Mu Ayuweg Boch e Girdi’ ni Ngari Gagiyel e Salap Rorad

1, 2. Uw rogon ni ma lemnag Jehovah e pi tapigpig rok u fayleng?

NAP’AN nra yaliy l’agruw e gallabthir gal fakrow ni yow be fafel, mab ga’ ni yow ma gin nga boch ban’en nib salap fa gal bitir riy. Faanra gur reb e gallabthir, ma dabisiy ni kam guy e re n’ey. Sana bagayow fa gal bitir e ba salap ko gosgos, ma bagayow e ba salap i yoloy yaan ban’en ara ba salap i fal’eg ban’en. Machane, demtrug e n’en nib salap fa gal bitir riy, mab felfelan’ e gallabthir rorow ni ngar ayuwegew yow ni ngari gagiyel fel’ngirow ara ngar mon’oggow ko n’en ni yow ba salap riy.

² Ku er rogon Jehovah ni ma yaliy e pi tapigpig rok u fayleng. Ma tayrad ni taareb rogorad ko “machaf” ko pi nam. (Hag. 2:7, BT) Rib ga’ farad u wan’ ni bochan e ba gel e michan’ rorad ma yad ba yul’yul’ ngak. Machane, sana kam guy ni bay boch e tapigpig rok Jehovah ni bay boch ban’en ni yad ba salap riy. Boch e walag ni pumoon e yad ba salap ko welthin, ma boch e yad ba salap i yarmiy ban’en. Boor e walag nib pin nib papey ni nge mit yugu reb e thin ngorad mar fanayed u nap’an e machib, ma boch i yad e manang rogon ni nge pi’ e athamgil nga laniyan’ be’ ara nge ayuweg e piin ni kar m’argad. (Rom. 16:1, 12) Gathi gad be felfelan’ ni bay e pi walag ney u lan e ulung rodad?

3. Mang deer e gad ra weliy e fulweg riy ko re article ney?

³ Machane, bay boch e walag u lan e ulung, nib ga’ ni piin fel’ yangaren ara piin ni ka fin ra uned ko taufe, ndawor ra pirieged e n’en ni yad ba fel’ ngay u lan e ulung. Ere, uw rogon ni ngad ayuweged e pi walag ney ni ngari gagiyel e salap rorad? Mang fan nsusun e ngad athamgilgad ni ngaud yaliyed fel’ngirad, ma gad lemnagrad ni bod rogon ni ma lemnagrad Jehovah?

MA SAP JEHOVAH NGA FEL’NGIN E PI TAPIGPIG ROK

4, 5. Uw rogon ni be m’ug ko fare thin ni bay ko Judges 6:11-16 ni Jehovah e ma yaliy e pi n’en nib salap e pi tapigpig rok riy?

⁴ Boor e thin nu Bible ni be dag ni gathi kemus ni ma sap Jehovah nga fel’ngin e pi tapigpig rok, ya ku ma guy e pi n’en ni yad ba salap riy. Bod nnap’an ni kan mel’eg Gideon ni nge chuweg e girdi’ rok Got u tan pa’ piyu Midian, ma dabisiy ni ke gin ko n’en ni yog e engel rok Got ngak ni gaar: “I gur reb e pumoon ndariy e marus rom, mi Somol e ba’ rom!” Dariy e maruwar riy ni ke ‘rus’ Gideon, me lemnag ndabiyog rok ni nge ayuweg e girdi’ rok Got. Machane, ba tamilang ko thin ni yog fare engel ngak nib thil e lem rok Jehovah ko lem rok, ya manang Jehovah nrayog rok ni nge rin’ e n’en ni ke yog ngak.​—Mu beeg e Judges 6:11-16.

⁵ Ba pagan’ Jehovah ngak Gideon nrayog rok ni nge chuweg piyu Israel u tan pa’ e toogor rorad ni bochan e Ke guy e salap rok. Bod ni, ke guy e engel rok Jehovah ni ke maruwel nga gelngin ni nge gunugunuy e wheat ni wom’engin e woldug ni yima ngongliy e flowa riy. Ku bay ban’en ni rin’ ni ki guy fare engel. Kakrom e ba ga’ ni ma gunugunuy e pi tamilay’ e wheat u daken e flang ya nge yag ni thoy e nifeng keru’ fapi wheat nge chuw. Machane, Gideon e yan i mith nga i gunugunuy e tirok e wheat u lan ban’en ni ma uduy e grapes, ya nge dabi guy piyu Midian. Ere, rib llowan’ ko n’en ni rin’! Aram fan ni ke guy Jehovah ni gathi kemus ni ir reb e tamilay’ ni ma kol ayuw, ya ku ir be’ nib gonop. Arrogon, ke guy Jehovah e salap rok ma ke maruwel ngay.

6, 7. (a) Uw rogon nib thil rogon ni i lemnag Jehovah Amos nga rogon ni i lemnag boch e girdi’ nu Israel? (b) Mang e be dag ni Amos e gathi ir be’ nde skul?

⁶ Ku aram rogon e n’en ni buch rok Amos nreb e profet rok Jehovah. Ke guy Jehovah ni bay e salap rok ni yugu aram rogon ni ma tay e girdi’ ni ir be’ ni gathi ri ma non ma de ga’ fan. I yog Amos ni ir e kemus ni ma gafaliy e saf ma ma ayuweg yungi woldug ni gek’iy ni fig. Miti gek’iy nem e aram e ggan ko piin nib gafgow e ngiyal’ nem. Ere, nap’an ni dugliy Jehovah ni ir e nge yal’uweg fa ragag i ganong nu Israel ndakurir liyorgad ngak, ma sana boor e girdi’ nu Israel nra lemnaged ndabi fel’ ko binem e maruwel. Mang fan?​—Mu beeg e Amos 7:14, 15.

⁷ Ke ilal Amos u bochi binaw nib palog ko pi binaw u Israel kakrom, machane boor ban’en ni manang u murung’agen e yalen nge piin ni ur gagiyeggad e ngiyal’ nem. Manang e pi n’en ni i buch u Israel, ma sana ku manang rarogon e pi nam ni bay u toobrad ni bochan girdien e siyobay ni yad ma yan ko binaw ni ma par riy ni ngar chuw’iyed boch ban’en ni fan ko siyobay rorad. (Amos 1:6, 9, 11, 13; 2:8; 6:4-6) Bay boch e girdi’ e ngiyal’ ney ni boor ban’en u murung’agen e Bible ni yad manang ni ka rogned ni Amos e ir be’ nib salap i yoloy murung’agen ban’en. Manang rogon ni nge fanay e thin nib mom ni ngan nang fan ma kub papey ni nge rich nga gum’irchaen e girdi’. De rus ni nge non nib togopuluw ngak fare prist nib kireb ni ka nog Amaziah ngak. Ma re n’ey e be dag nib puluw e cha’ ni ke mel’eg Jehovah ma ki fanay e salap rok nda i guy e girdi’, ni nge rin’ e maruwel ni ke pi’ ngak.​—Amos 7:12, 13, 16, 17.

8. (a) Mang e micheg Jehovah ngak David? (b) Mang fan nrayog ni nge pi’ fapi thin ko Psalm 32:8 e athamgil nga laniyan’ e piin nder pagan’rad ngorad?

⁸ Arrogon, manang Jehovah e n’en nib salap reb nge reb e pi tapigpig rok riy. I micheg ngak David ni Pilung ni gubin ngiyal’ nra i pow’iy, ma be ‘yog ngak e tin ni nge rin’.’ (Mu beeg e Psalm 32:8.) Ere, kam nang fan nra pi’ e re thin ney e athamgil nga lanin’dad? Yugu aram rogon nder pagan’dad ngodad, machane, rayog ni nge ayuwegdad Jehovah ni ngad rin’ed boch ban’en ni gad be lemnag ndabiyog rodad. Rayog ni nge ayuwegdad Jehovah ni ngari gagiyel e salap rodad ni bod rogon ba sensey ni ke yog ngak faen ni be skulnag ni nge rin’ ban’en, ngemu’ me pow’iy u rogon ni nge rin’ fare n’em. Ku rayog ni nge fanay Jehovah boch e walag u lan e ulung ni ngar ayuweged gadad ni ngari gagiyel e salap rodad. Ni uw rogon?

NGAUM SAP NGA FEL’NGIN BOCH E GIRDI’

9. Uw rogon ni ngad folgad ko fare thin ni yog Paul ni faani gaar, nge bagadad ma “gathi go ir e ngi i lemnag ir,” ya ngki lemnag boch e girdi’?

⁹ I yog Paul ngak e pi Kristiano nra bagayad ma “gathi go ir e ngi i lemnag ir,” ya ngki lemnag e piin taareb e michan’ rorad. (Mu beeg e Filippi 2:3, 4.) Fan e re fonow nem ni pi’ Paul e susun ni ngad gayed rogon ni ngad nanged boch ban’en nib salap e pi walagdad riy ma gad weliy murung’agen. Ra uw rogon u wan’dad ni faanra yog be’ ni gad be mon’og u ban’en? Re n’ey e ba ga’ ni ma k’aringdad ni ngad athamgilgad ni ngkud mon’oggad boch. Ere, ku er rogon pi walagdad ni faanra ud gagiyelnaged pi fel’ngirad, ma aram e gad be ayuwegrad ni ngar athamgilgad mi yad mon’og ko tirok Got ban’en.

10. Mini’ e piin nrib t’uf ni ngad lemnaged yad?

¹⁰ Mini’ e piin nrib t’uf ni ngad lemnaged yad? Riyul’ ni gad gubin nib t’uf ni ngaun lemnagdad. Machane, ba ga’ ni piin fel’ yangaren nge piin ni ka fin ra uned ko taufe e rib t’uf ni ngar nanged ni yibe unegrad ko pi n’en ni yibe rin’ u lan e ulung. Ya re n’ey e ra ayuwegrad ni ngar nanged nib ga’ farad u lan e ulung. Machane, faanra dab ud daged ngorad nriyul’ nib ga’ farad, ma rayog ni nge k’aringrad e re n’ey ni ngar dabuyed ni ngar nameged boch e maruwel u lan e ulung. Ma ireray ban’en ni be pi’ e Thin rok Got e athamgil nga lanin’rad ni ngar rin’ed.​—1 Tim. 3:1.

11. (a) Uw rogon ni ayuweg reb e piilal reb e pagel ni nge war e tamra’ rok? (b) Mang e kam fil ko n’en ni buch rok Julien?

¹¹ Ludovic nreb e piilal u reb e ulung e ke yib angin e ayuw ni un pi’ ngak u nap’an ni kab bitir. Ere, yog ni gaar: “Faanra gu dag ngak reb e walag ni pumoon nriyul’ ni gu be lemnag, mab papey ni ma mon’og.” I weliy Ludovic murung’agen reb e pagel nib tatamra’ ni ka nog Julien ngak ni gaar: “Bay yu ngiyal’ ni ma guy Julien rogon ni nge yoornag ban’en ni nge rin’ u lan e ulung, machane bayi n’en me lemnag ndabiyog rok, ma aram mi i tabab ni nge ngongol nib mit rogon. Machane, kug guy ni ir be’ nrib gol ma ri baadag ni nge ayuweg boch e girdi’ u lan e ulung. Ere, n’en ni kug rin’ e kug guy rogon ni nggu sap nga fel’ngin mug pi’ e athamgil nga laniyan’.” Munmun, me yag ni nge mang Julien reb e ministerial servant, ma chiney e ke mang reb e regular pioneer ara be’ ni ma machib u polo’ e tayim rok.

MU AYUWEGRAD NI NGE GAGIYEL E SALAP RORAD

12. Mang e thingar da rin’ed ma gad ayuweg be’ ni ngari gagiyel e salap rok? Mu weliy reb e kanawo’.

¹² Riyul’ ni faanra ngad ayuweged boch e girdi’ ni nge gagiyel e salap rorad, mab t’uf ni ngaud fal’eged i yaliy rarogorad. Yu ngiyal’ e ba t’uf ni ngad lemnaged fel’ngin facha’ nge tin nrayog rok ko bin ni ngad pared ma gad be lemnag e meewar rok ni bod rogon ni kad filed ko n’en ni ke buch rok Julien. Ireray e n’en ni rin’ Jesus ngak apostal Peter. Yugu aram rogon ni immoy yu ngiyal’ ni i m’ug ni gowa dabiyog ni nge pagan’uy ngak Peter, machane manang Jesus ni bay boch i fel’ngin nib fel’, ma aram fan ni yog nra par Peter nib mudugil ni bod rogon ba malang ni ke par nib mudugil nder mithmith.​—John 1:42.

13, 14. (a) Uw rogon Mark u wan’ Barnabas? (b) Uw rogon ni yib angin e ayuw nni pi’ ngak reb e walag ni pumoon ni bod rogon e ayuw ni kan pi’ ngak Mark? (Mu guy e sasing ni bay u tabolngin e re article ney.)

¹³ Ku ireray e n’en ni rin’ Barnabas ngak John Mark. (Acts 12:25) Nap’an e bin som’on e milekag ni tay Paul nge Barnabas ni yow be machib, ma immoy Mark rorow ni i “ayuwegrow ko maruwel,” ma sana ku be ayuwegrow ko tin nib t’uf rorow. Machane, nap’an nra tawgad nga Pamfylia, me digeyrow Mark nge sul. Ma aram mar milekaggow i yan ko lel’uch ni bangi ban’en nrib tabnathin ni bochan e boor e moro’ro’ riy. (Acts 13:5, 13) Machane, daki lemnag Barnabas e meewar rok Mark, ma faani boch nga tomuren me fek ngki un ngak ma be fil boch ban’en ngak. (Acts 15:37-39) Ireray e n’en ni ayuweg Mark ni nge mon’og ko tirok Got ban’en. Faani boch e duw nga tomuren u nap’an ni immoy u Roma ni be ayuweg Paul u nap’an ni bay u kalbus, ma boor ban’en nib fel’ ni weliy Paul u murung’agen u nap’an ni yol ngak piyu Kolose. (Kol. 4:10) Dabisiy ni kari felfelan’ Barnabas u nap’an ni yog Paul ni ngan pi’ Mark ni nge ayuweg.​—2 Tim. 4:11.

¹⁴ Bay reb e piilal ni ka nog Alexandre ngak ni yib ngan’ rogon ni ke yib angin e ayuw ni pi’ reb e walag ni pumoon ngak, ma aram me yog ni gaar: “Nap’an ni ku gub pagel, ma rib mo’maw’ rog ni nggu fek e meybil u fithik’ e girdi’. Ma aram me yog reb e piilal ngog rogon ni ngaug fal’eg rogog nge rogon ni nge war e marus rog. Ere, de tal ndaki yog ngog ni ngaug fek e meybil, ya bayi n’en me yog ngog ni nggu fek e meybil u tomuren e muulung ni fan ko machib. Munmun, me pagan’ug nrayog ni nggu rin’ e re n’ey.”

15. Uw rogon ni weliy Paul feni ga’ fan e pi walag u lan e ulung u wan’?

¹⁵ Nap’an ni gad ra nang ni bay reb e walag ni bay ban’en nib salap riy, ma gad ma yog ngak feni ga’ fan u wan’dad, fa? U Roma ko guruy ni 16 e weliy Paul riy murung’agen 20 e walag ni bay boch i fel’ngirad nrib manigil ma rib ga’ fan u wan’. (Rom. 16:3-7, 13) Bod ni, yog Paul ni Andronikus nge Junias e kab n’uw nap’an e pigpig ni kar tew ko pigpig ni ke tay, miki weliy murung’agen e athamgil ni kar tew ni yow l’agruw e Kristiano. Ki weliy Paul murung’agen e chitiningin Rufus, ni sana bochan e ayuw ni i pi’ ngak Paul.

16. Mang angin nra yib riy ni faanra u nog boch ban’en nib fel’ ni be rin’ e piin fel’ yangaren?

¹⁶ Sana ku ra yib angin ni faanra u dogned boch ban’en nib fel’ ni ke rin’ boch i walagdad. Am lemnag e n’en ni buch rok Rico. Rico e bochi pagel ni ma par u France, ma kari mulan’ ni bochan e dabun e chitamangin ni nge un ko taufe. Ma chitamangin e der ma pigpig ngak Jehovah. Ere, lemnag Rico nthingari son nge taw ko duw rok mfini tabab ni nge pigpig ngak Jehovah. Kub gel e kireban’ ni tay ni bochan e yima moningnag u skul. Ere, immoy reb e piilal u lan e ulung ni ka nog Frédéric ngak nnog ngak ni nge fil e Bible ko chi pagel nem. I yog ni gaar: “Ku gog ngak Rico nrib fel’ e n’en ni be rin’, ya togopuluw ni be mada’nag e be m’ug riy nder rus ni nge weliy murung’agen e michan’ rok.” Pi thin ney e ayuweg Rico ni nge par nib mudugil me dag e ngongol nib fel’, miki ayuweg ni nge chugur e tha’ u thilrow e chitamangin. Ere, nap’an ni gaman 12 e duw rok Rico, me un ko taufe.

17. (a) Uw rogon ni ngad ayuweged pi walagdad ni ngar mon’oggad? (b) Uw rogon ni ke dag reb e missionary ngak boch e walag ni kab pagel ni ma lemnagrad, ma mang angin ni ke yib riy?

¹⁷ Gubin yay ni gad ra pining e magar ngak reb i walagdad ni bochan ban’en ni ke rin’ ma gad yog nrib fel’ e n’en ni ke rin’, ma aram e gad be k’aring ni nge athamgil ni nge pi’ e tin th’abi fel’ rok ngak Jehovah. Sylvie,a ni ke yoor e duw ni ke pigpig u Bethel u France, e yog nrayog ni nga i yog e pi walag nib pin boch ban’en nib fel’ ni ke rin’ e pi walag ni pumoon. Ki yog ni piin nib pin e ba ga’ ni yad ma guy boch ban’en u rarogon e pi walagrad nder ma guy e pi walag ni pumoon. Ere, “nap’an nra yog e pi walag nib pin boch ban’en nib fel’ ni ke rin’ e pi walagrad ni pumoon, ma aram e yad be tay angin e n’en nra yog boch e walag ni pumoon ni kar ilalgad ko tirok Got ban’en.” Ki yog ni gaar: “Gu ma lemnag nib milfan ngog ni nggog ban’en nib fel’ ni ke rin’ be’.” (Prov. 3:27) Jérôme, nreb e missionary u French Guiana e ke yoor e walag ni kab pagel ni ke ayuwegrad ni ngar uned ko missionary. I yog ni gaar: “Kug nang nnap’an ni gu ra yog boch ban’en nib fel’ ni ke rin’ e pi walag ney u nap’an e machib ara boch e fulweg nib fel’ ni kar pied u nap’an e muulung, ma ma gel e pagan’ rorad. Ma angin ni ke yib riy e kar athamgilgad ni ngar mon’oggad ko pi n’en ni yad ba salap riy.”

18. Mang fan nib fel’ ni ngaun pining e pi walag nib pagel ni kab fel’ yangarrad ni ngar uned ko pi n’en ni yibe rin’?

¹⁸ Rayog ni ngad pied e athamgil nga laniyan’ pi walagdad ni ngar mon’oggad ko tirok Got ban’en u nap’an ni gad ma rin’ boch e maruwel u taabang. Bod nrayog ni nge yog reb e piilal ngak reb e walag nib pagel ni kab fel’ yangaren ni manang rogon i fanay e computer ni nge printnag boch ban’en ni bay ko jw.org nrayog ni nge pi’ e athamgil nga laniyan’ e piin pilibthir ndariy e computer rorad. Maku reb e, faanra gur e kan tem ni ngaum rin’ boch e maruwel ni fan ko Kingdom Hall, ma rayog ni nga mog ngak reb e walag nib pagel ni kab fel’ yangaren ni nge ayuwegem. Ireray boch ban’en nra ayuwegem ni ngam nang ko mang e yad ba fel’ ngay, ma gog ngorad, mag guy ni ke yib angin.​—Prov. 15:23.

NGAN LEMNAG BOCH BAN’EN NI FAN KO GABUL NGE LANGLATH

19, 20. Mang fan nsusun e ngad ayuweged boch e girdi’ ni ngar mon’oggad?

¹⁹ Nap’an ni mel’eg Jehovah Joshua ni nge pow’iy piyu Israel, Miki tay chilen ngak Moses ni nge “pi’ e athamgil nga laniyan’” Joshua me ayuweg ni nge par nib “gel e lem rok.” (Mu beeg e Deuteronomy 3:28, BT.) Be yoor i yan e piin ni yad be yib ko ulung rok Got ni bay u ga’ngin yang e fayleng. Gubin e Kristiano nrayog ni ngar ayuweged e pi walag nib pagel ni kab fel’ yangarrad nge piin ni ka yad ba beech ni ngari gagiyel e salap rorad. Gathi yigoo piin piilal e rayog ni ngar rin’ed e re maruwel ney. Faan gad ra rin’ ni aray rogon ma ra yoor e girdi’ ni ngar uned ko machib u polo’ e tayim rorad, maku ra yoor e girdi’ nra bung rogorad ni ngar “machibniged boch e girdi’.”​—2 Tim. 2:2.

²⁰ Demtrug ko gad ma un nga reb e ulung ni boor e walag riy ara bochi reb e ulung nib achichig, mab t’uf ni ngad lemnaged boch ban’en ni fan ko gabul nge langlath. Ban’en nra ayuwegdad e aram e ngad folwokgad rok Jehovah mu ud sapgad nga fel’ngin e pi tapigpig rok.