Fare Gelngin e Meybil

Ke chuchugur ni nge aw e yal’ ko mach ni Nahor u Middle East. Fa en ni Eliezer fithingan ni ir be’ ni pumoon nu Syria e ke yib nga reb e luwed nga wuru’ e re mach nem ni be fek ragag e kamel. Dariy e maruwar riy ni ke magar ma ke yib e belel ngak, machane ri ma lemnag Eliezer e n’en ni bat’uf rok yugu boch e girdi’. Ke yib u yugu reb e binaw ni nge gay reb e ppin ni nge leengiy fak e masta rok. Maku, thingari gay e re ppin nem u fithik’ i pi girdien e masta rok. Uw rogon ni nge lebuguy e re maruwel rok nem nib mo’maw’?

BA mich uwan’ Eliezer ni ba gel gelngin e meybil. Bochan nbay e michan’ rok nib thil, ni bod e bitir, me meybil u fithik’ e sobut’an me ning ban’en ku Got ni gaar: “Jehovah ni Got rok e masta rog i Abraham, mu ayuwegeg e daba’ ni nge yog ngog e tin ni ku gubnag ma ga ta’ nga tagil’ e tin ni kam mog ngak e masta rog ni bay mu rin’ ngak. Gub aray ko fare luwed ni erera’ e gin ni bay yib e pi rugod ko re binaw ney ngay ni ngar linged e ran. Ma n’en ni thingari buch e aram e bayi lungog ngak ba rugod, ‘Wenig ngom, mu sigreeg e rume’ rom buchuw nggu unum e ran riy,’ ma en ni ra yog ngog ni gaar, ‘Mu unum, mu ku gu pi’ e ran i unum e kamel rom,’ ma aram e ir e en ni kam turguy ni nge leay e tapigpig rom i Isak; ma aram e kug nang ni kam ta’ nga tagil’ e tin ni kam mog ngak e masta rog.”​—Genesis 24:12-14, New World Translation.

Ma pagan’ Eliezer ko gelngin e meybil ni ke tay ni de aw nib m’ay fan. Mang fan ni fare ppin ni som’on ni ke yib ko fare luwed e ir bin bitir ko bitir rok walagen Abraham! Ma fithingan e Rebekah, ma dawori un ko mabgol, mab fel’ e gafarig rok, me ir e ppin ni pidorang. Ma gathi ke mus ni ke pi’ ngak Eliezer e ran ngar unum ya ki yog ni ku ra pi’ ko pi kamel rok boch e ran ni ngar unumed urngin ni yad ba adag. Me munmun, u tomren ni ke non Rebekah nge girdien e tabinaw rok, ma aram me magan’ ngay ni nge un ku Eliezer nga ranow ko gin nib palog ni ngar mabgolgow Isak ni fak Abraham. Rib tamilang ni kan fulweg taban e meybil ni ke tay Eliezer ko ngiyal nem kakrom ni yu ngiyal’ e ma dag Got gelngin ni nge fal’eg boch e maangang!

Boor ban’en ni gadad ra fil ko meybil ni ke tay Eliezer. I dag riy gel e michan’ rok, mab sobut’an’, ma ma lemnag e n’en nib t’uf rok yugu boch e girdi’ ni dariy e lem nib siin riy. Maku ke dag Eliezer ko re meybil ni ke tay nem ni ma tay fan e kanawo’ rok Jehovah ko uw rogon ni ma ayuweg e girdi’. Ma dariy e maruwar riy ni manang Eliezer nib fel’ Abraham uwan’ Got nge fare n’en ni Ke micheg ni nge yib e taw’ath ngak urngin e girdi’ u daken Abraham. (Genesis 12:3) Arfan, ni ke tababnag Eliezer e meybil rok ko fapi thin thin ni gaar: “Jehovah ni gur fare Got ko masta rog.”

Jesus Kristus e ir fare owchen Abraham ni yira taw’athnag urngin e girdi’ nib mat’aw u daken. (Genesis 22:18) Faanra gad baadag ni ngan fulweg taban e meybil rodad ko ngiyal’ ney, ma thingarda daged ni gad be tayfan u fithik’ e sobut’an’ e kanawo’ rok Got u rogon ni be ayuweg e girdi’ u daken Fak. Ke gaar Jesus Kristus: “Faanra mpired u fithik’ag, me par e thin rog u fithik’ i lanin’med, ma aram e gimed ra ning e tin ni gimed ba adag, min pi’ ngomed.”​—John 15:7.

Reb i gachalpen Kristus ni ke guy ko uw rogon ni ke riyul’ e pi thin rok Jesus nem ngak e aram Paul ni apostal. Fare pagan’ ko gelngin e meybil ni dag Paul e de aw nib m’ay fan. I pi’ e athamgil nga laniyan’ e pi Kristiano ni ngar weliyed urngin e magawon rorad ngak Got u daken e meybil me gaar: “Demtrug e mit i n’en ni gu ra mada’nag ma ba’ gelngig ni bochan fa en ni ma ayuwegeg.” (Philippians 4:6, 7, 13, NW) Ere be dag e re n’ey ni urngin e n’en ni ke ning Paul ngak Got u daken e meybil e kan pi’ ngak? Ngada guyed.

Gathi Urngin Ban’en ni Yima Ning e Yira Pi’

Nap’an ni be un Paul ko machib, ma ke yib ngak e magawon ni yima yog ni “ba liliy nib gel e amith riy.” (2 Corinthians 12:7) Sana aram e kireban’ ni ke yib ngak ni bochan fare n’en ni ke rin’ a piin ni tatogopuluw nge piin ni “yad be dake yad e pi walag.” (2 Corinthians 11:26; Galatians 2:4) Ara sana riyul’ nfan ko dowef ni bod e m’ar u lan owchey ni be amith. (Galatians 4:15) Demtrug ko mang e re nem, fare “liliy nib bagel e amith riy” e be warnag Paul iyan. Ke yoloy ni: “Nga dalip yay ni kug meybil ngak Somol u murung’agen e re n’ey ni gu be wenig ngak ni nge chuweg rog.” Machane, dan pi’ ngak Paul e n’en ni ke ning. Kan weliy ngak Paul ni kan pi’ ngak e taw’ath ni yib rok Got ni aram e taw’ath ni bay angin ma ba gaman, ni bay gelngin ni nge k’adan’ ko skeng ni ra yib ngak. Maku, ke yog Got ngak ni gaar: “Ya gelngig e rib gel ko ngiyal’ ni gub meewar.”​—2 Corinthians 12:8, 9.

Mang e n’en ni kad filed ko n’en ni ke rin’ Eliezer nge Paul? Riyul’ ni ma motoyil Jehovah ko meybil ni ma ta’ e piin ni ba sobut’an’rad ma yad be athamgil ni ngan pigpig ngak. Machane de dag e re n’ey ni nge pi’ Got urngin ban’en ni kan ning ngak u gubin ngiyal’ ya ma guy Got ban’en nib palog nga m’on. Ma ka ba gonop Got ngodad ni manang ko mang e n’en ni rib fel’ ngodad. Ma ban’en ni ri baga’fan, e baaray ni gubin ngiyal’ e ma rin’ Got ban’en nib muun ngay e tin nib m’agan’ ngay ni kan yoloy nga lan e Bible.

Ngal’an ni Ngan Golnagey Ko Tirok Got

Ke micheg Got ni nge golnag urngin e m’ar ko girdi’ ko dowef, nge laniyan’uy, nge gafarig u nap’an e gagiyeg rok Fak u fayleng u lan Bbiyu’ e Duw. (Revelation 20:1-3; 21:3-5) Piin Kristiano nib yul’yul’ e yad be sonnag e re n’ey u fithik’ e falfalan’ ni nge yib nga m’on, ni be pagan’rad ku Got u polo’ i gum’ercha’rad ni bay gelngin ni nge rin’ e tin ni ke micheg. Der ma lemnag ni nge yib e maangang ni aram rogon e ngiyal’ n’ey, machane yad ma meybil ku Got ni nge fal’eg laniyan’rad ma nge pi’ gelngirad ni ngar gel ko pi skeng ni ma yib ngorad. (Psalm 55:22) Faanra ke yib e m’ar ngorad, ma ku yad ma meybil ko Got ni nge pow’iyrad ni ngar pirieged e falay nib fel’ ni ku rayog ni ngar pied puluwon.

Bay boch e teliw ni ma pi’ e athamgil nga laniyan’ be’ nib m’ar ni ngar meybil gad ni ngan golnag e m’ar rorad e chiney, ni yad be lemnag ni bod ni ke golnag Jesus nge pi gachalpen e piin nib m’ar kakrom. Machane pi maangang nem ni kan ngongliy e ri bay ban’en ni fan. Pi n’em e ke micheg ni Jesus Kristus e ir fare Messiah nib riyul’ ku be dag e pi n’em ni ke chuw Got ko nam nu Israel min thiliyeg e par nge ulung ko piin Kristiano ni kefin ni tababnag. Ngiyal’ nem, ma bat’uf e pi maangang ni nge gel e michan’ ko re ulung ko Kristiano nem nib biech. Nap’an ni fare ulung ko Kristiano ni kab bitir kafram e ke sak’iy ni goo ir me munmun ma ke ilal, ma fare maangang nib tawath e “ra mus.”​—1 Corinthians 13:8, 11, NW.

Re tayim ney ni baga’ fan, e be pow’iy Jehovah pi tapigpig rok ni ngar uned ko maruwel ni ngan golnag e girdi’ ko m’ar rorad nib spiritual. Bochan ni ka bay e tayim rorad, ma thingara folgad ko fapi thin ni be piningrad ni be gaar: “Gimed e girdi’, mu chelgad ngak Jehovah e chiney ni ba’ ni kab chugur ngomed. Piin nib kireb e ngongol rorad e ngar paged, mi yad thiliyeg rogon e lem ni yad be tay; ma ngar chelgad ngak Jehovah, ni Got rodad, ya ri ma runguy e girdi’, ma ba gur ni nge n’ag fan ban’en uwan’.”​—Isaiah 55:6, 7.

Kan golnag boch e girdi’ ko m’ar rorad ni spiritual ni bochan fare maruwel ni ngan machibnag e thin nib fel’ u umurung’agen Gil’ilugnun Got ni yibe rin’ e ngiyal’ n’ey. (Matthew 24:14) Ma bochan ni Jehovah e ke pi’ gelngin e pi tapigpig rok ni ngara rin’ed e re maruwel ney ni be ayuweg e yafas ko girdi’, ma aram ma ke ayuweg bokum milyon e girdi’ ko urngin e nam ni ngara kalgadngan’rad ko denen rorad ma ra fel’ thilrad Got u m’on ni nge m’ay e re m’ag n’ey ni ba kireb. Urngin e piin ni ma meybil ku Got ni fan ko re maruwel ney u fithik’ e yul’yul’ nge urngin e piin ni ma meybil ni nge ayuwegrad ni ngara rin’ed e re maruwel n’ey e ba mutrug ni kan fulweg taban e meybil rorad.

[Picture Credit Line on page 3]

Eliezer nge Rebekah/​The Doré Bible Illustrations/​Dover Publications