Jehovah e Ir e Ma “Taw’athnag e Piin ni Be Gayiy Got”
“En nra yib ngak Got e thingari mich u wan’ ni ba’ Got ma ra taw’athnag e piin ni yad be gayiy Got.”—HEBREWS 11:6.
1, 2. Mang fan ni boch e tapigpig rok Jehovah e yad be cham e lem ni be magawonnagrad?
“KE CHUCHUGUR ko 30 e duw ni kug mang reb e Mich Rok Jehovah, machane dagur lemnag ni bay rogog ni ngan piningeg ni aram rogon,” ireray e n’en ni ke yog Barbara.a “Yugu aram rogon ni kug un ko machib ni gubin ngiyal’ ara pioneer min pi’ ngog boch e maruwel u lan e ulung, ma dariy reb riy ni ke k’aringeg ni ngari mich u wan’ug ni bay rogog ni ngan piningeg ni aram rogon.” Maku aram rogon ni ke yog Kieth ni gaar. “Yu ngiyal’ ma ke magawon lanin’ug ya tapigpig rok Jehovah e boor tapgin ni ngar felfelan’gad, machane gag e danga’,” Miki yog ni. “Re n’en ney e ra magawon’nag lanin’uy, me gel i yan e kireb riy.”
2 Boor ko fapi tapigpig rok Jehovah nib yul’yul’, ni tin kakrom nge tin chiney, e kar chamgad e lem ni aram rogon. Gur, ma buch rom e n’en ni aram rogon fa? Sana ke kireban’um nrib gel ni bochan ni boor e magawon ni keb ngom, ma be m’ug ni walagem e ba felfelan’, ma dariy ban’en ni be magawonnag. Bochan e re n’ey, ma rayog ni ngam lemnag ni dam fel’ u wan’ Jehovah ma dariy rogom ni nge lemnagem. Dabmu gur ngam duguliy ni aram rogon. Be micheg e Bible ngodad ni gaar: ‘Der ma pag ma der ma fek owchen ko gafgow ni be ta’ e en ni ke gafgow; der ma par u urel rok, machane ma fulweg taban e meybil rok ni ra wenig ngak ni nge ayuweg.’ (Psalms 22:24) Pi thin ni yiiy u murung’agen fare Messiah e be dag ni gathi kemus ni ma motoyil Jehovah ngak e girdi’ rok nib yul’yul’ ya ku ma taw’athnagrad.
3. Mang fan ni ku ma yib e mochuch nge magawon ko re fayleng ney ngodad?
3 Dariy be’ ni dabi yib e pi mochuch ara magawon ko re fayleng ney ngak—ni ki mada’ ko girdi’ rok Jehovah. Gad be par u ba fayleng ni bin th’abi ga’ e toogor rok Got, ni Satan ni fare Moonyan’ e ir e be gagiyegnag. (2 Korinth 4:4; 1 John 5:19) Pi tapigpig rok Jehovah e der ma yororiyrad u fithik’ e maang’ang, ya tin riyul’ riy e yad e bin som’mon ni ma lemnag Satan ni nge gafgownagrad. (Job 1:7-12; Revelation 2:10) Arfan nib t’uf ni ngad “k’adedan’dad ko gafgow” ma uda “meybilgad ni gubin ngiyal’,” nib pagan’dad ni be ayuwedad Jehovah nge yan i taw ko ngiyal’ ni ke duguliy Got. (Roma 12:12) Thingar dabda paged ni nge gel ngodad fare lem ni de t’ufegdad Got, ni Jehovah!
Pi Girdi’ Kakrom ni Kar K’adedan’rad
4. Mog boch e tapigpig rok Jehovah nib yul’yul’ ni kar k’adan’gad ko magawon ni ri ma k’aring e kireban’.
4 Boor e pi tapigpig rok Jehovah kakrom ni thingara k’adan’gad ko pi n’en ni ri ma k’aring e kireban’. Reb riy, e Hannah, ni “kari kireban’” ya dariy e bitir rok—bochan e re magawon nem ma ke lemnag ni ke pagtalin ara ke digey Got. (1 Samuel 1:9-11) Nap’an ni ke l’ol’og Jezebel ni Leengin e Pilung Elijah, me rus me meybil ngak Jehovah ni gaar: “Somol re gafgow ney ni ara’ ga’ngin e dabiyog rog. Mfek e pogofan rog, ya kab fel’ ni nggum’!” (1 Kings 19:4) Ma sana kaygi gel e kireban’ rok Paul ni apostal nga thibngin u nap’an ni yog ni gaar: “Faanra gub adag ni nggu rin’ e tin nib fel’, ma ke mus ntin nib kireb e rayog ni gu rin’.” Miki yog ni gaar: “Ere kar gu gafgow!”—Roma 7:21-24.
5. (a) Uw rogon ni kan taw’athnag Hannah, nge Elijah, nge Paul? (b) Uw rogon ni ra fal’eg e Thin rok Got lanin’dad nfaanra gad be cham ko lem ni be k’aring e kireban’ ngodad?
5 Riyul’, gad manang ni Hannah, nge Elijah, nge Paul e yad urngin ni kar k’adan’gad ko pigpig ku Jehovah, ma kari taw’athnagrad. (1 Samuel 1:20; 2:21; 1 Kings 19:5-18; 2 Timothy 4:8) Yugu aram rogon, ma kar chamgad ko urngin e lem nib thil thil ni bod e kireban’, nge chuwan’uy, nge ma rus. Ere dab da gingad ngay nfaanra ke yib ngodad e lem ni be k’aring e kireban’ ngodad. Ere, mang e rayog ni ngam rin’, nfaanra magawon rom e ke k’aringem ni ngam lemnag ko riyul’ ni gab t’uf rok Jehovah fa? Rayog ni nge fal’eg e Thin rok Got lanin’um. Reb riy, e fa binem e guruy ni ke yan, e kada weliyed riy murung’agen e thin ni ke yog Jesus ni “ke m’ay i theeg” rok Jehovah piyan lolugmed.” (Matthew 10:30) Pi thin nem e be dag ni ri ma lemnag Jehovah urngin e tapigpig rok ni be’ nge be’. Maku, mu lemnag e fanathin ni weliy murung’agen e arche’ ni sparrow. Faanra dariy reb e pi arche’ nem nib achichig ni ke mul nga but’ ni de nang Jehovah, ma mang fan ni dabi tiyan’ ko magawon romed?
6. Uw rogon ni nge ayuweg e Bible e piin ni ke yib ngorad e lem ni be k’aring e kireban’?
6 Gur, gadad e girdi’ ni daworda flontgad e rayog ni nge tay Jehovah Got ni ir e en Ta Sunmiy nrib gel gelngin nib tolang puluwdad? Arrogon! Tin riyul’ riy, e boor e thin nu Bible ni be micheg ngodad ni aram rogon. Gad ra tiyan’dad ko pi thin ney, ma rayog ni ngad uned i yog fare thin rok fare psalmist ara ta tang ni gaar: “Nap’an ni ke yoor e lem ni be magawonnageg, ma thin rom ni be fal’eg lanin’uy e ke tabab ni nge ayuweg e yaal rog nib fel’ rogon.” (Psalms 94:19, NW) Gad ra weliy boch ko pi thin rok Got nra ayuwegdad ni ngad nanged fan nrib fel’ rogon ni baga’ fadad u wan’ Got ma ra taw’athnagdad ni gad be ul’ul i rin’ e tin nib m’agan’ ngay.
Tirok Jehovah nib “Ga’ Fan”
7. Mang yiiy e ma pi’ e athamgil nga lanin’uy ni ke pi’ Jehovah ngak fare nam nib kireb u daken Malaki?
7 U nap’an e bin lal e chibog ko B.C.E. ma rib kireb rarogon piyu Jew. Piin ni prist e ur feked e gamanman ni ma pi’ e girdi’ ni de fel’ nga ur pied ngak Jehovah ni nge mang maligach u daken e altar. Piin tapuf oloboch e yad ba laniyan’. Pig, nge malulfith ligin, nge sasalap, nge ngongol ni darngal e yoor. (Malaki 1:8; 2:9; 3:5) I weliy Malaki reb e yiiy ni yira ngat ngay ni fan ko re nam nem nib kireb. Ra yib ba ngiyal’, ni ra sulweg Jehovah e girdi’ rok nga rogon. Be yog ni gaar: “Bay ra manged e tirog e girdi’ ko chirofen ni bay gu maruwel, ma bay ra pired ni kari mil suwrad ngog. Bay gu runguyrad ni bod ba matam ni runguy ba pagel ni fak ni ma pigpig ngak.”—Malaki 3:17.
8. Mang fan ni Malaki 3:17 e ra puluw ko fare ulung ni baga’ u reb e kanawo’?
8 Yiiy rok Malaki e ke lebug e ngiyal’ ney ni bay rogon ko piin Kristiano ni kan dugliyrad ko kan ni thothup, ni kar manged ba nam ni be yip’ fan ban’en ni 144,000 e girdi’ ni bay riy. Re nam nem e riyul’ ni Jehovah e ke “mel’egrad.” (1 Peter 2:9) Yiiy rok Malaki e ku rayog ni nge pi’ e athamgil nga laniyan’ fare “ulung ni baga’” ni kar “sak’iygad u p’eowchen tagil’ Got nge fare Fak e Saf, ni ka ron’ed e mad nib wechwech.” (Revelation 7:4, 9) Kar manged taab ulung ngak e piin ni kan dugliyrad, u tan taareb e Tachugol saf, ni Jesus Kristus.—John 10:16.
9. Mang fan ni “baga’ fan” u wan’ Jehovah e girdi’ rok?
9 Uw rogon u wan’ Jehovah e piin ni kar mel’eged ni ngar pigpiggad ngak? Rogon ni yog ko Malaki 3:17, e be sap ngorad ni rogon ni be sap ba matam ni ma t’ufeg fak. Ma ngam guy e thin ni rib fel’ ni be weliy Got u murung’agen e girdi’ rok—ni “ban’en nib ga’ fan.” Boch e Bible e kan piliyeg e re n’em riy ni “tirog e girdi’,” ma reb e “chugum rog nib tolang puluwon,” ma reb e “pi nochi malang rog nib tolang puluwon.” Mang fan ni ma sap Jehovah ngak e piin ni ma pigpig ngak nib ga’ fan ni aram rogon? Ya reb riy, e ir e Got ni ri ma pining e magar. (Hebrews 6:10) Ma chuchugur ngodad ma baga’ fan u wan’ e piin ni be pigpig ngak ni yib u gum’ircharad.
10. Uw rogon ni ke ayuweg Jehovah e girdi’ rok?
10 Bay ban’en rom nib tolang puluwon ni ga be ta’ ni ban’en ni baga’ fan? Gur, gathi ngam athamgil ni ngam yoror riy? Maku ma rin’ Jehovah ni aram rogon ko tirok ni “baga’ fan u wan’.” Riyul’, ni der ma ayuweg e girdi’ ko urngin e skeng nge gafgow ni ma yib ngorad. (Eklesiastes 9:11) Machane rayog rok Jehovah ni nge rin’ ma bayi ayuweg e michan’ rok e pi tapigpig rok nib yul’yul’. Ma pi’ gelngirad ni fan ni ngar k’adan’gad ko urngin e skeng. (1 Korinth 10:13) Ere, ke yog Moses ngak e girdi’ rok kakrom, ni piyu Israel ni gaar: “Mpired ni gimed ba gel ma damur rusgad. . . . Ya Got romed, ni aram Somol e bayi un ngomed; dabi pagmed ngam wargad ara n’agmed.” (Deuteronomy 31:6) Ma rin’ Jehovah ban’en ngak e girdi’ rok ni ma fel’ rogorad riy. Yad e girdi’ ni “baga’” farad u wan’.
Jehovah e En “Ma Pi’ e Taw’ath”
11, 12. Uw rogon ma ngan tayfan e maruwel rok Jehovah ni ir e Taw’ath nagdad e ra ayuwegdad ni dabki maruwaran’dad?
11 Reb e mich riy nib ga’ fan u wan’ Jehovah e pi tapigpig rok e aram ma taw’athnagrad. Ke yog ngak piyu Israel ni gaar: “Mu skengniged gag, mi gimed guy ni bay gu bing mban e tharmiy mu gu puog nga dakenmed e pi n’en nib fel’ nge pag e fol riy.” (Malaki 3:10) Riyul’, ni boch nga ram, ma ra taw’athnag Jehovah e pi tapigpig rok ko yafas ni dariy n’umngin nap’an. (John 5:24; Revelation 21:4) Re taw’ath ney nrib tolang puluwon e be dag e t’ufeg rok Jehovah nge gol ma ri baadag ni nge pi’ ban’en. Maku be dag e re n’ey ni baga’ fan u wan’ e piin ni kar mel’eged ni ngar pigpiggad ngak. Ngan fil rogon ni ngan lemnag ni Jehovah e ri ma Taw’ath nagdad e ra ayuwegdad ni dab ki maruwaran’dad ko tha’ rodad ngak. Tin riyul’ riy, Jehovah e be ta’ ir ngodad ni ngaud sapgad ngak ni be’ ni ma Taw’athnigey. I yoloy Paul ni: “Dariy be’ nra fel’ u wan’ Got ni faanra de mich Got u wan’. Ya en nra yib ngak Got e thingari mich u wan’ ni ba’ Got ma ra taw’athnag e piin ni yad be gayiy Got.”—Hebrews 11:6.
12 Riyul’, ni gad be pigpig ku Jehovah ya ba t’uf rodad—ni gathi kemus ni bochan ni ke micheg ni nge taw’athnagdad. Machane, gad ra tay nga lanin’dad fare athap rodad ni fare taw’ath e gathi ban’en nde puluw ara gad be siin. (Kolose 3:23, 24) Bochan ni yad ba t’uf rok ma baga’ farad u wan’, me Jehovah e ke rin’ ban’en ko som’mon me taw’athnag e piin ni ri yad be gayiy Got.
13. Mang fan ni fare yaram ko biyul e aram e mich riy nrib gel ni gadad ba t’uf rok Jehovah?
13 N’en ni rib tamilang ni be dag nib ga’ fan e girdi’ u p’eowchen Jehovah e aram e yaram rok ni ke pi’ fare biyul. I yoloy John ni apostal ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Fare yaram ko biyul rok Jesus Kristus e ba togopuluw ko lem ni dariy fadad ara dada t’ufgad rok Jehovah. Tin riyul’ riy, e faanra ke pi’ Jehovah e n’en nrib tolang puluwon ni fan ngodad—ni aram e ke pi’ Fak ni kari maagirag rok—ma rib mudugil nri gadad ba t’uf rok.
14. Mang e be dag ko uw rogon fare biyul u wan’ Paul?
14 Arfan, ni faanra keb ngom e lem ni de puluw, ma ga fal’eg i lemnag fare biyul. Arrogon, mu ta’ ni re n’ey e ba taw’ath ni ke pi’ ngom. Ireray e n’en ni ke rin’ Paul ni apostal. Dab mu pagtalin ni ke yog ni gaar: “Ere kar gu gafgow!” Machane ke yog ni gaar: “Ke magar Got u daken e Somol rodad i Jesus Kristus,” ni rogon ni yog Paul e, “ir e gub t’uf rok ma ke pi’ e pogofan rok ni fan ngog.” (Roma 7:24, 25; Galatia 2:20) I yog Paul e re n’em, ni gathi be tolangnag ir. Ya ke mus ni kari mich u wan’ ni baga’ fan u wan’ Jehovah. Maku thingari mu fil rogon ni ngam ta’ fare biyul ni ba taw’ath ni yib rok Got ni fan ngom ni bod Paul. Jehovah e gathi kemus ni Taayuw nib gel gelngin ya ku en ma Pi’ e Taw’ath u fithik’ e t’ufeg.
Mu Kol Ayuw ko ‘Ban’ Rok Satan
15-17. (a) Uw rogon ni ma fanay fare Moonyan’ e lem nde puluw? (b) Mang e n’en ni ra pi’ e athamgil nga lanin’dad ni rayog ni ngad feked ko tin ni ke buch rok Job?
15 Machane, sana kam pirieg ni mo’maw’ ni nge mich u wan’um ni Thin rok Got ni be fal’eg lanin’uy e fan ngom. Sana ga be lemnag ni fare taw’ath ni nguun par ni manemus u lan e bin nib biech e fayleng e ban’en ni nge yog ngak boch e girdi’, machane gur e dariy rogom. Faanra aram rogon ni ga be lemnag, ma mang e rayog ni ngam rin’?
16 Dariy e maruwar riy ni ga manang ko fonow rok Paul ngak piyu Efesus ni gaar: “Mon’ed nga dakenmed urngin e talin e cham ni pi’ Got ngomed, nge yog ni ngam togopuluwgad ko pi ban rok moonyan’.” (Efesus 6:11) Nap’an ni gad ra lemnag boch e kanawo’ ni ma fanay Satan, ma chugum nge ngongol ni darngal e rayog ni nge yib ngan’dad nib tomgin ma riyul’ ni aram rogon. Pi n’en ney e ke wawliy boor e girdi’ rok Got kakrom nge ngiyal’ ney kar uned ngay. Machane, thingari dab da paged talin reb e ban rok Satan—ni aram e athamgil ni ma ta’ ni nge mich u wan’ e girdi’ ni der ma t’ufegrad Jehovah Got.
17 Ba salap fare Moonyan’ ni nge fanay e re lem ney ni nge chefeg e girdi’ nga orel rok Got. Mu lemnag e thin ni yog Bildad ngak Job ni gaar: “Uw rogon ni nge mat’aw e girdi’ ni ma yim’ u p’eowchen Got, fa uw rogon be’ nni gargelnag ni nge biech? Amsap! Bay e pul, ma gathi rib tamilang; ma pi t’uf e de biech u p’eowchen. Ere uw rogon e girdi’ ni ma yim’, ni bod reb e fakl’ud.” (Job 25:4-6, NW; John 8:44) Uw feni ra gelnag e pi thin ney e mulan’ rok Job? Ere dab mu pag Satan ni nge mulan’nigem. Ma reb, e ngam lemnag e pi kanawo’ rok Satan ma ra yib gelngim ni ngam cham ngak nib gel me yog ni ngam rin’ e tin nib mat’aw. (2 Korinth 2:11) Me Job, ni yugu aram rogon nib t’uf ni ngan yal’uweg, e taw’athnag Jehovah e k’adan’ ni i tay me sulweg ngak ni l’agruw yay e pi n’en ni ke mul u pa’.—Job 42:10.
Ka Baga’ Jehovah nga “Lanin’dad”
18, 19. Uwrogon ma Got e “ka ba ga’ nga lanin’dad,” ma uwrogon ni ‘manang urngin ban’en’?
18 Riyul’, ni mo’maw’ ni ngan chuweg e lem ni mulan’ ni faanra kari l’ag likngin. Yugu aram rogon, ma kan ni thothup rok Jehovah e rayog ni nge ayuwegem ni buchuuw ma buchuuw ni nge “kirebnag e pi’ n’en” ni ke l’ag likngin nib togopuluw ko tamilangan’ rok Got. (2 Korinth 10:4, 5) Nap’an ni lem nib kireb e ke chuchugur ni nge gel ngom, ma ngam mu fal’eg i lemnag e thin rok John ni apostal ni gaar: “Ereray rogon me pagan’dad u p’eowchen Got. Ya faanra yog lanin’dad ngodad ni gadad ba kireb, ma kad nanged ni Got e ka ba ga’ nga lanin’dad, ni gubin ban’en ma manang.”—1 John 3:19, 20.
19 Mang fan fare buguthin ni “Got e ka ba ga’ nga lanin’dad”? Yu ngiyal’, ma gum’irchadad e ma yog ngodad ni gadad ba kireb, ni baga’ ni faanra ri gad manang thibngidad nge kireb ni kada rin’ed. Ara sana bochan e yafas rodad kafram, rayog ni ngada lemnaged e tin nib kireb u murung’agdad nib pag rogon, ni gowa dariy ban’en ni rayog ni ngada rin’ed nib fel’ u wan’ Jehovah. Thin rok John ni apostal e be micheg ni kab ga’ Jehovah ko re lem nem! Ma yan e changar rok nge pag e oloboch rodad ma manang e tin ni ri rayog rodad. Maku manang e n’en ni ke k’aringdad kad rin’ed ban’en, nge n’en ni gad baadag ni ngad rin’ed. I yoloy David ni gaar: “Manang e n’en nni ngongliydad ngay; ma manang ni gadad e fiyath.” (Psalms 103:14) Ri manangdad Jehovah ma gadad e gathi ri gadad manangdad!
“Teeliyaw nib Fel’ Yaan” nge “M’agan’ Lolugen e Pilung”
20. Yiiy rok Isaiah u murung’agen e girdi’ rok Jehovah ni ngan sulwegrad e uwrogon ni be dag rogon e lem rok ko pi tapigpig rok?
20 U daken Isaiah ni profet, e yog Jehovah riy e athap ngak e girdi’ rok kakrom ni nge sulwegrad nga rogorad. Nap’an ni kan fekrad nga Babylon, ma ri ireray e n’en ni rib t’uf rorad mab puluw ya kari kireban’rad! Jehovah ni be sap nga m’on ko ngiyal’ ni yad ra sul ko binaw rorad, e yog ni gaar: “Thingar mmang ba teeliyaw nib fel’ yaan u pa’ Jehovah, ma ngam mang m’agan’ lolugen e pilung u lan pa’ e Got rom.” (Isaiah 62:3, NW) U daken e pi thin ney, ma ke tay Jehovah fan e girdi’ rok ma bod ni ke fal’eg yaarad. Taarebrogon e n’en ni ke rin’ ni fan ko nam ni Israel rok e ngiyal’ ni be yip’ fan ban’en. Ni bod ni ke tolangnagrad ni fan ni urngin e girdi’ e ngar ngatgad ngorad.
21. Uw rogon ni nge pagan’um ni ra taw’athnag Jehovah e k’adan ni kam tay?
21 Yugu aram rogon ni re yiiy ney e ke lebug ko som’mon ko piin ni kan dugliyrad, ma be dag e tayfan ni ma tay Jehovah ngak urngin e piin ni be pigpig ngak. Ere, ngiyal’ ni ke maruwaran’um, ma dab mu pagtalin ni yugu aram rogon ni dawor mu flont, ma rayog ni nge taareb rogon e “teeliyaw nib fel’ yaan” nge “m’agan lolugen e pilung” ngak Jehovah. Ere nguum felfelan’nag gum’irchaen ni ga be athamgil ni ngam rin’ e tin nib m’agan’ ngay. (Proverbs 27:11) Ga ra rin’ e n’en ni aram rogon, ma ra yog ni ngam pagan’um ni ra taw’athnagem Jehovah nbochan e k’adan’ rom!
[Footnote]
a Kan thiliyeg boch e ngochol.
Ka Ga Manang?
• Uw rogon ni gadad e “ban’en nib ga’ fan” u wan’ Jehovah?
• Mang fan ni baga’ fan ni nguun lemnag ni Jehovah e en ma pi’ e taw’ath?
• Mang ‘ban’ rok Satan e thingarda kol ayuwgad riy?
• Uwrogon ma Got e “ka baga’ nga lanin’dad”?
[Picture on page 8]
Paul
[Picture on page 8]
Elijah
[Picture on page 8]
Hannah
[Picture on page 10]
Thin rok Got e boor ban’en riy ni ra fal’eg lanin’uy