Fonow Ni Fan Ko Piin Nib Mabgol

“Piin ni ppin, um marod nga laniyan’ pi figirngimed, ni Somol e gimed be yan nga laniyan’. Piin ni pumoon, ngari t’uf e piin nleengimed romed.”​—EFESUS 5:22, 25.

1. Susun uw rogon e mabgol u wan’uy?

I YOG Jesus ni mabgol e aram e ke chagiy Got e pumoon nge ppin ngar “taab girdi’gow.” (Matthew 19:5, 6) Mabgol e aram l’agruw ni’ ni ba thil rarogorow ni yow be fil rogon ni nge taareb lanin’row ma ngar maruwelgow u taabang ni taa ban’en ni yow be nameg. Mabgol e ban’en ni kan micheg ni n’umngin nap’an e yafas rok fagali mabgol, ma gathi ke mus ni bugithin ni kan micheg nrayog ni ngan thilyeg. U boch e nam e de mo’maw’ ni nge dar e mabgol, machane u wan’ e pi Kristiano e ba thothup e mabgol. Rayog ni nge dar e mabgol ni faanra bay tapgin ni baga’ fan.​—Matthew 19:9.

2. (a) Mang ayuw ni rayog rok e piin nib mabgol? (b) Mang fan ni baga’ fan ni ngan athamgil ni nge fel’ e mabgol?

² I yog be’ ni ma fonownag e piin ni mabgol ni gaar: “Mabgol nib fel’ e yugu ma thil iyan ya ra thil ya nge pithig boch e magawon nib biech ma nge maruweliy e pi n’en ni bay nra ayuweg e mabgol u nap’an ni yow ra ilal iyan.” Ma boch ban’en nra ayuweg e mabgol rok e pi Kristiano e aram e Bible, nge ayuw rok e pi Kristiano ni yad, ma baga’ e ayuw ko fare thin nib fel’ u thilrad Jehovah ni ke fel’ ni bochan e meybil. Ba mabgol nib fel’ e ra par nib n’uw nap’an, ma ra falan’nag ma ra gapasnag laniyan’ e ani figirngiy nge ani leengiy. Machane bin ni ka baga’ fan e ra nog e sorok ngak Jehovah ni bochan ya ir e sunmiy e mabgol.​—Genesis 2:18, 21-24; 1 Korinth 10:31; Efesus 3:15; 1 Thessalonika 5:17.

Mu Folwok Rok Jesus Nge Ulung Rok

3. (a) Mu weliy e fonow rok Paul ngak e piin nib mabgol? (b) Mang kanawo’ nib fel’ ni ke dag Jesus?

³ Ke l’agruw biyuˈ e duw e chiney ni ke fonownag apostal Paul e pi Kristiano ni yad mabgol ni gaar: “Ere piin ni ppin e thingar uranod nga laniyan’ pi figirngirad u gubin ban’en, ni bod rogon girdien e galesiya ni yad be yan nga laniyan’ Kristus. Piin ni pumoon, ngari t’uf e piin nleengimed romed ni bod rogon feni t’uf girdien e galesiya rok Kristus me pi’ e pogofan rok ni fan ngorad.” (Efesus 5:24, 25) Rib fel’ ni ke taarebnag Paul e piin nib mabgol ko Kristus nge ulung rok! Pi leengiy ni Kristiano ni yad be yan nga laniyan’ e pumoon rorad e yad be folwok e ulung ni be yan nga laniyan’ Kristus ni ir lolgen e ulung rok. Pi figirngiy nib mich u wan’rad ni yad be t’ufeg e ppin rorad ni yugu demutrug ko bay e magawon fa dariy e yad be folwok rok Kristus ni ma t’ufeg e ulung rok ma ma ayuweg.

4. Uw rogon nrayog ni nge fol e piin ni figirngiy rok Jesus?

⁴ Pi figirngiy ni yad e Kristiano e yad lolgen e tabinaw rorad, machane bay be’ ni ir lolugrad, ni ir Jesus. (1 Korinth 11:3) Ere bod rogon ni ma ayuweg Jesus e ulung rok ma ku arrogon ni ngar ayuweged e pi tabinaw rorad ko tin nib t’uf ko michan’ rorad nge dowef rorad ma yad ra rin’ u fithik’ e t’ufeg ni yugu aram rogon ni thingar ra paged farad. Ke m’on e tabinaw rorad me tomur e tin ni yad ba adag. Be gaar Jesus: “Ere um rin’ed ngak e girdi’ e tin ni gimed ba adag ni ngar rin’ed ngomed.” (Matthew 7:12) Ri baga’ fan e re machib nem u lan e mabgol. Aram e n’en ni tamilangnag Paul ni faani gaar: “Pumoon e thingari t’uf rorad e piin nleengirad ni bod rogon nib t’uf dowrad rorad. . . . Ya dariy be’ ni kaa fanenikay e birok e dowef. Ya ma duruw’iy ma ma ayuweg.” (Efesus 5:28, 29) Ani figirngiy e ra duruw’iy ma ra t’ufeg e ppin rok ni bod rogon ni ma duruw’iy ir ma ma t’ufeg ir.

5. Uw rogon nrayog ni nge fol e piin ni leengiy rok e ulung ni Kristiano?

⁵ Pi leengiy ni yad ma tay fan Got e yad ma folwok rok e ulung rok Kristus. Nap’an ni immoy Jesus u fayleng, ke m’agan’ pi gachalpen ngay ni ngar n’aged e maruwel rorad ngar leked Jesus. Ma tomren ni yim’ Jesus e ka yad be yan nga laniyan’ ma ke chugur ni ke 2,000 e duw e chiney ni ka yad be yan nga laniyan’ ma yad be fol ko gagiyeg rok u gubin ban’en. Maku arrogon e pi leengiy ni Kristiano ni dar dariy fannaged e pumoon rorad ma dar dariy fannaged rogon yalen e mabgol u lan e Babyor nib Thothup. Danga’ ya yad ma ayuweg e pumoon rorad ni yad be fol rorad ma yad be maruwel u taabang ko pumoon rorad ni aram e kanawo’ ni yad be pi’ e athamgil nga laniyan’ e pumoon rorad. Faanra arrogon e ngongol rok e ani figirngiy nge ani leengiy ma ri ra fel’ e mabgol rorow ma yow ra falfalan’ riy.

Nguum Pired E Pi Leengimed

6. Mang e fonow rok Peter ngak e piin ni figirngiy, ma mang fan ni baga’ fan e thin rok?

⁶ Ki fonownag apostal Peter e piin nib mabgol, ma rib tamilang e fonow rok ngak e piin ni figirngiy. Be gaar: “Ma ku er rogomed e piin ni pumoon ni nguum pired e pi leengimed ma thingar um nanged ni yad mmeewar ko pumoon, ere thingar um tiyed farad; ya ku er rogorad nra pi’ Got e tow’ath rorad ni yafos ni bod gimed. Mu rin’ed ni ara’ rogon nge dabi magawon ban’en ko meybil ni gimed be pi’ ngak Got.” (1 Peter 3:7) Fene ga’ fan e thin rok Peter e be m’ug ko tin tomur e thin rok. Ya be yog ni faanra dabi tay e pumoon fan e ppin rok ma ra kireb thilrow Jehovah. Ma ra magawon e pi meybil rok ngak Got.

7. Uw rogon ni nge tay e pumoon fan e ppin rok?

⁷ Ere uw rogon nra tay e pumoon fan e ppin rok? Ngan tay fan e be yip’ fan ni ngan t’ufeg ma ngan liyor. Sana ra lemnag boor e girdi’ ni gathi arrogon e ngongol ngak e piin ni ppin. I yog be’ ni fil morngaagen piyu Greece ni gaar: “Rogon e motochiyel nu Roma ma dariy mat’awen be’ ni ppin. Ya rogon e motochiyel e ir bod be’ ni bitir. . . . Ma thingari fol ko pumoon rok ma pumoon rok e ra yog e thin.” Rib thil e re thin nem ko machib nu Kristiano! Ya be’ ni figirngiy ni Kristiano e ma tay fan e ppin rok. Ma ngongol fare pumoon ngak e ppin rok nrogon e machib nu Kristiano ma gathi yugu ra rin’ e tin ni ba adag ni nge rin’ ngak e ppin rok. Maku ra t’ufeg me “nang rarogon” ni mmeewar e ppin rok.

Uw Rogon Ni Ke “Meewar”?

8, 9. Uw rogon ni taareb rogon e piin ni ppin nge piin ni pumoon?

⁸ Faani yog Peter nib “meewar” e ppin e gathi be yip’ fan ni ba sobut’ ko pumoon ara dariy e michan’ rok ara llowan’ rok ni bod e pumoon. Riyul’ ni bay e taw’ath rok boor e pumoon u lan e ulung ni dabiyog ni nge un e piin ni ppin ngay, mu lan e tabinaw e be yan e piin ni ppin nga laniyan’ e pumoon rorad. (1 Korinth 14:35; 1 Timothy 2:12) Machane taareb rogon e michan’ nge gum’an’ ni nge tay e piin ni figirngiy nge leengiy ma taareb rogon e motochiyel ni thingar ra folgad ngay nde mutrug ko pumoon ara ppin. Ma be yog Peter ni “ra pi’ Got e tow’ath ni yafos” ngak e piin ni figirngiy nge leengiy. Ere taareb rogon e pumoon nge ppin u p’eowchen Jehovah Got u nap’an nra taw’athnagrad. (Galatia 3:28) Ke yol Peter ngak e pi Kristiano ni kan duguliyrad ko kan ni thothup ko bin somm’on e chibog. Ere nap’an ni yog ni “ngar uned ngak Kristus ngar fanayed e tin ni ke tay Got ni fen” e be yip’ fan ni taareb rogon e athap rok e piin ni pumoon nge piin ni ppin ni ngar uned ngak Kristus u tharmiy. (Roma 8:17) Ere ra taw ko ngiyal’ ni pumoon nge ppin e ra mang prist nge pilung u Gil’ilungun Got u tharmiy!​—Revelation 5:10.

⁹ Ere gathi ba sobut’ e piin ni leengiy ni Kristiano ni kan duguliyrad ko kan ni thothup ngak e pumoon rorad ni Kristiano ni kan duguliyrad ko kan ni thothup. Mu ku taareb rogon e piin ni yad be athapeg e par u fayleng ni de sobut’ e piin ni ppin ngak e piin ni pumoon. Ya piin ni pumoon nge piin ni ppin ko “fare ulung ni baga’” e kar luk’naged e mad rorad kar wechwechnaged nga rachaen fare Fak e Saf. Piin ni pumoon nge piin ni ppin ma yow l’agruw ni yad be pining e sorok ngak Jehovah “nnep’ nge rran” u fayleng iyan. (Revelation 7:9, 10, 14, 15) Piin ni pumoon nge ppin e yad be athapeg e ngiyal’ ni “yad ra un ko flaab rok pi fak Got” mi yad falfalan’ ko “yafas ni ir e bin riyul’ e yafas.” (Roma 8:21; 1 Timothy 6:19) Ere urngin e Kristiano ni yugu demutrug ko kan duguliy ko kan ni thothup ara girdien fa yugu boch e saf ma yad ma pigpig ku Jehovah ni yad “taab ran’ i saf ma taa be’ e be gafaliyrad.” (John 10:16) Aram fan ni ba t’uf rok e piin ni figirngiy nge leengiy ni Kristiano ni ngar tew farow!

10. Uw rogon nib “meewar” e piin ni ppin?

¹⁰ Maku uw rogon ni kab “meewar” e piin ni ppin? Sana ku be yip’ fan Peter ni kab achig e piin ni ppin ngak e pumoon ma dariy gelngirad ni bod gelngin e pumoon. Ma chiney ni gad tadenen ma ke gafgow e piin ni ppin ni bochan e yad ma diyen ya kan taw’athnagrad ni ngar gargeleg e bitir. Piin ni kab rugod e ra magawon u gubin e pul. Ere thingar ni ayuwegrad min tay farad u nap’an ni yad mmagawon ara nap’an ni yad ba diyen ara be gargel. Ani figirngiy ni ma tay fan e ppin rok me ayuweg e ku be ayuweg e mabgol rok ni nge fel’.

Tabinaw Ni De Taareb E Machib Riy

11. Uw rogon nrayog ni nge fel’ e mabgol ni yugu aram rogon nib thil e teliw rorow?

¹¹ Ra uw rogon ni faanra ba thil e machib rok l’agruw e mabgol ni bochan e ke mich bagayow ko machib nriyul’ ko Kristiano ma bagayow e dawori mich u wan’? Rayog ni nge fel’ e re mabgol nem, fa? Rayog ni nge fel’ ya aram rogon boor e girdi’. L’agruw e mabgol nib thil e machib rorow e rayog ni nge fel’ e mabgol rorow ya nge par nib n’uw nap’an ma nge yog e falfalan’ ngorow riy. Ma yow mabgol u p’eowchen Jehovah; ma yow “taab girdi’.” Ere ka nog ngak e pi Kristiano ni yad mabgol ni ngar pared rok e mabgol rorad ni dar uned ko machib ni faanra ba m’agan’ faanem ni de mich u wan’ ngay. Ma faanra bay e bitir rorow ma ra fel’ rogon e bitir ni bochan e michan’ rok fare llabthir ni Kristiano.​—1 Korinth 7:12-14.

12, 13. Uw rogon nrayog ni nge ayuweg e piin ni ppin ni Kristiano e pumoon rorad ni de mich u wan’rad nrogon e fonow rok Peter?

¹² I fonownag Peter e piin ni ppin ni Kristiano ni de mich u wan’ e pumoon rorad. Maku rayog ni ngan fanay e thin rok ngak e piin ni pumoon ni de mich u wan’ e ppin rorad. Be gaar Peter: “Ma ku er rogomed pi leengiy nthingar um folgad rok pi figirngimed, ni fan e faanra ba’ boch i yad ndawori mich e thin rok Got u wun’rad ma rayog ni nge mich u wun’rad ni bochan pangimed. Ma aram e dakuriy fan bbugithin ni nga mogned ngorad ya bay ra guyed rogon feni machalbog pangimed nge rogon ni gimed be ta’ farad.”​—1 Peter 3:1, 2.

¹³ Faan rayog ni nge weliy reb e ppin e machib ngak e pumoon rok mab fel’. Machane uw rogon ni faanra dubun ni nge motoyil? Ir rok. Machane gathi be yip’ fan ni dakuriy ban’en ni ngan rin’ ya baga’ angin pangin e Kristiano. Bay boor e pumoon ni gathi ri yad ba adag e machib ko somm’on ara kar togopuluwgad ko machib rok e ppin rorad, machane “ke mel’egrad Got ni nge yog e yafos ndariy n’umngin nap’an ngorad” u tomren ni kar guyed pangin nib fel’ rok e ppin rorad. (Acts 13:48) Mus ni faanra dabi un fare pumoon ko machib ni Kristiano ma ra falan’ ko pangin e ppin rok ma ku bay angin ko mabgol rorow. Reb e pumoon ni ppin rok e reb e Mich Rok Jehovah e ke yog ni dabiyog rok ni nge fol ko yalen e Pi Mich Rok Jehovah. Machane i yoloy fare pumoon ngak reb e shimbung me yog ni ir “be’ ni figirngiy ni ba falfalan’ ni bochan e ba fel’ e ppin rok” me pining e sorok ngak e ppin rok nge Pi Mich Rok Jehovah u lan e re shimbung nem.

14. Uw rogon nrayog ni nge ayuweg e piin ni pumoon e ppin rorad ni de mich u wan’rad?

¹⁴ Pi figirngiy ni Kristiano ni kar folgad ko fonow rok Peter e kar ayuweged e ppin rorad ni ngar uned ko machib ni bochan e ngongol rorad. Piin ni leengiy ni de mich u wan’rad e kar guyed e pumoon rorad ni yad ra rin’ e maruwel rorad, ma dar adbeyed e salpiy rorad ko tamagow, nge muun rrum nge gambling ma dakur rogned e thin nib kireb ngak e ppin rorad. Boch e pi girdi’ ney e kar mada’gad girdien e ulung ni Kristiano. Ma yad ba adag e t’ufeg ni bay ko fare ulung i walag, ma n’en ni kar guyed ko girdien e ulung e ke chugurnagrad ngak Jehovah.​—John 13:34, 35.

Rarogon U Fithik’ Laniyan’

15, 16. Miti mang pangiy rok e ppin ni Kristiano nra ayuweg e pumoon rok ni de mich u wan’?

¹⁵ Miti mang pangiy e ra ayuweg be’ ni figirngiy? Bin riyul’ riy e aram e ngongol ni bay ko piin ni ppin ni Kristiano. Be gaar Peter: “Ma susun e dab mu ted ban’en nga dowmed ni nge fal’eg yaamed ngam pidoranggad, ni bod rogon ni gimed ma fal’eg iyan lolugmed, ara churuwo’ ni gimed am tay nga dowmed, ara mad ni gimed ma yin’. Ya lanin’med e nge par nib pidorang, ni aram e pidorang ndabi m’ay ni aram e lem nib sumunguy ma ba gapas , ni ir e ba ga’ fan u mit Got. Ya ara’ rogon e piin ni ppin ni kakrom ni ur ngongliyed rogorad ni ngar pidoranggad, ni piin ni ppin ni yad ba yul’yul’ ngak Got kar pied ni Got e ke l’agan’rad ngak; ma yad be fol rok figirngirad. I Sarah e aram rogon; i fol rok Abraham mi i pining Sarah Abraham ni gaar “Masta rog.” Gimed e chiney e kam manged bogi ppin ni pi fak ni faanra um rin’ed e tin nib fel’ ma damur tamdaggad nga ban’en.”​—1 Peter 3:3-6.

¹⁶ I fonownag Peter e piin ni ppin ni Kristiano ni nge dab ra pagan’rad ko pidorang rorad. Ya ngar paged ni nge guy e pumoon rorad angin e machib nu Bible ko rarogon u fithik’. Ma nge guy e pumoon rok e bin nib biech e pangiy ni be maruwel. Ma sana ra guy nib thil ko bin ni kakrom pangin e ppin rok. (Efesus 4:22-24) Dabi siy ni ra falan’ ko “lem nib sumunguy mab gapas” ni bay ko ppin rok ma ra tay ni ban’en ni ba gamog. Gathi goo ra falan’ e ani figirngiy ngay ya ku “ir e ba ga’ fan u mit Got.”​—Kolose 3:12.

17. Uw rogon ni ke dag Sarah e kanawo’ nib fel’ ngak e piin ni ppin ni Kristiano?

¹⁷ Ka nog ngak e piin ni ppin ni ngar folwokgad rok Sarah, ma ngan folwok rok ni yugu demutrug ko mmich u wan’ e pumoon rorad fa danga’. Ke tay Sarah ni Abraham e ir lolgen e tabinaw. Mus nu lan gumerchaen Sarah ma ke pining e “masta” ngak Abraham. (Genesis 18:12) Gathi kan sobut’nag Sarah ni bochan e pining “masta” ngak Abraham. Ya ba tamilang ni ir be’ nib gel e michan’ rok ngak Jehovah. Ma ir bang fare “ulungen e piin nib yad e mich” ma michan’ rok e ra n’igindad ni “ngada athamgiliyed e gin ni ka ba’ ni ngada mil gad riy ngada tawgad ko gin ni gad be nameg.” (Hebrews 11:11; 12:1) Gathi yibe dariy fannag e pi leengiy ni Kristiano ni faan yad ra bod Sarah.

18. Mang boch e machib ni ngan fol ngay u lan e tabinaw ni de taareb e machib riy?

¹⁸ U lan ba tabinaw ni de taareb e machib riy ma ani figirngiy e ka ir lolgen. Faanra mmich u wan’ e ani figirngiy ma de mich e ppin rok ma ra tay fan e machib rok e ppin rok machane dabi kirebnag e birok e michan’. Ma faanra ani leengiy e ir e ke mich u wan’ ma ku dabi kirebnag e michan’ rok. (Acts 5:29) Ma dabi togopuluw ko gagiyeg rok e pumoon rok. Ra tay fan e pumoon rok ni ir lolgen e tabinaw ma ra par u tan e “motochiyel rok e pumoon rok.”​—Roma 7:2.

Fonow Ko Bible Ni Bay E Gonop Riy

19. Mang boch ban’en ni ma magawonnag e mabgol, ma uw rogon nrayog ni ngan togopuluw ko pi magawon nem?

¹⁹ Ngiyal’ ney e bay boor ban’en nrayog ni nge magawonnag e mabgol. Boch e pumoon e dar rin’ed e maruwel ni ke mil fan ngorad. Ma boch e ppin e dubrad ni ngar ranod nga laniyan’ e pumoon rorad. U lan boch e mabgol e ma gafgownag bagayow bagayow. Ma ku bay e magawon rok e pi Kristiano ni yad mabgol ni bochan ni bay e magafan’ ni bochan e salpiy, ara bochan e yad tadenen ma ri de yalen e fayleng. Machane ma flaabnag Jehovah e pi pumoon nge ppin ni Kristiano ni yad ma fol ko machib nu Bible ni yugu demutrug rogon e magawon rorad. Mus ni faanra ke mus ni bagayow fagali mabgol e ra fol ko machib ko Bible ma kab fel’ rogon e mabgol ko bin ni yow l’agruw ni dar folgow ko machib. Maku ma t’ufeg Jehovah e pi tapigpig rok ni yad ba yul’yul’ ko n’en ni kar micheged u nap’an ni m’agpa’gad ni yugu demutrug e magawon rorad. Dabi pag Jehovah talin e yul’yul’ ni yad be tay.​—Psalm 18:25; Hebrews 6:10; 1 Peter 3:12.

20. Mang e fonow rok Peter ngak urngin e Kristiano?

²⁰ Tomren ni fonownag apostal Peter e piin ni pumoon nge ppin ni yad mabgol me pi’ e athamgil nga lanin’rad. Be gaar: “Ere thingari gimed gubin ni nge taareb rogon e lem romed mu um runguyed gimed; me bigimed me t’uf rok bigimed nrogon e piin ni walag ni girdien Kristus, mu um pired nib fel’ e thin romed ngomed ma ba sobut’ lanin’med ngomed. Dab mu puluwniged e tagan, ara mpuluwniged e thin nib kireb; machane ngam fulweged taban nga ban’en nib fel’, ya ban’en nib fel’ e ke yog Got ni nge pi’ ngomed ko ngiyal’ ni faani piningmed.” (1 Peter 3:8, 9) Ri bay e gonop ko re fonow nem ni fan ko urngin e girdi’, ma baga’ ni fan ko piin nib mabgol!

Ka Ga Manang?

• Uw rogon ni ma fol e piin ni figirngiy ni Kristiano rok Jesus?

• Uw rogon ni ma fol e piin ni leengiy ni Kristiano rok fare ulung?

• Mang boch e kanawo’ ni rayog ni nge tay e pumoon fan e ppin rok?

• Mang e bin th’abi fel’ e kanawo’ ni nge ayuweg reb e ppin ni Kristiano e pumoon rok ni de mich u wan’?

[Picture on page 27]

Be’ ni figirngiy ni Kristiano e ra t’ufeg ma ra ayuweg e ppin rok

Be’ ni leengiy ni Kristiano e ra tay fan ma ra pining e sorok ngak e pumoon rok

[Picture on page 29]

Ba thil e machib ko Kristiano ko motochiyel nu Roma, ya rogon e machib nu Kristiano e thingari tay e pumoon fan e ppin rok

[Picture on page 30]

Piin ni pumoon nge piin ni ppin ko fare “ulung ni baga’” e yad be athapeg e yafas ni manemus u Paradis

[Picture on page 31]

U wan’ Sarah ma Abraham e masta rok