Rogon ni Yima Lemnag Boch E Girdi’

GONAP’AN dalip biyu’ e duw ni ke yan, nap’an ni i mil David rok Saul ni Pilung nu Israel. Me l’og David be’ nge yan ngak Nabal, ni be’ nib fel’rogon ni ma chugul saf nge kaming, ni nge ning e ggan nge ran. Ma rogon riy, e Nabal e susun ba’ ban’en ni nge rin’ ngak David nge girdi’ rok ni bochan e ayuw ni ur matanagiyed e pi gamanman rok Nabal. Machane aram rogon, me siyeg Nabal ni nge pi’ e ayuw ngorad. Ma ki i tolul ma be puwan’ ngak e girdi’ rok David. Ke fal’eg Nabal ban’en ni ra yib e magawon riy ngak, ya David e be’ ni dabiyog ni ngan dariyfannag.​—1 Samuel 25:5, 8, 10, 11, 14.

Ngongolen Nabal e de puluw nga yalen e girdi’ nu Middle East ni yalen rorad e dag e tuf’eg ngak e girdi’ ni keb ngodad nge milekag. Ere, ba miti mang ngachal e ke ta’ Nabal nga daken? Rogon ni kan yoloy ko fare Bible e gaar be’ “ni bagel e thin rok ma ba kireb e pi n’en ma rin’” nge “be’ nib moon ni dariy e n’en nib fel’ ngay.” Fan fithingan e “aliliy,” ma kari ta’ ir ni aram rogon. (1 Samuel 25:3, 17, 25) Ga baadag ni ngaun lemnigem ni aram rogon? Ga ma gelnag e thin rom ma damur dag e runguy ngak boch e girdi’, ni rib ga’ ni faanra ke m’ug ni kar magawongad? Fa gab gol, ma gab fel’ ngak e girdi’, ma ga ma lemnagrad?

Mang e N’en ni Ma Lemnag e Girdi’ u Murung’agen Jesus?

Machib ni i tay Jesus u fayleng e kemus ni dalip nge baley e duw. Machane, uw rogon ni par u wan’ e pi gachalpen? Bochan nib flont, ma dariy e denen rok, ere ma palognag ir ko girdi’? Fa ma tolangnag ir nga i yog e n’en ngan rin’ ni bochan ni manang ni ir Fak Got? Fa ma towasar nga i k’aring e marus ma be gelfen ngak pi gachalpen ni nguur folgad rok? Fa be par ni der non ma un ko gosgos? Fa boor ban’en ni i rin’ ni dariy e tayim rok ni fan ngak e piin meewar nge piin bm’ar ara piin bitir? Fa ma sap nga but’ ngak yugu boch e girdi’ ni yad ba thil ngak e piin ni ppin, nib ga’ ni aram e n’en ma rin’ e pumoon e ngiyal’ nem? Mang e n’en ni be yog e babyor ngodad?

Jesus e baadag daken e girdi’. Yira fal’eg i fil murung’agen e machib rok ma rabi m’ug ni boor yay ni i golnag e magutgut nge m’ar. I ta’ ir ni nga i ayuweg e piin nib t’uf e ayuw rorad, me dag nib adag daken e piin bitir.

Girdi’ e ma baud laniyan’rad u nap’an ni u ra chaggad ngak Jesus. Ma da i k’aring e marus ngak pi gachalpen, ni ngaur tamdaggad ni nga rogned e tini yad be lemnag. Riyul’, ya ma fith boch e deer ngorad ni bochan ni nge puf rogorad nga rogned rogon e pi n’en ni yad be lemnag.​—Mark 8:27-29.

Jesus e ma par u wan’uy ni bochan ni boor fel’ngin e girdi’ ni ba’ rok, nib muun ngay e lem ni ma pag ir nge gafgow ni fan ni nge fel’ rogon be’. I ir e yib ni ir e t’ufeg rok Got. Jesus e ke dag rogon e n’en nge rin’ urngin e piin ni yad baadag ni ngar manged pi gachalpen. Uw feni chuchugur ni ga be lek ere kanawo’ nem?​—1 Korinth 13:4-8; 1 Peter 2:21.

Uw Rogon ni Nge Par u Wan’uy e Tin Chiney e Kristiano?

Ngiyal’ ney, ma boor e Kristiano nib yul’yul’ ni kar m’ad, boch e bochan e ke pilibithir, ma boch e ri kab fel’ yangaren. Machane kar paged thirad nib fel’ nga keru’rad.

Ere uwrogon ni ra un lemnagem? Faan ma nga mum’ fowap, ma mang e n’en ni be yog e girdi’ u murung’agem e daba’? Ireray reb e deer ni sana ra k’aringdad ni gad gubin ni nge fel’ rogon e ngongol rodad.

Mang e gad ra rin’ me yog ni da fal’eged thidad? Rayog ni ngad mon’oggad ni faan gad ra dag waamngin e kan ni thothup​—ni bod e t’ufeg, nge g’uman, nge gol, nge sumunguy, nge t’ar laniyan’. (Galatia 5:22, 23) Arrogon, ba mudugil, “nib ngachal nib [fel’] e kab fel’ ko gapgep nib fel’, nge rorran nnim’ e kab fel’ ko rorran nni gargeleg be’.”​—Eklesiastes 7:1, NW.