Nge Ga’ Fan u Wan’um e Maruwel nib Milfan Ngom u Lan e Ulung
“Aray rogon nra bangi dowey me Got e ke tay ko fare dowef nrogon ni finey.”—1 KOR. 12:18.
1, 2. (a) Mang e mich riy nrayog ni nge gubin e girdi’ u lan e ulung me milfan reb e maruwel ngak me par nrib ga’ fan u wan’? (b) Mang boch e deer ni gad ra weliy ko re thin ney?
KA NAP’AN piyu Israel kakrom ni i ayuweg ma be pow’iy Jehovah e girdi’ rok u daken e ulung rok. Tomuren ni chuw piyu Israel ko fare mach nu Ai, me beeg Joshua “nib ga’ laman ga’ngin fare motochiyel, nib muun e fal’eg waathan nge buch waathan ngay, nri bod nni yoloy ko fare ke babyoren e motochiyel. Gubin yang ko fare motochiyel rok Moses me beeg Joshua ngak gubin fapi girdi’ nu Israel ni kar muulunggad.”—Josh. 8:34, 35, BT.
2 Nap’an e bin som’on e chibog me yog Paul ngak Timothy nreb e piilal, ni fare ulung ni Kristiano e aram “girdien e tabinaw rok Got” ma “ir e duga’ me ir e be dunubiy fare thin nib riyul’.” (1 Tim. 3:15) Ngiyal’ ney e fare ulung i walag ni Kristiano u ga’ngin yang e fayleng e aram e “tabinaw” rok Got. U lan e guruy ni 12 ko gin som’on e babyor nni thagthagnag nga laniyan’ Paul nge yoloy nge yan ngak piyu Korinth e taarebnag e ulung nga ba dowef. I yog ni yugu aram rogon nra bangi dowey ma maruwel riy, machane gubin yang ni bay rogon reb nga reb. I yoloy ni gaar: “Aray rogon nra bangi dowey me Got e ke tay ko fare dowef nrogon ni finey. Ma yungi n’en u dowey nib tomur u wun’dad e ereram e yu yang ni ir e gadad ma tiyan’dad ngay.” (1 Kor. 12:18, 23) Ere, ku arrogon e piin Kristiano ni girdien e tabinaw rok Got ndariy bagayad nde ga’ fan e maruwel rok. Kemus nib thilthil e maruwel ni kan pi’ ngorad. Ere uw rogon ni ngad nanged e maruwel nib milfan ngodad u lan e ulung rok Got, me ga’ fan u wan’dad? Mang boch ban’en ni bay rogon ko n’en nib milfan ngodad u lan e ulung? Ma uw rogon ni nge ‘guy e girdi’ ni gubin ni gad be mon’og i yan’?—1 Tim. 4:15.
Uw Rogon ni nge Ga’ Fan u Wan’dad e Maruwel nib Milfan Ngodad?
3. Mang reb e kanawo’ ni ngad nanged e maruwel nib milfan ngodad u lan e ulung, me ga’ fan u wan’dad?
3 Reb e kanawo’ ni ngad nanged e maruwel nib milfan ngodad u lan e ulung, me ga’ fan u wan’dad e ngaud folgad ko n’en ni ma yog “fare tapigpig nib yul’yul’ ma ba gonop” nge fare ulung ni ma pow’iyey ni aram owchen. (Mu beeg e Matthew 24:45-47.) Ere ba t’uf ni ngad fal’eged i yaliy rogon ni gad ma fol ko fonow ni ma yib ko re ulung i tapigpig nem. Bod ni kab kafram i yib ni yima fonownagdad u rogon yalen e munmad ni ngaud ted nge rogon yaadad, nge pi n’en ni gad ma chuweg e chalban rodad ngay, nge boch ban’en ko Internet ni ngad paloggad riy. Gur, gad ma gay rogon ni ngad folgad ko re fonow ney ya nge yog nda pared ni gad ba gel ko tirok Got ban’en? Ma uw rogon fare fonow ni ngaud fol Bible gad u taabang u tabinaw ni gubin ngiyal’? Gad be fol ko re fonow nem ma kad ted reb e blayal’ ni fan ko re n’em, fa? Faanra dawor mu un ko mabgol, ma kam ta’ ba ngiyal’ ni fan ko fol Bible ni yigoo gur, fa? Faan gad ra fol ko n’en ni be yog fare ulung i tapigpig ni ngan rin’, ma ra tow’athnagdad Jehovah ni gad gubin.
4. Mang e susun ni ngad lemnaged u nap’an ni gad ra dugliy ban’en?
4 Sana boch e girdi’ e yad be lemnag ndariy be’ ni bay rogon ni nge dugliy e miti n’en ni ngar chuweged e chalban rorad ngay, nge rogon e mad ni ngar chuwgad ngay, nge rogon yaarad ni nge par. Machane piin Kristiano nib ga’ fan u wan’rad e maruwel nib milfan ngorad u lan e ulung e gathi kemus e n’en ni ngar lemnaged u nap’an ni yad ra dugliy ban’en. Ya ku thingar ra lemnaged rogon laniyan’ Jehovah ni bay u Bible. Thingari par e thin rok Got nib ‘magal ni be pow’iyrad ma ir e tamilang ko kanawo’ ni yad be yan riy.’ (Ps. 119:105) Gad ba gonop ni faan gad ra lemnag e n’en nra rin’ e pi n’en ni gad ma mel’eg ni ngad rin’ed, ko machib ni gad ma tay nge girdi’ u lan e ulung ngu wuru’.—Mu beeg e 2 Korinth 6:3, 4.
5. Mang fan ni ngad kol ayuwgad ni nge dab ud dabuyed ni ngad folgad?
5 “Fare [“gelngin,” NW] ni ir e chiney e be gagiyegnag e piin ndarir folgad” e kari garer u gubin yang ni bod e nifeng ni gad ma pogofannag. (Efe. 2:2) Re gelngin nem e rayog ni nge k’aringdad ngad lemnaged nde t’uf ni nge pow’iydad e ulung rok Got. Machane dubdad ni ngad boded Diotrefes ni ‘dabuy ni nge fol ko thin ni yog apostal John.’ (3 John 9, 10) Ere ba t’uf ni ngad kol ayuwgad ni nge dab ud dabuyed ni ngad folgad. Ma dab da rin’ed ara dogned ban’en ni ngad darifannaged e n’en ni ke dugliy Jehovah ni nge pi’ e thin rok riy ngodad e ngiyal’ ney. (Num. 16:1-3) Thingari ga’ fan u wan’dad fare tow’ath ni kan pi’ ngodad ni aram e ngaud folgad ko thin ni be yib rok fare ulung i tapigpig. Ma thingar kud gayed rogon ni ngaud folgad rok e piin ni yad ma yog e thin u lan e ulung ni mus ni faanra ba mo’maw’.—Mu beeg e Hebrews 13:7, 17.
6. Mang fan ni ngaud fal’eged i yaliy rarogodad?
6 Reb e kanawo’ ni ngad daged nib ga’ fan u wan’dad e maruwel nib milfan ngodad u lan e ulung, e ngad fal’eged i yaliy rarogodad ma gad rin’ e tin nrayog rodad ya nge ‘felfelan’dad ko maruwel ni gad be tay,’ ma gad pining e sorok ngak Jehovah. (Rom. 11:13) Boch i gadad e rayog ni ngar uned ko pioneer. Ma boch i gadad e ke mang missionary, ara ma lekag e ulung, ara ma maruwel u Bethel. Boor e walag ni yad ma pi’ e ayuw ko dimow Kingdom Hall ni yima tay. Ma yooren e girdi’ rok Jehovah e yad be rin’ e tin nrayog rorad ni ngar ayuweged e tabinaw rorad ko tirok Got ban’en mar uned ko machib u gubin e wik. (Mu beeg e Kolose 3:23, 24.) Faanra m’agan’dad ngay ni ngad ognaged gadad ni ngad rin’ed e tin nib m’agan’ Jehovah ngay ma gad pigpig ngak u polo’ i gelngidad, ma bay e maruwel nra milfan ngodad u lan e ulung rok.
Boch Ban’en ni Ku Bay Rogon ko Maruwel Rodad
7. Mu weliy e n’en nra rin’ rarogodad ko maruwel nrayog ni nge milfan ngodad u lan e ulung.
7 Ba ga’ fan ni ngad fal’eged i yaliy rarogodad ni bochan e bay rogon ko tin nrayog ni ngad rin’ed u lan e ulung. Bod ni pi walag ni pumoon u lan e ulung e ba thil e maruwel nib milfan ngorad ko pi walag nib pin. Maku reb e, duw rodad nge rogon fithik’ i dowdad nge ku boch ban’en e rayog ni nge ayuweg fa magawonnag e tin nrayog ni ngad rin’ed ko pigpig ni gad be tay ngak Jehovah. Be gaar e Proverbs 20:29 (BT): “Gadad ma finey gelngin e piin kab pagel ma gadad ma tayfan e piin ke ilal ni ke manna’ lolugen.” Tin ni ka bay e walag u lan e ulung ni kab fel’ yangarrad e boor ban’en nrayog ni ngar rin’ed ya ka yad ba gel. Machane piin ni kar pilibthirgad e rayog ni ngar ayuweged e ulung ko gonop rorad nge tin ni yad manang. Ku thingar dab da paged talin ni gubin ban’en ni be yog ni ngad rin’ed u lan e ulung rok Jehovah e bochan e runguy rok ngodad.—Acts 14:26; Rom. 12:6-8.
8. Mang e ra rin’ e tin ni gad baadag ko n’en ni gad ma rin’ u lan e ulung?
8 Ku reb e ban’en ni bay rogon ko maruwel nra milfan ngodad u lan e ulung e rayog ni ngan taarebrogonnag ngak l’agruw i ppin ni yow walag. Kar mu’nagew e skul ni yow l’agruw. Ma ke rin’ e gallabthir rorow e tin nrayog rorow ni ngar piew e athamgil nga lanin’row ni ngar unew ko pioneer u tomuren ni kar mu’nagew e skul. Machane, tomuren ni kar mu’nagew e skul me un bagayow ko pioneer, ma bagayow e un ko maruwel. Ere mang e ba thil rorow? N’en ni yow baadag e aram e n’en nib thil rorow. Ya ra bagayow ma ke rin’ e n’en ni baadag ni nge rin’. Gathi ku aram rogodad? Ere ba ga’ fan ni ngad fal’eged i lemnag e n’en ni gad baadag ni ngad rin’ed ni fan ko pigpig ni gad be tay ngak Got. Rayog ni ngad rin’ed nib mus rogodad riy nrogon nrayog rodad, fa?—2 Kor. 9:7.
9, 10. Mang e susun ni ngad rin’ed ni faanra gathi ri gad ba pasig ni ngad yoornaged e tin ni gad be rin’ ni fan ngak Jehovah?
9 Uw rogon ni faanra gathi ri gab pasig ni ngam yoornag e tin ni ngam rin’ ni fan ngak Jehovah, ma kemus ni tin ni thingar mu rin’ e ga be rin’? I yog Paul ko babyor ni yoloy nge yan ngak piyu Filippi ni gaar: “Got e gubin ngiyal’ ni be maruwel u fithik’ i lanin’med ni be pingeg lanin’med ni nge m’agan’med ngay ni ngam folgad ko tin ni be finey.” Ere, rayog rok Jehovah ni nge pingeg lanin’dad nge thil e tin ni gad baadag.—Fil. 2:13; 4:13.
10 Susun ni ngad weniggad ngak Jehovah nge yog ni pingeg lanin’dad ni ngad adaged ni ngad rin’ed e tin nib m’agan’ ngay, ya aram e n’en ni rin’ David ni Pilung nu Israel kakrom. I meybil ni gaar: “Got, mfil ngog e tirom e kanawo’; mu dag ngog nggu nang. Mfil ngog rogon ni nguug lem ma gu be ngongol nib mat’aw ko thin rom nib riyul’; yi gur e Taayuw rog. Kakadbul nge mada’ ko nep’ ni gu be par ni gur e ba pagan’ug ngom.” (Ps. 25:4, 5) Ku rayog ni ngad rin’ed e re n’ey ni faan gad ra meybil ngak Jehovah ni nge ayuwegdad ngad adaged ni ngad rin’ed e tin nib m’agan’ ngay. Faan gad ra lemnag rogon laniyan’ Jehovah Got nge Fak ko tin ni be yog ni ngad rin’ed ni fan ngorow, ma gad ra adag ni ngad pininged e magar ngorow. (Matt. 26:6-10; Luke 21:1-4) Re n’ey e ra k’aringdad ni ngad weniggad ngak Jehovah ni nge ayuwegdad nge yog ni yoor ban’en ni ngad rin’ed ni fan ngak. I rin’ Isaiah ni profet ban’en ni ku rayog ni ngad gayed rogon ni ngad folwokgad riy. Nap’an ni rung’ag laman Jehovah ni ke gaar: “I mini’ e nggu l’og nge yan? I mini’ e nggu tay e thin nga l’ugun nge fek e thin romad nge yan?” me fulweg fare profet ni gaar: “Bay gu wan! Mu l’ugeg!”—Isa. 6:8.
Uw Rogon ni Ngan Mon’og i Yan?
11. (a) Uw feni ga’ fan ni nge pi’ boch e walag ni pumoon e ayuw u lan e ulung rok Jehovah? (b) Uw rogon ni nge un reb e walag i rin’ boch e maruwel u lan e ulung?
11 Nap’an e duw ni 2008 ma 289,678 e girdi’ u ga’ngin yang e fayleng ni kar uned ko taufe. Re n’ey e be dag nrib t’uf e ayuw ko pi walag ni pumoon. Ere, uw rogon me yog ni un reb e walag ni pumoon i pi’ e re ayuw ney? Rib tamilang nthingari gay rogon ni nge rin’ e pi n’en nthingari rin’ e piin piilal nge ministerial servant nrogon ni be yog e Bible. (1 Tim. 3:1-10, 12, 13; Titus 1:5-9) Uw rogon nrayog ni nge rin’ reb e walag ni pumoon e re n’ey? Thingari pasig ko machib, me rin’ e maruwel ni kan pi’ ngak ni nge rin’ u lan e ulung, me gay rogon ni nge fel’ boch e fulweg ni nga i pi’ u nap’an e muulung, me m’ug ni be lemnag rarogon e piin taareb e michan’ rorad. Faanra rin’ e pi n’ey ma aram e be dag nib ga’ fan u wan’ e maruwel nib milfan ngak u lan e ulung.
12. Uw rogon ni nge m’ug nib pasig e piin fel’ yangaren ko pigpig ni yad be tay?
12 Mang e rayog ni nge rin’ e pi walag ni pumoon ni kab fel’ yangarrad ya nge yog nra mon’oggad u lan e ulung? Rayog ni ngar athamgilgad ni nge ga’ e “gonop nge tamilangan’” rorad ni aram e ngar filed e thin nu Bible. (Kol. 1:9) Ku rayog ni ngar rin’ed e re n’ey ni faanra pasigan’rad i fil e Thin rok Got mu kur pasiggad ko muulung. Piin pagel e ku ra rayog ni ngar athamgilgad ni nga ranod ko fare pa’ i kanawo’ nra pow’iyrad ko maruwel nib ‘ga’ fan ma ra yib angin ngorad.’ (1 Kor. 16:9) Yira nameg boch ban’en ni fan ko pigpig ngak Jehovah ma aram e bin th’abi fel’ kanawoen e yafos, ya angin nra yib riy e ra tow’athnagey Got.—Mu beeg e Eklesiastes 12:1.
13, 14. Mang boch e kanawo’ nrayog ni nge m’ug riy nriyul’ nib ga’ fan u wan’ e pi walag nib pin e maruwel nib milfan ngorad u lan e ulung?
13 Pi walag nib pin e ku rayog ni nge m’ug nib ga’ fan u wan’rad e maruwel ni kan pi’ ngorad ni aram e ngar uned i lebguy fare thin u Psalm 68:11 (BT). Re thin nem e be gaar: “I Somol e yog e n’en ni ngan rin’, ma boor e ppin nra weliyed i yan.” Reb e kanawo’ nrayog ni nge m’ug riy nriyul’ nib ga’ fan u wan’ e pi walag nib pin e maruwel nib milfan ngorad u lan e ulung, e ngar uned ko fare maruwel ni ngan ayuweg e girdi’ ngar manged boch pi gachalpen Jesus. (Matt. 28:19, 20) Ere faanra athamgil e pi walag nib pin ni ngar uned i rin’ e re maruwel ney nib mus rogorad riy, ma aram e yad be micheg nriyul’ nib ga’ fan u wan’rad e maruwel nib milfan ngorad u lan e ulung.
14 Nap’an ni yol Paul ngak Titus, me yog ni gaar: “Nga mog ngak e piin ni kar puwelwolgad ni nge par pangirad ni bod yalen e piin ni ppin ni yad ma par nib mat’aw pangirad u mit Got. Ma thingari dab ur t’ared e thin nga daken e girdi’, ara ra pired ni kar manged sib ko wain. Ma thingar ra filed e tin nib fel’ ngak e piin nrugod nge yog ni t’uf figirngirad nge pi fakrad rorad, ma nge yog nra t’ared lanin’rad ko tin nde mat’aw ma ngar pired ni yad mmachalbog, ma ngar ngongliyed e maruwel nib fel’ u tabinaw rorad, ma yad be fol ko thin rok figirngirad, nge dabiyog ni yog be’ nib kireb e thin ni yib rok Got.” (Titus 2:3-5) Pi walag nib pin u lan e ulung ni kar mon’oggad e rayog ni nge yib farad ko ulung. Yad ma tayfan e piin piilal, ma yad ma gonopiy rogon e munmad ni yad ma tay nge rogon yaarad nge rogon e pi n’en ni yad ma chuweg e chalban rorad ngay. Rayog ni ngan folwok rorad mab ga’ fan u wan’rad e maruwel nib milfan ngorad u lan e ulung.
15. Mang e nge rin’ reb e walag nib pin ndawori un ko mabgol ma ma kireban’?
15 Yu ngiyal’ e ba mo’maw’ ko pi walag nib pin ndawor ra uned ko mabgol ni ngar nanged e maruwel nib milfan ngorad u lan e ulung. Reb e walag nib pin ni ke buch rok e re n’ey e gaar: “Piin ndawor ra uned ko mabgol e bay yu ngiyal’ ni ma kireban’rad.” Ere ni fith ngak ko uw rogon ni ke yog ni nge gel ko re magawon ney, me yog ni gaar: “Meybil nge fol Bible e ke ayuwegneg ni nggu nang bayay e maruwel nib milfan ngog u lan e ulung. Kug fil u Bible rogon ni ma lemnageg Jehovah. Ma kug nameg ni nggu ayuweg boch e girdi’ u lan e ulung. Re n’ey e ke ayuwegneg ni nge dab ku ug par ni yigoo gag e gu be lemnageg.” I yog Jehovah ngak David u Psalm 32:8, ni gaar: “Bay gog ngom e tin ni ngam rin’ ma bay gu fonownigem.” Arrogon, ma lemnag Jehovah rarogon e pi tapigpig rok ni yad gubin nib muun e pi walag nib pin ngay ndawor ra uned ko mabgol, ma ra ayuwegrad ni ngar nanged e maruwel nib milfan ngorad u lan e ulung.
Dab Mu Pag e Maruwel nib Milfan Ngom!
16, 17. (a) Mang nrib fel’ ni ke m’agan’dad ngay ni ngad manged bang ko ulung rok Jehovah? (b) Uw rogon ni ngad pared ni gad ba pasig ko maruwel ni ke pi’ Got ngodad u lan e ulung?
16 Jehovah e ir e ke pow’iy e pi tapigpig rok ni ngar bad ngak. I gaar Jesus: “Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog.” (John 6:44) Ke mel’egdad Jehovah u fithik’ e girdi’ nu fayleng ni ngad manged bang ko ulung rok u fayleng e ngiyal’ ney. Rib fel’ ni ke m’agan’dad ngay ni ngad manged bang ko ulung rok, ya ke yib fan e yafas rodad ma ke felfelan’dad ni bochan e kad nanged e maruwel nib milfan ngodad u lan e ulung.
17 I yog e en ni yoloy e Psalm ni gaar: “A Somol, ba t’uf rog fare naun ni ga ma par riy.” Miki yog ni gaar: “Gub gilaf ko gubin e riya’; gu pining e sorok ngak Somol u lan e ulung ko girdi’ rok.” (Ps. 26:8, 12, BT) Bin riyul’ e Got e bay e maruwel ni ke tay ni fan ngodad ni gad gubin u lan e ulung rok. Faan gad ra fol ko yaram rok ma gad tedan’dad ko pigpig ni gad be tay ngak, ma aram e rayog ni ngad pared ni gad ba pasig ko maruwel ni ke pi’ Got ngodad u lan e ulung rok.
Ka Ga Manang?
• Mang fan nrayog ni nga nog ni gubin e Kristiano ma bay e maruwel nib milfan ngorad u lan e ulung?
• Uw rogon ni nge ga’ fan u wan’dad e maruwel nib milfan ngodad u lan e ulung rok Got?
• Mang boch ban’en nrayog ni nge ayuweg fa magawonnag e maruwel nib milfan ngodad u lan e ulung?
• Uw rogon ni nge dag e piin fel’ yangaren nge piin kar ilalgad nriyul’ nib ga’ fan u wan’rad e maruwel nib milfan ngorad u lan e ulung rok Got?
[Pictures on page 19]
Uw rogon ni nge dag e pi walag nib pin nriyul’ nib ga’ fan u wan’rad e maruwel nib milfan ngorad u lan e ulung?
[Picture on page 20]
Uw rogon ni nge yog boch e maruwel ngak e pi walag ni pumoon u lan e ulung?