Ngaud Ga’naged e T’ufeg Rodad Ngak Pi Walagdad

“T’ufeg e thingari mang ir e i gagiyegnag e ngongol romed, ni bod rogon Kristus ni gadad ba t’uf rok.”​—EFE. 5:2.

1. Mang e pow ni yog Jesus Kristus ni yira nang pi gachalpen riy?

YIRA nang e Pi Mich Rok Jehovah ni bochan e yad be machibnag fare thin nib fel’ u murung’agen Gil’ilungun Got. Machane ki yog Jesus Kristus yugu reb e pow ni yira nang e tin riyul’ i gachalpen riy. Ke gaar: “Nggu pi’ reb e motochiyel nib beech ngomed, nge bigimed me t’uf bigimed rok. Rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed. Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.”​—John 13:34, 35.

2, 3. Mang angin ni ra yib ngak boch e girdi’ ni faanra ngaud daged e t’ufeg u nap’an e muulung?

² T’ufeg ni bay ko tin riyul’ e Kristiano e dabiyog ni ngan guy ko yugu boch e girdi’. Bod rogon e magnet ni ma girngiy e wasey nga taabang, ere ku arrogon e pi tapigpig rok Jehovah ni ke taareban’rad ni bochan e t’ufeg. Ma ku bochan e t’ufeg rorad me adag boch e girdi’ e tin riyul’. Ni bod e n’en ni buch rok Marcelino ni be’ nu Cameroon, ke maad’ad u tabon e maruwel ma ke malmit. Tomur riy ma boor e girdi’ ni ka rogned ni ke malmit ni bochan e ba tapig. Fare pastor nge boch e girdi’ ko teliw rok e dar pied e athamgil nga laniyan’ ya kar chuweged ko teliw rorad. Nap’an ni ke pining reb e pi Mich rok Jehovah Marcelino ko muulung rorad ma be maruwaran’ ya be lemnag ni ku bod e teliw rok.

³ Ke gin Marcelino u nap’an ni un nga Kingdom Hall. Ya boor e girdi’ ni kar pininged e magar ngak u fithik’ e t’ufeg, ma kari felfelan’ ko machib ni ke rung’ag u nap’an e muulung. Ma aram me tabab ni nge un ko gubin e muulung, me mon’og ko fol Bible min taufenag ko duw ni 2006. Ma aram me fil e thin nriyul’ ngak girdien e tabinaw rok nge piin buguli yoror rok, me yoor e girdi’ ni be fil e Bible ngorad. Ba adag Marcelino ni piin be fil e Bible ngorad e rayog ni ngar guyed e t’ufeg ni i dag e girdi’ rok Got ngak.

4. Mang fan thingar da folgad ko fonow rok Paul ni, ‘t’ufeg e ir e nga i gagiyegnag e ngongol rodad’?

⁴ Re t’ufeg ney u lan e ulung e ma k’aring e felfelan’, ma dabi war ni faanra gadad urngin ni ngad maruweliyed. Mu lemnag reb e m’uw ni ragag e girdi’ ni be yan riy. Ba t’uf ni yad urngin ni ngar mamangad ya faanra danga’ ma ra sagaal fare m’uw me un ko gireng me sor nga bang. Ere ku er rogon u lan e ulung ni gubin e girdi’ nib t’uf ni ngar maruweliyed e t’ufeg. Ere uw rogon ni ngad rin’ed e re n’ey? Ke pi’ Paul e fulweg riy ni gaar: “T’ufeg e thingari mang ir e i gagiyegnag e ngongol romed, ni bod rogon Kristus ni gadad ba t’uf rok me pi’ e pogofan rok ni bochdad, ni ke mang maligach nib fel’ bon u daken e altar ni ir e mm’agan’ Got ngay.” (Efe. 5:2) Fare deer ni ngad fithed gad riy e, uw rogon ni nge m’ug ni t’ufeg e be gagiyegnag e ngongol rodad?

“Ma Ku Ngam Ga’naged e T’ufeg Romed”

5, 6. Mang fan ni ke yog Paul ngak boch e Kristiano u lan e ulung ni ngar “ga’naged e t’ufeg rorad”?

⁵ Ke yoloy apostal Paul ngak e Kristiano nu Korinth kakrom ni gaar: “Kug welthingad ngomed nda gu tinna’gad ngomed, kug weliyed lanin’mad ngomed. Dawor gu mitheged lanin’mad romed; gimed e kam mitheged lanin’med romad. Gu be non e chiney ni gowa gimed pi fakag ni be lungug: mu daged lanin’med ngomad ni bod rogon lanin’mad ngomed. Dab mmitheged lanin’med [“Mu ga’naged e t’ufeg romed,” NW].” (2 Kor. 6:11-13) Mang fan ni ke fonownag Paul e pi Kristiano nu Korinth ni dab ra mitheged lanin’rad ara ngar ga’naged e t’ufeg rorad?

⁶ Mu lemnag ko uw rogon ni ke tabab e ulung nu Korinth kakrom. Ke yib Paul ngaram u nap’an ni ke chugur ni nge m’ay fare duw ni 50 C.E. Ya nap’an ni tabab Paul ko machib u rom me togopluw boch e girdi’ ngak, machane de tal. De n’uw nap’an, ma boor e girdi’ ni ke mich fare thin nib fel’ u wan’rad. U lan “reb e duw nge baley” ni i machib Paul ma i pi’ e athamgil ko fare ulung nib beech. Ba tamilang ni fare ulung nu Korinth e rib t’uf rok. (Acts 18:5, 6, 9-11) Ma ku arrogon e girdi’ u lan e ulung nu Korinth ni rib t’uf Paul rorad ma ri yad ma tayfan. Machane boch i yad e kar paloggad rok. Ni sana daburad rogon ni ke fonownagrad ni rib tamilang. (1 Kor. 5:1-5; 6:1-10) Ma ku boch i yad e ke mich u wan’ e n’en ni ke yog “fapi apostal nib sororad.” (2 Kor. 11:5, 6) Baadag Paul ni urngin e pi walag u lan e ulung e ngar t’ufeged. Ere ke wenig ngorad ni ngar “ga’naged e t’ufeg rorad” ngar chugurgad ngak nge yugu boch e walag u lan e ulung.

7. Uw rogon ni ngad “ga’naged e t’ufeg” rodad ngak pi walagdad?

⁷ Ma gadad, uw rogon ni rayog ni ngad “ga’naged e t’ufeg rodad”? Girdi’ ni taab yangarrad, thin, nge yalen rorad e sana ba mom ni ngar t’ufeged yad. Ma ku arrogon ni piin taab mit i fafel ni yad ba adag, e ba ga’ ni yad ma chag u taabang ni gubin ngiyal’. Machane n’en ni gimed ma rin’ boch e walag e ra palognag thilmed boch e girdi’ u lan e ulung ma aram e ba t’uf ni ngad “ga’naged e t’ufeg rodad.” Fel’ ni ngad fithed gadad ni nge lungudad: ‘Gathi ri gu ma chag ngak e girdi’ u lan e ulung ni da gu mecham ngorad u nap’an e machib nge ku boch e maruwel? U lan e Kingdom Hall, gathi ri gu ma non ngak e girdi’ ni ka fin ra uned ko muulung, ya gu be lemnag ni fin munmun ma rayog ni ngar manged tafager rog? Gu ma non ngak e piin ni kar ilal gad nge piin yad ba bitir ngog?’

8, 9. Uw rogon ni nge ayuwegdad e thin rok Paul u Roma 15:7 nge ga’ e t’ufeg rodad ngak pi walagdad?

⁸ Rogon ni ngad daged ko thin nge ngongol rodad ni gad ba felfelan’ ni gad be mada’nag e pi walagdad, e ra ayuwegdad e thin rok Paul ngak piyu Roma ni ngar fel’gad u wan’dad. (Mu beeg e Roma 15:7.) Fare thin nu Greek ni kan piliyeg ni “um pired nra bigimed ma ba t’uf rok bigimed” e be yip’ fan ni “ngad golgad ngak be’ ni kad mada’gad ma gad ba felfelan’ ni nge mang fager rodad.” Girdi’ kakrom ni be ayuweg e en milekag e ma yog ngak ni ke felfelan’ ni nge ayuweg. Ma ku arrogon Kristus ni ke felfelan’ ni kad uned ko ulung ni Kristiano, ma be fonownagdad u rogon ni ngad folwokgad rok.

⁹ Nap’an ni gad be non ku be’ ni kad mada’gad u Kingdom Hall ara u nap’an yugu reb e muulung u bang, mab fel’ ni ngad nonad nib n’uw nap’an boch ngak e piin ni dawor da guyed yad nib n’uw nap’an. Ma yay ni migid e muulung ma rayog ni ngad nonad ngak yugu boch e girdi’. Ma dabi n’uw nap’an ma rayog ni ngam nonad yooren e pi walagdad u lan e ulung. Dabi magafan’dad ni faanra dabiyog ni ngad nonad ngak urngin e girdi’ u lan reb e rran. Ere susun dabi damumuw be’ ni faanra  de yog nda nonad ngak u gubin e muulung.

10. (a) Mingiyal’ e rayog ni ngad m’aged fager ngak pi walagdad u lan e ulung? (b) Ma uw rogon ni ngad rin’ed?

¹⁰ Gad ra non ngak be’ ni ka fin da mada’gad ma ireray reb e kanawo’ ni gad be dag e t’ufeg ngorad. Munmun ma aram e rayog ni ngam fagergow. Bod ni nap’an e muulung ma rayog ni ngad nonad ngak boch e girdi’ ni kafin da mada’gad, ma gadad be athapeg ni ku rayog ni ngad nonad bayay boch nga m’on. Girdi’ ni ma toy e Kingdom Hall nge girdi’ ni ma pi’ e ayuw nga reb e nam u nap’an e yoko’, e ba ga’ ni ma fel’ e thin rorad ni bochan e maruwel ni yad ma tay u taabang ma kar nanged yad nib fel’ rogon. Boor rogon nrayog ni ngad m’aged fager ngak pi walagdad u lan e ulung rok Jehovah. Faanra ngad “ga’naged” e t’ufeg rodad ngak e girdi’ nib thilthil rarogorad ma aram e boor i yad e rayog ni ngar manged fager rodad.

Ngam Gol Ngak e Girdi’

11. Mang e dag Jesus nib fel’ ni ngad folgad riy nrogon ni yog ko Mark 10:13-16?

¹¹ Gubin e Kristiano e rayog ni ngar athamgilgad ngar golgad ni bod Jesus. Mu lemnag e n’en ni rin’ Jesus u nap’an ni yog pi gachalpen ni dab ki fek e pi gallabthir e bitir rorad i yib ngak. I gaar: “Mpaged e pi bitir nir ngar bad ngog. Dab mu taleged yad, ya gagiyeg rok Got e fan ngak e piin ni bod e pi bitir ney. Me kunuy Jesus fapi bitir ngak me tay pa’ nga dakenrad, ni aram e ke yibilayrad.” (Mark 10:13-16) Mu lemnag ko uw feni kari felfelan’ e pi bitir nem ya Jesus ni fare sensey nrib fel’ e ke dag e t’ufeg ngorad!

12. Mang e ra magawonnag be’ ni dabiyog ni non ngodad?

¹² Ra reb e Kristiano ma thingari fith ir, ‘Gu ma pi’ e tayim rog ni fan ngak boch e girdi’, fa gubin ngiyal’ ni gowa boor e magawon rog?’ Yugu boch ban’en ni yima rin’ ni de kireb e rayog ni nge magawonnag e sabethin. Ni bod ni faanra gubin ngiyal’ ni gad ma fanay e cellphone nge earphone u fithik’ e girdi’, ma rayog ni ngar lemnaged ni dubdad ni ngad nonad ngorad. Riyul’ ni bay “ngal’an ni ngan th’ab gulungey.” Machane nap’an ni gad bay u fithik’ e girdi’ ma ba ga’ ni ireray “ngal’an ni ngan welthin.” (Ekl. 3:7) Boch e girdi’ e ma yog ni gaar: “Gu baadag ni nggu par rog” fa “Ra kadbul ma dabug ni nggu non.” Machane, faanra nge un be’ ko sabethin ni yugu aram rogon ni gathi ri ba baadag e be micheg ni bay e t’ufeg rok ma gathi “ke mus ni ir e ma lemnag ir.”​—1 Kor. 13:5.

13. I pi’ Paul e athamgil nga laniyan’ Timothy ni nge uw rogon pi walagen u wan’?

¹³ Ke pi’ Paul e athamgil nga laniyan’ Timothy ni nge tayfan gubin e girdi’ u lan e ulung. (Mu beeg e 1 Timothy 5:1, 2.) Ere thingar da ted fan pi walagdad ni kar ilalgad ni bod e gallabthir rodad, ma ku arrogon e ngongol rodad ngak e piin nib fel’ yangaren ni gowa yad e pi walagdad. Faanra gadad ra rin’ ni aram rogon ma ra chugur pi walagdad ngodad.

14. Mang angin ni ra yib ni faanra pi’ be’ e athamgil nga laniyan’ be’?

¹⁴ Gad ra pi’ e athamgil nga laniyan’ pi walagdad, ma aram e gad be ayuwegrad ni ngar ilalgad ko tirok Got ban’en. Reb e walag ni ma maruwel u Bethel e ke yib ngan’ ni nap’an ni ka fini un ko maruwel u Bethel ma boch e walag e yad ma non ngak ni gubin ngiyal’. Ke guy ni riyul’ nib t’uf rorad ni bochan e thin ni ka rogned ngak. Chiney e ma guy rogon ni nge non ngak e pi walag ni yad ma maruwel u Bethel.

Sobut’an’ e Ra Awnag e Gapas

15. Mang e be dag ni ku rayog ni nge dabki taareban’dad?

¹⁵ Euodia nge Sintike e l’agruw i walag ni Kristiano u Filippi kakrom. Ba tamilang ni ke sum e magawon u thilrow nib mo’maw’ ni ngar pithigew. (Fil. 4:2, 3) Kan nang ni Paul nge Barnabas e kar tugthingow nib elmerin, ma aram mi yow dar ni milekag. (Acts 15:37-39) Re n’ey e be dag ni mus ko tin riyul’ e Kristiano e ku rayog ni nge dabki taareban’rad. Ma pi’ Jehovah e ayuw u rogon ni ngad pithiged e magawon nge fel’ e tha’ u thildad bayay. Machane ku bay ban’en ni ku baadag ni ngad rin’ed.

16, 17. (a) Uw feni ga’ fan e sobut’an’ u nap’an ni ngan pithig e magawon ni sum u thilmew be’? (b) Uw rogon ma n’en ni rin’ Jakob u nap’an nra mada’gow Esau e be dag nrib ga’ fan e sobut’an’?

¹⁶ A mu susunnag ni gur nge fager rom e be n’en ni ngam marow ko milekag u karrow. U m’on ni ngam tababgow ko milekag, thingar mu fanay e kiy ni faanra nga chel e karrow. Ma ku bay ban’en ni bod e kiy ni aram e sobut’an’ nib t’uf ni ngan fanay u nap’an ni ngan pithig e magawon. (Mu beeg e James 4:10.) Thin nu Bible ni gad ra weliy e ra dag ni sobut’an’ e ra ayuweg e girdi’ ngar fanayed e thin u Bible ngar pithiged e magawon ni ke sum u thilrad.

¹⁷ Ke yan 20 e duw faram ni baadag Esau ni nge li’ Jakob ngem’ ya ke damumuw ni bochan e ke fek mat’awun ni ir e bin nganni’. Ere nap’an ni ke chugur ni ngar mada’gow, “me par Jakob ni kari rus ma be wagagey laniyan’.” I lemnag ni kab damumuw Esau ma ra li’. Machane nap’an nra mada’gow ma ke rin’ Jakob ban’en ni de lemnag Esau nra rin’. Ni aram e “siro’” i yan nge mada’ ku Esau ni walagen. Ere mang e ke buch? “Me mil Esau i yib ngak, me yib i gumuchmuch ngak, me faray owchen. Ma yow l’agruw ni yow be yor.” Ere bochan e kari sobut’nag Jakob laniyan’ ma aram e ke chuw e damumuw rok Esau.​—Gen. 27:41; 32:3-8; 33:3, 4.

18, 19. (a) Mang fan nib ga’ fan ni ngad folgad ko fonow u Bible u nap’an ni ke sum e magawon? (b) Mang fan ni dabi mulan’um ni faanra som’on ni mu non ngak be’ ma be darifannag e n’en ni ga be rin’ ni nga aw e gapas u thilmew?

¹⁸ Bay e fonow u Bible nrib fel’ ni ngan fanay u nap’an ni ke sum e magawon u thilin e girdi’. (Matt. 5:23, 24; 18:15-17; Efe. 4:26, 27)a Machane faanra dabda fanayed e pi fonow ney u fithik’ e sobut’an’ mab mo’maw’ ni ngad pithiged e magawon. Faanra ngad sonnaged be’ ni ir e nge dag e sobut’an’ ko som’on ma dabiyog ni ngan pithig e magawon.

¹⁹ Faanra kad gayed rogon ni ngad pithiged e magawon ma de yib angin ma thingar dab da talgad. Sana fa en ni ke sum e magawon u thilmew e ba t’uf ni nge yan boch e tayim ya nge chuw e damumuw rok. Pi walagen Josef e kar bannaged. Ke yan boor e duw ma fin ra guyed Josef bayay ni ke mang pilung nu Egypt. Ngiyal’ nem e ke thil lanin’rad mar weniggad ngak ni nge n’ag fan e oloboch rorad. Ke n’ag Josef fan u wan’ e kireb rorad, munmun ma kar manged ba nam ni yad be micheg fithingan Jehovah. (Gen. 50:15-21) Gad ra maruweliy ni nge par e gapas u fithik’dad, ma aram e ra taareban’dad u lan e ulung ma gad ra felfelan’.​—Mu beeg e Kolose 3:12-14.

Nge M’ug e ‘Bin Riyul’ e T’ufeg’ ko Ngongol Rodad

20, 21. Mang e rayog ni ngad filed ko n’en ni rin’ Jesus ni luknag ay e pi apostal rok?

²⁰ De n’uw nap’an u m’on ni nge yim’ Jesus me yog ngak e pi apostal rok ni gaar: “Kug dag ngomed e n’en ni nguum rin’ed ngomed, ya nge yog ni mrin’ed nri bod rogon e n’en ni ka fini gu rin’ ngomed.” (John 13:15) Ngiyal’ nem e ka fini luknag e rifrif u ay fa 12 i apostal rok. N’en ni rin’ Jesus e gathi kemus ni be fol ko yalen, ara kemus ni be gol ngorad. U m’on ni yoloy John murung’agen Jesus ni be luknag ay e pi apostal rok me yoloy ni gaar: “Yugu ma par nib t’uf rok e piin ni yad e tirok e girdi’ u fayleng, ma yigi i par ni yad ba t’uf rok nge yan i mada’ ko tomur.” (John 13:1) Ere t’ufeg e ke k’aring Jesus ni nge luknag ayrad ni ireray e maruwel ko sib kakrom. Thingar ra rin’ed boch ban’en ni be dag nib t’uf bagayad rok bagayad. Ku arrogodad ni nga kud daged nri gad ma lemnag rarogon urngin pi walagdad u lan e ulung.

²¹ Apostal Peter ni ir bagayad e piin ni luknag Jesus e rifrif u ay e ke nang fan e n’en ni rin’ Jesus, ya i yoloy ni gaar: “Chiney e kam machalbognaged gimed ni fan e kam folgad ko tin nib riyul’, ma gimed be par nrib t’uf romed e piin ni gimed ni ke mich Kristus u wan’rad ni bod gimed, ma ra bigimed ma ngari t’uf rok bigimed u polo’ i laniyan’.” (1 Pet. 1:22) Apostal John ni ki luknag Jesus e rifrif u ay e ke yoloy ni gaar: “Pi fakag! Rogon nib t’uf Got nge girdi’ rodad e dabi par ni ke mus ni thin nge welthin; ya thingari yan i aw ni bin riyul’ rogon nib t’uf Got nge girdi’ rodad ni ma m’ug ko ngongol.” (1 John 3:18) Manga yu gu uda daged ko ngongol rorad nib t’uf pi walagdad u lan u ulung rodad.

[Footnote]

Ka Ga Manang?

• Mang boch e kanawo’ ni rayog ni ngad “ga’naged” e t’ufeg rodad ngak pi walagdad u lan e ulung?

• Mang e ra ayuwegdad ni ngad nonad ngak e girdi’ u rogon nrayog rodad?

• Uw rogon ni sobut’an’ e ra awnag e gapas?

• Mang e ra k’aringdad ni ngad lemnaged rarogon pi walagdad?

[Picture on page 23]

Ngam non ngak pi walagdad u lan e ulung u fithik’ e t’ufeg

[Picture on page 25]

Mu non ngak e girdi’ ni gubin ngiyal’ u rogon ni rayog rom