Ngam Pirieg e Felfelan’ ko Mabgol Rom

“Tabinaw e ngan toy nga daken e def ni gonop nge tamilangan’.”​—PROV. 24:3.

1. Uw rogon ni ke dag Got e gonop ni fan ko bin nsom’on e pumoon?

CHITAMANGIDAD nu tharmiy nib gonop e manang e n’en nib fel’ ngodad. Bod ni, ke nang Got nra nge lebug e n’en nib M’agan’ ngay, ma “de fel’ ni nge par fare moon ni goo ir” u lan fare milay’ nu Eden. Gin nib ga’ fan ko n’en nib m’agan’ Got ngay e nge mabgol e girdi’ nge yog e bitir ngorad nge ‘wer e piin ni owcherad nga gubin yang u fayleng.’​—Gen. 1:28; 2:18.

2. Mang e ke tay Jehovah nra fel’ rogon e girdi’ riy?

² I gaar Jehovah, “Bay gu ngongliy be’ ni nge chag ngak ngi i ayuweg.” Ma aram me mesurnag Got e bin nsom’on e pumoon, Me fek reb e yumiyaw ko fare dowef rok nib flont. Me sunmiy be’ nib ppin ko fare yumiyaw. Nap’an ni fek Jehovah ere pin ney nib flont, ni aram Efa, i yib ku Adam, me gaar fare moon: “Ka fini yog be’ ni taareb rogomow, ni yil rok e ni fek ko yil rog, ma ufin u dow e ni fek ko ufin u dowag. Ppin e nge mang fithingan, ya ni fek u fithik’ i dow e pumoon.” Rriyul’ ni Efa e taayuw rok Adam. Ra bagayow ma be dag bmit e ngongol nge fel’ngin, ya yow l’agruw ni yow ba flont ya kan sunmiyrow ni bod yaan Got. Ere Jehovah ir e ke ngongliy e bin nsom’on e mabgol. Adam nge Efa e dariy e magawon rorow ni ngar folgow ko yaram ni ke tay Got nra ayuwegrow.​—Gen. 1:27; 2:21-23.

3. Uw rogon u wan’ boor e girdi’ e tow’ath ko mabgol, ma mang boch e deer ni ke sum riy?

³ Bay e kireban’ riy, ya ke garer e lem ntogopluw u fayleng e ngiyal’ ney. Magawon ni ke sum riy e gathi Got e tabolngin. Boor e girdi’ ni yad ma darifannag e tow’ath ko mabgol ni ke pi’ Got, ya yad ma lemnag ndaki m’ag ko biney e par, ma ireray e n’en ni ma sunmiy e kankanan’ nge togopuluw. Boor e piin ni kar mabgolgad ni ke mom ni ngar dargad. Dakunir runguy e bitir ma boor e gallabthir nima gay rogon ni nge yog ban’en ngak u daken e bitir. Boor e gallabthir nder rin’ ban’en ni fan ko gapas nge taareban’. (2 Tim. 3:3) Ere uw rogon me par e mabgol nib felfelan’ ko ngiyal’ ney ni ke mo’maw’ e par? Mang e ra rin’ e sumunguy me yog nni siyeg ndabi dar e mabgol? Mang e rayog ni ngad filed ko piin ni kar ayuweged e mabgol rorad nge par ni bay e felfelan’ riy e ngiyal’ ney?

Ngan Sumunguy Min Fol ko Fonow Rok Jehovah

4. (a) Mang e fonow ni pi’ Paul u murung’agen e mabgol? (b) Uw rogon nima folwok e pi Kristiano ko fonow ni pi’ Paul?

⁴ Apostal Paul ni Kristiano e ke pi’ e fonow ni kan thagthagnag ngak e ppin ni ke yim’ figirngirad nfaanra kar dugliyed ni ngkur mabgolgad bayay, ma kemus “nrogon e mabgol ni ma tay e piin ni girdien Kristus.” (1 Kor. 7:39) Re n’ey e de beech ngak e pi Kristiano ni ur moyed u tan e motochiyel rok piyu Jew. Motochiyel rok Got ngak piyu Israel e ba tamilang ndab ra “mabgolgad” ngak e pi nam ni yad ma meybil ngak boch e kan. Ki weliy Jehovah rogon e riya’ nra yib ni faanra dab ni fol ko re motochiyel ney. “Ya [piin ni gathi yad piyu Israel e] yad ra pingeg pi fakmed nge dab kur folgad rok Somol mi yad ta’ fan yugu boch e kan mi yad meybil ngorad, ma aram e ra damumuw Somol ngomed nge thang owchemed nib machreg.” (Deut. 7:3, 4) Mang e n’en ni baadag Jehovah ni nge rin’ e pi tapigpig rok e ngiyal’ ney u nap’an ni yad be mel’eg be’ ni nge mang mabgol rorad? Rib gagiyel, nreb e tapigpig rok Got e susuna nge mel’eg be’ ntaareb rogon e michan’ rorow ni kan taufenag ni ngar mabgolgow “nrogon e mabgol ni ma tay e piin ni girdien Kristus.” Ngan sumunguy min fol ko fonow rok Jehovah u murung’agen ere n’ey e aram e bin nib gonop e kanawo’ ni ngan fol riy.

5. Uw rogon u wan’ Jehovah nge pi Kristiano ni kar uned ko mabgol e n’en ni kan micheg u nap’an e mabgol?

⁵ N’en ni yima micheg u nap’an e mabgol e ba thothup u mit Got. Mus ngak Jesus ni Fak Got, me weliy murung’agen e bin som’on e mabgol ni gaar: “Thingari dabi dareg e girdi’ e gali cha’ ni Got e ke chagiyrow.” (Matt. 19:6) Fare psalmist e ke puguran ngodad feni ga’ fan e n’en ni kan micheg ni gaar: “Mu pining e magar ku Got nge mang maligach rom, ma ga lebguy e n’en ni kam micheg ngak e En Nth’abi Tolang.” (Ps. 50:14, NW) Yugu aram rogon nra felfelan’ l’agruw ni’ u nap’an ni kar mabgolgow, ma tin ni kar michegew ko rorran ni mabgol rorow e ban’en nrib ga’ fan ma bay ban’en nib milfan ngorow riy.​—Deut. 23:21.

6. Mang e rayog nda filed ko n’en ni buch ku Jephthah?

⁶ Mu lemnag e n’en ni buch ku Jephthah, ni i pigpig ni ir reb e judge nu Israel u nap’an e bin 12 e chibog B.C.E. I micheg ere n’ey ku Jehovah ni gaar: “Faan gara tay ni nggu gel ko yu Ammon ko mahl, ma en nsom’on nra yib ko tabinaw rog ni nggu mada’gow u nap’an ni kug sul ko mahl ngak piyu Ammon e thingari milfan ku Jehovah, ma thingari gu pi’ e cha’ nem ni maligach ngak.” Nap’an ni guy Jephthah ni fare rugod ni fak, ni kari mus rok, ni yib ni nge mada’nag u nap’an ni sul nga tafen u Mizpah, ma gur, i gay rogon ni nge thilyeg e n’en ni ke micheg, fa? Danga’. I gaar: “Ku gog ban’en ku Jehovah, ndabkiyog ni nggu thilyeg.” (Judg. 11:30, 31, 35, NW) De thilyeg Jephthah e n’en nike micheg ku Jehovah, ni yugu aram rogon ndakuriy be’ nra yib nga tomren ni nge fek fithingan. N’en ni micheg Jephthah e ba thil ko n’en ni yima micheg u nap’an e mabgol, machane n’en ni rin’ nde thilyeg e n’en ke micheg e ke aw ni ban’en nrayog ni folwok e piin figirngiy nge leengiy ni Kristiano riy.

Mang e Ma Rin’ e Mabgol Me Par nib Fel’?

7. Mang boch ban’en nib t’uf ni nge thilyeg e piin ni kafin nra uned ko mabgol u rarogorad?

⁷ Boor e piin mabgol ni yow ma sul ngar lemnagew e ngiyal’ ni baaram ni kafin nra mada’gow riy. Rib gel e felfelan’ riy ni kar nangew yow! Nap’an ni n’uw nap’an ni rin’ew boch ban’en u taabang, ma aram mi ri fel’ e tha’ u thilrow. Machane, demtrug ko fel’ e thin rorow ba ngiyal’ nib n’uw nap’an fa ni yarmiy e mabgol rorow, ma nap’an nra mabgolgow, ma bay boch ban’en nib ga’ fan ni ngan thilyeg. Reb i figirngiy e gaar: “Magawon romow nrib ga’ ko som’on e thingar gu nangew ndabkiyog ni nggu ngongolgow ni gowa gathi gamow ba mabgol. Munmun ma gamow pirieg ni ke mo’maw’ ni nge par e fager romad boch e girdi’ nge tha’ u thilmad e tabinaw romow ni ka rogon.” Ku be’ ni figirngiy, ni ke gaman 30 e duw ni ke un ko mabgol, e ke nang u nap’an ni ke un ko mabgol ni faanra nge par nib thabthabel, ma thingari “lemnag ni yow l’agruw ma gathi goo ir.” U m’on ni nge un nga ban’en ni kan pining ngay ara nge micheg ban’en ku be’, ma ri ma yog ko ppin rok ngemu’ mfini dugliy, ni be lemnag e tin nib ga’ fan u wan’row. Boch ban’en ni aray rogon e ba t’uf e sumunguy riy.​—Prov. 13:10.

8, 9. (a) Mang fan nib ga’ fan ni nge fel’ e numon u thiliy? (b) Mingiyal’ e ba t’uf ni ngan thilyeg e n’en ni yibe rin’ ni fan ngak boch e girdi’, ma mangfan?

⁸ Yu ngiyal’ ma mabgol e ma taarebnag l’agruw ni’ nib thil yalen e nam nra bow riy. Faanra aray rogon mab t’uf ni ngan non nib puf rogoy. Ba thilthil rogon nima non e girdi’. Gara fal’eg i yaliy rogon nima non e en ni mabgol rom ko girdi’ u tabinaw rok ma ra ayuwegem ngam nang rarogon e en ni mabgol rom nib fel’ rogon. Yu ngiyal’ e gathi n’en ni ka nog ya rogon ni ka nog fare n’em e ir e ma dag e n’en ni bay u laniyan’ be’. Ma ka boor ban’en ni yira fil ko tin ndanir yog. (Prov. 16:24; Kol. 4:6) Ra ngan felfelan’ mab t’uf e tamilangan’.​—Mu beeg e Proverbs 24:3.

⁹ Nap’an nra taw ni ngan mel’eg boch ban’en ni yi baadag ni ngan rin’ ni faanra bay e tayim nge boch ban’en ni fan ko fafel, ma boor e girdi’ ni kar pirieged nib t’uf ni ngar thilyeged e n’en ni yad be rin’ ni fan ngak boch e girdi’. U m’on ni kam mabgolgow, ma sana faen ni mabgol rom e boor e tayim nima fanay ko gosgos nge ku boch e fafel. Ba t’uf ni ngan thilyeg boch ban’en, fa? (1 Tim. 4:8) Ku rayog ni ngan fith ere n’ey u murung’agen e tayim ni yibe tay ni fan ngak e girdi’ ko tabinaw. L’agruw ni’ ni yow ba mabgol e ba t’uf e tayim rorow ya nge yog nrin’ew boch ban’en u taabang ni fan ko tirok Got nge ku boch ban’en.​—Matt. 6:33.

10. Uw rogon ni sumunguy e ra fal’eg thilin e gallabthir nge bitir ni ke un ko mabgol?

¹⁰ Nap’an nra un reb e pumoon ko mabgol, ma ra digey e chitamangin nge chitiningin, maku arrogon be’ nib pin. (Mu beeg e Genesis 2:24.) Machane, fare motochiyel rok Got nra be’ ma nge tayfan e chitamangin nge chitiningin e dariy e ngiyal’ nra mus. Ere mus nga nap’an ni ke mabgol l’agruw ni’, maku yad ra rin’ e tabinaw rorow boch ban’en u taabang. Be’ ni figirngiy, ni ke gaman 25 e duw nap’an ni ke un ko mabgol, e gaar: “Yu ngiyal’, e ba mo’maw’ ni ngan rin’ e tin baadag e en leengiy fa en figirngiy mu kun rin’ e tin ni baadag e gallabthir, ara walagey u tabinaw, nge gallabthir ara walagen e en leengiy ara figirngiy. Kug pirieg nrayog ni ayuwegey fare thin u Genesis 2:24, ni ngan mel’eg e n’en nib fel’. Ra be’ ma bay rogon ni nge yul’yul’ me rin’ e tin nib milfan ngak ni fan ko girdi’ u lan e tabinaw rok, machane fare thin nu Bible e ke dag ngog ni yul’yul’ ngak e en ni mabgol rog e th’abi ga’ fan.” Pi gallabthir ni Kristiano ni yad ba sumunguy e yad ra tayfan e bitir rorad ni ke mabgol ma ke yog e tabinaw ngorad ni faen figirngiy e ir e ba milfan ngak ni nga i pow’iy fare tabinaw.

11, 12. Mang fan ni fol Bible u tabinaw nge meybil e rib ga’ fan u lan e mabgol?

¹¹ Ba ga’ fan e fol Bible u tabinaw ni gubin ngiyal’. N’en ni ke rin’ boor e tabinaw ko Kristiano e be dag nriyul’ ere n’em. De mom ni ngan tababnag e fol Bible ni aram rogon min ulul i rin’ ni aram rogon. I yog reb e lolugen e tabinaw ni gaar: “Faanra ku rayog ni nggu thilyegew ban’en, ma aram e gamow ra ngongliy nge fel’ e fol Bible u tabinaw romow ni tabab ko som’on ni gu mabgolgow.” Miki gaar: “Ba tow’ath nib fel’ ni ngguy e felfelan’ nima tay leengig u nap’an nra pug boch e thin nriyul’ nu Bible laniyan’ ni kug piriegew u taabang u nap’an e fol Bible romow.”

¹² Meybil u taabang e ku reb e ayuw. (Rom. 12:12) Nap’an nra taareban’ e en figirngiy nge leengiy ko liyor ngak Jehovah, ma ra chugur thilrad Got me fel’ e mabgol rorow. (Jas. 4:8) Be’ ni figirngiy ni Kristiano e gaar: “Ngan gur ngan wenig ko oloboch ni kan rin’ min dag ni kan oloboch u nap’an ni yibe meybil u taabang e aram reb e kanawo’ ni ngan dag nriyul’ ni ke kireban’uy ko n’en ni ke k’aring e damumuw.”​—Efe. 6:18.

Ngaun Sumunguy u Lan e Mabgol

13. Mang e fonow ni pi’ Paul u murung’agen e tha’ u thilin e mabgol?

¹³ Pi Kristiano ni kar mabgolgad e ba t’uf ni ngar paloggad u boch ban’en nrayog ni nge kirebnag e m’ag u thilin e mabgol, ni bod e tin ni yima rin’ e ngiyal’ ney ni fan ko ngongol nde yalen. I fonownigey Paul u murung’agen ere n’ey ni gaar: “En ni pumoon e nge pi’ ir ngak e ppin rok nrogon figirngiy, ma en ni ppin e nge pi’ ir ngak e pumoon rok nrogon leengiy, nge bagayow me fal’eg laniyan’ bagayow nrogon ni ke t’uf rok bagayow. Ya leengiy e gathi ir e suwon downgin, ya faanem ni figirngin e ir e suwon; ma ku er rogon e en ni figirngiy ni gathi ir e suwon downgin, ya faanem ni leengin e ir e suwon.” Ki pi’ Paul ere fonow ni baaray nib tamilang ni gaar: “Ra ba wu’ e mabgol ma dabi tel bagayow ir rok bagayow, ke mus ni faanra ke taareban’row ngay ni ngar talgow u rogon n’umngin nap’an ni yow ba adag.” Mang fan? Ya “nge yog nra tewan’row ko meybil; me mu’ mi yow sul ngkur rin’ew e n’en ni ma rin’ e mabgol, ya ri fek Satan ban’en i yib ngak bagayow, ni ban’en nrayog ni nge pingeg faanem nge denen, ni bochan e dakiyog rok faanem ni nge k’adan’.” (1 Kor. 7:3-5) I dag Paul e n’en nib ga’ fan ko Kristiano u nap’an ni weliy murung’agen e meybil. Machane ki tamilangnag nra reb e Kristiano ni ke mabgol ma nga i lemnag e tin nib t’uf ko dowef nge laniyan’ e en mabgol rok.

14. Uw rogon ni yira fol u kenggin e motochiyel ko Bible ma ra fel’ e tha’ u thilin e mabgol?

¹⁴ En figirngiy nge leengiy e ba t’uf ni ngaur rognew urngin ban’en ngorow ma kub t’uf ni ngar nangew nfaanra ra darifannagew e re tha’ ney u thilrow ma ra sum e magawon riy. (Mu beeg e Filippi 2:3, 4; mu taarebnag ko Matthew 7:12.) Ke m’ug e mich riy nriyul’ u boch e tabinaw nib thil e teliw ko girdi’ riy. Mus ni faanra de taareban’uy, ma Kristiano e rayog ni pithig e magawon u daken e ngongol nib fel’, nge gol, nge maruwel u taabang. (Mu beeg e 1 Peter 3:1, 2.) T’ufeg rok be’ ngak Jehovah nge en ni mabgol rok, nge sumunguy e ra ayuweg e mabgol ko re n’ey.

15. Uw rogon nra yibnag e tayfan e felfelan’ nga lan e mabgol?

¹⁵ Faen figirngiy nib gol e ku ra dag e ngongol ngak leengin u fithik’ e tayfan u boch ban’en. Bod nra i lemnag laniyan’, ni mus ko tin nib achig ban’en. Reb i figirngiy ni ke mabgol ni 47 e duw e gaar: “Kug be fil ere n’ey.” Pi leengiy ni Kristiano e kan tay chilen ngorad ni ngaur ted fan pi figirngirad. (Efe. 5:33) Ra dab ur sapgad nga fel’ngin pi figirngirad ma ur weliyed kirebun u p’eowchen e girdi’, ma be dag ndarur ted farad. Proverbs 14:1 (NW) e be puguran ngodad ni gaar: “Be’ nib ppin nib gonop e ma ubung e tabinaw rok, machane en nib balyang e ma buthug nga but’.”

Dab Mu Sumunguy Ngak Moonyan’

16. Uw rogon nrayog ni fanay e piin mabgol fare thin u Efesus 4:26, 27?

¹⁶ “Faanra mu damumuwgad, ma dab mpaged e damumuw romed nge fekmed nga fithik’ e denen; ma dab mpired ni gimed ba damumuw nge polo’ reb e rran. Dab mu binged e kanawo’ ngak moonyan’.” (Efe. 4:26, 27) Yira fanay e pi thin ney, ma ra ayuwegdad ara ra palognagdad ko tugthin u thilin e mabgol. Reb e walag ni ppin e gaar, “Der yib ngan’ug ba ngiyal’ ni gomanga gu tugthingow figirngig ma da gu weliyew u taabang fare magawon ni mus ni faanra nggu pithigew u lan bokum e awa.” Som’on e mabgol rorow, ma kar turguyew ndabi pag reb e rran ndab ra pithigew e magawon rorow. “Kug turguyew ni yugu demtrug rogon fare magawon, ma nggu n’agew fan romow ma dabkug lemnagnagew me fel’ bayay e thin u thilmow.” Ere dar bingew e “kanawo’ ngak Moonyan’.”

17. Mus ko ngiyal’ nde taareban’ e mabgol, ma mang e ra ayuwegrow?

¹⁷ Machane uw rogon ni faanra kam mabgolgow be’ nde taareban’mew? Sana gara pirieg ni tha’ u thilmew e dariy e felfelan’ riy ni bod e tha’ u thilin boch e girdi’. Machane, ra um lemnag rogon nima changar e En Tasunmiy ko tha’ u thilin e mabgol ma ra ayuwegem. Kan thagthagnag ngak Paul ni nge fonownag e Kristiano ni gaar: “Mabgol e urngin e girdi’ ni nge ta’ fan, ma pumoon nge ppin ni kar uned ko mabgol e thingari bagayad mi i par nib yul’yul’ ngak bagayad. Ya ra gechignag Got e pi arorad ni be ngongliy e ngongol ko darngal nge piin ni yad be par e girdi’ ni gathi mabgol rorad.” (Heb. 13:4) Ma dab ni fek owchey ko fare bugithin ni gaar: “Dalip yal’ e gaf e de mom ni nge math’.” (Ekl. 4:12, NW) Ra i lemnag e en figirngiy nge leengiy rogon ni ngaur tolangnigew fithingan Jehovah, ma aram e yow be gelnag e m’ag u thilrow nge m’ag u thilrad Got. Yow ra maruweliy ni nge fel’ e mabgol rorow, ya yow manang ni bay rogon ngak Jehovah, ni ir e Tabolnginnag e mabgol.​—1 Pet. 3:11.

18. Mang e rayog ni mich u wan’um u murung’agen e mabgol?

¹⁸ Mmutrug nrayog ni nge pirieg e Kristiano e felfelan’ ko mabgol. Ra ngan rin’ ere n’ey mab t’uf e athamgil min dag e pi fel’ngin e Kristiano, nreb riy e ngaun sumunguy. Ngiyal’ ney, u lan e ulung ko Pi Mich Rok Jehovah u ga’ngin e fayleng, e boor e mabgol ni be micheg nrayog ni ngan rin’ e re n’ey.

Uw Rogon ni Ga Ra Fulweg?

• Mang fan nriyul’ nrayog i pirieg e felfelan’ u lan e mabgol?

• Mang e ra ayuweg e mabgol nge fel’ rogon?

• Mang e pi fel’ngin nib t’uf ni nge maruweliy e piin mabgol?

[Picture on page 13]

Yu wu’ i mabgol e nge puruy’ u fithik’ e gonop u m’on ni nge un bagayow nga ban’en ni kan pining ngay

[Picture on page 14]

Ngan pithig e magawon ni ka rorran nem, ma dab ni ‘bing e kanawo’ ngak Moonyan’