Dab un Tel e Tinib Fel’!
1. Uw rogon ndab da ‘teled e tinib fel’’?
1 Faan gad ra un i wereg fare thin nib fel’ u murung’agen Gil’ilungun Got, ma dab da ‘teled e tinib fel’’ ni aram e ngad machibnaged e girdi’ u lan e territory rodad. (Prov. 3:27) Dariy yugu rebe thin ni kab fel’ ko par nib fel’ u tan e gagiyeg rok Got ni ngan wereg ngak e girdi’. Yugu aram rogon ni ga ma un i wereg e thin u murung’agen Gil’ilungun Got ko machib u fithik’ e sabathin ara ngam wereg e pi babyor, machane mang ni dab mu nameg ni ngam conductnag e Bible study, ni faanra dawor mu rin’?
2. Mang e ma talegdad ni ngad tababnaged e Bible study?
2 Yu ngiyal’ ma lanin’dad e bin baga’ e magawon rodad ni ngad conductnaged e Bible study. Boch e girdi’ e yad ma magawon ni ngar conductnaged e Bible study ni bochan e yad ma lemnag ndabiyog rorad ara boor pa’ u puluwrad. Pi thin ni ba aray e rayog ni nge ayuwegem ni dab magawon ni ngam conductnag e Bible study.—Matt. 28:19; Acts 20:20.
3. Mang fan ni rayog rodad ni ngad filed e Bible ko girdi’?
3 Lem ni Dabiyog Rom: Sana dariy e skul rom ara ga be lemnag ni dariy e salap rom ni ngam conductnag e Bible study. Ke yib angin ngak e pi Kristiano ko bin som’on e chibog ni yugu aram rogon ‘ndariy e skul rorad.’ Mang e ke ayuwegrow ni ngar filew e thin riyul’ ngak e yugu girdi’? “Ur unew i yan ngak Jesus.” (Acts 4:13) Kar filew rok fa En ni Tamachib, i Jesus, ni machib nge kanawo’ ni tay e kan yoloy ko Bible ni fan ngodad. Mus ni faanra dariy e skul rom, machane ka bay e skul rom ko tirok Got ban’en ni bin th’abi fel’.—Isa. 50:4; 2 Kor. 3:5.
4. Mang e rayog ni ngad filed ko n’en ni rin’ Amos?
4 Yu ngiyal’ ma i fanay Jehovah e pi profet ni ngar fonownaged e pi pilung ni ur olobochgad ara yugu boch e girdi’ nib tolang e liw rorad. Boch i yad e bod Amos, ni yib uba tabinaw nib sobut’. Yog Amos ni gaar: “Gathi gag ba profet, ya gathi ereray e maruwel rog. Gu ma gafaliy e gamanman ma gu ma ayuweg yungi woldug ni gek’iy ni fig.” (Amos 7:14) Yugu demtrug, ya de tal Amos ni nge dabi yog e gechig nra yib rok Jehovah ngak Amaziah ni prist ni ke meybil ko fak e garbaw. (Amos 7:16, 17) Thingar dab da paged talin ni gad be fl’eg e maruwel rok Got ma ra ayuwegdad ngad rin’ed e maruwel ni ke pi’ ngodad.—2 Tim. 3:17.
5. Mang fan ni susuna ngad athamgilgad ni ngad tababnaged e Bible study ni yugu aram rogon ni bay boor pa’ u puluwdad?
5 Boor Pa’ u Puluwom: Yugu aram rogon ni boor pa’ u puluwom, machane baga’ ni kam dugliy boch e tayim ni ngam un ko machib u mit e tabinaw u gubin e wik. Ram conductnag e Bible study ma aram bang ko machib u mit e tabinaw nra yognag e felfelan’ ngom. Rib tow’ath ni ngad guyed e Thin rok Jehovah ni be maruwel u lan e yafos rok e girdi’. (Heb. 4:12) Be felfelan’ Jehovah ko ngiyal’ ni ngad paged fadad ni fan e ngad ayuweged e girdi’ “ngar nanged e tin nib riyul’.” (1 Tim. 2:4) Mus ko pi engel e yad ma felfelan’rad ko ngiyal’ nra pi’ be’ keru’ ko denen rok me mon’og iyan ko tirok Got ban’en.—Luke 15:10.
6. Mang tow’ath e bay rodad ni ngad maruwelgad u rogon nib puluw ko tinib m’agan’ Got ngay?
6 M’agan’ Got ngay ni “urngin e girdi’ ni ngar thapgad ngak ma ngar nanged e tin nib riyul’.” (1 Tim. 2:4) Ri gad ba tow’ath ni ngad maruwelgad u rogon nib puluw ko tinib m’agan’ Got ngay, ndab da magawongad ni ngad conductnaged e Bible study!