Uw Feni Ga’ Fan e Yafas Rom?

BOOR e girdi’ e chiney e yad be par u fithik’ e riya’ nge gafgow ma yad be athamgil nib gel ni bochan ni nge yog ngorad e tin ba t’uf ni ngar pired ni yad bfas. Machane, rayog ni ngari pagan’rad ni polo’ ni Got e “ra ayuweg e ani kan gafgownag” ko mochuch nge kireban’. (Job 36:15) Nge mich u wan’um ni Got e ma lemnag nib ga’fan e yafas ko gubin e girdi’. Jehovah Got ni Tasunmiy e gaar, “Mu piningeg ko rran ko gafgow,” “Mu gu ayuwegem riy.”​—Psalm 50:15, NW.

Ga be pirieg nib mo’maw’ ni nge mich u wan’um ni Faen Tasunmiy e ma lemnagem​—ri taabe’ u fithik’ bilyon e girdi’ nu fayleng—​ma baga’ fan? Ere mu lemnag ko mang e yoloy fare profet ni Isaiah u murung’agen bilyon e t’uf u lan fare bilyon i galaxies u lan fare palpalthib ni gathi ba achig nib liyegdad. Gad ra bieg ni gaar: “Mu sapgad nga lan e lang. Mini’ e sunmiy e pi t’uf ni gimed be guy? En ni be pow’iyrad ni bod baraba’ i salthaw ni pire’, manang urngirad ma pining fithingrad ni tataa bagayad. Gelngin e rib gel, dariy reb ni kaa yan nga bang.”​—Isaiah 40:26.

Ba fel’ u wan’um fan e re n’em? Milky Way galaxy rodad​—ni ir fare solar system rodad e kemus ni bang riy—​e bay e t’uf riy ni lich ko 100 bilyon. Me ere in e galaxies ni ka bay? Dariy be’ ni ri manang, machane yibe susunnag ni 125 bilyon. Uw feni de mudugil urngin e pi t’uf ni ba’ nem! Machane, fare Bible e be yog ngodad ni faani Sunmiy e palpalthib e manang reb nge reb nge fithinganrad.

“Piyan Lolugmed e Goo Ke M’ay i Thi’eg”

‘Machane,’ be’ e sana ra togopuluw ngay, ‘ni rayog ni kemus ni ngan nang fithingan bokum bilyon e t’uf​—ara bokum bilyon e girdi’—​e gathi fan e yibe lemnagrad ni be’ nge be’.’ Ba computer ni ba’ gelngin ndabi pagtalin ban’en e rayog ni nge fek fithingan bokum bilyon e girdi’. Machane, dariy be’ ni ra lemnag ni fare computer e ri be lemnagrad. Yugu aram rogon, ma fare Bible, e be dag ni Jehovah Got e gathi kemus ni manang fithingan bokum bilyon e girdi’ ya kuma lemnag rogorad ni be’ nge be’. I yoloy apostal Peter ni gaar, “Mpaged fan urngin e magafan’ romed ngak,” “ya be lemnag rogomed.”​—1 Peter 5:7.

Jesus Kristus e gaar: “Rayog ni ngan chuw’iy l’agruw chi arche’ ni sparrow fithingan nga ba salpiy nrow machane dariy taa bagayad nra mul nga but’ nde nang e Chitamangimed. Mus nga piyan lolugmed ni ke m’ay i thi’eg. Ere dabmu tamdaggad ya ka ba ga’ famed ngak fa nochi arche’ ni sparrow fithingan.” (Matthew 10:29-31) Ngam gu’ ni de yog Jesus ni Got e kemus nib naab ko mang e ra buch ko fapi sparrow nge girdi’. I gaar: “Ka baga’ famed ngak bokum e sparrows.” Mang fan ni kab ga’ famed? Ya bochan nni ngongliymed “ni bod yaan Got”​—ni rayog ni ngan rin’ e tin fan ko gabul nge langleth ni ngan gi’ e but’ ngan woldug min dag e ngongol nib fel’, nge llowan’, nge pi felngin Got nib tolang.​—Genesis 1:26, 27.

“Ra Ayuweg e Eni Ke Gafgow ni Be Yornag e Ayuw”

Yugu aram rogon ni yu ngiyal’ mab gel e kireban’ ni boor e girdi’ ni be gafgow riy e chiney, ma yafas e ka ba taw’ath ni rib fel’. Ma ngada rin’ed urngin ni rayog rodad ni nguud ayuweged. Fa binem e yafas nga m’on ni micheg Got e kab fel’ ko bin nguun i athamgil ni kemus ni ngani par nib fas u bangiyal’ ni dariy e runguy ma ba gel e amith. N’en nib m’agan’ Got ngay e nge chuwegdad ko gin gad bay riy ko amith nge m’ay fan ya nge yog rodad “ni ngad koled ngad chichiiyed paadad ko bin riyul’ e yafas” ni aram e n’en nib m’agan’ Got ngay ko tabolngin ni fan ko girdi’ ni ke sunmiy.​—1 Timothy 6:19.

Ra rin’ Got urngin e pi n’ey ya ra bagadad ma rib ga’ fan u p’eowchen. Me lemnag Fak i, Jesus Kristus, ni nge pi’ fare biyul ni maligach nib t’uf ni nge chuwegdad ko denen, nge dani flont, nge yam’ ni da feked ko gal ni som’mon e gallabthir rodad ni, Adam nge Efa. (Matthew 20:28) I yog Jesus Kristus ni gaar, “Yi Got e rib t’uf e girdi’ nu fayleng rok,” “ma aram me pi’ Fak ni kari maagirag rok nge yib, ni fan e nge urngin e piin ni michan’rad e aram e dab kur m’ad . . . ma ke yog e yafas ndariy n’umngin nap’an ngorad.”​—John 3:16.

Mang e ra rin’ Got ni fan ngak e piin yafas rorad e kan gafgownag ko amith nge mochuch? Rogon murung’agen Fak, e be yog e Thin rok Got mithagthagnag ni gaar: “Ra ayuweg e ani ke gafgow ni be yor ni ngan ayuweg, maku arrogon e ani kan gafgownag nge demtrug be’ ni dariy be’ ni be ayuweg. Ra kireban’ ko ani sobut’ nge ani gafgow, ma yafas ko piin ni gafgow e ra ayuweg. Ra chuweg e yafas rorad ko gafgow nge maangach.” Mang fan ni ra rin’ e re n’ey? Ya “racha’ rorad [ara, yafas rorad] e rib ga’fan u p’eowchen.”​—Psalm 72:12-14, NW.

Chiney e dabki n’uw nap’an me Got e bayi k’aring “nge sul urngin ban’en nga rogon” u daken fare Gil’ilungun ni am rok u pa’ Fak, ni Jesus Kristus. (Acts 3:21; Matthew 6:9, 10) Ga ra par ni gab fas nge yog nim felfelan’ ko fare yafas ni micheg Jehovah? Binem e gur e ba mil fan ngom. Gamad be ta’mad ngom ni ngam un boch ko pi yaram ni ke fal’eg Got ni nge yibnag urngin e pi taw’ath ney. Piin ni yad ma fal’eg e re ke magazine ney e yad ra felfelan’ ni ngar ayuweged gur nge yog rom.

[Picture on page 5]

“Baga’ fam nga boch e arche’ ni sparrows”