Michan’ Ni Riyul’ Ku Rayog Fa?

“Michan’ e ban’en nib fas, nib pagan’ ni der ma rus u fithik’ e wurengan’ u wan’ nge t’ufeg rok Got, ni rib riyul’ ma ba mudugil ni ani ke michan e ra pi’ e yafas rok nga daken ni bokum biyu’ yay.”​—MARTIN LUTHER, 1522.

“Ba chugur ni nge urngin ban’en ni yima lemnag ma gadad ma lemnag ni lem ko fayleng ma aram e michan’ ko Kristiano e baga’ ni be math i yan.”​—LUDOVIC KENNEDY, 1999.

RAGON ni yibe guy e mich riy e ke thilthil. Kafram, ma michan’ ngak Got e aram e bin nib ga’ ni immoy. Ma ngiyal’ ney, u ba fayleng ni dabiyog i pagan’uy riy ngab n’en nge gafgow, ma aram e fa bin riyul’ e michan’ ngak Got nge Bible e ba pay ni be m’ay nga bang.

Bin Riyul’ e Michan’

Boor e girdi’ ni ma lemnag ni, “michan’” e kemus ni nge mich u wan’um barba’ e teliw fa muun nga boch e yalen ko liyor riy. Ma rogon ni be fanay e Bible, e demtrug rogon, ma “michan’” e aram kenggin i fan ni nga rim pagan’um​—ni polo’, ni dabi rur e pagan’ rom ngak Got nge pi n’en ni ke micheg. Aram reb e ngongol ni ir e ma gagiyelnag pi gachalpen Jesus Kristus.

Bay ba ngiyal’, ni weliy Jesus Kristus rogon fani t’uf ni nga un meybil “ma dabni tal.” Ma nap’an ni yodorom me fith reb e deer u rogon e bin riyul’ e michan’ ko kura immoy ko tirodad ney e rran fa? ra ni immoy ko tirodad ney e rran. Me fith reb e deer ni gaar: “Nap’an ni ra taw e en fak e girdi’, ma gur ku rayog ni pirieg e mit ney e michan’ u fayleng?” Mang fan ni fith e binem e deer?​—Luke 18:1, 8, New World Translation, footnote.

Michan’ ni Ke Mul

Boor ban’en ni rayog ni nge buch ko girdi’ mar paged e michan’ ni bay rorad. Pi n’eney e ba muun ngay e maadad nge gafgow ko yafas ni gubin e rran. Professor Michael Goulder, immoy ni ba padrey u reb e galesiya, u Manchester, England, u nap’an fa ngiyal’ nem ko 1958 u Munich ni faani kireb ba sikoki riy nge mul nga but’, ni boor girdien e Manchester United football team ni ura moyed riy ni ra m’ad. U reb e BBC television program, ma reb e girdi’ ni ma non riy ni Joan Bakewell e weliy ni Goulder “e math e liyeb rok ni faani guy gelngin e kireban’ ko girdi’.” Reb e n’en ni buch rok “e mul e michan’ rok ngak ba Got ni ma ayuweg e girdi’ ko tin ni bay nga m’on rorad.” Me yog Goulder e michan’ rok ni “fare Bible e gathi . . . thin rok Got” ni der ma oloboch ya, ma oloboch, “ya thin ko girdi’, sana ra moy bochuw u fithik’ ni thin rok Got.”

Yu ngiyal’ ma ma war e michan’ i yan. Aram e n’en ni buch rok faani ma yol maku ma non u radio ni ir Ludovic Kennedy. I yog ni gaar ka nap’an ni kab bitir ma “maruwaran’ rok nge der mudugilan’ nga [rogon Got] e yugu ma yamyan ma aram mi i mul e michan’ rok i yan.” Dariy be’, ni yog rok ni nge pi’ e fulweg ko pi deer rok. Yam’ ni tay e chitamangin u maday e rib gel ni ri warnag e michan’ rok me par ni ke war. Pi meybil ku Got ni “nge ayuwegdad ko riya’ u maday me ayuwegdad ko cham rok e pi toogor” rodad e dan fulweg taban u nap’an ni fare barkow nu Chiyamen e bilig fare barkow ni immoy e chitamangin u daken u nap’an e bin l’agruw e mahl ko fayleng.​—Keb ko lem ni nga nog e—​Ke Fel’ ngak Got.

Binem e n’en ke buch e gathi ban’en ni gathi ri ma buch. “Michan’,” e yog apostal Paul, ni gathi “fan ngak urngin e girdi’.” (2 Thessalonika 3:2, NW) Mang e n’en ni ga be lemnag? Bin riyul’ e michan’ ngak Got nge Thin rok e ku rayog e chiney ko re fayleng ney ni ke yoor e maruwaran’ riy? Mu fal’eg i guy e bin migid e thin ko mang e bayi yog.