Ma Rung’ag Jehovah e Tin Gad Ma Wenignag Ngak

“I Somol e ma matanagiy e piin ni yad mmat’aw, ma ma motoyil ngorad ko tin ni yad ma wenignag ngak.”​—PS. 34:15.

1, 2. (a) Uw rogon laniyan’ e girdi’ e ngiyal’ ney? (b) Mang fan ni darud gingad ko re n’ey?

KE YIB e gafgow ngom e chiney, fa? Faanra arrogon, ma gathi goo gur. Bokum milyon e girdi’ ni yad be athamgil ni ngar pithiged e magawon rorad u gubin e rran u lan e re fayleng ni kireb ney. Boch e girdi’, e gowa dabkiyog ni ngar k’adedan’rad. Kar thamiyed e n’en ni ke thamiy David, me yoloy ni gaar: “Kug gamig ma kari kireban’ug; kug tolul nbochan e kireban’. Ma be chub ngorongoreg nib gel, ma dakuriy gelngig, ma dabkiyog ni ngguy ban’en.”​—Ps. 38:8, 10, NW.

² Gad e Kristiano e darud gingad ko gafgow ni ma yib ngak e girdi’. Gad manang ni gafgow ni ma yib ngak e girdi’ ni bod e “amith ni ma yib ngak be’ ni nge gargel” e bang ko fare pow ni ka nog nra yib u nap’an ni bay Kristus. (Mark 13:8; Matt. 24:3) Fare thin ni Greek ni kan piliyeg ni “amith ni ma yib ngak be’ ni nge gargel” e be yip’ fan e gafgow nib gel ni ma yib ngak e girdi’. Re n’em e ri be dag feni gel e gafgow ni be yib ngak e girdi’ ko ngiyal’ ney ‘nrib gel e kireb’ ma “rib mo’maw’ ni ngan par” riy!​—2 Tim. 3:1.

Manang Jehovah e Gafgow ni Ma Yib Ngodad

3. Mang e n’en nri manang e girdi’ rok Got?

³ Girdi’ rok Jehovah e ri yad manang ni ku ra rin’ e pi gafgow ney ban’en ngorad, ma rayog ni ngki gel boch. N’en ni kub muun ko gafgow ni ma yib ngak e girdi’, e gadad e pi tapigpig rok Got e bay e ‘toogor’ rodad ni fare Moonyan’, nri baadag ni nge kirebnag e michan’ rodad. (1 Pet. 5:8) Rib mom ni ngada thamiyed e n’en ni ke thamiy David me gaar: “Thin nib kireb ni yibe yog ngog e ke kirebnag an’ug, ma kug par ndabiyog ni gu ayuwegneg. Kug finey ni mang e runguyeg e girdi’, ma dariy be’ ni ke runguyeg; ara be’ ni nge fal’eg lanin’ug, machane ku dariy”!​—Ps. 69:20.

4. Mang e ra fal’eg lanin’dad u nap’an ni ke yib e gafgow ngodad?

⁴ Gur n’en ni yog David e be yip’ fan ndakuriy e athap rok? Danga’. Am lemnag e n’en ni ki yog ko re psalm nem ni gaar: “Somol e ma motoyil ngak e piin ni kar gafgowgad, ma der ma pagtalin e tirok e girdi’ ni bay u kalbus.” (Ps. 69:33) Yu ngiyal’ e sana gad ra thamiy ndabkiyog ni ngada paloggad ko gafgow ni ke yib ngodad. Rayog ni nge m’ug ni boch e girdi’ e gathi ri yad manang rarogodad ma sana rriyul’ ndar nanged. Machane rayog ni nge fel’ lanin’dad ni ngad nanged nri manang Jehovah e gafgow ni ma yib ngodad ni bod rogon David.​—Ps. 34:15.

5. Mang e ke pagan’ Solomon ni Pilung ngay?

⁵ I tamilangnag Solomon ni fak David e re n’ey u nap’an ni kan ognag fare tempel u Jerusalem. (Mu beeg e 2 Kronicles 6:29-31.) I wenignag ngak Jehovah ni nge rung’ag e meybil rok urngin e girdi’ nib yul’yul’ ni kar yibilayed Ngak ni nge ‘ayuwegrad ko magawon rorad ara amith ni yad be tay.’ Uw rogon u wan’ Got e meybil ni ma tay e girdi’ ni ke yib e gafgow ngorad? I weliy Solomon e pagan’ rok ngak Got ni gathi kemus ni nge rung’ag e meybil rorad machane ku ra ayuwegrad. Mang fan? Bochan nri manang e n’en ni bay u lan “gum’irchaen pi fak e girdi’.”

6. Uw rogon ni ngada pithiged e magawon rodad, ma mang fan?

⁶ Ku rayog ni ngada yibilayed ngak Jehovah ni nge ‘ayuwegdad ko magawon rodad ara amith ni gad be tay,’ ni aram e gafgow ni gad be tay ni be’ nge be’. Susun e ngari fel’ lanin’dad nbochan e gad manang nri manang Got e gafgow rodad ma ma lemnag rarogodad. I tamilangnag Peter ni apostal e re n’ey u nap’an ni gaar: “Mpaged fan urngin e magafan’ romed ngak, ya be lemnag rogomed.” (1 Pet. 5:7) Ba ga’ fan u wan’ Jehovah e n’en ni ma buch rodad. I tamilangnag Jesus e t’ufeg rok Jehovah, ni gaar: “Rayog ni ngan chuw’iy l’agruw chi arche’ ni sparrow fithingan nga ba salpiy nrow; machane dariy taa bagayad nra mul nga but’ nde nang e Chitamangimed. Mus nga piyan lolugmed ni ke m’ay i theeg. Ere dab mu tamdaggad; ya ka ba ga’ famed ngak fa nochi arche’ ni sparrow fithingan!”​—Matt. 10:29-31.

Mu Pagan’um ko Ayuw rok Jehovah

7. Mang ayuw e nge pagan’dad ngay?

⁷ Rayog ni nge pagan’dad ni Jehovah e ba m’agan’ ngay maku rayog rok ni nge ayuwegdad u nap’an ni ke yib e gafgow ngodad. “I Got e ir e manaf rodad me ir gelngidad, gubin ngiyal’ ni ke fal’eg rogon ke par ni ra yib e gafgow ngodad me ayuwegdad.” (Ps. 34:15-18; 46:1) Uw rogon ni ma pi’ Got e re ayuw nem? Mu lemnag e n’en ni yog e 1 Korinth 10:13 ni gaar: “Yi Got e dabi thiliyeg e tin ni ke yog nra rin’ ngodad, ma dabiyog ni nge pagmed nge yib ngomed e pi n’en ni ma waliy e girdi’ nge denen nge pag rogon ndabiyog romed ni ngam taleged gimed riy; machane re ngiyal’ i n’em e ra pi’ gelngimed ngam k’adedan’med riy.” Rayog ni nge gagiyegnag Jehovah ni nge chuw e gafgow rodad, ara pi’ gelngidad nge yog nda k’adedan’dad riy. Ra ayuwegdad Jehovah.

8. Uw rogon nrayog ni nge ayuwegdad Got?

⁸ Uw rogon ni nge yib e re ayuw nem ngodad? Mu lemnag e n’en ni kan fonownagdad riy ni ngad rin’ed ni gaar: “Mpaged fan urngin e magafan’ romed ngak.” Re n’ey e be yip’ fan ni ngad paged Jehovah ni ir e nge ayuwegdad ko urngin e magawon rodad. Ngad gayed rogon ndab ki magafan’dad mad pagedan’dad ngak ni nge ayuwegdad ko tin nib t’uf rodad. (Matt. 6:25-32) Ba t’uf e sobut’an’ ko mit ney e pagan’, ma dabda pagedan’dad nga gelngidad nge gonop rodad. Gad ra par “u tan pa’ Got nib gel gelngin,” ma gad be dag ni gad manang ni gad ba sobut’ ngak. (Mu beeg e 1 Peter 5:6.) Re n’ey, e ra ayuwegdad ni ngad pithiged urngin e magawon ni ma pag Got ni ngeb ngodad. Sana gad baadag ni nge chuw e magawon rodad nib papey, machane ba pagan’dad nri manang Jehovah e ngiyal’ nge rogon ni nge ayuwegdad.​—Ps. 54:7; Isa. 41:10.

9. Miti mang magawon e ba t’uf ni nge pag David fan ku Jehovah?

⁹ Mu lemnag e thin rok David ni bay ko Psalm 55:22 (NW), ni gaar: “Mu paged e pi n’en ni ke tomalnagmed nga daken Jehovah, me ir e bayi ayuwegmed. Ya ri dabi pag e piin nib mat’aw nga u ra yoyowolgad.” Ke kireban’ David u nap’an ni yoloy e pi thin nem. (Ps. 55:4) Ba tamilang ni ke yoloy e re psalm ney u nap’an ni be gay rogon Absalom ni fak ni nge fek e liw rok ni pilung. Ahithofel ni tafonow rok David ni yima pagan’uy ngak e ki mang ngak Absalom. Ba t’uf ni nge chuw David u Jerusalem ya nge dabi yim’. (2 Sam. 15:12-14) Yugu aram rogon ni ke yib e pi magawon nem ngak David, me par nib pagan’ ngak Got, ma de mulan’.

10. Mang e thingar da rin’ed u nap’an ni keb e gafgow ngodad?

¹⁰ Taareb rogodad ku David nib ga’ fan ni ngada yibilayed ngak Jehovah ni nge ayuwegdad ko urngin e gafgow ni keb ngodad. Ngad guyed e n’en ni yog apostal Paul ni ngada rin’ed ko re n’ey. (Mu beeg e Filippi 4:6, 7.) Mang angin e meybil ni aram rogon? ‘Ma gapas rok Got ndabi chuchugur ni nge nang e girdi’ fan e ra yororiy gum’irchadad nge tafinay rodad ngi i par rok Kristus Jesus.’

11. Uw rogon ni ma yororiy fare “gapas rok Got” gum’irchadad nge lem rodad?

¹¹ Gur ra thil rarogom nbochan e meybil rom? Sana rayog. Machane, thingar da nanged ni gathi gubin ngiyal’ ni ma fulweg Jehovah taban e meybil rodad nrogon ni gad baadag. Yugu aram rogon, ma meybil e ra ayuwegdad ni nge par nib thabthabel lanin’dad ndabi pag rogon e magafan’ rodad ko magawon rodad. Fare “gapas rok Got” e ra pi’ gelngidad u nap’an ni ke tomal lanin’dad. Fare “gapas rok Got” e ra yororiy gum’irchadad nge lem rodad ni bod ba ulung i salthaw ni kan tayrad ni ngar yororiyed ba mach ni be n’en ni nge cham bogi girdi’ ni kireb ngay. Ku ra ayuwegdad nge dabki maruwaran’dad, ma dabkuda rusgad, me chuw e lem nde puluw rodad nge yog nda siyeged i rin’ ban’en nib gur ndariy e gonop riy.​—Ps. 145:18.

12. Mu weliy rogon nrayog ni nge yog e gapas laniyan’ ngak be’.

¹² Uw rogon ni nge par nib gapas lanin’dad u nap’an keb e gafgow ngodad? Am lemnag ba fanathin nib m’ag nga rarogodad. Sana bay be’ ni be maruwel u tan pa’ reb e ga’ ko maruwel nib kireb. Machane, me yib i mab e kanawo’ ngak fa cha’ ni nge weliy laniyan’ ngak e en ni fen fare company, ni be’ nib gol, mab sumunguy. Me yog faen ni fen fare company ngak faanem ni ke nang e magawon rok miki yog ngak nra chuweg faen nib ga’ ko maruwel rok. Mang e ra rin’ e re n’ey ngak facha’ ni girdien e maruwel? Bochan ni ke mich u wan’ e thin ni ka nog ngak ma ke nang e n’en ni bayi buch ma ke ayuweg ni nge dugliy ni nge ulul ko maruwel rok, nyugu aram rogon ni ka bay boch e magawon nra yib ngak. Maku arrogodad, ni gad manang ni manang Jehovah rarogodad, ma ke micheg ngodad ndabki n’uw nap’an ma bayi chuweg e “en ni ir e be gagiyegnag e girdi’ nu fayleng.” (John 12:31) Rra fal’eg e re n’ey lanin’uy!

13. Mang e ku thingar da rin’ed nib muun ko meybil?

¹³ Ere ba gaman ni kemus ni ngad weliyed e magawon rodad ngak Jehovah u daken e meybil, fa? Danga’. Ka bay ban’en nib t’uf ni ngan rin’. Thingar da ngongolgad u rogon nib puluw ko meybil rodad. Nap’an ni l’og Saul ni Pilung e girdi’ ni ngar lied David ngem’, me meybil David ni gaar: “Got rog, mu ayuwegeg u pa’ e pi toogor rog; nge piin ni yad be gafgownigeg. Mu ayuwegeg ko piin ni yad ma rin’ e kireb, nge piin ni ma thang e fan.” (Ps. 59:1, 2, NW) N’en ni kub muun ko meybil ni tay David e motoyil ngak leengin me rin’ e tin nib t’uf ni fan e nge dabi yim’. (1 Sam. 19:11, 12) Taareb rogon ngodad, nrayog ni ngad yibilayed nge yog e gonop ngodad nge yog nda rin’ed ban’en nra lichnag e magawon rodad.​—Jas. 1:5.

Rogon ni Ngeb Gelngidad Nge Yog nda K’adedan’dad

14. Mang e ra ayuwegdad ni ngad k’adan’gad u nap’an ni keb e gafgow ngodad?

¹⁴ Sana dabi chuw e gafgow rodad nib papey. Rayog ni nge n’uw boch nap’an. Faanra aram rogon, ma mang e ra ayuwegdad ni ngad k’adedan’dad? Som’on, e dab mu pagtalin ni faanra da ululgad ko pigpig ngak Jehovah u fithik’ e yul’yul’ nyugu aram rogon ni bay e magawon, ma aram e gad be dag nib t’uf rodad. (Acts 14:22) Dab mu pagtalin e thin ni yog Satan u murung’agen Job: “Gur ra i par Job ni ba’ madgum u wan’ ni faanra der yib e fel’ riy ngak? Kam par ni ga be yoror rok nge girdi’ nu tabinaw rok nge urngin ban’en ni ba’ rok. Ga be fal’eg waathan u urngin e tin ni be ngongliy, ma urngin e garbaw ni kam pi’ ngak e ke yoor u daken e ted i yan. Machane ga ra fek rok urngin e tin ni ba’ rok, ma ra yog nga owchem e thin nib togopuluw ngom.” (Job 1:9-11) Bochan e yul’yul’ rok Job, ma ke dag nde riyul’ e thin ni ke yog Satan. Gad ra k’adan’ ko gafgow, ma rayog ni ngad micheged nib malulfith l’igin Satan. Ma, k’adan’ ni gad ra tay e ra gelnag e athap nge pagan’ rodad.​—Jas. 1:4.

15. Mang boch ban’en nrayog ni pi’ e athamgil nga lanin’dad?

¹⁵ Bin l’agruw, e dab mu pagtalin ni ‘piin ni yad be par u roy u fayleng ni polo’ ni Kristus e ke michan’rad ngak e gafgow ni be yib ngodad e ku ir e be yib ngorad.’ (1 Pet. 5:9) Arrogon, ‘urngin e n’en ni ma waliy e girdi’ nge denen ni ke yib ngom e ereyer e mit i n’en ni ka ma yib ngak e girdi’.’ (1 Kor. 10:13) Ere rayog ni ngeb gelngim nfaanra mu fal’eg i lemnag e tin nib fel’ ni ke rin’ boch e girdi’ ma gathi magawon rom. (1 Thess. 1:5-7; Heb. 12:1) Mu tay e tayim ni ngam fal’eg i lemnag e n’en ke rin’ e piin ni ga manang ni ke par nib yul’yul’ ni yugu aram rogon ni keb e gafgow ngorad. Kaam fal’eg i gay murung’agen boch e girdi’ ni kan ta’ nga babyor ni keb e magawon ngorad ni bod rogon e magawon ni ke yib ngom, fa? Pi n’ey e rayog ni ngari pi’ e athamgil nga lanin’um.

16. Uw rogon ni ma gelnagdad Got u nap’an nra yib e skeng ngodad nib thilthil?

¹⁶ Bin dalip, e dab mu pag talin ni Jehovah e “ir e Chitamangiy nrib tarunguy e girdi’, ni ir faanem i Got ni urngin mit e ayuw me ir e be yib rok ngodad! Ma ayuwegdad u urngin e gafgow nge kireban’ ni ma yib ngodad.” (2 Kor. 1:3, 4) Re n’ey e gowa bod ni bay Got u toobdad ni be pi’ e athamgil nga lanin’dad ma be gelnagdad, ni gathi kemus ni fan ko gafgow ni be yib ngodad e chiney, ya “fan ko urngin e gafgow ni ma yib ngodad.” Re n’ey e ra ayuwegdad ni ngada fal’eged laniyan’ e girdi’ ni “demtrug e gafgow ni ke yib ngorad.” Ke riyul’ e pi thin ney ko n’en ni buch ku Paul.​—2 Kor. 4:8, 9; 11:23-27.

17. Uw rogon nra ayuwegdad e Bible nge yog nda k’adedan’dad ko gafgow ni ma yib ngodad?

¹⁷ Bin aningeg, e bay rodad e Thin rok Got ni fare Bible, ma “ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got, ya en ni be pigpig ngak Got e nge par ni ke bung rogon nrayog ni nge rin’ urngin mit e ngongol nib fel’.” (2 Tim. 3:16, 17) Thin rok Got e gathi kemus ni ma ayuwegdad ni nge par ni ke ‘bung rogodad’ ni ‘ngad rin’ed urngin mit e ngongol nib fel’.’ Ya ku ra ayuwegdad ni ngad k’adedan’dad ko gafgow ni ma yib ngodad. Ra ayuwegdad ni nge par ni ‘kari bung rogodad’ ni ‘ri rayog ni ngada rin’ed ban’en nib fel’.’ Fare bugithin ni kan thilyeg ni ‘ngari bung rogon’ e be yip’ fan ni ‘kan pi’ ngorad e tin nib t’uf rorad.’ Re thin ney e rayog ni ngan fanay kakrom ni fan ko barkow ni kan ta’ urngin ban’en nib t’uf ngay ni fan ko milekag ara masin nrayog ni nge rin’ urngin e maruwel nib t’uf ni nge rin’. Ere ku arrogon Jehovah, ni ma pi’ ngodad urngin ban’en nib t’uf rodad nge yog nda pithiged e magawon ni keb ngodad u daken e Thin rok. Ere ba puluw ni ngad gaargad, “Faanra ke pag Got e re n’ey, ma rayog ni nggu k’adan’ug riy, u daken e ayuw rok.”

Ngan Chuwegdad ko Urngin e Gafgow Rodad

18. Ngan tiyan’uy ko mang e ra ayuwegdad ni ngad k’adan’gad u fithik’ e yul’yul’?

¹⁸ Bin lal, e mu tiyan’um ko tin riyul’ nra chuweg Jehovah e girdi’ ko urngin e gafgow. (Ps. 34:19; 37:9-11; 2 Pet. 2:9) Tomur riy, e ayuw nra pi’ Got ngodad e gathi kemus ni nge chuwegdad ko gafgow ni be yib ngodad e chiney ya ku bay e athap rodad ni nge yog e yafas ni manemus ngodad ndemtrug ko yafas u tharmiy u taabang ku Jesus fa paradis u fayleng.

19. Uw rogon nrayog ni ngan k’adan’ u fithik’ e yul’yul’?

¹⁹ Ngad ululgad ngad k’adedan’dad ko gafgow ni bay ko re fayleng ney nge ni mada’ ko re ngiyal’ i n’em. Ri gad be sonnag e ngiyal’ nra m’ay urngin e pi n’ey! (Ps. 55:6-8) Dabda paged talin ni k’adan’ ni gad ra tay u fithik’ e yul’yul’ e ra micheg nib malulfith l’igin Moonyan’. Manga yigi yib gelngidad ko meybil rodad nge pi walagdad ni Kristiano, ngaud lemnaged ni pi walagdad e ku be yib e skeng ngorad ni bod gadad. Mu fanay e Thin rok Got nib fel’ rogon nge yog nim par ni kari bung rogom ni ngam rin’ urngin mit e ngongol nib fel’. Dab mu pag ni nge war e pagan’ rom ko ayuw ni ma pi’ “fare Got ni ri ma fal’eg lanin’uy.” Dab mu pag talin ni “Somol e ma matanagiy e piin ni yad mmat’aw, ma ma motoyil ngorad ko tin ni yad ma wenignag ngak.”​—Ps. 34:15.

Rayog nim Fulweg?

• Uw rogon u wan’ David e gafgow ni yib ngak?

• Mang e ke yog Solomon ni Pilung ni be dag nib pagan’?

• Mang e ra ayuwegdad ngad pithiged e magawon ni ke pag Jehovah keb ngodad?

[Picture on page 17]

Kari mich u wan’ Solomon nra ayuweg Jehovah e girdi’ Rok ni kar gafgowgad