KENGGIN E RE KE BABYOR NEY | GUR, SATAN E IR BE’ NIB RIYUL’?
Gur, Riyul’ ni Bay Satan?
“Gu ilal ko fare binaw nu El Salvador. Ma nap’an ni da ug fol, ma ma yog e nina’ rog ngog ni gaar, ‘Bayi yib fare Moonyan’ ngom!’ Ma gu ma fulweg ni ma lungug, ‘Mu pag nge yib!’ I gag e ba mich Got u wan’ug, gathi Satan.”—ROGELIO.
Gur, taareb rogon e lem romew Rogelio? Bin ngan ko pi n’ey ni yira weliy e ba fel’ u wan’um?
Satan e gathi ir be’ nib riyul’; ya kemus ni be yip’ fan e tin nib kireb ban’en.
Riyul’ ni bay Satan, machane dariy fan e girdi’ u wan’.
Satan e ba kan nib gel gelngin ni ma k’aring e girdi’ u ga’ngin yang e fayleng ni ngar ngongliyed e kireb.
Bay bokum milyon e girdi’ nib mich u wan’rad fapi n’en ni kad weliyed murung’agen. Machane gur, rib ga’ fan ko bin ngan ko pi n’ey e ba puluw? Faanra Satan e be’ nde riyul’, ma piin ni yad be lemnag ni ir be’ nib riyul’ e kan bannagrad. Ma faanra de ga’ fan e girdi’ u wan’ ma dariy fan ni ngar kol ayuwgad ara ngar rusgad ngak. Machane, faanra Satan e ir e ta gagiyeg nib sasalap, ma aram e bay rogon ni ngan rus ngak.
Gad ra guy rogon ni ke pi’ e thin nu Bible e fulweg ko pi deer ney: Mini’ Satan—gur, be yip’ fan e pi kireb ara ba kan nib kireb? Ma faanra riyul’ ni ir be’, ma gur rayog ni nge gafgownagem? Faanra arrogon ma uw rogon ni ngam ayuwegem?