Dabki N’uw Nap’an Me Chuweg Got Urngin e Gafgow

“Somol, uw n’umngin nap’an nthingar gu wenig ngom ni ngam ayuwegmad mfin mu rung’ag lungug ngam chuwegmad u fithik’ e gafgow ni yibe tay ngomad?” (Habakkuk 1:2, 3) Ireray e thin ni yog Habakkuk ni be’ nib moon nib manigil ma kub fel’ u wan’ Got. Gur, thin ni yog e be m’ug riy ni ke war e michan’ rok? Danga’! I micheg Got ngak Habakkuk ni ke dugliy ba ngiyal’ nra taw ngay me chuweg urngin e gafgow.​—Habakkuk 2:2, 3.

Faanra ga be gafgow ara bay be’ nib t’uf rom ni be gafgow, mab mom ni ngam lemnag nder gur Got ni nge chuweg e gafgow rom ara en nib t’uf rom. Kub mom ni ngam lemnag nthingari rin’ ban’en ngay ni ka chiney. Machane be micheg e Bible ni be gaar: “Dawori sowath Somol ni nge rin’ e tin ni ke yog nra rin’, ni bod rogon ni be lemnag boch e girdi’. Ya be gum’an’nag ir u puluwmed, ni fan e dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.”​—2 Peter 3:9.

MINGIYAL’ E RA CHUWEG GOT E GAFGOW?

Dabki n’uw nap’an! I tamilangnag Jesus ni bay reb e mfen ni yad ra guy boch ban’en nra buch ni aram e pow riy ni yi bay ko tin tomuren e rran ko “re m’ag ney.” (Matthew 24:3-42, NW) Rogon ni be lebug e yiiy ni yog Jesus u murung’agen e ngiyal’ ney ni gad bay riy e be dag ni kari chugur ni nge chuweg Got e gafgow rodad.a

Machane uw rogon nra chuweg Got urngin e gafgow? Nap’an ni immoy Jesus u fayleng, ma pi n’en ni i rin’ e be dag ni bay gelngin Got ni nge chuweg e gafgow rodad. Baaray boch e pi n’em.

Yoko’ nge Boch Ban’en ni Ma Yib ni Yima Gafgow Riy: Nap’an ni immoy Jesus nge pi apostal rok u bowoch u lan e Lipath nu Galile, ma aram me yib bangi nifeng nrib gel me chugur ni nge ligil e bowoch rorad. Yugu aram rogon me dag Jesus ni bay gelngirow e Chitamangin ni ngar mocha’nagew e nifeng nge day. (Kolose 1:15, 16) Kemus ni gaar Jesus ko nifeng: “‘Mmocha’!’ Me gaar ngak e n’ew, ‘Mu gapas!’ Me mocha’ e nifeng, me aw e cho’.”​—Mark 4:35-39.

M’ar: Boor e girdi’ kakrom ni yad manang nrayog rok Jesus ni nge golnag e piin nib malmit nge piin nib marwoth, nib muun ngay e piin ni bay e m’ar rorad ni epilepsy, nge piin ni yad ba daraw, nge yugu boch e m’ar. I “golnag urngin e piin ni yad mm’ar.”​—Matthew 4:23, 24; 8:16; 11:2-5.

Ke Lich e Ggan: I fanay Jesus gelngin ni ke pi’ e Chitamangin ngak ni nge ngongliy e maang’ang ni nge yoornag e ggan ni nge kay e girdi’. Rogon ni bay u Bible e l’agruw yay ni duruw’iy bokum biyu’ e girdi’ u nap’an e machib ni i tay.​—Matthew 14:14-21; 15:32-38.

Yam’: Fa dalip ni’ ni fasegrad Jesus ni bay murung’agrad u Bible e be tamilangnag ni bay gelngin Jehovah ni nge chuweg e yam’. Immoy bagayad e pi cha’nem ni faseg Jesus u tomuren aningeg e rran ni ke yim’.​—Mark 5:35-42; Luke 7:11-16; John 11:3-44.