Gur, Thingar Da Rusgad ngak Satan?

Kan taarebrogonnag Satan ko miti yub ney ndabiyog ni ngan guy ma rayog ni nge magawonnag e yafos ko girdi’. Machane, gathi ban’en ni ke pagdad Got ni dabi ayuwegdad. Faan ga ra fanay e pi tow’ath ni ke pi’, ma dariy fan ni ngam rus ngak Satan.

Rayog ni ngam dugliy e n’en ni ngam rin’. James 4:7 e be gaar: ‘Mu togopluwgad ngak fare moonyan’, me mil romed.’ Yugu aram rogon nib gel gelngin Satan, machane dariy gelngin ni nge towasariyem ngam rin’ boch ban’en ni dabum ni ngam rin’. Rayog ni ngam mel’eg e n’en ni ngam rin’. Bin taareb e Peter 5:9 e be gaar: “Um pired nib mudugil e michan’ romed ngak Kristus mi gimed togopluw ngak fare moonyan’.” Dab mu pagtalin ni chuw Satan nge yan u tomuren ni waliy Jesus ni dalip yay. (Matthew 4:11) Ere, ku rayog rom ni ngam dugliy ko ga ra fol rok Satan fa danga’.

Bin th’abi fel’ e fager. James 4:8 e be pi’ e athamgil nga lanin’dad ni ngad “chugurgad ngak Got.” Be piningem Jehovah ni nge fel’ e tha’ u thilmew. Uw rogon ni ngam rin’ e re n’ey? Bin th’abi fel’ e kanawo’ u rogon ni ngam rin’ e re n’ey e ngam fil murung’agen u lan e Bible. (John 17:3) N’en ni ga ra fil u murung’agen Jehovah e ra k’aringem ni nge t’uf rom, ma bochan e re t’ufeg ney ma aram e ra k’aringem ni ngam rin’ e n’en nib m’agan’ ngay. (1 John 5:3) Nap’an ni ga ra chugur ngak e Chitamangidad ni bay u tharmiy, ma mang e ra rin’? Ki ulul James ngay nge gaar: “Me chugur [Got] ngomed.”

Ke micheg nra ayuwegey. Proverbs 18:10, NW e be gaar: “Fithingan Jehovah e bod ba wulyang nib gel; nrayog ni nge yan e piin nib mat’aw ngay ma dabi buch ban’en rorad.” Machane re n’em e gathi be yip’ fan ni ngachal rok Got e rayog ni ngan fanay ni nge mang bonod ni nga i ayuwegey ko gin ni yibe yan riy. Ya bin riyul’ riy, e demtrug e ngiyal’ nra wenig e piin ni yad ma tayfan fithingan Got, ma ra ayuwegrad.

N’en nrayog ni ngan rin’. Be yog e Acts 19:19 murung’agen e girdi’ nu Efesus ni kafin nra thilyeged e michan’ rorad ni gaar: “Boor e piin ni yad ma pig nra kunuyed e babyor rorad nga taabang ngar urfiyed u p’eowchen urngin e girdi’. Mi yad puthuy puluwon fapi babyor me yan i gaman wugem i biyu’ e dollar.”a Pi Kristiano nem e kar kirebnaged gubin ban’en rorad ni bay rogon ko ngongolen e pig, ni yugu demtrug feni tolang puluwon. Ngiyal’ ney e rayog ni ngad filed ban’en ko n’en ni kar rin’ed. Ke garer ngongolen e pig u ga’ngin yang u fayleng. Yira fanay boch ban’en ko ngongolen e pig ni yibe lemnag ni gowa dariy e kireb riy, machane rayog ni nge k’aringem ni ngam un ko re ngongol ney. Ere, yugu demtrug rogon ma rib ga’ fan ni dab mu un ko mit ney e ngongol.​—Deuteronomy 18:10-12.

Rogelio, ni kan weliy murung’agen ko re article ney e u lan 50 e duw ma de mich u wan’ ni bay Moonyan’. Machane, ke thilyeg e tafinay rok. Mang fan? I yog Rogelio ni gaar, “U nap’an e yafos rog, ma ireray e som’on ni ke yag baken e Bible ngog. Tamilangan’ ko Thin nu Bible e ke ayuwegneg ni nggu nang nriyul’ ni bay Moonyan’. Maku aram e n’en ni ke ayuwegneg ni nge dab gu pag Satan ni nge gagiyegnigeg.”

Ga baadag ni ga ra guy e ngiyal’ ni yira thang Satan? Rayog. Ke yiiynag e Bible nra boch nga m’on ma Moonyan’ ni ir e be bannag boor e girdi’ e yira yin’ nga “lan fare lipath i nifiy nge sulfur.” (Revelation 20:10) Bin riyul’ riy, e dariy ban’en ni rayog ni nge rin’ e nifiy nge sulfur ngak reb e kan ni danir guy. Ere ba mudugil, ni fare lipath i nifiy e be yip’ fan e mathmit. Ra chuw Satan ni manemus. Rib gel e felfelan’ nra tay e piin nib t’uf Got rorad e ngiyal’ nem!

Ngiyal’ ney, e ngam ulul ngam fil urngin ban’en ni murung’agen Jehovah nge pi n’en ni ma rin’.b Mu susunnag e ngiyal’ nem ni ga bay ni gab fos ni rayog ni nge lungum, “Daki moy Satan!”