Ya yad manang ni michan’ ko thin nu Bible e ku rayog ni nge ayuweg e yafos rom.

[Footnote]

[Pictures on page 3]

Michan’ ko thin nu Bible e ma thiliyeg e yafos rok e girdi’ nge yan ko kanawo’ nib fel’