Mu Folwok Rok e En Ke Micheg Nra Pi’ e Yafas Ndariy N’umngin Nap’an Ngodad
“Nguum pired ni gimed be folwok rok Got, ni bochan e gimed pi fak ni gimed ba t’uf rok.”—EFE. 5:1.
RAYOG NI NGAM WELIY?
Mang boch e kanawo’ ni i dag Jesus pi fel’ngin Jehovah riy?
Uw rogon ni nga i m’ug pi fel’ngin Got ko ngongol rodad ni bod rogon e t’ufeg?
Mang fan nthingar ud kol ayuwgad u rogon ni gad ma lem?
1. Mang reb e ban’en ni bay rodad ni ma ayuwegdad ni nge m’ug rarogon Got rodad?
KE SUNMIYDAD Jehovah nrayog ni ngad nanged rogon laniyan’ boch e girdi’ ni yugu aram rogon ndawori buch rodad e n’en ni ke buch rorad. (Mu beeg e Efesus 5:1, 2.) Ere, uw rogon nrayog ni ngad maruwelgad ko biney e tow’ath ni ke pi’ Got ngodad nib fel’ rogon? Ma mang fan nsusun e ngad kol ayuwgad ndab da paged e re n’ey ni nge magawonnagdad?
2. Mang e ma rin’ Jehovah u nap’an nra guy ni gad be gafgow?
2 Dariy e maruwar riy ni gad be felfelan’ ni bochan e ke micheg Got ni piin ni kan dugliyrad ni yad ba yul’yul’ e ra yag e yafas ndariy n’umngin nap’an ngorad u tharmiy, ma “yugu boch e saf” rok Jesus ni yad ba yul’yul’ e ra yag e yafas ndariy n’umngin nap’an ngorad u fayleng. (John 10:16; 17:3; 1 Kor. 15:53) Piin nra yag e yafas ndariy n’umngin nap’an ngorad u tharmiy ngu fayleng e dab kur mada’naged e pi gafgow ni be mada’nag e girdi’ e ngiyal’ ney. Manang Jehovah gelngin e amith ni ma tay lanin’dad u nap’an ni gad ra mada’nag e gafgow e ngiyal’ ney. Bod ni manang gelngin e gafgow ni i tay piyu Israel u nap’an ni ur moyed u Egypt ni yad e sib kakrom. Arrogon, ‘rib tamilangan’ u gelngin e gafgow ni ur ted.’ (Ex. 3:7) Boch e chibog nga tomuren me rus e pi Jew ko togopuluw ni i tay e pi toogor rorad ngorad ni bochan e yad be guy rogon ni ngar toyed bayay e tempel rok Got. Machane, me yog Got ngorad ni gaar: “En nra math ngomed e ke math nga tiren marwag.” (Zek. 2:8, NW) Ri ma t’ufeg Jehovah e pi tapigpig rok, ma baadag ni nge ayuwegrad ni bod rogon ba matin nrib t’uf fak rok. (Isa. 49:15) Ere, rayog rok Jehovah ni nge nang rarogon laniyan’ e girdi’, maku arrogodad ni ki pi’ e biney e tow’ath ngodad.—Ps. 103:13, 14.
ROGON NI I FOLWOK JESUS U ROGON NI MA DAG GOT E T’UFEG
3. Mang e be dag ni Jesus e ir be’ ni ma runguy e girdi’?
3 Manang Jesus rogon e amith ni ma tay laniyan’ e girdi’, ni ki mada’ ngak e piin ni ur mada’naged boch e magawon ndawori mada’nag. Bod ni manang gelngin e gafgow ni i tay e girdi’ kakrom ni i bannagrad e pi tayugang’ ko teliw mu ur sunmiyed boor e motochiyel ni nga i fol e pi girdi’ nem riy ni gathi Got e ke yib rok. (Matt. 23:4; Mark 7:1-5; John 7:13) Yugu aram rogon nda i rus Jesus ko pi girdi’ nem maku da i yag ni ngaur bannaged, machane manang rogon laniyan’ e piin ni un gafgownagrad. Rib gel e kireban’ ni i tay u nap’an ni i guy gelngin e gafgow ni un tay ngorad. Aram fan nnap’an ni “guy e pi girdi’ nem ni aram urngirad, me taganan’ ngorad, ya kar pired ni ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad.” (Matt. 9:36) Jesus e bod e Chitamangin ni ma t’ufeg e girdi’ ma ma runguyrad.—Ps. 103:8.
4. Mang e rin’ Jesus ni bochan e i guy e girdi’ ni yad be gafgow?
4 I ayuweg Jesus e piin ni ur gafgowgad ni bochan e yad ba t’uf rok. Ir e en nrib fel’ rogon ni i m’ug rarogon e t’ufeg rok e Chitamangin ko ngongol rok. Immoy bayay nra milekaggad e pi apostal rok nga bangi ban’en nrib palog ni ngar machibgad. Kari aw parowrad ma ke t’uf ni nga ranod nga bang ni goo yad ngar toffangad. Machane, me guy Jesus ba ulung i girdi’ ni yad be sonnag. Yugu aram rogon ni kari aw parawon, machane manang nib t’uf ni ngan ayuwegrad. Ere, “tabab i machibnag boor ban’en ngorad.”—Mark 6:30, 31, 34.
ROGON NRAYOG NI NGAD FOLWOKGAD U ROGON NI MA DAG JEHOVAH E T’UFEG
5, 6. Ra nga i m’ug e t’ufeg rok Got rodad, ma uw rogon nthingar ud ngongolgad ngak e piin ni yad ba migid ngodad? Mu susunnag. (Mu guy e sasing ni bay u tabolngin e re article ney.)
5 Rayog ni nga i m’ug e t’ufeg rok Got rodad u rogon ni gad ma ngongol ngak e piin ni yad ba migid ngodad. Susun e bay reb e walag ni kab fel’ yangaren ni ka nog Alan ngak. Re walag ney e be lemnag rarogon reb e walag ni pumoon ni ke pilibthir ni ke mo’maw’ rogon ni nga i beeg e babyor ni bochan e ke kireb owchen. Ki magawon rogon e yan rok, ere ke mo’maw’ ni nga i un ko machib u mit e tabinaw. Ere, yib ngan’ Alan e n’en ni yog Jesus ni faani gaar: “Mu rin’ed ngak boch e girdi’ e tin ni ir e gimed ba adag ni ngar rin’ed ngomed.” (Luke 6:31) Ere, fith Alan ir ni gaar, ‘Mang e gu baadag ni ngan rin’ ngog?’ Me fulweg ni gaar, ‘Gu baadag ni ngan un ngog ko bat!’ Machane, gad manang ni fare walag ni ke pilibthir e dabkiyog ni nga i mil ara i un ko bat. Ere, n’en nib t’uf ni nge fith Alan ir riy e, ‘Faanra gag e re walag nem, ma mang e gu baadag ni ngan rin’ ngog?’
6 Dawori pilibthir Alan, machane rayog rok ni nge lemnag boch ban’en ndawori mada’nag. Ere, fal’eg i yaliy rarogon fare walag me motoyil ngak nib fel’ rogon. Faani munmun me nang Alan rarogon e piin ni kar pilibthirgad ni ke mo’maw’ rorad ni ngaur beeged e babyor ara ranod ko machib u mit e tabinaw i yan. Nap’an ni nang Alan rogon laniyan’ fare walag ni ke pilibthir, ma aram me nang ko mang ayuw e ba t’uf ni nge pi’ ngak, miki adag ni nge ayuweg. Ere, ku arrogodad nra ngad t’ufeged e girdi’ ni bod rogon ni ma t’ufegrad Got, ma thingar da nanged rarogon lanin’rad.—1 Kor. 12:26.
7. Uw rogon ni ngad nanged rogon e gafgow ni be tay pi walagdad?
7 Ba mo’maw’ ni ngad nanged rogon laniyan’ boch e girdi’ nge gafgow ni yad be yan u fithik’. Ya boor e girdi’ ni yad ma mada’nag boch e magawon ndawor da mada’naged bayay. Bay boch i yad ni ma par u fithik’ e amith ni bochan e maad’ad ni ke tay, ara bochan e m’ar, ara bochan ni kar pilibthirgad. Ku bay boch i yad ni be magawon laniyan’ ni bochan e gubin ngiyal’ ni yad ma par nib kireban’rad, ara kaygi pag rogon e magafan’ ni yad ma tay, ara bochan e gafgow ni un tay ngorad kafram. Ku bay boch i yad ni yigoo yad u lan e tabinaw rorad e yad ma pigpig ngak Jehovah ara yigoo yad ni yad be chuguliy pi fakrad. Ra be’ ma rogon e miti magawon ni be yan u fithik’, mab ga’ ni pi magawon ney e bay boch i gadad ndawori mada’nag. Ere, faanra buch boch ban’en ni aray rogon ma uw rogon ni nge m’ug e t’ufeg rok Got rodad? Ra be’ ma n’en nib t’uf rok. Ere, faan gad ra fal’eg e motoyil ma gad guy rogon ni ngad nanged rogon laniyan’ facha’, ma gad ra nang rogon ni ngad ayuweged. Ma ireray e n’en nra k’aringdad ni ngad daged e t’ufeg rok Jehovah ni aram e ngad ayuweged facha’. Ra be’ ma rogon e ayuw nib t’uf rok, machane rayog ni ngad pied e athamgil nga laniyan’ facha’ ko tirok Got ban’en nge ku boch e ayuw nib t’uf rok.—Mu beeg e Roma 12:15; 1 Peter 3:8.
NGAUM GOL NI BOD JEHOVAH
8. Mang e ayuweg Jesus ni nge gol ko girdi’?
8 I yog Fak Got ni gaar: “Got ni ir e Th’abi Tolang . . . e ba gol ngak e piin ndarir pininged e magar ngak nge piin nib kireb.” (Luke 6:35) Bin riyul’ riy e, Jesus e bod Got nib gol. Mang e ayuweg Jesus ni nga i rin’ e re n’ey? Ba ga’ ni ma lemnag e n’en nra rin’ e thin nge ngongol rok nga laniyan’ e girdi’. Bod ni, immoy be’ nib pin nrib tadenen ni yib ngak Jesus ni be yor nge munurnag e rifrif u ay ko lu’ rok. Nap’an ni guy Jesus e re ppin nem, me nang ni kari kalngan’ ko kireb rok, maku manang gelngin e kireban’ nra tay ni faanra puwan’ ngak. Ere, yog ngak nib fel’ e n’en ni ke rin’ me n’ag fan e kireb rok. Ku immoy reb e Farise ko gin’em ni immoy Jesus riy ni damumuw ko n’en ni ke rin’ Jesus ngak fare pin, machane me non Jesus ngak u fithik’ e sumunguy.—Luke 7:36-48.
9. Mang e rayog ni nge ayuwegdad ni ngaud golgad ni bod Jehovah? Mu weliy reb e kanawo’.
9 Uw rogon ni ngaud golgad ko girdi’ ni bod Got? I yoloy apostal Paul ni gaar: “Ya tapigpig rok Somol e thingari dabi un ko tugthin. Thingari munguy ngak urngin e girdi’, ma nge par ni ir reb e tamachib nib fel’ ma ba gum’an’.” (2 Tim. 2:24) Be’ nib sumunguy e ma gonopiy rogon e thin nge ngongol rok ya nge dabi kirebnag laniyan’ boch e girdi’. Am lemnag rogon nrayog ni ngad daged e sumunguy u nap’an ni kad mada’naged boch e magawon ni bod e pi magawon ni baaray: Susun e gad ma un ko maruwel, ma en nib ga’ ko maruwel rodad e der rin’ e maruwel rok nib fel’ rogon. Ere, mang e gad ra rin’? Maku reb e susun ni bay reb e walag ni ke yib ko muulung ni ke yan in e pul ndaki un ko muulung. Ere, mang e gad ra yog ngak? Maku reb e susun ni ka darod ko machib, me gaar be’ ngodad, “Dabiyog ni ngad nonad e chiney ya ri boor pa’ u puluwog.” Ere gur, gad ra lemnag rarogon facha’? Ma reb e faanra ke gaar e en mabgol rodad ngodad, “Mang fan nda mog ngog ni bay ban’en ni ga be lemnag ni ngam rin’ ko Sabado?” Gad ra non ngak u fithik’ e sumunguy, fa? Faan gad ra guy rogon ni ngad nanged rogon laniyan’ boch e girdi’ nge n’en nra rin’ e thin ni gad ra yog ngorad, ma aram e rayog ni ngad nanged rogon ni ngad nonad ngorad nge rogon ni ngad ngongolgad nra m’ug riy ni gad ba gol ni bod Jehovah.—Mu beeg e Proverbs 15:28.
MU GONOP NI BOD GOT
10, 11. Mang e rayog ni nge ayuwegdad ni ngad gonopgad ni bod Got? Mu weliy reb e kanawo’.
10 Bochan nrayog ni ngad lemnaged boch ban’en ndawori buch rodad, ma aram fan nrayog ni ngad gonopgad ni bod Jehovah. Re n’ey e rayog ni nge ayuwegdad ni ngad nanged rogon angin ara wenegan e n’en ni gad ma rin’. Gonop e aram reb i fel’ngin Jehovah nib lingagil, ma faanra lemnag ni nge nang ban’en ni bay nga m’on, ma rayog rok ni nge rin’. Gadad e dabiyog ni ngad nanged e n’en nra buch nga m’on, machane rayog ni ngad susunnaged u lanin’dad e n’en nrayog ni nge buch ni bochan e n’en ni gad be lemnag ni ngad rin’ed. Dab da boded piyu Israel nda ur lemnaged e n’en nra buch rorad ni faanra dab ra folgad rok Got. Yugu aram rogon urngin ban’en ni ke rin’ Got ni fan ngorad, ma manang Moses ndab ra folgad rok Jehovah. Ma nap’an ni be motoyil urngin e girdi’ nu Israel ngak, me yon’ ba tang ni bay e pi thin ni baaray riy ni gaar: “Israel e ba nam ni dariy e lem rorad; ri dariy e gonop rorad. Dar nanged ko mang fan ni kar wargad ko mahl, der pat ngan’rad ko mang fan ni kar yodoromgad.”—Deut 31:29, 30; 32:28, 29.
11 Ra ngad gonopgad ni bod Got, ma aram e ngad lemnaged u m’on riy wenegan e ngongol rodad. Bod ni faanra gimew be puruy’nag be’ e mabgol, mab t’uf ni ngam nang ni faanra gimew baadagew gimew mab mo’maw’ ni ngam gagiyegnagew e lem nge ar’ar romew. Ere, dab mu rin’ew ban’en nrayog ni nge kirebnag e tha’ u thilmed Jehovah! Ya thingar mu ngongolgow nib puluw ko re fonow ni baaray ni gaar: “Be’ nib gonop e ra guy e oloboch ni be yib me pilo’ riy, machane piin nib balyang e darur pilo’gad riy, me yan i tomur mi yad kalngan’rad.”—Prov. 22:3.
MU GAGIYEGNAG ROGON NI GA MA LEM
12. Uw rogon nrayog ni nge magawonnagdad e lem rodad?
12 Be’ nib gonop e manang ni lem rodad e bod e nifiy. Faanra maruwel be’ ko nifiy nib fel’ rogon, ma boor ban’en nrayog ni nge fanay ngay ni bod rogon e lum nge ku boch ban’en. Machane, faanra dabi kol ayuw ko fare nifiy ma rayog ni nge mooruf e naun rok, me yim’ e girdi’ ni bay ko fare naun. Ere, ku arrogon e lem rodad ni ma ayuwegdad ni ngad lemnaged boch ban’en ni kad filed rok Jehovah. Machane, faanra dab ud kol ayuwgad ngay, mu ud lemnaged boch e ngongol nib kireb, ma rayog ni nge magawonnagdad. Bod ni faanra ke mecham ngodad ni ngaud lemnaged boch e ngongol nib kireb, ma ra munmun ma gad rin’ fapi n’em ni gad be lemnag. Ma re n’ey e rayog ni nge kirebnag e tha’ u thildad Jehovah.—Mu beeg e James 1:14, 15.
13. Mang e lemnag Efa u rarogon e par rok?
13 Am lemnag e n’en ni rin’ me adag Efa ni nge kay wom’engin “fare ke gek’iy ni ma tamilangnag an’uy ko tin nib fel’ nge tin nib kireb.” (Gen. 2:16, 17) I gaar fare porchoyog ngak: “Gathi gimew ra yim’. I yog Got e re bugithin nir ya manang ni gimew ra kay mi gimew bod Got, me tamilangan’mew ngam nangew e n’en nib fel’ nge n’en nib kireb ni bod ir.” I guy Efa “feni fel’ yaan fare ke gek’iy, nge feni manigil yaan i wom’engin.” Ere, mang e rin’? I “t’ar boch i wom’engin nge kay. Ma aram me pi’ boch ngak e pumoon rok me ki kay.” (Gen. 3:1-6) Ere, ri baadag Efa e n’en ni ke yog Satan ngak. I par nge lemnag ma ka baadag ni nge mang ir e dugliy ko mang e ba fel’ nge mang e ba kireb ko bin ni be’ e nge yog ngak. Rib kireb wenegan e n’en ni lemnag! Ma bochan e denen ni tay Adam ni figirngin, ma aram ‘me yib e denen nga fayleng, ma denen ni ngongliy e fek e yam’ i yib.’—Rom. 5:12.
14. Uw rogon ni be ayuwegdad e Bible ni ngad siyeged e ngongol ndarngal?
14 Fare denen ni rin’ Efa u lan fagi milay’ nu Eden e gathi be yip’ fan ni ke un ko ngongol ndarngal. Machane, i yog Jesus nib kireb ni nga i par be’ ma be lemnag boch ban’en ni bay rogon ko ngongol ndarngal. I yog ni gaar: “En nra sap ngak be’ ni ppin me finey ni manga yugu ra pirew, e ke kireb e rok, ni fan e kar pirew u fithik’ i laniyan’.” (Matt. 5:28) Ki puguran Paul ni gaar: “[Mu talgad] ndab ku um rin’ed [“lemnaged,” NW] e tin nib kireb ni be ar’arnag e dowef romed.”—Rom. 13:14.
15. Ba miti mang flaab e susun ni ngad guyed rogon ni nge yag ngodad, ma mang fan?
15 Kub mit e lem nde fel’ e aram e nga i par be’ ma be susunnag ir ni ke yoor ban’en rok ma dab ki tiyan’ ko tin nib m’agan’ Got ngay. Bin riyul’ riy e piin ni boor ban’en rorad e “wun’rad e fel’ rogon rorad e ra yororiyrad ni bod ba yoror nib tolang.” (Prov. 18:11, BT) I weliy Jesus reb e fanathin ni nge tamilangnag rarogon e “piin ni boor ban’en ni kar kunuyed ke yoor ban’en rorad, machane de yoor ban’en rorad u p’eowchen Got.” (Luke 12:16-21) Ma felfelan’ Jehovah ni faanra i guy ni gad be rin’ e tin nib m’agan’ ngay. (Prov. 27:11) Ma kub gel e felfelan’ ni gad ma tay u nap’an ni gad ra nang ni gad be par ni gad ba fel’ u wan’ ni bochan e gad be ‘ulunguy e flaab rodad u tharmiy’! (Matt. 6:20) Ma bin th’abi fel’ e tow’ath nra yag ngodad e aram e nge fel’ e tha’ u thildad Jehovah.
DAB UM PAR NI BE MAGAFAN’UM
16. Mang reb e kanawo’ nrayog ni nge war e magafan’ rodad riy?
16 Faan gad ra guy rogon ni ngad ‘ulunguyed e flaab rodad u roy u fayleng,’ ma rib gel e magafan’ nra ud ted. (Matt. 6:19) I weliy Jesus reb e fanathin ni nge tamilangnag rogon nrayog ni nge yib e ‘magafan’ ko par rodad u fayleng nge chogowen e fel’ rogon’ nge thang u wan’dad e tin ni kad filed u murung’agen Gil’ilungun Got. (Matt 13:18, 19, 22) Bay boch e girdi’ ni yug yad ra par ma be magafan’rad nga boch ban’en nrayog ni nge buch rorad. Machane, faanra i magafan’dad nib pag rogon ma rayog ni nge k’aring e m’ar ngodad ara da meewargad ko tirok Got ban’en. Ere, nga i pagan’dad ngak Jehovah ma dab da paged talin ni ‘magafan’ e rayog ni iring e felfelan’ rodad, machane thin nib fel’ e ra baudeg lanin’dad.’ (Prov. 12:25) Rib gel e felfelan’ ni gad ma tay u nap’an nra yog be’ ni manang rarogodad boch e thin nib manigil ni nge pi’ e athamgil nga lanin’dad. Faan gad ra weliy lanin’dad ko gallabthir rodad, ara en mabgol rodad, ara reb e fager rodad ni ma pagan’dad ngak, ma rayog ni nge war boch e magafan’ rodad.
17. Uw rogon ni ma ayuwegdad Jehovah ni ngad athamgilgad u fithik’ e pi magafan’ rodad?
17 Kemus ni yigoo Jehovah e manang rarogodad nib fel’ rogon, ere yigoo ir e manang rogon e magafan’ ni gad ma tay. I yoloy Paul ni gaar: “Dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed ngi i par rok Kristus Jesus.” (Fil. 4:6, 7) Am lemnag e piin ni yad be ayuwegdad ko tirok Got ban’en ni bod rogon e piin taareb e michan’ rodad, nge piin piilal, nge fare tapigpig nib yul’yul’, nge pi engel, nge Jesus, nge Jehovah.
18. Uw rogon nrayog ni nge ayuwegdad e lem ni gad ma tay?
18 Ere, kad filed ni lem ni gad ma tay e rayog ni nge ayuwegdad ni nga i m’ug pi fel’ngin Got rodad ni bod rogon e t’ufeg. (1 Tim. 1:11; 1 John 4:8) Rib gel e felfelan’ ni gad ma tay ni faanra ud t’ufeged e girdi’ ma gad be gol ngorad, ma gad be lemnag wenegan e pi n’en ni gad ma mel’eg ni ngad rin’ed, ma gad siyeg e magafan’ nib pag rogon. Ere, ngad athamgilgad ni ngad maruwelgad ko biney e tow’ath ni ke pi’ Got ngodad ni aram e ngaud lemnaged e pi n’en ni gad be athapeg ni ka bay nga m’on ma gad guy rogon ni nga i m’ug pi fel’ngin Jehovah rodad ni aram e t’ufeg, nge gol, nge gonop, nge felfelan’.—Rom. 12:12.