Gur, Satan e Kemus ni Be Yip’ Fan e Tin nib Kireb Ban’en?

Ba mom ni nga dogned ni faen ni ka nog Satan ngak ni ir e gad ma beeg murung’agen u lan e Bible e be yip’ fan e tin nib kireb ban’en. Machane gur, aram e n’en nri be fil e Bible? Faanra aray rogon ma mang fan ni bay murung’agen Satan u Bible ni be non ngak Jesus Kristus, ma ku bay ba ngiyal’ ni non ngak Got ni Gubin ma Rayog Rok? Mu lemnag e ngiyal’ ni baaram ni non Satan ngak Jesus nge ngiyal’ ni non ngak Got.

NAP’AN NI BE NON SATAN NGAK JESUS

Nap’an ni tabab Jesus ko machib, ma dalip yay ni gay Satan rogon ni nge waliy. Som’on, e gay Satan rogon ni nge fanay Jesus gelngin ni kemus ni ir e nge fel’ ngak ni aram e nge pilyeg e malang nge ngal’ ni flowa nge kay, ya nge dabki yim’ ko bilig. Ma aram me k’aring fare Moonyan’ Jesus ni nge tay e yafos rok nga thatharen e riya’, me lemnag nib ga’ fan ni nge rin’ ban’en ni kemus ni yigoo ir e nge fel’ ngak. Me tomur riy, me ognag Satan e pi nam nu fayleng ngak Jesus ni nge gagiyegnag ni faanra ragbug nga but’ nge tay fan. Dalip yay ni siyeg Jesus e pi ban rok Satan ni be fanay e thin nu Bible.​—Matthew 4:1-11; Luke 4:1-13.

Mini’ e be non Jesus ngak? Gur, be non ko pi kireb ni bay u fithik’ i laniyan’? Rogon ni be yog e Bible e Jesus e “yib ngak urngin mit i kanawoen e pi n’en ni ma waliy e girdi’ nge denen ni bod gadad machane de denen.” (Hebrews 4:15) Miki yog e Bible ni gaar: “Dariy e denen ni ngongliy; ma dariy be’ ni rung’ag taab bug i thin nde riyul’ ni yib u l’ugun nga but’.” (1 Peter 2:22) Jesus e be’ nib flont ma gubin ngiyal’ ni par nib yul’yul’. De pag e lem nib kireb ni nge sum u laniyan’. Ba tamilang ni der non Jesus ko kireb u fithik’ i laniyan’, ya be non ngak be’ nib riyul’.

Numon u thilin Jesus nge Satan e ku be micheg ni Satan e ir be’ nib riyul’.

• Am lemnag rogon ni ognag Moonyan’ e pi nam nu fayleng ngak Jesus ni nge gagiyegnag ni faanra ragbug nga but’ nge tayfan. (Matthew 4:8, 9) Ra yan i aw e re n’ey nib m’ay fan ni faanra de riyul’ Satan. Maku, de fith Jesus Satan ko ir e en ni be gagiyegnag e fayleng fa danga’.

• Tomuren ni siyeg Jesus fapi lumel ni yib ngak, me chuw Satan nge “pag nge yan nib ngoch nap’an.” (Luke 4:13) Ere gur, re thin ney e be tamilangnag ni Satan e aram gelngin e kireb fa ir e en toogor?

• Mu lemnag ni “yib e pi engel ngar bad ra pigpiggad ngak” Jesus. (Matthew 4:11) Gur, piin ni kar bad ni ngar ayuweged Jesus mar pied e athamgil nga laniyan’ e riyul’ ni yad e pi engel? Arrogon. Ere, mang fan ni gad ra lemnag ni Satan e gathi ir be’ nib riyul’?

NAP’AN NI NON SATAN NGAK GOT

Maku l’agruw yay ni non Satan ngak Got u murung’agen Job. Ma ngiyal’ nem e ke yog Got ni ke felfelan’ ni bochan ni ke par Job nib yul’yul’. Machane, ke yog Satan ni kemus ni fan ni be pigpig Job ngak Got e bochan e pi n’en ni be yag riy ngak. Ma be m’ug riy ni be yog Satan ni ir e manang rarogon Job nib fel’ rogon ngak Got. Ke pag Jehovah Satan ni nge kirebnag e pi chugum nib milfan ngak Job, ma ngki thang e fan rok gubin e bitir rok, miki n’igin ni nge for ba mit e malad u downgin Job ni ga’ngin.a Munmun, me yan i aw nib riyul’ e n’en ni yog Jehovah u murung’agen Job, me m’ug ni be ban Satan. Ma aram me tow’athnag Got Job ni bochan ni par nib yul’yul’.​—Job 1:6-12; 2:1-7.

Nap’an e gal welthin nem u thilin Got nge Satan ma gur, be non Jehovah ko pi kireb ni bay u fithik’ i laniyan’? Be gaar e Bible: Got e “rib yal’uw e ngongol rok.” (2 Samuel 22:31) Miki yog ni gaar: “Ba thothup, ba thothup, ba thothup Somol ni Got ni Gubin ma Rayog Rok.” (Revelation 4:8) Thothup e be yip’ fan ban’en ni dariy thibngin ara ba beech, mab dar ko denen. Jehovah e be’ nib flont ma dariy thibngin, ma dariy ban’en ni ma ngongliy nib kireb.

Maku bay boch e girdi’ ni yad ma yog ni Job e be’ nde riyul’, ere welthin u thilin Satan nge Got e kemus nib fanathin. Machane gur, ba puluw e re n’em? Ku bay yugu boch e thin nu Bible ni be micheg ni Job e be’ nib riyul’. Ni bod fare thin ko James 5:7-11 ni be tamilangnag murung’agen Job ni ke dag e kanawo’ u rogon ni nge athamgil e piin Kristiano u nap’an ni yad ra mada’nag e magawon, maku be puguran ngodad ni ma tow’athnag Jehovah e piin ni yad ma athamgil. Mang e ra rin’ e re n’em ni faanra Job e ir be’ nde riyul’ ma pi n’en ni rin’ Satan ngak e ku de riyul’? Fare thin ko Ezekiel 14:14, 20 e yibe weliy riy murung’agen Job, Noah, nge Daniel ni yad dalip i pumoon ni yad ba mat’aw. Job e ir be’ nib riyul’ ni bod Noah nge Daniel, maku ba gel e michan’ rok. Ere, faanra Job e be’ nib riyul’, ma dabisiy ni en ni gay rogon ni nge gafgownag e ir be’ ni kub riyul’.

Be tamilangnag e Bible ni Satan e ir be’ nib riyul’. Machane rayog ni ngam lemnag ko ‘Rayog ni nge magawonnageg Satan nge chon e tabinaw rog e ngiyal’ ney ni ke mon’og gubin ban’en?’

UW ROGON E NGIYAL’ NEY NI GAD BAY RIY?

Mu susunnag ni faanra bay ba ulung i girdi’ nib kireb ni kar bad nga lan fare mach ni ga ma par riy. Ba tamilang nra mo’maw’ ni ngam ayuwegem ko kireb maku boor e kireb nrayog ni ngam un ngay. Am lemnag ban’en ni taareb rogon ko re n’ey: Satan nge pi moonyan’ rok ni yad gubin e pi kan nib kireb e kar togopuluwgad ku Got ma kan tharbograd ngaray nga fayleng. Mang e ra buch? Am lemnag e pi n’en ni ga ma guy ko news ni be buch ko gi n’en ni ga be par riy nge pi n’en ni be buch u ga’ngin yang u fayleng.

• Ga be guy ni ke yoor mit e cham, ni yugu aram rogon ni yibe guy rogon ni ngan taleg e mit ney e ngongol u ga’ngin yang u fayleng?

• Ga be guy ni ke yoor mit e kachido ni yaan e pig, ni yugu aram rogon ni bay e piin ni gallabthir ni ma magafan’rad ni ma yaliy pi fakrad e miti kachido ney?

• Ga be guy ni yibe kirebnag e fayleng ni yugu aram rogon ni bay boch ban’en ni yibe rin’ ni ngan ayuweg?

• Gur, pi n’ey ni be buch e be dag ni bay ban’en ni be magawonnag e girdi’, maku bay ban’en ni be k’aringrad ni ngar gafgowgad?

Ngam lemnag ko mini’ e be yog e Bible ni ir e be k’aring e pi kireb ney u fayleng e ngiyal’ ney: “Mi nin’ fare dragon nri ba ga’ nga wuru’ e tharmiy! I ir fare porchoyog ni ke kakrom, ni kan tunguy fithingan ni Moonyan’, ara Satan, ni ir faanem ni bannag e girdi’ nu fayleng ni polo’. Mi nin’ u lang nga daken e fayleng, nib muun urngin e pi engel rok ngak. . . . Bayi gafgow e fayleng nge day! Ya ke yib fare Moonyan’ ngomed ni kari damumuw, ya manang ndaki n’uw nap’an ni nge par.” (Revelation 12:9, 12) Tomuren ni kan fal’eg i lemnag e pi n’ey, ma boor e girdi’ ni ka rogned ni Satan e ir ba kan nrayog ni nge magawonnag e girdi’, maku ir e be gagiyegnag e girdi’ nu fayleng.

Rayog ni ngam lemnag ko uw rogon nrayog ni ngam ayuwegnem. Re n’ey e ban’en nib ga’ fan ni ngam lemnag. Bin migid e article e ra pi’ boch e fonow u rogon nrayog ni ngam ayuwegem.