Thingari Thothup e Ngongol Rodad

1, 2. (a) Ba miti mang ngongol e baadag Got ni nga i rin’ e pi tapigpig rok? (b) Mang boch e deer ni gad ra weliy e fulweg riy ko re article ney?

I THAGTHAGNAG Jehovah nga laniyan’ apostal Peter ni nge sul nga daken e thin ni bay ko fare babyor ni Levitikus, me weliy feni ga’ fan ni nge par e piin Kristiano ni yad ba thothup u fithik’ urngin e pi n’en ni yad ma rin’. (Mu beeg e 1 Peter 1:14-16.) Jehovah ni ir Faen nib “thothup” e baadag ni nge par e piin ni kan dugliyrad nge “yugu boch e saf” ni yad ba thothup u fithik’ urngin e pi n’en ni yad ma rin’, ma gathi kemus ni boch riy.​—John 10:16.

² Fapi kenggin e motochiyel ni bay ko fare babyor ni Levitikus e ra yib angin ngodad, ma faan gad ra fol ko pi n’en ni gad ra fil riy ma ra ayuwegdad ni ngaud pared ni gad ba thothup u fithik’ urngin e pi n’en ni gad ma rin’. Ere, chiney e ngad weliyed e pi deer ni baaray ni gaar: Susun ni nge uw rogon u wan’dad ni faanra kad togopuluwgad ko thin rok Got u nap’an ni kan towasariydad? Mang e be fil fare babyor ni Levitikus ngodad u murung’agen rogon ni ngad ted fan mat’awun Jehovah ni nge gagiyeg? Mang e rayog ni ngad filed ko pi maligach ni un pi’ kakrom?

MU KOL AYUW NDAB MU RIN’ BAN’EN NIB KIREB U NAP’AN NI KAN TOWASARIYEM

3, 4. (a) Mang fan nthingari guy e pi Kristiano rogon ndab ra togopuluwgad ko pi motochiyel nge pi kenggin e motochiyel rok Got u nap’an ni kan towasariyrad? (b) Mang fan nsusun e dab ud fulweged taban e kireb ara ud ted e kireb u lanin’dad?

³ Faanra ngad fel’gad u wan’ Jehovah, ma thingar ud folgad ko pi motochiyel rok nge pi kenggin e motochiyel rok. Dariy ba ngiyal’ ni ngad togopuluwgad nga reb e pi n’ey ni ki mada’ ko ngiyal’ ni yibe towasariydad. Yugu aram rogon nda kud moyed u tan fare Motochiyel rok Moses, machane be ayuwegdad e re motochiyel ney ni ngad nanged e pi n’en ni baadag Got nge pi n’en ndabun. Bod ni, yog ngak piyu Israel ni gaar: “Dabi guy be’ rogon ni nge fulweg taban e kireb ngak be’, ara i par ni be fanenikay faanem, ya nge par nib t’uf yugu boch e girdi’ rok ni bod ir nib t’uf ir rok. I gag e Somol.”​—Lev. 19:18.

⁴ Dabun Jehovah ni ngad fulweged taban e kireb ara ud ted e kireb u lanin’dad. (Rom. 12:19) Ra felfelan’ Moonyan’ ni ngad togopuluwgad ko pi motochiyel ara pi kenggin e motochiyel rok Jehovah ma gad darifannag. Mus ni faanra ke rin’ be’ ban’en ni ke kirebnag lanin’dad, ma susun ndab da paged e damumuw ni nge mang ir e gagiyegnagdad. Be yog e Bible ni gad bod bogi “rume’ ni but’,” ni bay e machaf u langgin. Ma pi machaf nem e be yip’ fan e machib ni gad ma tay. (2 Kor. 4:1, 7) De fel’ ni ngaud pared ni gad ba damumuw ni bod rogon nde fel’ ni ngan puog e acid nga lan ba rume’ ni but’!

5. Mang e rayog ni ngad filed rok Aron nge n’en ni buch ko fa gal pagel ni fak ni faani li’row Got ngar m’ow? (Mu guy e sasing ni bay u tabolngin e re article ney.)

⁵ Gad ra beeg e Levitikus 10:1-11 ma be weliy murung’agen ban’en ni buch u lan e tabinaw rok Aron ni k’aring e kireban’ ngorad nib gel. I pag Jehovah e nifiy u tharmiy nge urfiy fa gal pagel ni fak Aron ni ka nog Nadab nge Abihu ngorow u nap’an ni yow bay u tabernacle. Riyul’ ni kan skengnag e michan’ rok Aron nge chon e tabinaw rok ni bochan e nog ngorad ndab ra yornaged e gal pagel nem! Me gur, ga ma guy rogon ni ngam par ni gab thothup ni aram e damur ma chagil ko girdi’ u lan e tabinaw rom ara boch e girdi’ ni kan tharbograd ko ulung, fa danga’?​—Mu beeg e 1 Korinth 5:11.

6, 7. (a) Mang boch ban’en nthingar da lemnaged u m’on ni ngad dugliyed ko ngad uned nga reb e madnom ko mabgol ni yira tay u galesiya fa danga’? (Mu guy e footnote.) (b) Uw rogon nrayog ni ngad weliyed ngak reb e girdi’ rodad ni gathi ir reb e Pi Mich fan ndab da uned nga reb e madnom ko mabgol ni yira tay u galesiya?

⁶ Sana dab da mada’naged e skeng ni bod rogon e skeng ni mada’nag Aron nge chon e tabinaw rok. Machane, uw rogon ni faanra ka nog ngodad ni ngad uned nga reb e madnom ko mabgol rok reb e girdi’ rodad ni gathi ir reb e Pi Mich ni ngan tay u reb e galesiya? Dariy ba motochiyel u Bible ni be yog ndabiyog ni ngad uned ko re n’ey, machane bay boch i kenggin e motochiyel nrayog ni nge pow’iydad u rogon ni ngad dugliyed e n’en ni ngad rin’ed.a

⁷ Faanra kad dugliyed ni ngad pared ni gad ba thothup ma gad rin’ e tin nib m’agan’ Jehovah ngay, ma rayog ni nge balyangan’ chon e tabinaw rodad ni gathi yad boch e Pi Mich. (1 Pet. 4:3, 4) Yugu aram rogon, ma dubdad ni nga dogned ban’en nra kirebnag lanin’rad. Ere, ba fel’ ni ngad nonad ngorad u fithik’ e sumunguy, ma gad yog e thin nib tamilang ngorad. Machane, sana rayog ni ngad rin’ed e re n’ey u m’on ko rofen ni ngan tay e re madnom nem. Rayog ni ngad pininged e magar ngorad ni kar pininged gadad ni ngad uned ko re madnom ko mabgol nem. Ngemu’, ma gad yog ngorad ni dubdad ni ngad k’aringed e tamra’ ngorad nge girdi’ ni kar uned ngaram ni bochan e bay boch ban’en ni yira rin’ u nap’an e re madnom nem ni bay rogon ko teliw ndab da uned ngay, ma gad baadag ni ngar felfelan’gad ko re madnom nem ni yira tay. Ireray reb e kanawo’ nrayog ni ngad siyeged ndab da rin’ed ban’en nib togopuluw ko michan’ rodad.

NGAM TAYFAN MAT’AWUN E GAGIYEG ROK JEHOVAH

8. Uw rogon ni be tamilangnag fare babyor ni Levitikus ni Jehovah e ir e bay mat’awun ni nge gagiyegnag urngin ban’en?

⁸ Be tamilangnag fare babyor ni Levitikus ni Jehovah e ir e bay mat’awun ni nge gagiyegnag urngin ban’en. Fapi motochiyel ni bay murung’agen ko Levitikus e ba pag 30 yay ni ka nog riy ni Jehovah e ir e ke yib rok. Manang Moses e re n’ey me rin’ e n’en ni tay Jehovah chilen ngak ni nge rin’. (Lev. 8:4, 5) Ku arrogodad ni gubin ngiyal’ ni susun e ngaud rin’ed e n’en ni baadag Jehovah ni ngad rin’ed ni ir e Got rodad Nth’abi Tolang. Ma ayuwegdad e ulung rok Got ni ngad rin’ed e re n’ey. Machane, rayog ni ngan waliydad ni ngad rin’ed ban’en nde puluw u nap’an ni gad bay u bang ni goo gadad ni bod rogon e n’en ni buch rok Jesus u nap’an ni immoy u daken e ted ni goo ir. (Luke 4:1-13) Faanra gad be tayfan mat’awun Got ni nge gagiyegnag urngin ban’en mab pagan’dad ngak, ma dariy be’ nrayog ni nge k’aringdad ni ngad rin’ed ban’en nib kireb.​—Prov. 29:25.

9. Mang fan ni yima fanenikay e girdi’ rok Got ni yad bay u ga’ngin yang e fayleng?

⁹ Bochan ni gad pi gachalpen Kristus ma gadad e Pi Mich Rok Jehovah, ma gad ma mada’nag e togopuluw ko yungi n’en ni gad ma par riy u fayleng i yan. Gad manang nra i buch e pi n’ey, ya yog Jesus ngak pi gachalpen ni gaar: “Bayi kolmed e girdi’ ngar pied gimed ngan gechignagmed, ma bay nthang e fan romed. Ma urngin e girdi’ ni bay ra fanenikayed gimed ni bochag.” (Matt. 24:9) Machane, yugu aram rogon ni yima fanenikaydad, ma ka gad ma athamgil ni ngad ululgad i machibnag murung’agen Gil’ilungun Got ma gad par ni gad ba thothup u p’eowchen Jehovah. Mang fan ni ma fanenikaydad e girdi’ ni yugu aram rogon ni gad boch e girdi’ ni gad ba yul’yul’, ma gad ba beech, maku gad ma fol ko motochiyel? (Rom. 13:1-7) Bochan ni kad ted ni Jehovah e ir e Got rodad Nth’abi Tolang! Kemus ni “yigo ir” e gad ma pigpig ngak ma darud togopuluwgad ko pi motochiyel rok nge pi kenggin e motochiyel rok nib mat’aw.​—Matt. 4:10.

10. Mang e buch rok reb e walag nde yag ni nge par nib yul’yul’ u nap’an nni towasariy ni nge un ko salthaw?

¹⁰ Ku reb riy e, ‘gathi gadad’ e girdi’ nu fayleng. Ere, aram fan ndarud uned ko mahl nge pi ngongolen e am nib togopuluw ko pi motochiyel rok Got. (Mu beeg e John 15:18-21; Isaiah 2:4.) Bay boch e girdi’ ni kar ognaged yad ni ngar pigpiggad ngak Got ni kar uned ko pi ngongol ney u nap’an ni kan towasariyrad. Boor ko pi girdi’ ney e kar kalgadngan’rad, ke yag ni ngki fel’ bayay e tha’ u thilrad Jehovah. (Ps. 51:17) Machane, bay in i yad ndar kalgadngan’rad. Bod nnap’an e Bin L’agruw e Mahl ko Fayleng, ma immoy 160 e walag nib lich e duw rorad ko 45 ni ka non’rad nga kalbus u Hungary ndariy ban’en ni kar bucheged. Ni kunuyrad nga reb e binaw, ngemu’ mi nog ngorad ni ngar uned ko salthaw. Tin baaram e walag ni yad ba yul’yul’ e ra pired ni yad ba mudugil mar siyeged ni ngar uned ko salthaw. Machane immoy mereb i yad ni m’agan’rad ngay ni ngar uned ko salthaw mar feked e mad ko salthaw nni pi’ ngorad. L’agruw e duw nga tomuren, ma bay bagayad ko fapi walag ni un ko salthaw nni dugliy ni nge un i li’ fapi walag nra pired ni yad ba yul’yul’ ngar m’ad. Ma bay bagayad u fithik’ fapi walag nra pared ni yad ba yul’yul’ ni yow ngayal! Machane, tomur riy ma da kun li’ fapi walag ngar m’ad.

MU PI’ E TIN TH’ABI FEL’ ROM NGAK JEHOVAH

11, 12. Mang e rayog ni ngad filed u rogon ni yog Jehovah ni nga i pi’ piyu Israel e maligach kakrom?

¹¹ Rogon ni bay ko fare Motochiyel rok Moses e bay e re miti maligach nthingari ognag piyu Israel. (Lev. 9:1-4, 15-21) Maligach ni ngan pi’ e susun ndariy bang riy nib kireb ni bochan e be dag yaan e maligach nra pi’ Jesus ndariy bang riy nib kireb. Maku reb e, ra ba mit e pi maligach nem ma rogon ni ngan pi’. Bod rogon e maligach ni nge pi’ reb e ppin ni ka fini gargel. Be gaar e Levitikus 12:6, BT: “Nap’an nra gaman nap’an ni aram e ke arow fare pin ni demtrug ko ba pagel fak fa ba pin, ma thingari fek ba fak e saf ni taareb e duw rok i yan ko prist nga langan e garog ko fare tent u p’eowchen Somol ni ngan fanay ko maligach ni muuruf nge reb e bulogol ara ba dove ni maligach ko denen.” Yugu aram rogon nrib mudugil e n’en ni ke yog Jehovah ni ngan rin’, machane ku be tamilangnag e re Motochiyel nem ni ir reb e Got ni ma t’ufegey ma manang rarogon e girdi’ nge tin rayog rorad. Ya faanra dabiyog ko fare pin ni nge pi’ e saf ni maligach, ma rayog ni nge ognag l’agruw e bulogol ara l’agruw e dove. (Lev. 12:8) Yugu aram rogon nib gafgow fare pin, machane ba t’uf rok Jehovah mab ga’ fan u wan’, ma taareb rogon ni ma lemnagrad e tin ni baaram e girdi’ nrayog rorad ni ngar ognaged boch e maligach nib tolang puluwon. Ere, mang e rayog ni ngad filed ko re n’ey?

¹² I pi’ apostal Paul e athamgil nga laniyan’ e piin taareb e michan’ rorad ni ngar ognaged e ‘maligach rorad’ ngak Got ni ngar pininged e sorok ngak. (Heb. 13:15) Thingar da weliyed murung’agen fithingan Jehovah nib thothup nga dap’il’ugundad. Pi walag ni yad bbiling e yad ma non u pa’rad. Ma aram rogon ni yad ma pining e sorok ngak Got. Pi Kristiano ni yug yad ma par u tabinaw rorad ndabiyog ni ngar uned ko yan nga bang e yad ma yoloy e babyor ngar pied ngak boch e girdi’, ma yad ma machib u telefon, ma yad ma machibnag e piin ni ma ayuwegrad nge piin ni yad ma yib nga tabinaw rorad ni ngar guyed yad. N’en ni gad ma rin’ ni aram e gad ma pining e sorok nga fithingan Jehovah, ma gad be machibnag fare thin nib fel’ e be yan u rarogon fithik’ i dowdad nge tin nrayog rodad. Machane, thingar da rin’ed urngin e pi n’ey u rogon nrayog rodad.​—Rom. 12:1; 2 Tim. 2:15.

13. Mang fan ni susun e ngad yoloyed nga but’ urngin e awa ni gad ma machib riy?

¹³ Bochan nib t’uf Got rodad, ma aram fan nib m’agan’dad ngay ni ngad pied e maligach rodad ngak ni aram e ngad pininged e sorok ngak. (Matt. 22:37, 38) Machane, susun ni nge uw rogon u wan’dad e n’en ni yima yog ngodad ni aram e ngaud yoloyed urngin e awa ni gad ma machib riy nga but’? Report ni gad ma pi’ u reb e pul ngu reb e ba l’ag rogon ko yul’yul’ rodad ngak Got. (2 Pet. 1:7) Machane, de puluw ni ngad lemnaged nthingar da yoornag e awa rodad ko machib ni bochan e ngad pied e report rodad ma boor e awa ni kad ted ngay. Aram fan ni faanra bay reb e walag ni ma par u reb e nursing home ara gin ni yima ayuweg e piin pilibthir riy, ara dabkiyog ni nga i un ko machib ni gubin ngiyal’ ni bochan e ke pilibthir ara ke m’ar, ma rayog ni kemus ni 15 e minit e nga i yoloy ko report rok u gubin e pul. Rib ga’ fan e chuuw i minit ney u wan’ Jehovah ya manang ni ireray e chuuw nrayog ni nge pi’ e re walag nem ni fan Ngak. Manang Jehovah nib t’uf rok e pi walag ney ma kub ga’ fan u wan’rad e tow’ath ni bay rorad ni yad boch e Pi Mich Rok. Pi tapigpig rok Jehovah ndabkiyog ni ngar rin’ed boor ban’en ni fan ngak Got e ku rayog ni ngaur pied e report rorad ni bod rogon fapi ppin nu Israel ni yad ba gafgow ma dabiyog ni ngar pied e maligach nib tolang puluwon. Ma report rodad ni gad ma pi’ ni fan ko machib e yima puthuy ko report ni ku ma pi’ e tin ni ka bay e walag u ga’ngin yang e fayleng. Re n’ey e ma ayuweg e ulung rodad u rogon ni ngar yarmiyed boch ban’en ni fan ko machib ni gad ma tay. Ere, aram fan ni yima yog ngodad ni ngad yoloyed nga but’ urngin e awa ni gad ma machib riy.

RAROGON E FOL BIBLE NI GAD MA TAY NGE MALIGACH NI GAD MA PI’ NI NGE N’UF GOT

14. Mu weliy fan nib fel’ ni ngad fal’eged i lemnag rogon e fol Bible ni gad ma tay.

¹⁴ Chiney ni kad filed e pi thin ney ko Levitikus, e sana be lungum u wan’um, ‘Ka fin gu nang fan ni kan uneg e re babyor ney nga lan e Thin rok Got ni kan thagthagnag.’ (2 Tim. 3:16) Sana chiney e ka rim dugliy u wan’um ni ngaum par ni gab thothup, ni gathi bochan e baadag Jehovah ni ngaum par ni gab thothup, machane bochan e bay rogon ni ngam rin’ e tin nib m’agan’ ngay. Sana n’en ni kam fil u murung’agen e Levitikus ko gal article ney e ke ayuwegem ni ngam adag ni ngkum fal’eg i fil boch e machib u Bible nib fel’ rogon. (Mu beeg e Proverbs 2:1-5.) Mu yibilay mag fal’eg i lemnag rarogon e fol Bible ni ga ma tay. Ya dariy e maruwar riy ni ga baadag ni nge fel’ e maligach ni ga be pi’ u wan’ Jehovah. Ba ga’ ni ga ma pag e pi kachido u TV, nge video games, nge gosgos, ara nochi ban’en ni ga baadag ni ngam rin’ ni nge talegnem ndab mu mon’og ko tirok Got ban’en, fa danga’? Faanra aray rogon, ma sana ba fel’ ni ngam fal’eg i lemnag e thin rok apostal Paul ni bay ko fare babyor ni Hebrews.

15, 16. Mang fan nib tamilang e thin ni yog Paul ngak e pi Kristiano ni Hebrew?

¹⁵ Ba tamilang e thin ni yog Paul u nap’an ni non ngak e pi Kristiano ni Hebrew. (Mu beeg e Hebrews 5:7, 11-14.) I yog ngorad ni yad ‘ba sowath ni ngar nanged fan ban’en.’ Mang fan nrib tamilang e thin ni yog Paul ngorad? Ya bochan nib t’uf e pi walag nem rok ni bod rogon ni yad ba t’uf rok Jehovah, maku reb e ki magafan’ ngorad ni bochan e kar boded e bitir ni yigoo milik e ma unum, ara kemus ni pi kenggin e machib u Bible e ir e ke mit ngorad. Rib ga’ fan ni nge mit e pi kenggin e machib ngodad. Machane, kub t’uf rodad e “ggan nib el” ya nge yag nda mon’oggad ko tirok Got ban’en.

¹⁶ Machane, pi Kristiano ni Hebrew nem e dawor ra mon’oggad nrayog ni ngar filed ban’en ngak boch e girdi’, ya kab t’uf ni ngan fil boch ban’en ngorad. Mang fan? Ya da ur ked e “ggan nib el.” Ere, ngam fithem ni nge lungum: ‘Ba puluw rogon ni gu ma lemnag e tin baaray e machib u Bible nib toar fan, fa danga’? Gu ma fil e pi n’ey? Fa da gur ma fal’eg i fil e tin nib toar fan e machib u Bible maku da gur ma meybil? Faanra aray rogon, me ere gathi rarogon e fol Bible ni gu ma tay e aram kenggin e magawon rog?’ Gathi kemus ni ngaud machibnaged e girdi’ ya kub t’uf ni ngad filed e thin nu Bible ngorad ma gad ayuweged yad ni ngkur manged boch i gachalpen Jesus.​—Matt. 28:19, 20.

17, 18. (a) Mang fan ni susun e ngaud filed e tin nib toar fan e machib ni gubin ngiyal’? (b) Susun ni nge uw rogon u wan’dad fare n’em ni ngan unum buchuuw ban’en ni bay e alkul riy u m’on ni ngan yan ko muulung?

¹⁷ Bay yu ngiyal’ nde mom ni ngad filed e Bible rodad. Riyul’ nder ma n’igin Jehovah ni ngad lemnaged ni ngad filed e Bible rodad ni bochan e be magawonnagdad e nangan’ rodad. Ya demtrug ko ke n’uw nap’an ni gad be pigpig ngak Got fa danga’, ma susun ni ngad ululgad i fil e tin nib toar e machib u Bible. Faanra gad be guy rogon ni ngad pired ni gad ba thothup, ma rib ga’ fan ni ngad rin’ed e re n’ey.

¹⁸ Ra ngad pared ni gad ba thothup, ma thingar ud fal’eged i fil e Bible rodad nib fel’ rogon ma gad rin’ e tin ni baadag Got ni ngad rin’ed. Am lemnag fa gal pagel ni fak Aron ni ka nog Nadab nge Abihu ngorow. I li’row Got ngar m’ow ni bochan e ra afew e kol ni be yik’ nga langgin barba’ i ban’en ni ma par e nifiy u langgin ngar “piew nib maligach” ngak Got ni sana yow ba ching. (Lev. 10:1, 2, BT) Am lemnag e n’en ni yog Got ngak Aron. (Mu beeg e Levitikus 10:8-11.) Gur, re thin ney e be yip’ fan nib kireb ni ngad unumed ban’en ni bay e alkul riy u m’on ni nga darod ko muulung? Ga ra lemnag ma bin riyul’ riy e, da kud moyed u tan fare Motochiyel. (Rom. 10:4) Bay boch e nam ni ma garbod e pi walag riy nga buchuuw ban’en ni bay e alkul riy u nap’an ni yad be abich u m’on ni nga ranod ko muulung. Aningeg kap e wain ni un fanay u nap’an e madnom ko Paluk’af kakrom. Maku, nap’an ni tababnag Jesus fare Puguran ko yam’ ni tay, mu kur unumed pi gachalpen e wain ni be yip’ fan rachaen. (Matt. 26:27) Machane, be yog e Bible nib kireb e muun rrum nib pag rogon nge chingaw. (1 Kor. 6:10; 1 Tim. 3:8) Ma boor e Kristiano ndab ra unumed ban’en ni bay e alkul riy u m’on ni ngar rin’ed e pi n’en ni yima rin’ ni fan ko liyor rodad ngak Got ni bochan e dabi pagrad e nangan’ rorad ni ngar rin’ed e re n’ey. Machane, ra reb e nam ma rogon ni yima rin’ boch ban’en riy, ma n’en nib ga’ fan ni nge rin’ e piin Kristiano e ngar nanged e n’en nib thil u thilin e “tin fen Got ban’en” ara tin nib thothup nge tin nib kireb ya nge yag ni ur pared ni yad ba thothup u mit Got.

19. (a) Mang e dab da paged talin u murung’agen e fol Bible ni tabinaw nge fol Bible ni gad ma tay ni goo gadad? (b) Mang e kam dugliy u wan’um ni ngam rin’ ya nge yag ni um par ni gab thothup?

¹⁹ Ga ra fal’eg i gay e pi kenggin e motochiyel rok Got u lan e Thin rok, ma ga ra pirieg. Mu fanay boch ban’en ni gad ma fanay ni ngad gayed murung’agen boch ban’en riy ni fan e nge mon’og e fol Bible ni tabinaw ni gimed ma tay chon e tabinaw rom, nge fol Bible ni ga ma tay ni goo gur. Mu yoornag e tamilangan’ rom u murung’agen Jehovah nge tin nib m’agan’ ngay, ma ga chuchugur ngak. (Jas. 4:8) Mu meybil ngak Got ni bod rogon fare psalmist ni faani tang ni gaar: “Mu bing owcheg, ya nge yag ni gguy fel’ngin e tin ba rriyul’ u lan e motochiyel rom.” (Ps. 119:18, BT) Dariy ba ngiyal’ ni ngam togopuluw ko pi motochiyel nge pi kenggin e motochiyel rok Got ni bochan e kan towasariyem. Nge m’agan’um ngay ni ngaum fol rok Jehovah ni ir fare “Got nib thothup,” mu um machibnag fare “Thin Nib Fel’ ni yib rok Got” u fithik’ e pasig. (1 Pet. 1:15; Rom. 15:16) Mu par ni gab thothup ko ngiyal’ ney ko tin tomuren e rran ni kari gel e kireb u gubin ban’en. Manga yugu da athamgilgad ni gad gubin ngaud pared nib thothup e ngongol rodad mu ud ted fan mat’awun Jehovah Got ko gagiyeg.