Angin e Fas ko Yam’ ni Tay Jesus Ngodad

1, 2. (a) Mang e n’en ni baadag boch fapi tayugang’ ko teliw ni ngar nanged, ma mang e rin’ Peter? (Mu guy e sasing ni bay u tabolngin e re article ney.) (b) Mang fan nde rus Peter e ngiyal’ nem?

IN E rran nga tomuren ni yim’ Jesus me mada’nag apostal Peter ba ulung i pumoon ni ma rus e girdi’ ngorad. Pi girdi’ nem e yad boch fapi tayugang’ ko teliw nu Jew nib gel gelngirad nra yarmiyed ni ngan li’ Jesus nge yim’. Ma yad baadag ni nge tamilangnag Peter boch ban’en ngorad. Ke golnag Peter be’ nib moon nib mugutgut ni ka nap’an nni gargeleg, ma yad baadag ni ngar nanged ko mini’ e ke ayuweg ke yag ni rin’ e re n’em. Me fulweg apostal Peter nde rus ni gaar: “[Re] moon ni baara’ nib sak’iy u roy u p’eowchemed e kari gol ni gelngin fithingan Jesus Kristus nu Nazareth e ir e ke golnag ni ir faanem ni mu kuruthniged [kan tining nga baley e gek’iy, NW] nge mu’ me faseg Got ko yam’.”​—Acts 4:5-10.

² U m’on riy, ma dalip yay ni yog Peter u fithik’ e marus nde nang Jesus. (Mark 14:66-72) Ere, ngiyal’ nem ni bay u p’eowchen fapi tayugang’ ko teliw, ma mang e ayuweg ni nge dabi rus? I ayuweg gelngin Got nib thothup nge ku bochan ni ke mudugil u laniyan’ ni ke fos Jesus ko yam’. Mang e ayuweg Peter ni nge mudugil u wan’ ni ke fos Jesus? Ma mang fan ni ku rayog ni nge pagan’dad ko re n’em?

3, 4. (a) Chon mini’ e ni fasegrad ko yam’ u m’on nni gargeleg e pi apostal rok Jesus? (b) Chon mini’ e fasegrad Jesus ko yam’?

³ Pi apostal rok Jesus e kar nanged nib riyul’ e fas ko yam’, ya u m’on nni gargelegrad ma bay boch e girdi’ ni kan fasegrad ko yam’. Yad manang ni ke pi’ Got gelngin fa gal profet ni Elijah nge Elisa ni ngar rin’ew e pi maang’ang nem. (1 Ki. 17:17-24; 2 Ki. 4:32-37) Ku bay be’ nib moon ni fos ko yam’ u nap’an ni ka non’ nga lan fare low nni chibgiliy Elisa riy, ma nap’an ni yigi math fare yam’ ko yil rok Elisa, me fos. (2 Ki. 13:20, 21) Pi Kristiano kakrom e ba mich u wan’rad e pi n’en ni be weliy e Bible, ni bod gadad e ngiyal’ ney nib mich u wan’dad ni riyul’ e Thin rok Got.

⁴ Nap’an ni gad ra beeg e thin nu Bible u murung’agen e girdi’ ni fasegrad Jesus ko yam’, mab ga’ ni ma pug e tafinay rodad. Nap’an ni faseg Jesus be’ nib pagel ni fak be’ nib pin ni ke yim’ figirngin ni kari maagirag rok, ma dabisiy ni ke ngat e re ppin nem ko n’en ni ke buch. (Luke 7:11-15) Maku immoy ba ngiyal’ ni ki faseg Jesus reb e buliyel ko yam’ ni 12 e duw rok. Rayog ni ngam susunnag feni rib gel e felfelan’ ni tay e gallabthir rok u nap’an ni kan faseg fakrow ko yam’! (Luke 8:49-56) Maku dabisiy ni kari felfelan’ e girdi’ u nap’an ni kar guyed Lazarus ni ke yib u lan e low rok nga wuru’ ni ke fas, mab fel’ rogon!​—John 11:38-44.

FAN NIB THIL E FOS KO YAM’ NI TAY JESUS KO TIN NI KA BAY E FOS KO YAM’

5. Uw rogon nib thil e fos ko yam’ ni tay Jesus ko fos ko yam’ ni tay boch e girdi’ u m’on riy?

⁵ Manang e pi apostal ni fas ko yam’ ni tay Jesus e ba thil ko piin nni fasegrad u m’on riy. Ya piin nni fasegrad ko yam’ u m’on ni kan faseg Jesus e dowef rorad e bod downgin e girdi’, machane munmun mu kur m’ad bayay. Ma Jesus e kan faseg nga reb e dowef ni dabiyog ni ngan guy maku dabiyog ni nge kireb. (Mu beeg e Acts 13:34.) I yoloy Peter murung’agen Jesus, “nli’ ngem’, machane me fos.” Ya bin riyul’ riy e “ke yan nga tharmiy ke yan i par nga ba’ ni mat’aw rok Got, ni ir e be gagiyegnag urngin e engel nge piin ni yad bay u tharmiy ni yad be tay murung’agen ban’en nge piin ni yad be yog e thin.” (1 Pet. 3:18-22) Pi yam’ nni fasegrad u m’on ni kan faseg Jesus e goo ba manigil, machane kab gel feni fel’ fare fos ko yam’ ni tay Jesus.

6. Mang rogon fare fas ko yam’ ni tay Jesus ngak pi gachalpen?

⁶ Bay ban’en ni rin’ fare fas ko yam’ ni tay Jesus ngak pi gachalpen. Gathi ka bay Jesus nib yam’ ni bod rogon ni be lemnag e pi toogor rok. Ya ke fas ni ke mang reb e kan nib gel gelngin, ni dariy be’ ni rayog ni nge gafgownag. Fare fas ko yam’ ni tay Jesus e be micheg ni ir Fak Got, ma bochan ni ke nang pi gachalpen e re n’ey ma ke yag ni ngar felfelan’gad. Ma aram fan ni darur rusgad. Fare fas ko yam’ ni tay Jesus e rib ga’ fan nga rogon ni nge lebguy Jehovah e tin nib m’agan’ ngay, maku bay rogon ko fare thin nib fel’ ni i machibnag pi gachalpen.

7. Mang e be rin’ Jesus e ngiyal’ ney, ma mang boch e deer nrayog ni ngad fithed?

⁷ Gadad e pi tapigpig rok Jehovah e gad manang ni Jesus e gathi kemus ni be’ nib gilbuguwan. Ya ngiyal’ ney e bay nib fos, ma ir e be gagiyegnag fare maruwel ni machib ni yibe rin’ u roy u fayleng. Bochan ni ir e en ni ke mel’eg Got ni nge gagiyegnag Gil’ilungun u tharmiy, ma dabki n’uw nap’an ma ra chuweg e tin nib kireb, me paradisnag e fayleng ya nge yag ni nge par e girdi’ riy ni manemus. (Luke 23:43) Dariy reb e pi n’ey nra lebug ni faanra dan faseg Jesus ko yam’. Ere, uw rogon ni nge mich u wan’dad ni kan faseg Jesus ko yam’? Ma mang rogon ngodad?

KE DAG JEHOVAH NIB GEL GELNGIN KO YAM’

8, 9. (a) Mang fan ni yog fapi tayugang’ ko Jew ni nge yan e salthaw ngar matanagiyed fare low ko yam’ rok Jesus? (b) Mang e buch u nap’an ni yan fa gali ppin ko fare low ko yam’?

⁸ Tomuren nni li’ Jesus nge yim’ me yan e pi tolang ko prist nge pi Farise ngak Pilate me lungurad: “Keb ngan’mad nnap’an ni kab fos fare talifith l’ugun me gaar, ‘Ra gaman dalip e rran mi ni fasegeg ko yam’.’ Ere mog nga ni yan ni matangiy e low rok nge yan i mada’ ko chirofen ni nge man e dalip e rran ngay, nge dabiyog ni yan pi gachalpen ra iringed ma rogned ko girdi’ ni kan faseg ko yam’. Ya bug ney e thin nde riyul’ e kab gel e kireb riy ko fa bug nem ni yog ko som’on.” Me gaar Pilate ngorad: “Mfeked girdien e matanag; ngam marod mmatanagiyed e re low nem nib fel’ rogon.” Ma ireram e n’en nrin’ed.​—Matt. 27:62-66.

⁹ Kan tay downgin Jesus nga lan ba low min ning ba gaf i malang ngay nib ga’. Aram e gin ni baadag fapi tayugang’ nu Jew ni nge par riy ni dariy n’umngin nap’an. Machane ba thil e n’en ni ke lemnag Jehovah ngak. Tomuren dalip e rran me yan Maria Magdalene nge ku reb e ppin ni Maria fithingan ko fare low ko yam’, ma kar piriegew ni kan lulubiy fare gaf i malang ke chuw u langan fare low, ma bay ba engel ni ke par nga daken. Me yog fare engel ngak fa gali ppin ni ngar changargow nga lan fare low ngar guyew ni daki moy Jesus u rom. I yog fare engel ni gaar: “Daki moy u roy; ya ke fos ko yam’.” (Matt. 28:1-6) Ke fos Jesus ko yam’!

10. Mang e mich riy ni weliy Paul ni kan faseg Jesus ko yam’?

¹⁰ Pi n’en ni buch u lan 40 e rran e ke micheg nriyul’ ni kan faseg Jesus ko yam’. I yol apostal Paul ngak piyu Korinth ni be weliy murung’agen e n’en ni buch ni gaar: “Kug pi’ ngomed e tin ni yog ngog ni ir e ba th’abi ga’ fan, ni aram e Kristus e yim’ ni bochan e denen rodad, ni bod rogon ni ba’ ni kan yoloy u lan e babyor nib thothup; min k’eyag me faseg Got ko yam’ ko chirofen ni gaman e dalip fen ngay, ni bod rogon ni ba’ ni kan yoloy u lan e babyor nib thothup; me m’ug ngak Peter, nge mu’ me m’ug ngak fa ragag nge l’agruw i apostal. Me m’ug ngak pi gachalpen u taab ngiyal’ ni yad ba pag e lal mir’ay, ni oren i yad e ka yad ba fos e chiney, ma boch i yad e ke yim’. Me m’ug ngak James, nge mu’ mfini m’ug ngak urngin e pi apostal. Me gag e tomur ni ki m’ug ngog - ni yugu aram rogon ni gu bod be’ nni gargelnag ndawori taw nga pulan.”​—1 Kor. 15:3-8.

FAN NI GADAD MANANG NI KAN FASEG JESUS KO YAM’

11. Uw rogon ma fos ko yam’ ni tay Jesus e ke buch nrogon ni “kan yoloy u lan e babyor nib thothup”?

¹¹ Reb i fan ni gadad manang ni riyul’ ni kan faseg Jesus ko yam’ e bochan ni buch e re n’em nib puluw ko n’en ni “kan yoloy u lan e babyor nib thothup.” Thin rok Got e bay riy murung’agen e fos ko yam’ ni tay Jesus. Ni bod ni yoloy David ni dabi pag e ‘en nib t’uf rok’ nge par u lan fare Low ko yam’. (Mu beeg e Psalm 16:10.) Rofen ni Pentekost 33 C.E., me weliy apostal Peter murung’agen Jesus ni bay ko re verse ney ni gaar: “I David e guy e n’en ni bayi rin’ Got, ma aram me weliy murung’agen e fos ko yam’ ni bayi tay fare Messiah ni faani gaar: ‘Da nn’ag nge par u tafen e yam’, ma downgin e de mel.’”​—Acts 2:23-27, 31.

12. Chon mini’ e kar guyed Jesus ni kan faseg ko yam’?

¹² Bin l’agruw i fan ni gadad manang ni kan faseg Jesus ko yam’ e bochan ni boor e girdi’ ni ka rogned ni kar guyed. U nap’an 40 e rran, me m’ug Jesus ngak boch i gachalpen u lan fare milay’ ni bay fare low nni chibgiliy riy, ma ki m’ug ngak boch i gachalpen u daken fare pa’ i kanawo’ ni yan nga Emmaus nge ku yu yang. (Luke 24:13-15) Yu ngiyal’ i n’em e i non Jesus ngak e girdi’ ni be’ nge be’ nib muun Peter ngay, ma ki non ngak yu ulung i girdi’. Maku bay ba ngiyal’ ni m’ug ngak boor ko 500 e girdi’! Dabiyog ni nga dogned ni de riyul’ ni kan faseg Jesus ko yam’, ya boor e girdi’ ni kar guyed ni kan faseg ko yam’.

13. Bochan nib pasig pi gachalpen Jesus ko machib, ma uw rogon ni be m’ug riy nib mich u wan’rad ni kan faseg Jesus ko yam’?

¹³ Bin dalip i fan ni gadad manang ni kan faseg Jesus ko yam’ e bochan nrib pasig pi gachalpen i machibnag murung’agen. Bochan ni ur weliyed u fithik’ e pasig ni kar guyed Jesus ni ke fos ko yam’ ma aram fan ni un togopuluw ngorad, min gafgownagrad, ma yibe thang e fan rorad. Faanra dan faseg Jesus ko yam’, ma gur ra tay Peter e yafos rok nga thatharen e riya’ ni bochan e nge weliy murung’agen Kristus ni kan faseg ko yam’ ngak fapi tayugang’ ko teliw ni dubrad daken Jesus mar thanged e fan rok? Re n’ey e bochan nib mudugil u wan’ Peter nge tin ni ka bay pi gachalpen Jesus ni bay Jesus nib fos, ma ir e be pow’iy fare maruwel ni baadag Got ni ngan mu’nag. Maku fos ko yam’ ni tay Jesus e be micheg ngak pi gachalpen ni ku yira fasegrad ko yam’. Ni bod rogon Stephen ni ke yim’ nib mich u wan’ ni bay e fos ko yam’.​—Acts 7:55-60.

14. Mang fan nib mich u wan’um ni bay Jesus e ngiyal’ ney nib fos?

¹⁴ Bin aningeg i fan ni gadad manang ni kan faseg Jesus ko yam’ e bochan ni bay e mich riy ni ir e be gagiyeg e ngiyal’ ney nib Pilung, maku ir Lolugen fare ulung ni Kristiano. Angin ni ke yib riy e be mon’og e ulung ni Kristiano. Gur, rayog ni nge buch e re n’ey ni faanra de fos Jesus ko yam’? Bin riyul’ riy, e sana dab da nanged murung’agen ni faanra dan faseg ko yam’. Machane, bay fan ni nge mich u wan’dad ni bay Jesus e ngiyal’ ney nib fos ni be pow’iydad u nap’an ni gad be machibnag fare thin nib fel’ u ga’ngin yang e fayleng.

ANGIN E FOS KO YAM’ NI TAY JESUS NGODAD

15. Mang fan ni be ayuwegdad e fos ko yam’ ni tay Jesus ni nge dab da rusgad ni ngad machibgad?

¹⁵ Fos ko yam’ ni tay Kristus e be ayuwegdad ni dab kud rusgad ni ngad machibgad. Ke gaman 2,000 e duw ni be fanay e pi toogor rok Got boor e kanawo’ ni ngar taleged fare maruwel ni machib ni bod rogon be’ ni immoy ko tin riyul’ me chel nge togopluw ngay, maku bay e piin ni yad ma moningnag e tin riyul’, nge piin ni yad ma cham ko girdi’ rok Jehovah, nge pi am ni yad be guy rogon ni ngar taleged e Pi Mich Rok Jehovah ko machib, maku bay e piin ni yibe gafgownagrad, nge piin ni yibe li’rad ngar m’ad. Machane, ‘dariy ba talin e cham nni ngongliy nra maad’ad ngodad’ nrayog ni nge talegdad ko machib ni gad be tay nge rogon ni ngad ayuweged e girdi’ ni ngar bad ko tin riyul’. (Isa. 54:17) Darud rusgad ngak e piin ni be fanayrad Satan ni ngar magawonnaged gadad. Bay Jesus ni be ayuwegdad ni bod rogon ni ke micheg. (Matt. 28:20) Rayog ni nge pagan’dad, ni demtrug ko mang e ra rin’ e pi toogor rodad, ma dabiyog ni ngar taleged e maruwel ni gad be rin’!

16, 17. (a) Uw rogon ma fare fas ko yam’ ni tay Jesus e ke micheg nib riyul’ e tin ni i fil ko girdi’? (b) Rogon ni bay ko John 11:25 e mang e ke pi’ Got ngak Jesus?

¹⁶ Fos ko yam’ ni tay Jesus e be tamilangnag nib riyul’ e pi n’en ni ke fil. I yoloy Paul ni faanra dan faseg Kristus ko yam’, ma michan’ ko piin Kristiano nge machib ni yad be tay e ra yan i aw nib m’ay fan. Be’ ni ma fil e Bible e gaar: “Faanra dan faseg Kristus ko yam’, . . . Ma kan bannag e piin ni Kristiano.” Faanra de fos Jesus ko yam’, ma fa aningeg i Gospel e kemus ni bogi chep u murung’agen be’ nib moon nib fel’ e ngongol rok mab gonop, ni chel e toogor rok ngar lied nge yim’. Machane bochan ni fos Kristus ko yam’, ma ke m’ug nib riyul’ e pi n’en ni i fil, nib muun ngay e n’en ni weliy u murung’agen e gabul nge langlath.​—Mu beeg e 1 Korinth 15:14, 15, 20.

¹⁷ I yog Jesus ni gaar: “I gag owchen e fos ko yam’ nge yafos. Yigu ra ke yim’ be’ ni gub mich u wan’ ma ra fos.” (John 11:25) Re thin nem ni yog e ba mudugil nra lebug. Gathi kemus ni ke pi’ Jehovah gelngin Jesus ni nge sulweg e yafos ngak e piin ni athap rorad e nga ranod nga tharmiy, machane ku ra faseg bokum bilyon e girdi’ ni athap rorad e ngar pared u fayleng ni dariy n’umngin nap’an. Fare maligach ni pi’ Jesus nge fas ko yam’ ni ke tay e be yip’ fan nra boch nga m’on ma dakuriy be’ ni ku ra yim’. Re tamilangan’ ney e ra pi’ gelngim nge yag nim k’adan’um u nap’an nra yib e skeng ngom nge mada’ ko yam’.

18. Mang e be micheg e fos ko yam’ ni tay Jesus?

¹⁸ Fos ko yam’ ni tay Jesus e be pi’ e pagan’ ngodad nra pufthinnag Jehovah e girdi’ nrogon nib puluw ko motochiyel rok. I non Paul ngak ba ulung i girdi’ ni pumoon nge ppin u Athens kakrom ni gaar: “Ke turguy [Got] reb e rran ni ir e nge pufthinnag riy e fayleng ni polo’ nrogon nib mat’aw, ni nge rin’ u daken be’ nib moon ni ir e ke dugliy; ni ke dag e mich ko re bugithin ney ngak urngin e girdi’, ni fan e ke faseg e re moon nem ko yam’!” (Acts 17:31) Arrogon, ke dugliy Got Jesus ni ir e Tapuf Oloboch, ma rayog ni nge pagan’dad nra pufthinnag e girdi’ u fithik’ e t’ufeg.​—Mu beeg e Isaiah 11:2-4.

19. Mang angin nra yib ngodad ni faanra ba mich u wan’dad ni kan faseg Kristus ko yam’?

¹⁹ Bochan nib mich u wan’dad e fos ko yam’ ni tay Jesus ma be pi’ e athamgil nga lanin’dad ni ngad rin’ed e tin nib m’agan’ Got ngay. Faanra de pi’ Jesus e yafos rok nib maligach maku de fos ko yam’, maku gadad be par ni gad e sib ko denen nge yam’. (Rom. 5:12; 6:23) Faanra dan faseg Jesus ko yam’, ma sana rayog ni nge lungudad: “Mmarod nguud abichgad ma gadad be garbod, ya bayi gabul ma kad m’ad.” (1 Kor. 15:32) Machane, darud tiyan’dad ko pi n’en ni bay ko re fayleng ney. Ya ba ga’ fan u wan’dad fare athap ko fos ko yam’, ma bay fan ni ngad folgad ko urngin e pi n’en ni yog Jehovah ni ngad rin’ed.

20. Uw rogon ma fare fos ko yam’ ni tay Jesus e be micheg feni rib gel gelngin Got?

²⁰ Fos ko yam’ ni tay Kristus e be m’ug riy feni rib gel gelngin Jehovah, ni ir e “ra tow’athnag e piin ni yad be gayiy Got.” (Heb. 11:6) I fanay Jehovah gelngin nge gonop rok ya nge yag ni nge faseg Jesus ko yam’ me yan nga tharmiy ni dabki yim’ biid! Ere bin riyul’ riy e ke dag Got ni rayog ni nge rin’ gubin ban’en ni Ke micheg. Re n’ey e kub muun ngay fare yiiy ni micheg Got ni u daken “fak” ma ra tamilangnag ni ir e bay mat’awun nth’abi tolang ni nge gagiyeg. Faanra nge lebug e n’en ni ke micheg Got mab t’uf ni nge yim’ Jesus ma ngkun faseg ko yam’.​—Gen. 3:15.

21. Mang angin ngom fare athap ko fos ko yam’?

²¹ Ere, ngad pininged e magar ku Jehovah ni ir e ke pi’ fare athap ko fos ko yam’ ngodad. Thin nu Bible e be pi’ e pagan’ ngodad ni be gaar: “Chiney e keb i par tafen Got nga fithik’ e girdi’! Bayi par rorad, ma bay ra manged girdien. Mi Got e bay i par rorad, mi ir e bayi mang Got rorad. Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.” Re athap ney nrib fel’ e ka nog ngak apostal John ni nge yoloy ni gaar: “Mu yoloy e re n’ey, ya pi thin ney e ba riyul’ ma rayog ni ngan pagan’uy ngay.” Mini’ e ke yog e re thin nem ngak John? Ke yib u daken Jesus Kristus ni kan faseg ko yam’.​—Rev. 1:1; 21:3-5.