Rayog Ni Nge Yog Ngom E Bin Riyul’ E Michan’

Nap’an ni gaman 19 e duw rok Sarah Jayne, me nang ni bay e cancer u gin ma sum e bitir u yal rok. Tomuren ni kan sey, me fel’ rogon me par ni kari pagan’ ni dakuriy ban’en ni be magafan’ ngay ni ra magawon boch ngaram. Aram feni pagan’, ere nap’an ni yigi gaman 20 e duw rok, ma rognew be’ e mabgol ma aram me tabab i lemnag rarogon e m’agpa’ rok. Kare duw nem me sul fare cancer bayay, me ni nang ni daki yoor e wik ni ra par me yim’. Sarah Jayne e yim’ ko June 2000, u nap’an ni ke chugur ni nge gaman 21 e duw rok.

N’EN ni rib manigil u wan’ e piin ni u ranod ra guyed Sarah Jayne ni bay u aspital e pagan’ rok ko gabul nge langlath ni rib gapas, ni kab muun ngay e michan’ rok ni rib gel ngak Got nge Thin rok, ni fare Bible. Dariy fan ni n’en ke buch rok e rib gel e gafgow nge kireban’ riy, ya rib riyul’ u wan’ e athap ko fas ko yam’​—ni ngki guy gubin e fager rok biyay. (John 5:28, 29) I gaar, “Kugu ra guymed ni gimed gubin ko bin ni biech e fayleng rok Got.”

Boch e girdi’ e dakura lemnaged e binem e michan’ ke bod ban’en ni de riyul’. “Ere ku mang e yafas u tomuren e yam’ kemus ni michan’ ko piin der pagan’rad,” i deeriy Ludovic Kennedy ere n’eney miki gaar, “nap’an ni ra chob lingan e bin tomur e rappa ma ku bay e cake nge wayin maku bay e diyen ko nig ni kan fal’eg nge rappa ni fan ngorad u bangi ban’en ni bay e gek’iy riy nib dammal mab fel’ yaan e bay ur falfal’an’gad riy ni yad e piin kar ma’d nib som’mon rorad nge tin ni bayfini yim’ u tomur rorad?” Ere bochan ni aram rogon ma thingarda fithed reb e deer nib togopuluw ngay. Ni aram e bin ngan e ba puluw​—ni nge michan’uy ngay “bin baaram ni kemus e yafas rodad aray ere nga udi rin’ed urngin ni rayog rodad,” ni bod ni ke yog Kennedy, fa nge mich u wan’uy Got nge n’en ni ke micheg ko fas ko yam’? Sarah Jayne e mel’eg ni nge mich u wan’ e bin tomur. Uw rogon ni yog e binem e michan’ ngak?

“Mu Gay Got . . . Nga Rim Pirieg”

Faanra nge michan’um me pagan’um ngak be’, ma ba t’uf rom ni ngam nang faanem ma ngam nang rogon ni ma lem nge rogon ni ma ngongol. Rogon ni ngan rin’ e biney e ra un e gum’ercha nge lem i maruweliy. Ri taareb rogon ko baaray ni ngan maruweliy nge yog e bin riyul’ e michan’ ngak Got. Ba t’uf ni ngam nang, ma ga fil ngam nang fel’ngin nge rarogon, ni bochan ni ngam pirieg ko pi n’en ni ke yog ma ke rin’ e be micheg ni rayog ni nge michan’uy ngak mini pagan’uy ngak.​—Psalm 9:10; 145:1-21.

Boch e girdi’ e be lemnag ni dabiyog e re n’eney. I Got e yad be yog, ni rib palog, ma dan nang​—ko ri bay fa dariy. “Faanra Got e rib riyul’ ni bod fene riyul’ ngak e Kristiano ni bod Sarah Jayne,” n’en ni fith be’ ni ba maruwaran’ ku Got miki gaar, “me ere mang fan ni dabi guy rogon nge nang e tin ka bay i gadad?” Machane rriyul’ ni Got e rib palog ma dabiyog i gaweg? Bay ba welthin ni tay e piin ba llowan’ nu Athens, me yog apostal Paul ni gaar, “fare Got ni fal’eg e fayleng nge urngin ban’en riy” e ku ke pi’ urngin ban’en nib t’uf ni ngan “gaweg [riy] . . . mirin pirieg.” Bin riyul’ riy, e gaar Paul: “De mal’af rok bagadad nge bagadad.”​—Acts 17:24-27, NW.

Ere, uw rogon, ni ngam “gaweg Got . . . mi rim pirieg”? Boch e girdi’ e ke rin’ ni kemus ni ke fal’eg i yaliy e palpalthib u toobrad. Ma boor i yad, e kemus ni goo re palpalthib ney ma ba gaman urngin e mich ni ke pi’ ke mich u wan’rad ni ba’ be’ ni sunmiy.a (Psalm 19:1; Isaiah 40:26; Acts 14:16, 17) Kar lemgad, ni bod rogon apostal Paul, ni pi felngin “[Got] ni danir guy e kan guy ni rib gagiyel ni ka nap’an nni sunmiy e fayleng, i yib ni bochan e pi n’en ni ke may i ngongliy, ngaki mada’ nga gelngin nge rogon ni ir Got.”​—Roma 1:20; Psalm 104:24, NW.

Ba T’uf e Bible Rom

Ra ngani gelnag e bin riyul’ e michan’ ngak e ani Tasunmiy, ma aram e, ku bay ban’en ni kub t’uf ni ke pi’. Be mang ere n’enem? Fare Bible​—Thin rok Got ni kan thagthagnag, ni aram e bay riy e tin nib m’agan’ ngay nge n’en ke lemnag ni nge rin’. (2 Timothy 3:16, 17) “Machane mu son,” boch e girdi’ e ra gaar, “ra diin me mich u wan’um e n’en be yog e Bible ni ga be guy e pi n’en nib kireb ni be rin’ e girdi’ ni yad ma gaar yad ma fol ko Bible?” Ya bochan, Kristendom e bay thirad ni yima gin ngay, ni yad ma dake moding, ma yad ba maangach ma yad ma ngongliy e ngongol ko darngal. Machane ra be’ nib tamilangan’ e rayog ni gu’ ni Kristendom e kemus ni yad ba dake yad be fol ko fanow u Bible.​—Matthew 15:8.

Fare Bible e ki yog ni boor e girdi’ e bay i lungurad e yad be liyor ku Got, ma bin riyul’ riy, “e kar digeyed e ani suwon yad ni ke chuwiyrad.” “Ere bochan ere n’eney,” ni rogon ni yog apostal Peter e gaar, “kanawo’ nib riyul’ e bay u ni kirebnag nga uni thibthibnag.” (2 Peter 2:1, 2, NW) I yog Jesus Kristus ni picha’ ney e “yad ma rin’ e kireb” ni yira nangrad nib gagiyel ko ngongol rorad nib kireb. (Matthew 7:15-23) Ra ngan digey e Thin rok Got ni bod ni be rin’ e Kristiano ni googsur e bod ni kan n’ag bangi babyor rok ba fager ni yima pagan’uy ngak ni bochan ni ani yibi pi’ fa gi babyor e be’ nib kireb thin.

Ra dariy e Thin rok Got ma dabiyog ni ngan gelnag e bin riyul’ e michan’. Kemus ni yi goo lan e yungi babyor ko Bible e be dag Jehovah e tirok ban’en riy ni rogon ni yog. Me pi’ e tamilangan’ ko pi deer ni ke n’uw nap’an ni bod e mang fan ni kan pag yibe gafgow ma yibe amith nge mang e bayi nrin’ ngay. (Psalm 119:105; Roma 15:4) Sarah Jayne e mich u wan’ ni fare Bible e Thin rok Got ni thagthagnag. (1 Thessalonika 2:13; 2 Peter 1:19-21) Uw rogon? Gathi kemus ni bochan ni yog e gallabthir rok ngak ni nge mich u wan’, ya bochan ni ke par ke fal’eg i lemnag ma be taarebnag u fithik’ e yul’yul’ urngin e pi mich ni be dag ni fare Bible e karimus ban’en ni be dag e tini ma yib rok Got. (Roma 12:2) Ni bod ni guy ni fare Bible nib gel gelngin ni rayog ni nge pingeg e yafas ko piin ni yad ma fol ko motochiyel riy. Miki ayuweg fapi babyor ni bod e The Bible​—God’s Word or Man’s?,b miki par ngari i fal’eg i guy ma be lemnag e pi mich ni ba’ riy ni boor ni be micheg ni Got e thagthagnag.

“Michan’ e Ma Yib u Tomren e N’en Kan Rung’ag”

De gaman, ni kemus, ni nge yog baken e Bible maku e ri tay ni gathi kemus ni nge mich u wan’uy nni thagthagnag. “Michan’,” e yoloy apostal Paul ni gaar, “ngan fol ko pi n’en kan rungaag.” (Roma 10:17) Ngan rungaag e Bible, e gathi kemus ni nge yog e Bible, ma aram e rayog e michan’. Ngam “rung’ag” e pi n’en ba’ ni nge yog Got ni ngam poy ma ga fil e Thin rok. Mus ko bitir ni rayog ni nge rin’ e re n’ey. I yog Paul ni “kab madway” Timothy mini fil ngak e “thin u lan fare babyor nib thothup” ni fil e chitingin nge titaw rok ngak. Ere be dag ere n’eney ni ba muun ngay nni tawasariy ngan pingeg laniyan’? Danga! Timothy e dani gel ngak fani guy rogon ni ngan bannag nge mich u wan’ ba ngiyal’. Ni weliy ngak me “m’agan’ ngay ni nge mich u wan’” e n’en ni ke rungaag ma ke bieg.​—2 Timothy 1:5; 3:14, 15.

Sarah Jayne e ku taareb rogon ku nog ngak me m’agan’ ngay. Taareb rogon ngak piyu Berea ko fa bin ni som’mon e chibog, i “rungaag fare thin ko [gallabthir rok nge ku boch sensey] mi i lemnag nib gel i lemnag rok.” Nap’an ni kab bitir, ma dariy e maruwar riy ni rib pagan’ ko pi n’en ni ma yog e gallabthir rok ngak. Me taaboch, ni ke ilal, ma yugu de par ni gowa ba malmit ara yugu tin kan nog ngak me rin’. Ri ‘sagaal ngay nga i fal’eg i gaweg murung’agen e Thin u Bible ni gubin e rran ko ri aram rogon fa danga’.’​—Acts 17:11.

Rayog ni Mu Gelnag e Michan’ ni Riyul’

Ku arrogon gur ni rayog rom e bin riyul e michan’​—ni fare miti michan’ ni weliy apostal Paul u lan e babyor rok ni yan ngak e Kristiano nu Hebrew. Re michan’ nem, e gaar, aram e “mich ko n’en ni ke lagan’uy ngay ko pi n’en ni yibe athapeg, ni ke m’ug nib riyul’ machane dar guyed.” (Hebrews 11:1, NW) Faanra ba’ e binem e michan’ rom, ma ngari mich u wan’um ni urngin e athap rom nge tini ke l’agan’um ngay, nib muun ngay e n’en ni ke micheg Got ko fas ko yam’, ma ra riyul’. Ngari mudugil lanin’um ngay ni pi athap nem e ba mudugil ni rayog, gathi kemus ni yibe finey ni manga yigi buch. Ga ra nang ni Jehovah e dariy bayay ni de yog ni nge rin’ e tini ke micheg ni de rin’. (Joshua 21:45; 23:14; Isaiah 55:10, 11; Hebrews 6:18) I micheg Got ni bin biech e fayleng e ri ra riyul’ ni bod ni faan gowa ke taw ngaray. (2 Peter 3:13) Ga ra guy ko michan’ rom ni rib gagiyel ni Jehovah Got, nge Jesus Kristus, nge gagiyeg rok Got, e gubin ni rib riyul’ ma gathi bogi n’en nde riyul’.

Dawor ni pagem ni yi goo gur ni ngam gelnag e michan’ rom nriyul’. Bay e Thin rok ni ke m’ay i yog, maku ke pi’ Jehovah e ulung ko Kristiano u gaangin yang e fayleng ni kar pi’ed yad ni ngar ayuweged e girdi’ ni ba fel’ gum’ercharad ngar gelnaged e michan’ rorad ku Got. (John 17:20; Roma 10:14, 15) Nge fel’ u wan’um urngin e ayuw ni be pi’ Jehovah u daken ere ulung nem. (Acts 8:30, 31) Ma bochan ni michan’ e reb i waamngin e kan ni thothup rok Got, ma nga umu meybil ni boor yay ni nge ayuwegem ere kan ni thothup nem nge yog e bin riyul’ e michan’ ngom.​—Galatia 5:22.

Dabmu pag nge magawon nagem be’ ni dariy e michan’ rok ma ma moningnag e ani be weliy murung’agen e michan’ ku Got nge Thin rok. (1 Korinth 1:18-21; 2 Peter 3:3, 4) Riyul’, ni michan’ ni riyul’ e rib ga’ fan ya ma gelnagdad ngad pired ni gad ba gel ko pi togopuluw ni be yib. (Efesus 6:16) Sarah Jayne e pirieg e re n’em nib riyul’, mi yigi i pi’ e athamgil nga laniyan’ e piin ni u ranod ra guyed nga aspital ni ngar gelnaged e michan’ rorad. Me gaar, “Mu fanay e tin riyul’.” “Mu fil e Thin rok Got. Mu par ni gab chuchugur ko ulung rok Got. Mu p’eyn’uy e meybil. Mu par ni gab pasig ko pigpig ku Jehovah.”​—James 2:17, 26.

Kani gu’ e michan’ rok ngak Got nge fas ko yam, me gaar reb e kanggof rok ngak: “Riyul’ ni kari mich u wan’um, e re n’eney.” Ma nap’an nni fith ko mang e ke pi’ ngak e binem e pagan’ ma ba falfalan’ ni yugu aram rogon gelngin e magawon rok, me fulweg ni gaar: “Bochan ni bay e michan’ rog ku Jehovah. I ir e ba fager rog ni rib riyul’, ma ri gu ba t’uf rog.”

[Footnotes]

[Picture on page 6]

“Nap’an ni kab bitir” Timothy min fil ngak e “thin ku Got” ni fil e chitingin nge titaw rok ngak

[Picture on page 6]

Girdi’ nu Berea e nog ni yad ba manigil ni bochan ni yad ma fal’eg i guy e Thin u Bible ni gubin e rran ko ba puluw fa danga’

[Credit Line]

Yib ko “Photo-Drama of Creation,” 1914

[Pictures on page 7]

Ngan rungaag mini tayan’uy ko Bible, gathi kemus ni ngan fakay baken, ma aram e ra ga’ e micahn’

[Picture on page 7]

“Gu ra guymed ni gimed gubin ko bin nib biech e fayleng rok Got”