Ba Taw’ath E Piin Yad Be Pining E Sorok Ngak Got

“Bayra siro’gad u p’eowchem, O Jehovah, ma ngara pininged e sorok nga fithingam.”​—Psalm 86:9, NW.

1. Mang fan ni rayog rodad ni ngada pininged e sorok ngak Got u kanawo’ ni kab gel ko tin ni ma rin’ e tin kan sunmiy ndariy e yafas riy?

BAY ROGON Jehovah ni urngin ban’en ni ke sunmiy e nguur pininged e sorok ngak. Yugu aram rogon ni tin ni ke sunmiy ndariy e pogofan rorad ma yad ma pining e sorok ngak, ni dariy lungrad, ma gadad e bay rogodad ni ngada weliyed fan ban’en, ma ngad nanged fan ban’en, ma ngad pininged e magar, ma ngada liyorgad. Ere, thin ni yog fare psalmist e fan ngodad ni gaar: “Mu tolulgad ngak Got ni bod ni kam gelgad ko mahl, gimed e girdi’ nu fayleng ni gubin. Nga mon’ed e tang ni gimed be pining e sorok nga fithingan. Mu gagiyegnag ni nge felfelan’ rogon ni ngan pining e sorok ngak.”​—Psalm 66:1, 2, NW.

2. Mini’ e ke fol ko motochiyel ni ngan pining e sorok nga fithingan Got, ma mang fan?

² Oren e girdi’ e dar ma tayfan Got ma dar ma pining e sorok ngak. Machane, u lan 235 e nam, ma ke pag nel’ milyon e Pi Mich Rok Jehovah e kar daged ni “pi felngin” ndabiyog ni ngan guy e kar guyed u daken e tin ni ke sunmiy ma bod ni kar “rung’aged” e tin ni kan sunmiy ni yad be micheg ban’en ndariy lungrad. (Roma 1:20; Psalm 19:2, 3) U daken e fol Bible, e ku kar nanged Jehovah riy ma kar t’ufeged. Psalm 86:9, 10, (NW) e ke yiiynag ni gaar: “Urngin e nam ni kam ngongliy e ra bad, ma ka ra siro’gad u p’eowchem, O Jehovah, ma ngara pininged e sorok nga fithingam. Ya bochan e gur e ba gilbuguwam ma ga ma ngongliy e tin yira ngat ngay; Gur e Got, ni yigoo gur.”

3. Uw rogon ma fare “ulung ni baga’” e yad ma “pigpig ni rran nge nep’”?

³ Revelation 7:9, 15 e ku be weliy murung’agen e pi tapigpig nib “ulung ni baga’” ni yad “be pigpig ku [Got] ni rran nge nep’ u lan e tempel rok.” Gathi be yip’ fan ni be ning Got ni pi tapigpig rok e dabra talgad i pining e sorok ngak, machane piin ma liyor ngak e ba ulung ko girdi’ u fayleng ni ga’ngin. Ere nap’an ni ra nep’ u boch e nam, ma pi tapigpig rok Got u ba’ nem e fayleng e yad be machib nib gel. Ma aram rayog ni nga nog ni rran nge nep’ ma bay e girdi’ ni yad be pining e sorok ngak Jehovah. Dabki n’uw nap’an ma “urngin e pin’en nib fas” e ngara pininged e sorok ngak Jehovah ni baga’ lamrad. (Psalm 150:6) Machane, chiney, mang e rayog ni ngad rin’ed ngad pininged e sorok ngak Got ni be’ nge be’? Mang magawon e rayog ni ngeb ngodad? Ma mang taw’ath e bay ni pi’ ngak e piin ni ma pining e sorok ngak Got? Rogon ni ngan fulweg, e ngada lemnaged reb e chep nu Bible ni murung’agen fare ganong rok Gad nu Israel.

Reb e Magawon Kakrom

4. Mang e magawon ni keb ngak fare ganong rok Gad?

⁴ U m’on ni ke yan piyu Israel nga lan fare Binaw ni Kan Micheg, ma piin ni bang ko ganong rok Gad e ka ra weniggad ni ngan pagrad ngar pared u lan fare nam nib fel’ ni ngan chuguliy e gamanman riy ni immoy u ngek ko fare lul’ ni Jordan. (Numbers 32:1-5) Ran par u rom ma mutrug ni ra yib e magawon nib gel. Fapi ganong ni ur moyed u ngal e immoy fare loway nu Jordan ni be yororiyrad​—ni n’en ni ke mo’maw’nag e pi salthaw ngar bad ngar chamgad ngorad. (Joshua 3:13-17) Machane, murung’agen e pi binaw nu ngek u Jordan, e fare The Historical Geography of the Holy Land, rok George Adam Smith, e be yog ni gaar: “[Pi binaw nem] e ba tagapas ni urngin, ma ke chuchugur ndariy ban’en ni be yororiy, daken fare plateau nib ga’ u Arabian. Ba tamilang ni gubin ngiyal’ e mom ni nge yib e girdi’ nib gafgow ma gubin ngiyal’ e yad ma thiliyeg e binaw nguur pared riy, ni boch i yad e ma yib ni yad boor u gubin e duw ngar duruiyed e gamanman rorad.”

5. Uw rogon ni ke pi’ Jakob e athamgil nga laniyan’ e piin owchen Gad ni ngar chamgad u nap’an ni girdi’ e ngar chamgad ngorad?

⁵ Uw rogon ma fare ganong rok Gad e rayog rorad ni ngar gelgad ko re magawon nem nyugu ma yib ngorad? Boch e chibog kakrom, ma Jakob ni gallabthir ko pi gallabthir rorad e ke yiiynag ban’en u nap’an ni ke chuchugur ni nge yim’ ni gaar: “Me Gad e bay yib ba ulung e girdi’ ngar chamgad ngak, machane bayi cham ngorad nge l’ol’ograd.” (Genesis 49:19, NW) Yay ni som’mon ni ngam sap ko pi thin nem e gowa be k’aring e kireban’. Machane, tin riyul’ riy e reb e motochiyel eram ni fan ngak yu Gad ni ngar chamgad ngorad. I micheg Jakob ngorad ni faanra rin’ed ni aram rogon, ma ra mil ba ulung e girdi’ rorad ni kar tamra’gad, ni yu Gad e ra l’ol’ograd.

Fapi Magawon ko Liyor Rodad e Ngiyal’ N’ey

6, 7. Uw rogon ma rarogon e pi Kristiano e ngiyal’ ney e ba taareb rogon ko ganong rok Gad?

⁶ Ni bod e ganong rok Gad, ma piin Kristiano e ngiyal’ ney e ma yib ban’en ngorad ni ma mochuchnagrad nge n’en ni ma tomalnag lanin’rad ko re m’ag rok Satan ney; ma dariy e maangang ni ra ayuwegdad ni dabki yib ngodad e magawon. (Job 1:10-12) Boor i gadad e thingari athamgil nge gel ko magawon ko skul, nge magawon ni nge gay salpiy, nge rogon ni ngan chuguliy e bitir. Maku bay e magawon u fithik’ i lanin’uy. Boch e girdi’ e thingara kadan’rad ko “liliy nib gel e amith riy” ni reb e m’ar nib ubchiya. (2 Korinth 12:7-10) Boch e girdi’ e kar gafgowgad ni yad be lemnag ni dariyfarad. “Pi rran nib mo’maw’” ko piin pilibthir e rayog ni nge taleg e Kristiano ko pigpig ku Jehovah u fithik’ e pasig ni bod kakrom ni kab gel gelngirad.​—Eklesiastes 12:1.

⁷ Maku be puguran Paul ni apostal ngodad ni “gadad be cham ngak gelngin e kan nib kireb, ni pi kan ni yad be gagiyeg, nge gelngin e kan u lan e lang ko ngiyal’ ney nib talumor.” (Efesus 6:12) Gubin ngiyal’ nib chuchugur ngodad “fare lem ko fayleng,” ni fare lem ni ma togopuluw nge ngongol nib kireb ni Satan nge pi moonyan’ rok e yad be k’aring. (1 Korinth 2:12; Efesus 2:2, 3) Ni bod Lot ni bay madgun Got u wan’, ma sana ke kireban’dad e chiney ko tin ni ma yog nge tin ma rin’ e girdi’ nib kireb nib liyegdad. (2 Peter 2:7) Maku ma yib ngodad e togopuluw ni ma tay Satan nga puluwdad. Be cham Satan ngak e piin ka ba’ ko piin ni kan dugliyrad, “ni piin ni yad be fol ko pi motochiyel rok Got ma yad be un ko maruwel nguur weliyed murung’agen Jesus ngan nang.” (Revelation 12:17, NW) Maku “yugu boch e saf” rok Jesus’ e ma cham Satan ngorad ma ma talegrad ko maruwel rorad ma ma gafgownagrad.​—John 10:16.

Nge M’ingan’uy ara Ngan Fulweg Taban?

8. Mang e gad ra rin’ ko cham ni ma ta’ Satan ngodad, ma mang fan?

⁸ Mang e fulweg rodad ni ngad rin’ed ko cham ni ma ta’ Satan? Ni bod e ganong rok Gad kakrom, ma thingarda pared nib gel ko tirok Got ban’en ma ngad chamgad ngak ni gad be fol ko thin ni yog Got. Ba kireban’, ya boch e girdi’ e kar paged yad ni m’ingan’rad nbochan e tin ni be mochuchnagrad, ma kar paged e maruwel rorad ni fan ko tirok Got. (Matthew 13:20-22) I weliy reb e Mich ko mang fan ni ke buchuw e girdi’ ni ma un ko muulung ko ulung ni ma un ngay ni gaar: “Kari aw parowon e pi walag. Kara mochuchgad.” Tin riyul’ riy, e girdi’ e ngiyal’ ney e boor fan ni be aw parowrad. Ere bmom ni ngar guyed e liyor ku Got ni ku ban’en ni ma mochuchnagey, ni reb e maruwel nib tomal. Machane ireray e lem nib fel’​—ara lem nib—​puluw?

9. Uw rogon ni yira fek e mat’ rok Kristus ma rayog ni ngam un ko toffan?

⁹ Mu lemnag e thin ni yog Jesus ngak e girdi’ ni boor ko ngiyal’ ni immoy ni ku ke aw parowrad nbochan e tin ni be mochuchnag rad: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed.” Thin ni yog Jesus e be yip’ fan ni rayog ni nge toffan be’ ni faanra lichnag e tayim rok ni fan ko pigpig ku Got? I yog Jesus e thin nib togopuluw ngay ni gaar: “Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’; mi gimed pirieg e toffan.” Mat’ e ban’en ni kan ngongliy ko ren ara wasey nra ayuweg e girdi’ ara gamanman ma rayog ni ngar feked ban’en nib tomal. Ere, mang fan ni bay e girdi’ ni baadag ni nge fek e re mat’ nem? Gathi “ke aw parowdad”? Arrogon, machane fare Greek text e ku be yog ni gaar: “Mu un ngog nga darow u tan e mat’ rog.” Mu lemnag: Ke ognag Jesus ni nge ayuwegdad ngad feked gilbadad! Gathi ngad feked ni goo gadad.​—Matthew 9:36; 11:28, 29, footnote NW; 2 Korinth 4:7.

10. Mang angin ni ra yib ko athamgil ni gad ma ta’ ni nga uda pininged e sorok ngak Got?

¹⁰ Nap’an ni ngada feked fare mat’ rok pi gachalpen Jesus, ma aram e gad be cham ngak Satan. “Mi gimed togopuluw ngak fare moonyan’ me mil romed,” be micheg James 4:7 ni aram rogon. Biney e gathi be yip’ fan nib mom ni ngan togopuluw ngak fare Moonyan’. Ngan pigpig ku Got e ba t’uf ni ngan maruweliy nib elmerin. (Luke 13:24) Machane be micheg e Bible ko Psalm 126:5 (NW ni gaar: “Piin ni be yung e awoch ni yad be yor e yad ra t’ar wom’engin u fithik’ e felfelan’.” Arrogon, gad be pigpig ko reb e Got ni ma pining e magar. Ma “taw’athnag e piin ni be gayiy Got,” ma ma taw’athnag e piin ni ma pining e sorok ngak.​—Hebrews 11:6.

Piin Ma Machibnag Gil’ilungun e Ngar Pininged e Sorok Ngak Got

11. Uw rogon ma maruwel rodad ni ngan wereg e machib e ra yororiydad ko cham ni ma ta’ Satan ngodad?

¹¹ I motochiyelnag Jesus ni gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg.” Fare maruwel ni ngan wereg e machib e aram e bin som’mon e kanawo’ ni ngan ognag e “maligach ni yibe pining e sorok” ku Got.” (Matthew 28:19; Hebrews 13:15, NW) Ngad “fal’eged rogodad ni ngad weliyed e thin nib fel’ ni murung’agen e gapas e nge mang sus rodad” e bang ko “talin e cham rodad ni urngin” nib ga’ fan​—ni aram e n’en ni ma ayuwegdad u nap’an ni ra yib Satan ni nge cham ngodad. (Efesus 6:11-15) Ngan pining e sorok ngak Got u nap’an ni gad be machib e reb e kanawo’ nib fel’ ni ngad gelnaged e michan’ rodad. (2 Korinth 4:13) Ra ayuwegdad ni ngad paloggad ko lem nib kireb. (Filippi 4:8) Gad ra un ko maruwel ni ngan wereg e machib e ra ayuwegdad ni nguuda chaggad ngak e pi walagdad u lan e ulung ni be gelnagdad.

12, 13. Uw rogon ma ra nge un e tabinaw i wereg e machib ni gubin ngiyal’ ma ra fel’ rogorad riy? Ngan weliy ko uw rogon.

¹² Ngan wereg e machib e ku rayog ni nge fel’ e maruwel ko tabinaw. Riyul’, ni piin ni fel’ yangaren e ba t’uf nib fel’ urngin e tayim ni yad ma fanay ko fafel. Machane, tayim ni ma fanay e tabinaw ni ngar wereged e machib e susun gathi ban’en ni ma chachalbarad ngay. Piin gallabthir e rayog ni ngar ayuweged ni ngeb e felfelan’ riy ngak e pi bitir rorad nfaanra ngar ayuweged yad ngar salapgad ko machib. Gathi ra felfelan’ e piin ni fel’ yangaren ngar rin’ed e n’en ni kar salapgad riy? Nge dag e piin gallabthir nib filmunguyan’rad, ni dabra suruyed e piin nib fel’ yangaren ko tin dabiyog rorad, ma aram e rayog ni ngar ayuweged yad ngar felfelan’gad ko maruwel ni ngan wereg e machib.​—Genesis 33:13, 14.

¹³ Maku, reb e tabinaw ni yibe pining e sorok ngak Got u taabang e rib fel’ thilrad. Mu lemnag reb e walag ni ppin ni pumoon rok ni de michan’ e ke digey e cha’ nem nge lal e bitir rorow. Ere keb e magawon ngak ni ba’ t’uf ni nge un ko maruwel nge yog boch e salpiy ngak ni fan ni nge ayuweg e tin nib t’uf ko pi bitir rok. Gur kari aw parowon me pag e tirok Got nib t’uf ko pi bitir rok? Ke yib ngan’ ban’en ni gaar: “Kug fil e Bible nge pi babyor ni kan fek u Bible nib elmirin ma kug guy rogon ni nggu fol ko n’en ni kug bieg. Gu ma fek e pi bitir rog ko muulung nge machib u mit e tabinaw i yan ni gubin ngiyal’. Mang angin ni keb ko athamgil ni kug ta’? Urngin e bitir rog ni yad lal e kan taufenagrad.” Ngam un ko maruwel ni ngan wereg e machib ni polo’ e tayim rom e ku rayog ni nge ayuwegem ko athamgil ni ga be ta’ ni ngam chuguliy e bitir rom ni nge fol nga rogon “ni ma llowan’nigey Jehovah nge rogon ni ma gagiyegnag lanin’uy.”​—Efesus 6:4, NW.

14. (a) Uw rogon ma piin ni fel’ yangaren e rayog ni ngar pininged e sorok ngak Got u skul? (b) Mang e ra ayuweg e piin ni fel’ yangaren ni dabra “tamra’gad nbochan fare thin nib fel’”?

¹⁴ Gimed ni piin ni fel’ yangaren, faanra gimed ma par ko binaw ni motochiyel riy e be pag ni ngan weliy murung’agen e teliw ndemtrug e gin ni ga bay riy, ga ma machib u skul ni ga be pining e sorok ngak Got, ara kam pag ni marus ko girdi’ e nge talegnem? (Proverbs 29:25) Reb e Mich u Puerto Rico ni 13 e duw rok e yoloy ni gaar: “Ri dagu tamra’ ni nggu machib u skul ya bochan gu manang ni ireray e tin riyul’. Nap’an e class romad ma gu ma tining paag nga lang ni nggu weliy e n’en kug fil u Bible. Ngiyal’ ni dariy e class rog, ma gu ma yan nga library ni nggu bieg fare babyor ni Young People Ask.”a Gur ke taw’athnag Jehovah e maruwel ni tay’? Ke yog ni gaar: “Yu ngiyal’ ma piin ni gamad nga class e ma fith boch e deer ngog ma ku ma ning ba ken fare babyor.” Faanra be maruwaran’um ni ngam rin’ e n’en ni aram rogon, ma sana ba t’uf ni ngam fil ban’en nib elmerin ni ngam “nang e tin nib fel’ mab fel’ u wan’uy nge tin nrib m’agan’ Got ngay”. (Roma 12:2, NW) Nap’an ni kari mich u wan’um ni tin ni kam nang e ba riyul’, ma ri dab kum tamra’ ko “thin nib fel.”​—Roma 1:16.

Ba ‘Mab ni Ke Mab’ ni Fan ko Pigpig

15, 16. Mang “mab e baga’ ni be pow’iyey ko maruwel” ni ke yan boch e Kristiano ngay, ma mang flaab ni keb ngorad?

¹⁵ I yoloy Paul ni apostal ni “reb e mab nib ga’ ni ma pow’iyey ngan rin’ boch e maruwel” e ke mab ngak. (1 Korinth 16:9, NW) Gur rayog rom ni ngam tababnag yugu reb e maruwel? Ni bod ni, ra ngam un ko regular pioneer ara pioneer ni ayuw ma ba t’uf ni ngam thognag e awa ko machib ni 70 ara 50. Riyul’, ni piin ni pioneer e baga’ farad u wan’ e pi walagrad ni Kristiano nbochan e pigpig nib yul’yul’ ni yad ma ta’. Machane dara lemnaged ni yad ba tolang ngak e pi walagrad ni pumoon nge ppin nbochan ni boor e tayim ni yad ma thognag ko machib. Tin ni ur rin’ed, e kar maruweliyed ngar daged e ngongol ni i rin’ Jesus ni gaar: “Gamad e pi tapigpig ndariy famad. Tin ni kug rin’ed e aram e n’en ni thingar gu rin’ed.”​—Luke 17:10, NW.

¹⁶ Nge un be’ ko pioneer e ba t’uf ni nge gagiyegnag laniyan’, mab yaram, mab m’agan’ ngay ni nge pag fan. Machane, taw’ath ni ra yib riy e ba gaman puluwon. “Rayog ni ngan fanay e Thin rok Got nrogon e aram e bin riyul’ e taw’ath,” rogon ni yog reb e pioneer ni fel’ yangaren ni Tamika fithingan. “Nap’an ni ga be un ko pioneer, ma ga ma fanay e Bible ni gubin ngiyal’. Chiney nap’an ni nggu machib u mit e tabinaw i yan, rayog ni nggu lemnag boch e thin nu Bible nib puluw ko girdi’ ni be’ nge be’.” (2 Timothy 2:15) Reb e pioneer ni Mica fithingan e ke yog ni gaar: “Ngan guy ko uw rogon ni be ayuweg e thin riyul’ e yafas ko girdi’ e reb e taw’ath ni yira ngat ngay.” Reb e fel’ yangaren ni Matthew fithingan e ku ke weliy murung’agen e felfelan’ ni ngan “guy be’ ni ke un ko tin riyul’. Dariy yugu reb e felfelan’ nrayog ni ngan ta’ nga lon.”

17. Uw rogon ni ke gel reb e Kristiano ko lem nde fel’ u murung’agen e maruwel ni ngan pioneer?

¹⁷ Rayog ni ngam fal’eg i lemnag ni ngam un ko pioneer? Sana ga baadag ni ngam un ngay machane ga be lemnag ni dabiyog rom. “U wan’ug e mo’maw’ rog ni nggu un ko pioneer,” ireray e n’en ni yog reb e walag ni ppin ni Kenyatte fithingan. “Dagu lemnag ni rayog rog. Dagu nang ko uw rogon ni nggu tababnag e sabethin maku dabiyog ni nggu weliy fan ban’en ni gu be fanay e Thin nu Bible.” Machane, ke yarmiy e piin ni piilal ni reb e walag ni ppin ni pioneer ni nge un ngak. “Kug felfelan’ ni kug un ngak ko machib,” ireray e n’en ni yib ngan’ Kenyatte. “Bochan e re n’en nem ma kug adag ni nguun ko pioneer.” Ra ngan pi’ e athamgil nga lanin’um min skulnagem boch, ma sana ku ga ra adag ni ngam un ko pioneer.

18. Mang flaab e ke yib ngak e piin ni ka ra uned ko maruwel ni missionary?

¹⁸ Ram un ko pioneer e rayog ni nge ayuwegem ngam un ko reb e maruwel. Ni bod ni, yu wu’ i mabgol e rayog rorad ni ngar skulgad min pi’rad nga bayang ngar machibgad u rom. Piin missionaries e thingara puluwnaged e yafas rorad ko nam ni kafin ra tawgad ngay, ni sana thin riy, nge yalen, nge ggan ndawora mechamgad ngay. Machane taw’ath nra yib e ra achichignag e pi magawon nem. Mildred, ni reb e missionary u Mexico ni ke yoor ban’en ni manang, e ke yog ni gaar: “Dagu kalngan’ug ni kug dugliy ni nggu mang reb e missionary. Ireray e n’en ni gu baadag ni nggu rin’ ni ka nap’an ni ka gub bitir.” Mang e taw’ath ni keb ngak? “U lan e binaw rog, rib mo’maw’ ni ngan pirieg be’ ni nge un ko fol Bible. U roy, e ra bangiyal’ ma aningeg e girdi’ ni gu ma fil e Bible ngorad ni kar tababgad ngar uned i wereg e machib!”

19, 20. Uw rogon ma pigpig u Bethel, nge international service, nge fare Ministerial Training School e kari flaabnag boor e girdi’?

¹⁹ Taw’ath ni boor e ku ke yib ngak e piin ni yad be maruwel u Bethel ko pi tochuch ko Pi Mich Rok Jehovah. Sven, ni reb e walag ni kab pagel ni be pigpig u Chiyamen, e ke yog murung’agen e maruwel rok u Bethel ni gaar: “Gu be thamiy ni gu be rin’ ban’en ni ba’ puluwon ndariy n’umngin nap’an. Susun rayog ni nggu fanay e salap rog ko fayleng. Machane ra gu rin’ ma bod ni gu be ta’ e salpiy rog nga bank ni ke chuchugur ni nge m’ay e salpiy riy.” Riyul’, ni ngan pigpig ndariy e puluwon e ba muun ngay ni ngan pag lanin’uy. Machane ke yog Sven ni gaar: “Nap’an ni ngam sul nga tabinaw rom, ma ga manang ni urngin ban’en ni kam rin’ e re rran nem e fan ku Jehovah. Ma rib fel’ e n’en ni ga ra thamiy.”

²⁰ Boch e walag ni pumoon e kar taw’athgad kar uned ko maruwel ni ka nog e international service ngay, ni aram e yad ma un i toy e tochuch u ba yang. Ba wu’ i mabgol ni kar unew ko maruwel u ba yang ni meruk yay ma kar yoloyew ni gaar: “Pi walag u roy e ri yad ba manigil. Ra kireban’mow ni nggu chuwgow u roy​—ireray e bin meruk yay ni kari ‘kireban’mow.’ Rib fel’ e n’en ni ke buch romow!” Ngemu’ ba’ fare Ministerial Training School. Ireray e n’en nra ayuweg e pi walagdad ni pumoon ni muchugbil ngar salapgad ko tirok Got ban’en. Reb e walag ni ke mu’ ko re skul nem e yoloy ni gaar: “Ke mo’maw’ ngog ni nggog e magar ngomed ko skul ni aram rogon nrib fel’. Gur ka ba’ yugu reb e ulung ni ngari athamgil ni nge skulnagey ni aram rogon?”

21. Mang magawon ni ke yib ngak urngin e Kristiano ko pigpig rorad ngak Got?

²¹ Arrogon, boor e maruwel nrayog ni ngan un ngay. Riyul’, ni boor i gadad e dabiyog ni nge pigpig u Bethel ara yan nga reb e nam. Jesus e ir e ke yog ni piin Kristiano e ra yoor “wom’engin” nib thilthil urngin ya bochan nib thilthil rarogorad. (Matthew 13:23) Ere, n’en ni susun ngada rin’ed ni gadad e Kristiano, e ngarda fanayed e tayim ni rayog rodad,​—ni aram e ngarda pigpiggad ku Jehovah ni be yan u rogon rarogodad. Ra ngada rin’ed ban’en ni aram rogon, ma gad be pining e sorok ngak Jehovah, ma ra mudugil lanin’dad ni ke felan’ ngodad. Mu lemnag Ethel, reb e walag ni ppin ni ke pilibthir u lan reb e nursing home. Ma machibnag e girdi’ ni ku yad ma par ko re naun nem ma ma un ko machib u telefon. Demtrug e magawon rok, ma ku ma pigpig ni polo’ e yafas rok.​—Matthew 22:37.

22. (a) Maku mang boch e kanawo’ nrayog ni ngad pininged e sorok ngak Got riy? (b) Mang ba ngiyal’ nrib fel’ ni be sonnagdad?

²² Machane, dabmu pagtalin ni ngan wereg e machib e kemus ni reb e kanawo’ ni ngada pininged e sorok ngak Jehovah. Gad ra dag e ngongol nib fel’ ma gad be fal’eg yaadad u nap’an ni gad be un ko maruwel, ngu skul, ngu tabinaw, ma aram e gad be felfelan’nag gum’irchaen Jehovah. (Proverbs 27:11) Proverbs 28:20 e be micheg ni gaar: “Be’ nib yul’yul’ e ra yog boor flaab ngak.” Ere thingarda ‘yunged boor e awoch’ ko pigpig rodad ku Got, ya gad manang ni ra yog boor e flaab ngodad riy. (2 Korinth 9:6) Gad ra rin’ e n’en ni aram rogon, ma rayog ni ngad pared ko ngiyal’ ni “urngin ban’en nib fas” e bayra pininged e sorok ngak Jehovah ni riyul’ ni ri bay rogon!​—Psalm 150:6.

[Footnote]

Ka Ga Manang?

• Uw rogon ma girdi’ rok Got e yad ma pigpig ku Jehovah ni “rran nge nep’”?

• Mang magawon e ke mada’nag fare ganong rok Gad, ma mang e be fil ngak e pi Kristiano e ngiyal’ ney?

• Uw rogon ma ngan yan ngan wereg e machib ngak e girdi’ e ba ayuw nib togopuluw ko cham ni ma ta’ Satan?

• Mang ‘kanawo’ ni ba mab’ ni boch e girdi’ e ka ranod ngay, ma mang boch e flaab e keb ngorad?

[Picture on page 23]

Ni bod yu Gad ni kar chamgad ngak e girdi’ ni kar bad ni ngar chamgad ngorad, ma pi Kristiano e thingara chamgad ngak Satan

[Picture on page 25]

Gad ma felfelan’ ko chag nib fel’ u nap’an ni ngan yan ko machib

[Pictures on page 26]

Ngan un ko pioneer e rayog ni nge yognag yugu reb e maruwel, nib muun ngay e:

1. Pigpig ko pi nam i yan

2. Pigpig u Bethel

3. Maruwel ni missionary