Ban’en nib Fel’ ni Ngan Nameg ko Bin nib Beech e Service Year
1. Mang e ba fel’ ni ngad nameged ko fa bin nib biech e service year?
1 Thingar da nameged ban’en ni faan gad ba adag ni ngad mon’oggad iyan ko tirok Got ban’en. Mang e kam nameg ko bin nib beech e duw? Ban’en nib fel’ ni ngad nameged e ngad uned ko pioneer ni ayuw ko taareb ara l’agruw e pul. Bochan e ba t’uf ni ngad fineyed boch ban’en ko re n’ey, ma ba puluw ni ngad tababgad i lemnag e chiney. Mang fan ni ngam lemnag ni ngam nameg i un ko pioneer ni ayuw?
2. Mang fan e ngam lemnag ni ngam nameg i un ko pioneer ni ayuw?
2 Fan ni Ngam Un ko Pioneer ni Ayuw: Faan gad ra un ko pioneer ma “ri” ra felan’nag Chitamangidad nu tharmiy ni nge yoor e tayim ni ngad ognaged ko machib u mit e tabinaw. (1 Thess. 4:1) Faan gad ra lemnag urngin ban’en ni i rin’ Jehovah ni fan ngodad, ma gum’erchadad e ra k’aringdad ngad weliyed u murung’agen ngak yugu boch e girdi’. (Ps. 34:1, 2) Ma guy Jehovah e pi n’en ni gad ma rin’ ma ke felfelan’ ko maligach ni gad ma tay ni fan ni nge yoor e machib ni ngad ted u mit e tabinaw. (Heb. 6:10) Ma ra yog e felfelan’ ngodad ni bochan e gad manang ni be felfelan’ Jehovah ko maruwel ni gad be tay.—1 Kron. 29:9.
3, 4. Uw rogon nra fel’ rogodad ko ngiyal’ ni ngad uned ko pioneer ni ayuw?
3 Ra ngam rin’ ban’en ni boor yay ma ke mom ni ngam rin’. Ga ra un ko machib u mit e tabinaw ni boor ma ra mom rom ni ngam machibnag e girdi’ u mit e tabinaw. Ga ra salap ni ngam tababnag e sabathin nge rogon ni ngam fanay e Bible rom. Ga ra weliy u murung’agen e pi n’en ni mich u wan’um ma ra gel e michan’ rom iyan. Boch e girdi’ ndariy e Bible study rorad kafram e kar tababnaged reb ko ngiyal’ ni kar uned ko pioneer ni ayuw.
4 Maku ra mu un ko pioneer ni ayuw ma rayog ni nge ayuwegem ngam pasig ko tirok Got ban’en biyay. Be’ ni ke un ko regular pioneer kafram e ke yog ni kaygi boor e tayim ni be tay ko maruwel ko salpiy me dugliy ni nge un ko pioneer ni ayuw ko reb e pul. Ke yog ni gaar: “Da gu nang ni rayog ni nge gelnageg ko tirok Got ban’en ni bochan e kug un ko pioneer ni ayuw ko taareb e pul! Kug yarmiy rogon ni nggu un ko pioneer ni ayuw ndariy n’umngin nap’an, me munmun ma kug un ko regular pioneer biyay.”
5. Uw rogon ni ngad gelgad ko lem ni gathi gad ba salap ko machib?
5 Ga Ra Gel ko Magawon: Boch e girdi’ e dabra uned ngay ya yad be lemnag ni gathi yad ba salap ko machib. Faanra aram rogon u wan’um, dab mu rus ya rayog ni nge ayuwegem Jehovah ni bod rogon ni i rin’ ku Jeremiah. (Jer. 1:6-10) Yugu aram rogon ni kari “gafgow” Moses “ko welthin ma ba sowath,” machane i fanay Jehovah Moses ni nge musnag e tin nib m’agan’ ngay. (Ex. 4:10-12) Faanra ga be lemnag ni gathi gab salap ko machib, mu yibilay Jehovah ni nge gelnagem ndab mu rus.
6. Uw rogon nrayog ni ngam un ko pioneer ni ayuw ni yugu aram rogon ni bay e magawon rom ko m’ar ara boor pa’ u puluwam?
6 Dabum ni ngam un ngay ni bochan e gab m’ar ara boor pa’ u puluwom fa? Faanra gur be’ nib mugutgut, ma rayog ni ngam un ko pioneer ni ayuw ni faan ga ra rin’ ni buchuuw ma buchuuw ma ga rin’ u rogon nrayog rom. Faanra boor pa’ u puluwom, ma rayog ni ngam fl’eg boch e maruwel rom ni gathi rib ga’ fan ko yugu reb e pul. Boch e girdi’ ni yad ma un ko maruwel ni full time e kar yarmiyed rogorad ngar uned ko pioneer ni ayuw ni bochan e kar fanayed in e rran ko vacation rorad.—Kol. 4:5.
7. Mang nra fel’ rogom ngam yibilay ku Jehovah u murung’agen e pioneer ni ayuw?
7 Rogon ni Ngam Rin’: Mu yibilay ngak Got e tin nib m’agan’um ngay. Mu ning ku Jehovah ni nge flaabnag e maruwel ni ngam tay nge ayuwegem nge yoor e machib ni ga ra tay u mit e tabinaw. (Rom. 12:11, 12) Rayog ni nge ayuwegem ngam gonop i yarmiy e schedule rom. (Jas. 1:5) Faanra gathi ri ga ba adag ni ngam un ngay, mu ning ku Jehovah ni nge ayuwegem ngam felfelan’ ko machib u mit e tabinaw.—Luke 10:1, 17.
8. Uw rogon ni ngam fol ko Proverbs 15:22 ngam un ko pioneer ni ayuw?
8 Nga mu puruy’gad e tabinaw rom ni ngam nameg e pioneer ni ayuw. (Prov. 15:22) Sana reb e girdi’ ko tabinaw e rayog ni nge un ko pioneer ni ayuw ni faanra girdien e tabinaw e yad ra ayuweg. Mu weliy ngak girdien e ulung ni ga ba adag ni ngam un ko pioneer, ma ri mu rin’ ngak e girdi’ ni taareb rogomed. Ya rayog ni nge pi’ e athamgil nga laniyan’ e girdi’ ngar pasiggad i un ko pioneer ni ayuw.
9. Bin ngan e pul e ga ra turguy ni ngam un ko pioneer ni ayuw?
9 Nap’an ni ngam guy e calender ko binem e duw, bin ngan e rayog ni ngam un ko pioneer ni ayuw riy? Faanra ga ma un ko maruwel ni full-time ara sukul, ma ga lemnag e pul ni bay e holiday riy ara reb e pul ni bay lal e Sabado nge Madenom riy. Ya, September, December, March, nge August e bay lal e Sabado nge Madenom riy. Faanra gur be’ ni gab m’ar, ma rayog ni ngam lemnag ni ngam un ko reb e pul nib fel’ e yafang. Ku rayog ni ngam un ko pioneer ni ayuw ko pul nra yib e circuit overseer nge ayuweg e ulung rom. Nap’an e re wik nem ma bay e flaab rom ni ngam un ko balay e muulung ni yima fl’eg ni fan ko regular pioneer. Ra aw fare Puguran ko March 22 ko binem e duw, ma March, April, nge May e aram e pi pul ni rib fel’ ni ngan un ko pioneer ni ayuw. Tomren ni kam turguy e pul ara pi pul ni ngam un ko pioneer ni ayuw, mu fl’eg e schedule ni rayog ni ngam thognag e awa.
10. Mang e rayog ni ngad rin’ed ni faanra dabiyog ni ngad uned ko pioneer ni ayuw?
10 Mus ni ga be lemnag ndabi yog ni ngam un ko pioneer ni ayuw ko binem e duw, machane rayog ni ngam dag e pioneer spirit. Mu ul’ul ni ngam rin’ u rogon nrayog rom ko machib u mit e tabinaw, ma ga par nib mudugilan’um ni ba felan’ Jehovah ko maruwel ni ga be tay. (Gal. 6:4) Mu par ni ngam tay tangin ma ga pi’ e athamgil nga laniyan’ e piin ni kar uned ko pioneer ni ayuw. Sana rayog ni ngam thiliyeg e schedule rom ngam uneg reb e rran u reb e wik ni ngam un ngorad ko machib u mit e tabinaw.
11. Mang fan ni ngad lemnaged ni aram e maruwel ni ba ga’ fan ma buchuw e tayim ni ka bay?
11 Girdien Jehovah e yad ma lemnag ni aram e maruwel ni ba ga’ fan ya buchuw e tayim ni ka bay. Bay ba maruwel ni thingar ni rin’—fare maruwel ni ngan machibnag fare thin nib fel’. Yafos ko girdi’ e ba l’ag ngay, ma ke lich e tayim riy. (1 Kor. 7:29-31) T’ufeg ku Got nge girdi’ e ra k’aringdad ngad rin’ed gubin ban’en nrayog rodad ko machib u mit e tabinaw. Faan gad ra finey i athamgil ngay, ma rayog ni ngad uned ko pioneer ni ayuw ko taareb e pul ko binem e duw—ni aram ban’en ni rib fel’ ni ngad nameged!