Ga Ma Sap Ngak Boch e Girdi’ ni Bod ni Ma Rin’ Jehovah Fa?
“De yurba’ dowey . . . Urngin yang nra bayang ma ba thil ni yad be ayuweg yad.”—1 KOR. 12:25.
1. Uw rogon e lem rom u nap’an ni mub nga lan fare paradis nib spiritual ko som’on?
NAP’AN nni som’on nda chuwgad ko fare fayleng nib kireb ma gad tabab i chag ngak e girdi’ rok Jehovah, ma dabisiy ni kad felfelan’gad ni kad pirieged e t’ufeg nib fel’ nge ayuw ni bay rorad. Rib thil ko girdi’ ni maangach nge ma fanenikay, nge tatugthin ni bay u tan gelngin Satan! Kad bad nga lan fare paradis nib spiritual, nib sug ko gapas nge taareban’.—Isa. 48:17, 18; 60:18; 65:25.
2. (a) Mang e ra yib rogon nga rogon ni gad ma sap ngak boch e girdi’? (b) Mang e ba t’uf ni ngad rin’ed?
2 Machane, nap’an nra n’uw boch nap’an, ma sana rayog ni ud sapgad ngak pi walagdad u reb e sap nib kireb ni sap ko piin nde flont. Bochan ni dad flontgad ma rayog ni k’aringdad ngaud fal’eged i yaliy e kireb rok pi walagdad ko bin ngad sapgad ko pi fel’ngin Got ni ba’ rorad. Rogon riy, e kad paged talin ni ngad sapgad ngorad u rogon ni ma sap Jehovah ngorad. Faanra buch ere n’ey rodad, ma kad nanged ni ngad fal’eged i lemnag rogon ni gad be sap ni nge taareb rogon ko sap rok Jehovah nib tamilang.—Ex. 33:13.
Rogon ni Ma Sap Jehovah Ngak Pi Walagdad
3. Mang e be taarebnag e Bible e ulung ko Kristiano ngay?
3 Rogon ni bay ko 1 Korinth 12:2-26, e taarebnag apostal Paul fare ulung ko Kristiano ni kan dugliyrad nga ba dowef “ni bod yu yang riy.” Ri bod rogon e yu yang nib ga’ fan u dowey nib thil rogon bayang nga bayang, ma gothon e ulung e ba gel e thilthil u rarogorad nge tin nrayog rorad. Machane, ba fel’ u wan’ Jehovah e pi thilthil ney. Ba t’uf rok ma ma felan’ ngak gothon e ulung ni be’ nge be’. Ere, ku arrogon, ni ku be tay Paul chilen ngodad ni gothon e ulung e “thingari taareb rogodad u wun’dad.” Re n’ey e rayog ni nge mo’maw’ ya ngongolen boch e girdi’ e rayog nib gel e thil riy ko ngongol rodad.
4. Mang fan nsana ra t’uf ni ngad yal’uweged rogon ni gad ma sap ngak pi walagdad?
4 Bayi n’en mab ga’ ni gad ma guy e meewar rok pi walagdad. Gad ra rin’ ni aram rogon ma bod ni gad be fanay ba kamera ni lanmit e ri taa bochi yang i n’en e be m’ug riy. Machane rogon e sap rok Jehovah, e bod ni be sap u reb e kamera nib ga’ yang e be m’ug riy, nrayog ni ngan fek yaan ban’en riy nge tin ni ka bay u tooben i yan. Sana kemus ni gad ra fal’eg i yaliy e tin ni dubdad, ma Jehovah e ma guy be’ ni polo’ ni kub muun ngay urngin pi fel’ngin nib fel’. Ra i gel i athamgiliy rodad ni ngad boded Jehovah, ma aram e ri be gel rogon ni gad be ayuweg fare t’ufeg nge taab girdi’ u lan e ulung.—Efe. 4:1-3; 5:1, 2.
5. Mang fan nde puluw ni ngan turguy e kireb nga daken boch e girdi’?
5 Ri manang Jesus ni girdi’ nde flont e ba ga’ nrib mom ni ngaura dugliyed rarogon be’. I pi’ e fonow ni gaar: “Mu talgad i turguy e kireb nga daken e girdi’, nge dabi turguy Got e kireb nga dakenmed.” (Matt. 7:1, NW) Mu guy u roy nde gaar Jesus: “Dab mu turguyed e kireb nga daken e girdi’”; yi gaar: “Mu talgad i turguy e kireb nga daken e girdi’.” Manang ni boor ko piin be motoyil ngak e ke mecham ngorad ni ngaur gayed e kireb rok boch e girdi’. Gur rayog ni ke mecham ngodad ere ngongol nem? Faanra ke mom ni gad ma rin’ ere nem, ma thingar da athamgiliyed ngad paged nge dab ni togopuluwnag e pufthin ngodad. Ma rogon riy, e gad mini’ ni ngad dugliyed rogon be’ ni be fanay Jehovah ni ke dugliy nga reb e liw, ara nga nog ni susuna ri dabi mang bang ko ulung? Ba walag ni pumoon e rayog ni bay boch e kireb rok, machane faanra ka be par nib fel’ u wan’ Jehovah, ma gur ba puluw ni ngad paged? (John 6:44) Gur, ri be mich u wan’dad ni Jehovah e be pow’iy girdien e ulung rok, ma ra bay ban’en ni ngan yal’uweg riy, ma ra maruweliy ko ngiyal’ ni ke taw nga nap’an?—Mu beeg e Roma 14:1-4.
6. Uw rogon ni ma sap Jehovah ko pi tapigpig rok?
6 Reb i rarogon Jehovah ni ki yira ngat ngay e rayog ni nge guy rarogon reb nge reb e Kristiano ko mang e yad ra fel’ ngay u nap’an ni yad ra flont ko bin nib beech e fayleng. Maku manang ko uw rogon e mon’og ni kar tayed ko tirok Got ban’en. Ere arfan, ndariy fan ni ngari fal’eg i yaliy reb nge reb e meewar ku be’. Gad ra beeg ko Psalm 103:12 ni gaar: “Rogon feni mal’af thilin e ngek nge ngal, e aram rogon nra chuweg e denen rodad nge mal’afnag rodad.” Ngari bagadad me pining e magar nbochan e re n’em!—Ps. 130:3.
7. Mang e gad ra fil u rogon ni ma sap Jehovah ngak David?
7 Gad be guy e mich riy u Bible ni Jehovah e ba’ gelngin ni nge guy e n’en nib fel’ rok be’. I yog Got David ni “David ni tapigpig rog, ni ma fol ko pi motochiyel rog ma ma lekeg ni polo’ i gum’irchaen ni be rin’ e tinib mat’aw u p’eowcheg.” (1 Ki. 14:8, NW) Riyul’, ni gad manang ni rin’ David boch ban’en nib kireb. Machane, ki lemnag Jehovah ni nge fal’eg i yaliy e n’en nib fel’ ya manang nib mat’aw gum’irchaen David.—1 Kron. 29:17.
Um Sap Ngak Pi Walagem ni Bod ni Ma Rin’ Jehovah
8, 9. (a) Mang kanawo’ e rayog ni ngad boded Jehovah riy? (b) Uw rogon ni yira susunnag ere n’ey, ma mang e gad ra fil riy?
8 Jehovah e rayog ni nang rogon e lem, ma gadad e dabiyog rodad. Arfan nib fel’ ndab da turguyed ban’en nga daken be’. Ya dada nanged urngin i fan ni ma rin’ be’ ban’en. Thingar da guyed rogon ngad folwokgad rok Jehovah ni nge dab uda fal’eged i lemnag e meewar rok boch e girdi’ nra munmun me m’ay. Gathi ban’en ni bfel’ ni ngan nameg ni ngan bod ir ko biney e kanawo’, fa? Gad ra rin’ ni aray rogon mab gel nra ayuweg e gapas u thildad pi walagdad ni pumoon nge ppin.—Efe. 4:23, 24.
9 Ra ngan susunnag, ma ngam lemnag ba naun ni ke kirkireb, ke mulmul e toyo riy, ma ke pil e winda riy, ma ke kireb e tenjio riy. Oren e girdi’ e sana yad ra sap ko re naun nem mi yad lemnag ni kab fel’ ni ngan buthug; ya ke kireb yaan u owchey. Machane rayog ni ba’ be’ nib thil rogon nra sap ko fare naun. Sana ra yan e sap rok nge pag e tin nib gagiyel e magawon, nge guy ni kab gel kenggin fare naun maku rayog i fulweg nga rogon. Me chuw’iy fare naun me maruweliy nga fal’eg fa yu yang ni ke kireb riy me fal’eg yaan. Ma aram, e piin ni bay u ranod u tooben e bay u rogned feni fel’ ere tabinaw nem. Rayog ni ngad boded e cha’ nem ni maruwel nge fal’eg ere naun nem me fulweg nga rogon? Rayog ni ngad nanged fel’ngin pi walagdad nge rogon nrayog ni ngkur mon’oggad ko tirok Got ban’en ko bin ni ngaud fal’eged i guy e kireb rorad ni be m’ug nga wuru’, fa? Faan gad ra rin’ ni aram rogon, ma ra t’uf pi walagdad rodad nbochan fel’ngirad ko tirok Got ban’en ni bod ni ma rin’ Jehovah.—Mu beeg e Hebrews 6:10.
10. Uw rogon nra ayuwegdad fare fonow ni bay ko Filippi 2:3, 4?
10 Ke pi’ apostal Paul boch e fonow nrayog ni ayuwegdad ko rogon e tha’ u thildad urngin e girdi’ u lan e ulung. I tay chilen ngak e pi Kristiano ni gaar: “[Dabi] suk’ ngan’med ni ngam muruweliyed ban’en ni gimed e ngam m’onod riy ni fan e nga nognimed riy ni gimed e soromed, ara bochan e nge yib ufan ngomed; machane nge bigimed me sobut’nagan’, ma dabi finey bigimed ni ir e ba sorok ngak e tin ni ka bay e girdi’. Ra bigimed ma ngi i lemnag bigimed ngi i ayuweg u rogon nrayog rok, ma gathi goo ir e ngi i lemnag ir.” (Fil. 2:3, 4) Sobut’an’ era ayuwegdad nge fel’ rogon ni ngaud sapgad ngak boch e girdi’. Yira dag ni yibe lemnag boch e girdi’ ma yibe sap nga fel’ngirad ma ra ayuwegdad ngad guyed yad ni bod ni be rin’ Jehovah.
11. Mang e pi n’en ni ke thilthil ni keb angin nga boch e ulung?
11 Dawori n’uw nap’an, ma mon’og ni be tay e fayleng e ke yib angin ni kari gel e mithmith ni be tay e girdi’. Boch e mach e piin ni ma par riy, e girdi’ u boch e nam nib thilthil. Boch e girdi’ ni ka finib ko gin ni gad ma par riy e kar adaged e tin nriyul’ nu Bible, ma kar uned ngodad ko pigpig ngak Jehovah. Pi cha’ ney e kar “bad u gubin e nam, nge ganong, nge gubin mit e girdi’, nge gubin mit e thin.” (Rev. 7:9) Ere angin, e ke yoor e ulung rodad e ke ga’ ni ulung ko pi nam.
12. Mang e ngaud pired ni gad be rin’ u rogon ni ngaud sapgad ngodad, ma mang fan ni yu ngiyal’ e ba mo’maw’ ere n’ey?
12 Ba t’uf ni ngad tedan’dad nga i puluw rogon e sap rodad ngodad u lan e ulung. Re n’em e be puguran ngodad ni ngaud folwokgad ko fonow rok apostal Peter ni ngad daged ni gad be ‘par nrib t’uf rodad e piin ni gadad ni ke mich Kristus u wan’rad ni bod gadad, ma ra bagadad ma ngari t’uf rok bagadad u polo’ i laniyan’.’ (1 Pet. 1:22) Rayog nib mo’maw’ ni ngan maruweliy ni nge yog e bin riyul’ e t’ufeg nge runguy ko ulung ni girdi’ riy e yib u boor e nam nib thilthil. Piin ni walagdad e sana ba gel e thil ko yalen rorad ko birodad ni bod rogon nib thil e skul rorad, nge rarogon e par, nge gin nra sumgad riy. Ga ma pirieg nib mo’maw’ ni ngam nang rogon e lem ara ngongolen boch i yad, fa? Rayog ni ku aram rogon ni yad ma lemnagem. Demtrug rogon, ma gad gubin ni kan fil ngodad ni nge: ‘T’uf e pi cha’ ni gadad ni ke mich Got u wan’rad.’—1 Pet. 2:17.
13. Mang e ba t’uf ni ngad yal’uweged u rogon ni gad ma lem?
13 Ra t’uf ni ngada thilyeged bochi rarogon ni gad ma lem ni fan e nge yog ni ga’ boch e t’ufeg rodad nge un gubin pi walagdad ngay. (Mu beeg e 2 Korinth 6:12, 13.) Kaa yugu da pirieged gadad ni gad be yog ban’en ni bod e “Gathi gub laniyan’, machane . . . ” ma gad yog boch ban’en ni gad manang nib ga’ ni ma rin’ e girdi’ u reb e nam? Tinef e lem e ra m’ug riy nib t’uf ni ngad athamgilgad ngad paged e laniyan’ ni ka gad be tay u fithik’ i lanin’dad. Sana rayog nda fithed gadad nge lungudad, ‘Gur yugu ma athamgiliy ni nggu nang e girdi’ nib thil rogon e yalen romad?’ Binem e skeng ni gad ra tay ngodad e ra ayuwegdad nge fel’ u wan’dad ma gad adag walagdad ko pi nam iyan.
14, 15. (a) Mog boch e piin ni kar fulweged rogon e lem rorad u rogon ni yad ma sap ngak boch e girdi’. (b) Uw rogon ni ngad folwokgad rorad?
14 Be dag e Bible ngodad boch e piin ni kar yal’uweged e lem rorad, ni bagayad e apostal Peter. Bochan e Peter e ba Jew, ma sana ke siyeg ni nge yan nga naun rok be’ ni gathi ba Jew. Ayugum lemnag rogon laniyan’ ko ngiyal’ nnog ngak ni nge yan nga tafen Kornelius ni be’ ni dawor ni maad’ad ngak maku gathi ba Jew! Me yal’uweg Peter rogon e lem rok, ya manang nib m’agan’ Got ngay ni girdi’ u gubin e nam e ngar manged boch gothon e ulung ni Kristiano. (Acts 10:9-35) Saul, ni taaboch riy me mang apostal Paul, e ku thingari thilyeg boch rogon e lem rok nge dabki laniyan’. I yog nriyul’ niki fanenikay e pi Kristiano ‘nge ni taw ko gini kari gel riy [me] par ni be gafgownag e ulung rok Got ma be kirebnag.’ Maku arrogon, ni nap’an ni yal’uweg Somol ni Jesus Paul, me thilyeg boch i rarogon ni ki tabab ni nge fol ko fonow rok e piin ni ki i gafgownagrad.—Gal. 1:13-20.
15 Dariy e maruwar riy nrayog ni ngad thilyeged rarogon pangidad ni nge ayuwegdad e kan ni thothup rok Jehovah. Faanra kad pirieged ni ba’ chabngen e lem ni laniyan’ u fithik’dad, ma thingar da chuweged ma gad fol ko ‘taab girdi’ ni fare kan ni thothup e ke pi’ ngodad u daken fare gapas ni ir e ke m’agdad.’ (Efe. 4:3-6) Bible e be tay chilen ngodad ni ‘nga don’ed [nga dakendad] e t’ufeg, ya ir e ba m’ag nib fel’ ko ngan taareb.’—Kol. 3:14.
Ngan Folwok rok Jehovah ko Machib Rodad
16. Mang e ba m’agan’ Got ngay ni fan ko girdi’?
16 Rogon ni yoloy apostal Paul e “Got e taareb rogon e ngongol ni ma tay ngak urngin e girdi’.” (Rom. 2:11) Jehovah e ba m’agan’ ngay ni nge uneg e girdi’ u gubin e nam nga rogon e yaram ko liyor ngak. (Mu beeg e 1 Timothy 2:3, 4.) Ke yarmiy rogon “fare thin nib fel’ ni nge weliy ngak e girdi’ nu fayleng, ni urngin e pi nam nge ganong nge thin nge gubin mit e girdi’” ni fan e nge lebguy e re n’em. (Rev. 14:6) I gaar Jesus: “Fare gi milay’ e eram e fayleng.” (Matt. 13:38) Mang e n’en fan e re n’em ngom nge tabinaw rom?
17. Uw rogon ni ngad ayuweg urngin mit e girdi’?
17 Gathi gubin e girdi’ nrayog rorad ni nga ranod ko yungi n’en nib palog ngar feked i yan fare thin ko Gil’ilungun ngak e girdi’. Machane rayog rodad ni ngad feked e re thin ney i yan ngak e girdi’ ko pi nam ni yad be par ko gin gad be machib riy. Gur gad ba naab ko tow’ath ni ngad machibniged urngin mit e girdi’ ma gathi kemus ni piin kad machibniged ni ke bokum e duw? Mang fan ndab mu dugliy u wan’um ni ngam man mu guy e girdi’ ndawori fel’ rogon i machibnagrad?—Rom. 15:20, 21.
18. Mang e lem ni dag Jesus ni fan ngak e girdi’?
18 Ri nang Jesus u wan’ nib t’uf ni ngan ayuweg urngin e girdi’. De machib u taab yangi n’en. Reb e thin nu Bible e be yog ngodad ni “yan Jesus ko pi binaw i yan.” Ma “faani guy e pi girdi’ nem ni aram urngirad, me taganan’ ngorad” me yog nib t’uf ni ngan ayuwegrad.—Matt. 9:35-37.
19, 20. Mang boch e kanawo’ nrayog ni ngad daged riy e lem ni ma tay Jehovah nge Jesus ni fan ngak urngin mit e girdi’?
19 Mang boch e kanawo’ nrayog nim dag e ngongol riy nib taareb rogon ko biney? Boch e girdi’ e kar turguyed ni ngar machibgad ko yu gin ni ngaur machibgad riy ni gathi ri yima yan ngay. Re n’ey e ba muun ngay e tamaruwel, nge park, nge yungi n’en ntagil’ e maaf ara mit e pi naun ni yima par riy ni gathi ri yima yan ngay. Ma boch e girdi’ e kar athamgilgad kar filed reb e thin nib beech ni fan e ngar machibniged e girdi’ nu bang ni be par ko gin ni yad be par riy ara yu ulung e girdi’ ni gathi ri yima machibnagrad kafram. Yira fil rogon ni ngan non ngak e girdi’ ni thin rorad ma be dag nri ga be lemnag e tin nib fel’ ngorad. Faanra dabiyog ni nga kum fil yugu reb e thin, ma gur rayog ni ngad pied e athamgil nga laniyan’ e piin ni ke yog rorad? Ba mudugil ni dubdad ni ngad meewarnaged laniyan’ boch e girdi’ ara da deeriyed fan ni yad be athamgil ni ngar machibnaged e girdi’ nu reb e nam. Urngin e yafas nib ga’ fan u wan’ Got, ma gad baadag ni ngaud sapgad nga ban’en ni ku aram rogon.—Kol. 3:10, 11.
20 Ngan sap ko girdi’ ni bod Got e ku be yip’ fan ni ngan machibnag urngin e girdi’ ni yugu demtrug rarogorad. Boch i yad e ra buch ndariy e tabinaw rorad, fa yad ba alit, fa yad ma par nib kireb e ngongol rorad. Faanra rin’ e girdi’ e kireb ngodad ma dabi k’aringdad ere n’em nge yib e lem ni kireb ngodad u murung’agen e gini yad be’ riy ara re miti girdi’ nem ni gubin. I rin’ boch e girdi’ e kireb ngak Paul, machane de pag ere n’em nge taleg ko machib ni i tay ngak e girdi’ ni taareb rogorad e pi cha’ nem. (Acts 14:5-7, 19-22) Ba mich u wan’ ni bay boch e girdi’ ni yad baadag ni ngar motoyilgad.
21. Uw rogon ni sap ni bod e sap rok Jehovah e ra ayuwegem?
21 Chiney e ke gel boch e tamilang riy ko kafram ni bin nib puluw e sap ni—sap rok Jehovah—e ba t’uf u rogon e n’en gad be rin’ ngak pi walagdad ko ulung rodad, ngo fayleng i yan, nge girdi’ ni yibe lekrad i yan. Feni chuchugur nrayog rodad ni nga daged rogon ni ma sap Jehovah ma aram gelngin ni gad be gelnag e gapas nge ngan taareb. Ma rayog ni ngad ayuweged boch e girdi’ ngar adaged Jehovah, ni fare Got ni “dawori dag e laniyan’” ma be dag e t’ufeg nib fel’ ngak urngin e girdi’ ya “yad gubin ni maruwel u pa’.”—Job 34:19, NW.
Rayog nim Weliy?
• Mang e n’en nima rin’ me gonop reb e Kristiano?
• Uw rogon nrayog nda mon’oggad u rogon i dag e gonop rok Got?
• Mang e ngongol rok e piin ndarur daged “fare gonop ni yib u tharmiy”?
• Mang boch i fel’ngin ni kam dugliy u wan’um ni ngam maruweliy?
[Picture on page 28]
Uw rogon ma ga nang e girdi’ u boch e yalen?
[Pictures on page 30]
Mang boch e kanawo’ nrayog ni ngam tawnag fare thin nib fel’ ngak boch e girdi’ ni boor?