N’en ni Ke Rin’ Got ni Fan Ngom

Ireram reb e thin nu Bible nib ga’ ni manang e girdi’, maku ba ga’ ni yima yog. Yima yog ni ireray e re thin ni be “tamilangnag e tin riyul’ u murung’agen e tha’ u thilin Got nge girdi’ nge rogon ni kar thapgad ngak Got.” Ireray fan ni u boch e nam, ma fare thin nu Bible ko “John 3:16” e yima tay ko yungi n’en nib ga’ ni ma muulung e girdi’ ngay, ara yungi n’en ni yima gabdiy ko karrow, maku yima yoloy e re thin nem nga dow e naun ara yu yang nrayog ni nge guy e girdi’.

Piin ni yad ma dag e re thin nu Bible nem e ba mich u wan’rad ni bochan e t’ufeg ni ke dag Got, mab mudugil ni ke yag e yafas ni manemus ngorad. Me gur, uw rogon u wan’um e t’ufeg ni ke dag Got ni fan ngom? Ma mang e ga be lemnag ni ke rin’ Got ni fan ngom ni be m’ug riy ni gab t’uf rok?

“GOT E RIB T’UF E GIRDI’ NU FAYLENG ROK”

Yooren e girdi’ e ba m’agan’rad ngay ni ngar pininged e sorok ngak Got ko pi n’en ni ke sunmiy ni bod rogon e palpalth’ib nge pi n’en ni bay u fayleng, nge girdi’. Pi n’en nib fas nib mo’maw’ ni ngan guy e rib fel’ rogon ni kan sunmiy e ba tamilang ni bay be’ ni ke sunmiy. Boor e girdi’ e yad ma pining e magar ni gubin e rran ko yafas rorad nib tow’ath ni ke pi’ Got. Maku yad ma taga’ ngak Got ko pi n’en nib t’uf ko par rorad u reb e rran nge reb ni bod e nifeng, nge ran, nge ggan nge ku boch ban’en u fayleng nib t’uf ko par rorad, ya nge yag ni ngaur pared u fayleng ni yad ba felfelan’.

Ba ga’ fan ni ngad pininged e magar ngak Got ko urngin ban’en, ya riyul’ ni ir e ke Sunmiydad maku ir e be Ayuwegdad. (Psalm 104:10-28; 145:15, 16; Acts 4:24) Rayog ni ngad felfelan’gad ko t’ufeg ni ke dag Got ngodad u nap’an ni gad ra lemnag e pi n’en ni be rin’ ya nge yag ni ngad pared ni gadad ba fas. I yog apostal Paul ni gaar: “[Got] e ke pi’ e yafos nge pogofan nge urngin ban’en ngak e girdi’. Ya fithik’ Got e gadad be par riy ma gadad be mithmith riy ma gadad ba’ riy.”​—Acts 17:25, 28.

Machane, t’ufeg rok Got ngodad e gathi kemus ni be m’ug ko pi n’en ni ke pi’ ni fan ko par rodad u reb e rran nge reb. Ke sunmiydad ni gadad ba thil ko pi gamanman, maku be tay fadad ni bochan ni ke sunmiydad ni gadad baadag ni nge yag e tirok Got ban’en ngodad, ma ir e ra ayuwegdad ni nge yag e pi n’ey ngodad. (Matthew 5:3) Bochan e re n’ey, ma piin ni yad ba yul’yul’ e bay e athap rorad ni ngar manged chon e tabinaw rok Got ara “pi fak.”​—Roma 8:19-21.

Fare thin ko John 3:16 e be dag Got ni gadad ba t’uf rok me pi’ Fak ni aram Jesus nge yib nga fayleng ya nge fil ngodad murung’agen Got ni Chitamangin, me yim’ ni fan ngodad. Machane, ku boor e girdi’ e yad ra yog ndar nanged ko mang fan ni yim’ Jesus nge rogon nra m’ug e t’ufeg rok Got ngodad u daken e yam’ ni tay. Gad ra guy ko uw rogon ni ke tamilangnag e Bible fan e yam’ ni tay Jesus nge feni ga’ fan.

KE “PI’ FAK NI KARI MAAGIRAG ROK”

Gubin e girdi’ ni yad ma m’ar, maku yad ma pilibthir, ma yad ma yim’. Machane, gathi ireray e n’en nib m’agan’ Jehovah Got ngay ni fan ko girdi’. Ke sunmiy Got e gal nsom’on e girdi’ ni bay e athap rorow ni ngar parew u paradis u fayleng ni manemus. Machane, bay ban’en nib t’uf ni ngar rin’ew: Thingar ra folgow ko motochiyel rok. I yog Got ngorow ni faanra dab ra folgow, ma yow ra yim’. (Genesis 2:17) Bin som’on e pumoon e togopuluw nga mat’awun Got, me yim’ maku arrogon pi fak ni kur m’ad. I weliy apostal Paul ni gaar: “U daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.”​—Roma 5:12.

Got e ba “t’uf rok e tin nib mat’aw.” (Psalm 37:28) Yugu aram rogon ni dabi pag ni nge dabi gechignag e bin som’on e girdi’ ni bochan ni ngongliy e denen, machane de pag ni nge gafgow urngin e girdi’ mar m’ad ndakuriy e athap rorad ni bochan taa be’ nde fol. Bochan ni be yog fare motochiyel ni “puluwon e pogofan e ku pogofan,” e be m’ug riy ni Got e ba mat’aw ma ke bing e kanawo’ ngak e piin nib yul’yul’ ni nge yag e yafas ngorad ni dariy n’umngin nap’an. (Exodus 21:23, BT) Deer ni bay e, Uw rogon ni yira sulweg fare yafas ni manemus ni mul u pa’ Adam? Fulweg riy e: Ku reb e yafas nib flont ni taareb rogon ko n’en ni mul u pa’ Adam.

Ba tamilang, ni dariy reb i fak Adam nrayog rok ni nge pi’ e maligach ni aram rogon, machane kemus ni goo Jesus e rayog rok. (Psalm 49:6-9) Kan gargelnag Jesus ndariy e denen rok ya ba flont ni bod Adam nni sunmiy nib flont. Aram fan nnap’an ni pi’ e yafas rok, ma ke ayuweg e girdi’ ni nge dabkur pared ni yad e sib ko denen. Bochan e re n’em, ma aram e ke mab e kanawo’ ngak pifak Adam nge Efa ni nge yag e yafas ngorad nib flont ni bod rogon fare yafas ni ke mul u pa’ Adam nge Efa. (Roma 3:23, 24; 6:23) Gur, ka bay ban’en nib t’uf ni ngad rin’ed ya nge yib angin fare t’ufeg ni ke dag Got ngodad?

“PIIN NI MICHAN’RAD NGAK”

Ra ngad beeged e John 3:16 bayay ma bay bang riy ni be yog ni “urngin e piin ni michan’rad ngak [Jesus] e aram e dab kur m’ad, ya ke yog e yafos ndariy n’umngin nap’an ngorad.” Re n’ey e be yip’ fan ni bay ban’en ni thingar da rin’ed ma rayog ni nge yag e “yafas ndariy n’umngin nap’an” ngodad, ni aram e ba t’uf ni nge mich Jesus u wan’dad ma gad fol ko tin ni ke yog.

Sana ga ra lemnag ko: ‘Faanra ngan fol, ma mang e ba muun ngay? Gur, ke yog Jesus ni “urngin e piin ni michan’rad ngak” e ra yag e yafas ndariy n’umngin nap’an ngorad?’ Arrogon, rib ga’ fan e michan’. Machane, dab da paged talin ni be yog e Bible ni dabi gaman ni kemus ni nge mich Jesus u wan’dad. Rogon ni yog reb e babyor e fare bugithin ni fanay John nsom’on e be yip’ fan ni “nge pagan’uy nga ban’en, ma gathi kemus ni nge mich ban’en u wan’uy.” (Vine’s Expository Dictionary of Old and New Testament Words) Gathi kemus ni nge mich Jesus u wan’ be’ ni ir e En ni ma thapegdad me fel’ u wan’ Got. Ya kub t’uf ni nge fol ko pi n’en ni ke fil Jesus. Ra yog be’ ban’en ni ke mich u wan’ ma faanra de chag e ngongol ngay ma ra yan i aw nib m’ay fan fare michan’. Be yog e Bible ni, “michan’ ngak Got nra de chag e ngongol ngay ma ba yam’ fare michan’.” (James 2:26) Re n’ey e be yip’ fan nib t’uf nra be’ ma nge maruweliy e michan’ rok ngak Jesus, ni aram e thingari puluwnag e ngongol rok ko michan’ rok.

Ke weliy Paul murung’agen e re n’ey ni gaar: “Gelngin fanmad t’uf rok Kristus e ir e be gagiyegnagmad, ya kug nanged ni taareb e girdi’ [Jesus] e yim’ ni fan ngak urngin e girdi’ . . . I yim’ ni fan ngak e girdi’ ni urngin ni bochan e piin ni yad ba fos e nge dab ku ur ngongolgad ni yad be yan nga tabon lanin’rad, machane ngar ngongolgad ni yad be yan ngan’ faanem ni ir e ke yim’ ni fan ngorad ma kan faseg ko yam’ ni fan ngorad.” (2 Korinth 5:14, 15) Faanra riyul’ ni gad be pining e magar ngak Jesus ni bochan fare maligach ni ke pi’, ma thingar da thilyeged boch ban’en ko yafas rodad, ni aram e dab ku darod nga tabon lanin’dad ya ngad rin’ed e tin nib m’agan’ Jesus ngay, ya ke yim’ ni fan ngodad. Ba ga’ fan ni ngad m’oneged u lan e yafas rodad e pi n’en ni fil Jesus ngodad. Ra ngad rin’ed e pi n’ey ma dabisiy nra thil e pi n’en ni gad ma lemnag ni ir e ba ga’ fan, maku ra thil e pi n’en ni gad ra mel’eg nge ku boch ban’en ni gad ma rin’. Mang tow’ath e ra yag ngak e piin ni ke mich Jesus u wan’rad, ma yad be maruweliy e michan’ rorad ngak?

“DAB KUR M’AD, YA KE YOG E YAFOS NDARIY N’UMNGIN NAP’AN NGORAD”

Tungun fare thin ko John 3:16 e be tamilangnag e n’en ni ke micheg Got ni fan ngak e piin ni yad ma maruweliy e michan’ rorad ko fare biyul ni pi’ Jesus ma yad ma fol ko pi motochiyel rok Got. Baadag Got ni piin ni yad ra par ni yad ba yul’yul’ e “dab kur m’ad, ya ke yog e yafos ndariy n’umngin nap’an ngorad.” Machane yugu aram rogon, ma piin ni ke yib angin fare t’ufeg rok Got ngorad e ba thilthil e athap rorad boch nga m’on.

Bay reb e ulung ni ke micheg Jesus ngorad ni athap rorad e ngar pared u tharmiy ndariy n’umngin nap’an. Ke micheg ngak pi gachalpen ni yad ba yul’yul’ ni ke chugur ni nge yan i fal’eg rogon tagil’rad ya ngar uned ngak ko gagiyeg. (John 14:2, 3; Filippi 3:20, 21) Piin ni yira fasegrad nga ranod nga tharmiy e “bay ra manged pi prist rok Got nge Kristus, ma bay ra uned ngak ko gagiyeg u lan bbiyu’ e duw.”​—Revelation 20:6.

Mmudugil urngin pi gachalpen Jesus ni yad ra yan nga tharmiy. Bin riyul’ riy e yog Jesus ni gaar: “Gimed e chi ulung ney e dab mu tamdaggad! Ya Chitamangimed e ba adag ni nge pi’ e gin nsuwon ngomed.” (Luke 12:32) Uw urngin e girdi’ ko “chi ulung” nem? Revelation 14:1, 4 e be gaar: “Me ere faan gu sap ma ba’ fare Fak e Saf [Jesus ni kan faseg ko yam’] nib sak’iy nga daken e burey ni Zion [be yip’ fan e tharmiy]; ni yad raay nge aningeg i ragag nge aningeg i biyu’ e girdi’ ni ba’ fithingan rorad nge fithingan e Chitamangin ni kan yoloy nga peri’rad. . . . Kan biyuliyrad u fithik’ e tin ni ka ba’ e girdi’ nu fayleng ma yad e tin som’on e girdi’ nni pi’rad ngak Got nge ngak fare Fak e Saf.” Yira taarebrogonnag fachi “ulung” ni 144,000 urngirad ngak bokum bilyon e girdi’ ni ur med ni yad ba fas, ma ri ba achig e chi ulung ney. Be yog e Bible ni pi girdi’ ney e yad ra mang pilung, ere mini’ e piin ni yad ra gagiyegnag?

Ke weliy Jesus murung’agen yugu reb e ulung ni yad ba yul’yul’ ni ku ra yib angin Gil’ilungun Got u tharmiy ngorad. Rogon ni bay ko John 10:16 e yog Jesus ni gaar: “Ba’ yugu boch e saf ni saf rog, machane dar moyed u fithik’ e tiney e saf. Ere thingar kug fekrad i yib; ya bay ra metelgad nga lungug, mi yad peth ko tiney ngar pired mi yad taab ran’ i saf ma taabe’ e be gafaliyrad.” Be athapeg yugu boch e “saf” e par u fayleng ni dariy n’umngin nap’an, ni bod rogon Adam nge Efa ni kan sunmiyrow ni ngar parew u fayleng. Uw rogon ni kad nanged ni athap rorad e ngar pared u fayleng ndariy n’umngin nap’an?

Boor yang u Bible ni be weliy nra boch nga m’on ma ra Paradis e fayleng. Ra ga baadag ni ngam guy e pi thin ney, ma ga ra pithig e Bible rom ngam beeg e: Psalm 37:9-11; 46:8, 9; 72:7, 8, 16; nge Isaiah 35:5, 6; 65:21-23; nge Matthew 5:5; nge John 5:28, 29; nge Revelation 21:4. Pi thin ney e be yiiynag e ngiyal’ nra m’ay e mahl, uyungol, m’ar, nge yam’. Pi thin ney e be weliy murung’agen ni bay ba ngiyal’ ni piin ni yad ba mat’aw e yad ra par ni yad ba felfelan’ ya yad ra toy e naun rorad, ma yad ra fal’eg e milay’, ma yad ra chuguliy pi fakrad u fithik’ e gapas.a Gur, gathi ga ra felfelan’ ko pi n’ey? Bay rogon ni nge mich u wan’dad ni pi yiiy ney e ra riyul’.

BOOR BAN’EN NI KE RIN’ GOT

Faan ga ra lemnag e pi n’en ni ke rin’ Got ni fan ngom nge urngin e girdi’, ma rib tamilang nri boor ban’en ni ke rin’. Ke yag e yafas ngodad, bay e llowan’ rodad, ma yu ngiyal’ e ba fel’ fithik’ i dowdad, maku bay e pi n’en nib t’uf rodad ya nge yag ni ngad mageygad ni gadad ba fas. U daken fare biyul ni ke pi’ Got ni aram Jesus e ra yibnag boor e tow’ath ngodad ni bod e n’en ni yog ko John 3:16.

Yafas ndariy n’umngin nap’an u fithik’ e gapas, ni dakuriy e m’ar, mahl, uyungol, nge yam’ e ra yibnag e bin riyul’ e felfelan’ nge tow’ath. Ra nge yag e pi tow’ath nem ngom ma gur e ba milfan ngom. Deer ni bay e, Mang e ga be rin’ ni fan ngak Got?