Pi Fel’ngin Nthingar Da Nameged

“Mu nameg e tin nib mat’aw, nge yul’yul’ ku Got, nge michan’, nge t’ufeg, nge k’adan’, nge sumunguy.”​—1 TIM. 6:11, NW.

1. Mu weliy fan fare bugithin ni “nameg.”

MANG e ma yib ngan’um u nap’an ni gara rung’ag fare bugithin ni “nameg”? Sana ga ma lemnag fa ngiyal’ i n’em u nap’an Moses ni faani ‘lol’og piyu Egypt’ yu Israel, ma aram mi yad magawon u lan fagi Day ni Row. (Ex. 14:23) Fa sana ra yib ngan’um e riya’ ni keb ngak be’ u Israel kakrom ya ke kal ku be’ kem’. Thingari gur nge yan nga reb fa nel’ i mach ni kan dugliy ni yima ayuwegey riy. Ya ra danga’ ma “en ni ir e nge fulweg labgen e kireb, e ra athamgiliy ni nge yog faanem ngak, ma [rayog] ni kol nge li’ ngem’.”​—Deut. 19:6, Tanakh.

2. (a) Mang tow’ath e ke pining Got boch e Kristiano ni ngar nameged? (b) Mang tow’ath e be dag Jehovah ngak yooren e Kristiano e ngiyal’ ney?

² Mu lemnag e lem nib fel’ ni i tay Paul me gaar: “Ere gu be mil nib k’iy kanawoeg i yan ko n’en ni gu be nameg ni bochan e nge yog puluwon ngog, ni aram e pong ni ke ta’ Got ngodad u daken Kristus Jesus ni nga darod ko yafos ni bay u tharmiy.” (Fil. 3:14) Bible e be dag ni 144,000 e Kristiano ni kan dugliyrad nib muun Paul ngay e ke yog fare tow’ath ko yafas u tharmiy ngorad. Yad ra un ngak Jesus Kristus ngar gagiyegniged e fayleng u lan Bbiyu’ e Duw. Rib manigil ere n’ey ni ke pining Got e pi cha’ney ni ngar nameged! Machane, yooren e tin nriyul’ e Kristiano e ngiyal’ ney e ba thil e n’en ni yad be nameg. U fithik’ e t’ufeg e be ognag Jehovah ngorad e n’en ni ke mul u pa’ Adam nge Efa, ni aram, fare flaab ko yafas ni manemus ndariy e m’ar riy u paradis u fayleng.​—Rev. 7:4, 9; 21:1-4.

3. Uw rogon ni ngad daged ni gad be pining e magar ko ngongol rok Got ngodad u fithik’ e gol?

³ Girdi’ ntadenen e dabiyog ni nge yog e yafas ni manemus ngorad ni faanra kemus ni ngar athamgilgad ni ngar rin’ed e tin nib mat’aw ban’en. (Isa. 64:6) Kemus ni faanra michan’uy ko n’en ni ke pi’ Got ngodad u fithik’ e t’ufeg u daken Jesus Kristus e rayog ni yog riy e yafas ni manemus ngodad. Mang e rayog ni ngad rin’ed ma gad dag ni gad be pining e magar ko re ngongol nem u fithik’ e gol ni ke rin’ Got? Reb riy e rayog ni ngad folgad ko re motochiyel ni baaray ni gaar: “Mu nameg e tin nib mat’aw, nge tin nib fel’ u p’eowchen Got, ma ga par nib mich Got u wun’um, ma ba t’uf Got rom nge girdi’, mu um par ni gab k’adan’, ma gab sumunguy.” (1 Tim. 6:11, NW) Gad ra lemnag e pi fel’ngin ney ma ra ayuwegdad ni be’ nge be’ ngad dugliyed u wan’dad ni ngad nameged e pi n’ey u fithik’ e ‘athamgil.’​—1 Thess. 4:1.

“Mu Nameg e Tin Nib Mat’aw”

4. Mang fan nrayog ni nge mudugil u wan’dad nib ga’ fan ni ngan nameg e tin nib “mat’aw,” ma mang e ba t’uf ni nge rin’ be’ som’on?

⁴ L’agruw yang ko pi babyor ni pi’ Paul nge yan ngak Timothy, e weliy riy murung’agen e pi fel’ngin ni ngan nameg, ma gubin ngiyal’ nra yog reb e pi fel’ngin nem, me yog fare bugithin ni “mat’aw” ko som’on. (1 Tim. 6:11; 2 Tim. 2:22) Maku, yu yang u Bible e ka yibe pi’ e athamgil ngodad ni ngad nameged e tin nib mat’aw. (Prov. 15:9; 21:21; Isa. 51:1) Reb e kanawo’ ni ngad tababgad i rin’ e re n’ey riy e aram e ‘nge yog e tamilangan’ ngodad . . . ko bin nriyul’ e Got, nge en ni [ke] l’og ni aram Jesus Kristus.’ (John 17:3) Ngan nameg e tin nib mat’aw e ra k’aring be’ nge rin’ ban’en​—ni aram e ra kalngan’ ko denen ni i rin’ kafram me ‘pi’ keru’’ ngay nge yog ni rin’ e n’en nib m’agan’ Got ngay.​—Acts 3:19.

5. Mang e thingar da rin’ed nge yog nda mat’awgad u mit Got ma gad par ni aram rogon?

⁵ Bokum milyon e piin nriyul’ ni yad be nameg e tin nib mat’aw ni kar ognaged e yafas rorad ku Jehovah ma kar daged e pow riy u daken e taufe ko ran. Faanra gur reb e Kristiano ni kan taufenagem, ma ga be lemnag ni yafas rom e susun e be m’ug riy ni ga be ulul i nameg e tin nib mat’aw ban’en, fa? Reb riy e nap’an ni gara mada’nag boch ban’en u lan e yafas rom nsusuna ngam dugliy ban’en riy ma ngam nang e “tin nib fel’ ko tin nib kireb” ni be yog e Bible. (Mu beeg e Hebrews 5:14.) Bod ni, faanra gur reb e Kristiano ni ke taw nga yangarem nrayog ni ngam un ko mabgol, ma kam dugliy u wan’um ndab mu un ngak be’ ni gathi ir reb e Kristiano ni ke un ko taufe, fa? Ra aram rogom nfaanra tin nib mat’aw ban’en e ir e ga be nameg.​—1 Kor. 7:39.

6. Mang e ba muun ko ngan nameg e tin nriyul’ nib mat’aw ban’en?

⁶ Ngan par ni yib mat’aw e ba thil ko gur rom ngam lemnag ni gab mat’aw ara ‘ke pag rogon feni gab mat’aw.’ (Ekl. 7:16) I ginangey Jesus ko mit ney e ngongol ni nge dag be’ ni kab fel’ ngak boch e girdi’. (Matt. 6:1) Riyul’ nra ngan nameg e tin nib mat’aw mab muun gum’irchaey ngay​—ngan yal’uweg e lem nib kireb, nge ngongol, nge tin ni be k’aringey ni ngan rin’ ban’en, nge ar’ar. Faan gadra ulul i maruweliy e re n’ey, ma ra mo’maw’ ni ngad ngongliyed reb e denen nib ubchiya’. (Mu beeg e Proverbs 4:23a; mu taarebnag ko James 1:14, 15.) Tin kub muun ngay e ra tow’athnagdad Jehovah me ayuwegdad u boch e pi fel’ngin e Kristiano ni ka gad be nameg.

“Mu Nameg e . . . Yul’yul’ ku Got”

7. Mang e “yul’yul’ ku Got”?

⁷ Ngan par ni yib yul’yul’ nga ban’en e ba muun ngay ni ngan par ni yib felfelan’ ko n’en ni yibe rin’ ma yibe tiyan’uy ngay. Reb e jibiki ko Bible e yog ni fare bugithin ni Greek ni kan piliyeg ni “yul’yul’ ku Got” e be dag e “ngongol nib fel’ ni yibe gay rogon ndab ni pag ban’en nge warnag e michan’ ngak Got.” Ba ga’ nde yog rok piyu Israel ni ngar rin’ed ere n’ey nrogon ni m’ug ko n’en rin’ed ndar folgad u tomren ni chuwegrad Got u pa’ piyu Egypt.

8. (a) Mang deer e sum ni bochan e denen ni tay Adam? (b) Uw rogon ni ke m’ug e fulweg ko re n’ey “nib thothup nib mith”?

⁸ Ke yan bokum e duw u tomren ni ke denen fare moon nib flont ni Adam, ma dawor ni fulweg e re deer ney ni gaar, “Rayog ni nge par e girdi’ ni yad ba yul’yul’ ku Got ndab ra rin’ed ban’en nib kireb?” Nap’an e pi chibog nem, ma dariy be’ nib tadenen ni ke yog ni nge par nib yul’yul’ ku Got ni gubin ngiyal’. Machane nap’an ni taw nga ngal’an, me tamilangnag Jehovah e fulweg ko re n’ey “nib thothup nib mith.” I ngal’uweg e yafas rok fak ni kari mus rok nga yin Maria nge gargeleg nib girdi’ nib flont. N’umngin nap’an e yafas rok Jesus nib muun ngay e yam’ ni tay ni tamra’ riy, e dag e n’en ni be yip’ fan ni ngan par ni yib yul’yul’. Meybil rok e dag rogon e pigpig ni be tay ngak e Chitamangin nu tharmiy ni ma t’ufegey. (Matt. 11:25; John 12:27, 28) Ere, i thagthagnag Jehovah ku Paul ni nge weliy murung’agen e “yul’yul’ ngak Got” u rarogon e yafas rok Jesus nrayog ni ngan folwok riy.​—Mu beeg e 1 Timothy 3:16.b

9. Uw rogon ni ngad nameged ni ngad pired ni gad ba yul’yul’ ku Got?

⁹ Bochan rarogodad ni gad ba tadenen, ma dabiyog ni ngad pired ni gad ba yul’yul’ ku Got ndab da olobochgad. Machane rayog ni ngad nameged ere n’ey. Re n’ey e be dag nib t’uf ni ngad leked luwan ay Kristus u rogon nrayog rodad. (1 Pet. 2:21) Ere, dab da boded e piin ni ur dake modingniged yad ni ‘ur dake yad be liyor ngak Got, machane bay ra pied keru’rad nga gelngin.’ (2 Tim. 3:5) Re n’ey e gathi be yip’ fan ni yul’yul’ ku Got e dariy rogon nga rarogodad ni yima guy. Ya ri bay rogon. Bod ni, demtrug ko gad be mel’eg e mad ni ngad chuwgad ngay ko rorran ni m’agpa’ rodad ara mad ni ngad chuwgad ngay u nap’an ni nga darod nga kantin, rogon yaadad e susun ni gubin ngiyal’ mab m’ag ngak e piin ni “yad be dag ni yad girdien Got.” (1 Tim. 2:9, 10) Arrogon, n’en ni gad be nameg ni aram e ngad fel’gad u p’eowchen Got e be dag nib t’uf ni ngad lemnaged ni ngad pired ni gad ba mat’aw u mit Got u gubin e rran.

“Mu Nameg e . . . Michan’”

10. Mang e thingar da rin’ed nge yog ma nge par nib gel e michan’ rodad?

¹⁰ Mu beeg e Roma 10:17. Ra nge yog ma nge par nib gel e michan’, ma be’ nib Kristiano e thingari ulul nga i fal’eg i lemnag e pi thin nriyul’ mab fel’ ko Thin rok Got. “Fare tapigpig nib yul’yul’ ma ba gonop” e ke ngongliy e babyor ni boor ken. Dalip ken e babyor riy nrib fel’ e The Greatest Man Who Ever Lived (Fare Moon ni Immoy ni Ir e Th’abi Fel’) nge Learn From the Great Teacher (Mu Fil Ban’en Rok Fare Sensey ni Rib Fel’), nge “Come Be My Follower” (Moy Ngam Mang Reb i Gachalpeg), pi babyor ney e kan ngongliy ni nge ayuwegdad nge yoor ban’en ni ngad nanged u murung’agen Kristus me yog nda folwokgad rok. (Matt. 24:45-47) Maku fare ulung i tapigpig e kar yarmiyed e pi muulung, nge assembly nge convention, ni boor riy e ma tamilangnag “murung’agen Kristus.” Kam pirieg boch e kanawo’ nrayog ni nge fel’ rogom ko pi n’ey me ri ‘gel boch e tiyan’ ni ga be tay’ ko n’en ni be pi’ Got ngodad, fa?​—Heb. 2:1.

11. Mang e maruwel ko meybil nge fol u nap’an ni gad be nameg e michan’?

¹¹ Meybil e ku ban’en nrayog ni ayuwegdad nge gel e michan’ rodad. Immoy ba ngiyal’ ni wenig pi gachalpen Jesus ngak ni lungurad: “Mu gelnag e michan’ romad ngak Got.” Rayog ni ngad weniggad ku Got u fithik’ e sobut’an’ ni ngki rin’ ni aram rogon ngodad. (Luke 17:5) Ra nge gel boch e michan’ rodad, ma susuna ngad yibilayed e ayuw ko kan ni thothup rok Got; michan’ e aram reb i wom’engin ‘fare kan ni thothup.’ (Gal. 5:22) Maku reb e, faan gadra fol ko pi motochiyel rok Got maku ra gel e michan’ rodad. Bod ni, rayog ni ngad yoornaged e tayim rodad ko fare maruwel ni machib. Ri dabisiy nra yibnag ere n’em e felfelan’ nib gel ngodad. Ma nap’an ni gad ra lemnag e pi tow’ath ni ma yib ni faanra ngan ‘mon’eg u wan’uy e gagiyeg rok Got nge tin nib m’agan’ ngay,’ ma ra gel e michan’ rodad.​—Matt. 6:33.

“Mu Nameg e . . . T’ufeg”

12, 13. (a) Mang e bin nib beech e motochiyel rok Jesus? (b) Mang boch e kanawo’ nib ga’ fan nrayog ni ngad nameged e t’ufeg ni dag Kristus riy?

¹² Mu beeg e 1 Timothy 5:1, 2. I pi’ Paul e fonow nib fel’ u rogon nrayog ni nga i dag e piin Kristiano e t’ufeg ngorad. Yul’yul’ rodad ku Got e thingari chagil ngay e fol ni ngad tayed ko bin nib beech e motochiyel rok Jesus ni aram e ‘nge bagadad me t’uf bagadad rok’ nrogon ni gad ba t’uf rok Jesus. (John 13:34) I tamilangnag apostal Paul ni gaar: “Faanra boor ban’en rok be’ ma be guy be’ ni walagen ni girdien Kristus ni ke gafgow nthingari yog ban’en ngak, me fek owchen rok, ma ra diin me gaar e ba t’uf Got rok?” (1 John 3:17) Rayog nim lemnag ba ngiyal’ ni kam dag e t’ufeg nib fel’ rogon, fa?

¹³ Ku reb e kanawo’ ni gad ma nameg e t’ufeg riy e aram e ngad n’aged fan u wan’dad e kireb, ma dabda gayed rogon ni ngad sulweged taban e kireb ngak walagdad. (Mu beeg e 1 John 4:20.) Ya, gad baadag ni ngad folgad ko re fonow ni baaray ni kan thagthagnag ni gaar: “Thingar um n’iged fan u wan’med e n’en ni ke rin’ bigimed ngak bigimed ni bod rogon ni ke n’ag Somol fan u wan’ e tin ni kam rin’ed nib togopluw ngak.” (Kol. 3:13) Bay be’ u lan e ulung nrayog ni ngam rin’ ere n’ey ngak, fa? Ga ra n’ag fan e kireb rok, fa?

“Mu Nameg e . . . K’adan’”

14. Mang e rayog ni ngad filed rok ko fare ulung nu Philadelphia?

¹⁴ Ngad athamgilyed ban’en ni gad be nameg ndabi n’uw nap’an me yog ngodad e ba thil ko bin baaray ni ngad nameged ban’en nib mo’maw’ ara ban’en ni kab palog nga rogon ni ud lemnaged ko som’on. Ba tamilang, nib t’uf e k’adan’ nfaanra nge yog e yafas ni manemus ngodad. Somol Jesus e gaar ngak e ulung nu Philadelphia: “Ya kam fol ko thin ni gog ni ngam par ni gab gum’an’, ere bay gu tiyem ndabi buch ban’en rom ko re ngiyal’ i n’en ni baaram ni bay yib e gafgow riy nga daken e fayleng ni polo’.” (Rev. 3:10) Arrogon, i fil Jesus fan nib t’uf e k’adan’​—reb e fel’ngin nra ayuwegdad ndabi mulan’dad u nap’an ni kad mada’naged e skeng ara nap’an ni yibe waliydad ko kireb. Fapi walag ko ulung nu Philalephia ko bin nsom’on e chibog e kar daged e k’adan’ nrayog ni ngan folwok riy u nap’an nni skengnag e michan’ rorad. Ere, micheg Jesus ngorad ni ku ra ayuwegrad u boch e skeng ni kab ga’ nra yib ngorad boch nga m’on.​—Luke 16:10.

15. Mang e fil Jesus u murung’agen e k’adan’?

¹⁵ Manang Jesus ni pi gachalpen e ra fanenikayrad e girdi’ rorad nge girdi’ nu fayleng ni ga’ngin, ere l’agruw yay ni pi’ e athamgil ngorad ni gaar: “En nra athamgil nge mada’ ko tomur e ra yog e yafos ngak.” (Matt. 10:22; 24:13) Ki dag Jesus rogon nrayog ni nge yib gelngin pi gachalpen ni ngar k’adedan’rad e ngiyal’ nem. U lan reb e fanathin rok, me taarebnag boch thal i but’ ni bay u daken e war ngak e piin rung’aged e re “thin rok Got nem mi yad fol riy ni kar felfelan’gad” machane mar thaygad u nap’an nni skengnag e michan’ rorad. Machane, i taarebnag pi gachalpen ni yad ba yul’yul’ ko but’ nib yong’ol ya kar ‘ted’ e thin rok Got u lanin’rad ma ke ‘yib wom’engirad u fithik’ e k’adan’.’​—Luke 8:13, 15.

16. Mang ban’en ni ke ayuweg bokum milyon e girdi’ ni ngaur k’adan’gad?

¹⁶ Kam nang fare n’em nib mith u murung’agen e k’adan’, fa? Thingar da ‘ted’ e thin rok Got nib fas u lan gum’irchadad ngu lanin’dad. Bochan ni bay fare New World Translation of the Holy Scriptures rodad​—ni bake Bible nib puluw, mab mom ni ngan beeg e thin ni kan piliyeg riy—​maku boor e thin ni kan piliyeg ngay ni ke momnag ngodad ni ngad rin’ed e re n’ey. Ra ud fal’eged i lemnag bang ko Thin rok Got ni gubin e rran ma ra ayuwegdad ni nge yib gelngidad nge yog ni yib wom’engidad u ‘fithik’ e k’adan’.’​—Ps. 1:1, 2.

“Mu Nameg e . . . Sumunguy” nge Gapas

17. (a) Mang nrib ga’ fan e “sumunguy”? (b) Uw rogon ni dag Jesus ni ir be’ nib sumunguy?

¹⁷ Dariy be’ ni baadag ni nga nog ni ke rin’ ban’en ndawori rin’. Ba ga’ nrogon ni ma rin’ e girdi’ ban’en ko binem e ngongol e ngar nonad u fithik’ e damumuw. Machane ri kab fel’ ni ngan dag e “sumunguy”! (Mu beeg e Proverbs 15:1.) Ba t’uf e athamgil u nap’an ni yibe gathibthibnagdad. Ba fel’ e n’en ni rin’ Jesus Kristus u rogon e re n’ey. “Ma faan nog e thin nib kireb ngak ma de ta’ puluwon ni thin nib kireb; ma faan nni gafgownag ma de gaar e bayi fulweg taban ngak e piin ni yad be gafgownag, machane me pag fan urngin ban’en ngak Got, ni ir fare Tapufthin nib mat’aw.” (1 Pet. 2:23) Dabiyog ni ngad lemnaged ni gad ra rin’ e n’en ni i rin’ Jesus nrib fel’ rogon, machane rayog ni ngad maruweliyed ni ngad mon’ognaged rogon ni gad ma dag e sumunguy, fa?

18. (a) Mang fel’ngin e sumunguy? (b) Ku mang boch e fel’ngin ni kan pi’ e athamgil ngodad ni ngad nameged?

¹⁸ Manga yugu da pired ni kad ‘fal’eged rogodad ni gubin ngiyal’’ ni ngad ayuweged e n’en ni ke michan’dad ngay u ‘fithik’ e sumunguy nge tay fan,’ ni gad be folwok rok Jesus. (1 Pet. 3:15) Arrogon, faanra gad ba sumunguy ma rayog ndabi sum e tugthin nbochan e der taareban’uy, ntaareb rogon e girdi’ ni gad ma mada’nag u nap’an e machib nge piin ntaareb e michan’ rodad. (2 Tim. 2:24, 25) Sumunguy e ma ayuwegdad ni nge yib e gapas nga thildad. Dabisiy ni aram fan ni nap’an ni yoloy Paul e gin migid e babyor nge yan ku Timothy me tay e “gapas” nib muun nga boch e fel’ngin ni ngan nameg. (2 Tim. 2:22; mu taarebnag ko 1 Timothy 6:11.) Arrogon, “gapas” e ku aram reb e fel’ngin ni be pi’ e Bible e athamgil ngodad ni ngad nameged.​—Ps. 34:14; Heb. 12:14.

19. Tomren ni kad weliy medlip i fel’ngin e Kristiano, ma mang e kam dugliy ni ngam nameg, ma mang fan?

¹⁹ Kad weliyed murung’agen medlip fel’ngin e Kristiano ni yibe pi’ e athamgil ngodad ni ngad nameged​—tin nib mat’aw, nge yul’yul’ ku Got, nge michan’, nge t’ufeg, nge k’adan’, nge sumunguy, nge gapas. Rib gel e tow’ath nra yib riy nfaanra athamgil e pi walag u lan gubin e ulung ni ngar daged e pi fel’ngin ney nib fel’ rogon! Re n’ey e ra tolangnag Jehovah me yog ni fal’eg rogodad nge yog nda pininged e sorok ngak.

[Footnotes]

Boch Ban’en ni Ngan Fal’eg i Lemnag

• Mang e ba muun ko ngan nameg e tin nib mat’aw ban’en nge yul’yul’ ku Got?

• Mang e ra ayuwegdad ngad nameged e michan’ nge k’adan’?

• Uw rogon nra rin’ e t’ufeg ban’en nga rogon ni gad ma ngongol ngak boch i gadad?

• Mang fan nib t’uf ni ngad nameged e sumunguy nge gapas?

[Picture on page 14]

I ginang Jesus e piin ni yad be dake yad ba mat’aw ni fan e nge guy e girdi’

[Picture on page 15]

Rayog ni ngad nameged e michan’ ni faan gad ra fal’eg i lemnag e tin nriyul’ ko Thin rok Got

[Picture on page 17]

Rayog ni ngad nameged e t’ufeg nge sumunguy