Mu Kol Ayuw ko Pi N’en ni Baadag Gum’irchaem

Be ginangdad e thin nu Bible ni be gaar: “Laniyan’ be’ e ma yib e lem nib kireb riy ni ir e ma pingeg faanem nge li’ be’ ngem’, fa ra pirew be’ ni gathi mabgol rok, ma be rin’ yugu boch ban’en ni aram e ngongol ko darngal; nge moro’ro’ u fithik’ e yargel, me lifith l’ugun, me t’ar e thin nga daken e girdi’.” (Matt. 15:19) Rarogon gum’ircha’dad nib sasalap e rayog ni nge waliydad ni ngad rin’ed boch e ngongol nib kireb nde puluw ko n’en nib m’agan’ Got ngay, ma gad ma gay e tawey rodad ko pi n’en ni gad ma rin’. Ma yu ngiyal’ e ba ga’ ni dad nanged ni kad rin’ed e kireb, me tomur riy, ma kad kalgadngan’dad ko n’en ni kad rin’ed. Ere, mang e rayog ni nge ayuwegdad ni ngad nanged e bin riyul’ i rarogodad, u m’on ni ngad ngongliyed e kireb?

UW ROGON MA GA RA NANG E PI N’EN NI BAADAG GUM’IRCHAEM?

Mu beeg e Bible rom ni gubin e rran, mag fal’eg i lemnag e thin riy.

Be yog apostal Paul ni gaar: “Thin rok Got e ba fos ma ba’ gelngin ni ma maruwel. Ya kab m’uth nga bangi sayden ni ruw raba’ ma m’uth. Ya ma yan nge yan i taw nga fithik’ i lanin’dad ko n’en ni gadad be lemnag.” Thin rok Got ni bay u lan e Bible e rayog ni nge, “pufthinnag e n’en ni yima yim’ ni bochan nge tin ni yima lemnag.” (Heb. 4:12) Faanra gad baadag ni ngad nanged e bin riyul’ i rarogodad, mab fel’ ni ngad paged e pi thin nu Bible ni nge gagiyegnag e par rodad. Ere, ba ga’ fan ni ngada beeged e Thin rok Got min fal’eg i lemnag, ya aram rogon ni gad ra nang rogon ni ma lemnag Jehovah ban’en.

Faan gad ra pag e pi fonow nge pi kenggin e motochiyel u Bible ni nge gagiyegnag e yafas rodad, ma ra yib angin ko nangan’ rodad ni ir e ma “micheg” ban’en. (Rom. 9:1) Ma u m’on ni ga ra rin’ ban’en nib kireb, ma ra yog e nangan’ rom ngom e n’en nib fel’ ni ngam rin’. Ma pi n’en ni bay u lan e Bible e ra “mang ba ning chilen ngodad.” (1 Kor. 10:11) N’en ni ke buch rorad e rayog ni nge ayuwegdad ni nge dab da rin’ed ban’en nib kireb. Ere, ra be’ ma mang e thingari rin’?

Meybil ngak Got ni nge ayuwegem ni ngam nang e pi n’en ni bay u gum’irchaem..

Jehovah e ir e “ma changar nga gum’irchaen gubin e girdi’.” (1 Kron. 29:17, BT) Ir e “ka ba ga’ nga lanin’dad, ni gubin ban’en ma manang.” (1 John 3:20) Dabiyog ni ngan bannag Got. Faan gad ra weliy ngak e n’en ni bay u lanin’dad u fithik’ e yul’yul’ u daken e meybil, ma Jehovah e rayog ni nge ayuwegdad ni ngad nanged e pi n’en ni baadag gum’ircha’dad. Maku rayog ni ngad ninged ngak Got ni nge ‘sunumeg e tafinay nib machalbog u fithik’dad.’ (Ps. 51:10) Ere, ba t’uf ni ngad meybilgad ni ngad nanged e pi n’en ni bay u gum’ircha’dad.

Mu tiyan’um u nap’an e pi muulung ko Kristiano.

Nap’an ni gad ma tiyan’ ko pi n’en ni yima weliy u nap’an e pi muulung rodad, ma rayog ni nge ayuwegdad ni ngad fal’eg i yaliy rarogodad u fithik’ e yul’yul’, ma ngad nanged ko gad ba miti mang girdi’. Yugu aram rogon ni gathi gubin e ngiyal’ ma gad ma rung’ag murung’agen ban’en nib beech u nap’an e muulung, machane rayog ni nge tamilang u wan’dad e pi kenggin e motochiyel u Bible ni yibe weliy, nge yugu boch e puguran nra ayuwegdad ni ngad fal’eged i yaliy e pi n’en ni bay u gum’ircha’dad. Maku rogon e pi fulweg ni ma pi’ e pi walagdad u lan e ulung e ri ba ga’ fan u wan’dad. (Prov. 27:17) Ya bay e riya’ riy ni faanra gad ra par ni goo gadad ma dab da uned ko muulung. Ma aram e rayog ni nge bagadad ma ‘goo ir e be lemnag ir.’ (Prov. 18:1, BT) Ere, ba fel’ ni ngad fithed gadad ni lungudad, ‘Gu ma gay rogon ni nggu un ko gubin e pi muulung nra yib angin ngog, fa?’​—Heb. 10:24, 25.

UW ROGON NI NGE BANNAGEM GUM’IRCHAEM?

Bochan nib sasalap gum’ircha’dad, ma rayog ni nge k’aringdad ni ngad olobochgad. Ere, ngad weliyed murung’agen aningeg i ban’en ni aram e ngan nameg ni nge yoor e chugum rodad, nge rogon e muun alkul, nge rogon e girdi’ ni gad ma chag ngorad, nge pi n’en ni gad ma rin’ ni nge chuweg e chalban rodad.

Ngad nameged ni nge yoor e chugum rodad.

Dariy ban’en nib kireb riy ni faanra ga be lemnag ni nge gaman e pi n’en nib t’uf ko par rom. Machane, be ginangdad Jesus ni dabi ga’ fan u wan’dad e chugum ni boor. Ya i weliy u reb e fanathin rok murung’agen reb e moon nib fel’ rogon e par rok mab sug e gin ni ma chaariy e ggan rok riy. Ere, dakuriy e gin ni nge chaariy yugu boch e ggan ngay ni ke kunuy. Ere, i lemnag u wan’ ni nge buthug e tin ka bay e naun ni ma chaariy e ggan rok riy ngki toy boch nib ga’ ngay. Me gaar u wan’: “Nggu buthug e pi naun rog ni baaray ni tafen e ggan nggu toy boch ni ka ba ga’ ko tiney, ni ir e nggu chaariy urngin e ggan rog ngay nge urngin e tin ni ka bay e chugum rog. Ma aram mu gog ngog u lanin’ug ni lungug, Ba fel’ waatham! Ke yog ngom urngin e tin nib fel’ ni ba’ fan ngom nra par ni boor e duw. Mpagan’um, nguum abich ma ga be garbod, ma ga be rin’ e tin ni gab adag!” Machane, der tamilang u wan’ fare moon nib fel’ rogon e par rok nra aw e fan rok e re nep’ i nem.​—Luke 12:16-20.

Nap’an ni gad be pilibthir i yan ma n’en ni gad ma lemnag e ngad fal’eged rogon boch ban’en, ya nge yag ni nge mom boch e par rodad boch nga m’on. Ma aram e gad ma lemnag ni ba t’uf ni nge yoor boch e awa rodad ko maruwel, ma aram e gad be pag e pi muulung nge yugu boch e maruwel rodad ni fan ko tirok Got ban’en. Ere, rib ga’ fan ni ngad kol ayuwgad ko mit ney e lem, fa? Ara reb e kab fel’ yangardad ma gad be lemnag nib fel’ ni gad ra un ko machib u polo’ e tayim rodad. Machane, gad ma tawey ni sana ba t’uf ni nge yoor e salpiy rodad, ma fin da uned ko machib u polo’ e tayim rodad. Ere, ri gad ba gonop ni faan gad ra rin’ urngin ban’en nrayog rodad ni fan ko tirok Got ban’en e ngiyal’ ney. Ya dad nanged ko ra gabul ma kad m’ad.

Rogon e muun alkul.

Rogon ni be yog e Proverbs 23:20 e be gaar: “Dab um chag ngak e girdi’ ni tamuun rrum.” Faanra baadag be’ ni nge unum e alkul ma ra lemnag ni dariy ban’en nib kireb riy ni nge unum ni gubin e rran. Ya ra lemnag u wan’ ni ma unum ni nge yag ni nge toffan ma gathi nge chingaw. Ere, faanra ba t’uf e alkul rodad ni nge yag ni ngad toffangad, ma aram e be yip’ fan ni ngad fal’eged i yaliy rarogon gum’ircha’dad u fithik’ e yul’yul’.

Piin ni gad ma chag ngorad.

Riyul’ ni dabiyog ni dab da chaggad ngak yugu boch e girdi’ ni bod e piin ni gad nga skul, nge piin ni gadad ma maruwel u taabang, nge piin ni gad ma machibnagrad. Machane, ba kireb ni ngad uned ngorad ni gubin ngiyal’. Yu ngiyal’ e sana gad ma gay e tawey nib fel’ ni ngan chag ngorad ya bay fel’ngirad. Be ginangdad e Bible ni gaar: “Dab mpaged gimed nga ni bannagmed.” (1 Kor. 15:33) Ya taareb rogon ko yub nra buchuuw ma rayog ni nge kirebnag e ran, ere ku arrogon ni faan gad ra chag ngak e piin ni darur ma liyorgad ngak Got, ma rayog ni nge kirebnag e tha’ u thildad Got. Ma re n’ey e ra munmun ma ra gagiyel u rogon e munmad ni gad ma tay, nge thin ni gad ma yog, nge ngongol rodad.

N’en ni gad ma rin’ ni nge chuweg e chalban rodad.

Boor ban’en ni kan fal’eg e ngiyal’ ney nrayog ni nge chuweg e chachalban rodad, nib mom ni ngan fanay ma ba ga’ nde puluw ko ngongol ko piin Kristiano. I yog Paul ni gaar: ‘De mat’aw ni nge un u l’ugunmed e thin nib golong, ara thin ko chogow.’ (Efe. 5:3) Machane, uw rogon ni faanra ke mecham ngom ni ngaum guy ara ngaum motoyil nga boch ban’en nib kireb? Sana ga ra tawey ni yu ngiyal’ ma gubin e girdi’ e ba t’uf rorad ni ngar toffangad, ma susun nra be’ ma nge mel’eg e tin ni baadag ni nge rin’ ni nge chuweg e chalban rok ngay. Machane, ba fel’ ni ngan fal’eg i lemnag e fonow ni pi’ Paul, ma gad palog ko pi n’en nib kireb ni yima yaliy ara pi n’en ni yima motoyil ngay.

RAYOG NI NGAD THILYEGED E NGONGOL RODAD

Faanra ke mecham ngodad boch ban’en nib kireb ni gad ma rin’, ma rayog ni ngad thilyeg e ngongol rodad. (Efe. 4:22-24) Mu lemnag e n’en i buch rok l’agruw ni’.

Ke t’uf rok Miguela ni nge thilyeg rogon ni ma lemnag ni nge yoor e chugum rok. Ya i yog ni gaar: “I gag nge ppin rog nge bitir romow e gamad e girdi’ u reb e nam nib ga’ fan ni nge yag e tin th’abi fel’ e chugum nge boch ban’en nib t’uf ko par. Bay ba ngiyal’ ni gu lemnag nrayog ni nggu athamgil ni nge yag ngog urngin ban’en ko re fayleng ney, ma gu lemnag nrayog rog ni nggu rin’ e re n’ey, ma dabi ga’ fan e chugum u wan’ug. Ma de n’uw nap’an mu gu nang ni faan yira nameg ni nge yoor e chugum nge boch ban’en ko re fayleng ney, ma dariy ba ngiyal’ nra mus. Gu meybil ngak Jehovah u murung’agen rogon e tafinay rog nge pi n’en ni gu be nameg. Ere, gu weliy ngak ni gamad e tabinaw rog e gamad baadag ni nggu pigpiggad ngak u polo’ i gum’ircha’mad. Ere, ke yag ni nggu momniged rogon e par romad, ma gamad yan nga bang ni nggu pied e ayuw ko gin nib t’uf e ayuw riy. Ma de n’uw nap’an me yag ni nggu machibgow e ppin rog u polo’ e tayim romow. Kug nanged ni dariy fan ni nge yoor e chugum, ma rayog ni ngam pirieg e felfelan’ ko yafas.”

N’en ni buch rok reb e pumoon ni Lee fithingan e be tamilangnag rogon ni i fal’eg i yaliy rarogon, ma re n’ey e ke ayuweg ni nge dabki chag ngak e girdi’ nib kireb e ngongol rorad. Rogon ni yog Lee e gaar: “Bochan e maruwel rog, ma ba ga’ ni gu ma chag ngak e girdi’ u boch e nam ni bay e siyobay rorad. Nap’an ni gamad ma mada’, ma gu manang ni gamad ra unum e rrum nib pag rogon, machane gu baadag ni gu ma chag ngorad. Boor yay ni ke pag rogon e chingnag ni kug tay, machane tomur riy ma kug kalngan’ug. Ba t’uf ni nggu fal’eg i yaliy rarogon gum’irchaeg. Ma fonow ni bay ko thin rok Got u Bible nge fonow ko piin piilal e ke ayuwegeg ni nggu nang ni ngiyal’ nem e gu be nameg e nggu chag ngak e girdi’ nde t’uf Jehovah rorad. Ere, chiney e gu ma gay rogon ni nggu non ngak e pi girdien e siyobay nem u telefon, mu kug gay rogon ni nge dab ug mada’gad ni gubin ngiyal’.”

Ba t’uf ni ngad fal’eged i lemnag e pi n’en ni bay u gum’ircha’dad u fithik’ e yul’yul’. Ma nap’an ni gad ra rin’ e re n’ey, mab t’uf ni ngad ninged e ayuw rok Jehovah u daken e meybil, ya ir e ‘manang e tin bay u lanin’dad nib mith.’ (Ps. 44:21, BT) Maku ke pi’ Got e Thin rok ni bod rogon ba therek nrayog ni ngad fal’eged i yaliy e bin riyul’ i rarogodad riy. (Jas. 1: 22-25) Ma kub ba ga’ fan boch e fonow ni yima pi’ u daken e pi babyor nge muulung rodad ni nge mang puguran ngodad. Ere, rayog ni ngad fanayed e pi n’ey ni nge ayuweg gum’ircha’dad, nge yag ni ngad ululgad i rin’ e tin nib mat’aw.