Dab Mu Pag Talin e Piin ni Yad Inactive

1. Mang fan e susun ni ngad pied e athamgil nga laniyan’ e piin ni kar manged e girdi’ ni yad inactive?

¹ Ga manang be’ ni ir inactive? Sana ke tal ni nge chag ngak girdien e ulung me sor nga ba yang. Sana kam mada’nag be’ ni aram rogon ko ngiyal’ ni kam un ko machib u mit e tabinaw. Thingar dab da paged talin ni faanem e ka ir walagdad ko tirok Got ban’en. Gad ba adag ni ngad micheged e t’ufeg rodad ngak ma ngad ayuweged ni nge sul ko ulung nge ‘faanem ni ir e ma gafaliy e saf me ir e ma ayuweg lanin’dad.’​—1 Pet. 2:25.

2. Uw rogon nrayog ni ngad pied e athamgil nga laniyan’ be’ ni ir inactive?

² Ngam Dag ni Ga Ba Adag ni Ngam Ayuweg: Faan gad ra dengwanag ara ngad darod i guy be’ ni ir inactive ma aram rogon nra tamilang u wan’ ni dada paged talin ir. Mang e rayog ni ngad dogned? Rayog ni ngad pied e athamgil nga laniyan’ ni ngad dogned ni kad lemnaged ir. Mog e thin nib fel’ nra ubung cha’ nem. (Fil. 4:8) Rayog ni ngad weliyed u murung’agen ban’en nib fel’ ni kan weliy u nap’an e muulung. Maku rayog ni ngad pininged ni nge un ko muulung ara assembly ma ngad dogned nrayog ni nge par u chaarem ara bay yib e karro.

3. Uw rogon ni kan ayuweg reb e walag ni ppin ni nge sul ko ulung?

³ Kan mada’nag reb e walag ni ppin ni de un ko ulung ko 20 e duw u lan e binaw. Yugu aram rogon nde un ko fol Bible, machane fare walag ni ke pirieg faanem e ke sul ngak me pi’ e magazine ngak. Tomren e district convention, ke tamilangnag fare walag boch e thin ni kan weliy u nap’an e convention ngak fare walag ni ir inactive, ma munmun ma kan ayuweg me sul ko ulung.

4. Uw rogon ni ngad ngongolgad ngak be’ ni ke sul i un ko pi muulung?

⁴ Faanra Sul Be’ ko Muulung: Faanra sul be’ ni ir inactive ko muulung, ma uw rogon e susun ni ngad ngongolgad ngak? Amu lemnag, uw rogon e ngongol ni i tay Jesus ngak e pi gachalpen u tomren ni kar paged ir? I pining ngorad ni yad “pi walageg” mi dag ni be pagan’ ngorad. Mus ko maruwel ni ba ga’ fan ni i pi’ ngorad. (Matt. 28:10, 18, 19) De n’uw nap’an u tomur riy, kar wereged fare thin nib fel’ ni “ur machibnaged iyan.”​—Acts 5:42

5. Mog ko wuin e susun ni ngad tamilangnaged ngak e piin ni piilal ni kad mada’naged be’ ni inactive.

⁵ Susun ni ngad nonad e piin ni piilal u m’on ni ngad dogned ni gad ra fil e Bible ku be’ ni inactive ara ngad pininged ni nge un ngodad ko machib u mit e tabinaw. Faan gad ra mada’nag be’ ni inactive u lan e binaw, susun ni ngad tamilangnaged ngak e piin ni piilal ni fan ni ngar pied e ayuw nib t’uf rok ngak.

6. Faan gad ra ayuweg e piin ni yad inactive ma mang felfelan’ nra yog ngodad?

⁶ Be dag e Bible ni goo girdi’ ni yad ra athamgil nge mada’ ko tomur e ra yog e yafos ngorad. (Matt. 24:13) Me ere, nga mu lemnag e girdi’ ni kar dol’gad ko tirok Got ban’en ara kar sorgad nga ba yang. Faan gad ra dag ni ri gad ba adag ni ngad ayuweged e pi girdi’ nem ma ngad gum’an’gad i dag e t’ufeg rok Jehovah ngorad ma sana ra yog e felfelan’ ngodad ni ngar sulod ko pigpig u chardad.​—Luke 15:4-10.