Mang e Be Fil e Girdi’ ko Ngongol Rom?
1. Mang e ke fil pi gachalpen Jesus rok u nap’an ni ur chaggad ngak?
1 I gaar Jesus: “Mfeked e mat’ rog ngam tiyed nga pomed, mi gimed folwok rog.” (Matt. 11:29, ftn.) Ba tamilang ni i skulnag e girdi’ ni gathi kemus ni thin ni i yog ya ku bochan e ngongol rok nib fel’ ni i dag. Mu lemnag ko mang e ke fil pi gachalpen Jesus rok u nap’an ni ur chaggad ngak. Ir be’ nib gol mab munguy ma ma t’ufeg e girdi’. (Matt. 8:1-3; Mark 6:30-34) Ir be’ nib sobut’an’. (John 13:2-5) Nap’an ni ur uned ngak Jesus ko machib mar guyed nib pasig ma bay angin e machib ni i tay. (Luke 8:1; 21:37, 38) Mang e rayog ni nge fil e girdi’ ni be yaliydad u nap’an ni gad be machib?
2. Uw rogon ni ngongol rodad nib fel’ e rayog ni nge k’aring laniyan’ e girdi’?
2 Piin ni Gad Be Machibnag: Rogon e munmad ni gad ma tay nge rogon e ngongol rodad nge rogon ni gad ba yul’yul’ ko machib e rayog ni nge k’aring laniyan’ e girdi’. (2 Kor. 6:3; Fil. 1:27) Yad ma guy ni gad ma fanay e Bible ni gubin ngiyal’. Ma boch e girdi’ e ba adag ni gad ma motoyil ngorad u fithik’ e tay fan u nap’an ni yad be yog ban’en. Dabda lemnaged ndariy fan ni ngad daged e ngongol nib fel’ ya re n’ey e rayog ni nge k’aring e girdi’ ngar adaged e machib ko Gil’ilungun Got.
3. Mang angin nib fel’ nrayog ni nge yib ko pi walagdad ni bochan e ngongol rodad nib fel’?
3 Pi Walagdad: Ku mu lemnag ko mang angin ni ra yib ko pi walagdad ni bochan e ngongol rodad nib fel’. Rogon ni gad ba pasig ko machib e rayog ni nge k’aring e yugu girdi’. Bod ni wasey e ma uthum e wasey ere rogon ni gad ma machibnag e girdi’ e ma k’aring e yugu girdi’ ngar athamgilgad ni ngar salapgad ko machib. (Prov. 27:17) Faan gad ra yoloy nga babyor urngin e piin ni kar adaged e machib ma ngad sulod ngorad ma ra k’aring e girdi’ ni ngar rin’ed ni aram rogon. Gad ra k’aring laniyan’ e girdi’ ko tin nib fel’ ni ngad ngongliyed urngin e maruwel rodad ko machib.—2 Tim. 4:5.
4. Mang fan nib fel’ ni ngad fal’eged i lemnag rogon e ngongol ni gad ma tay?
4 Mang ni dabmu fal’eg i lemnag ko bay angin e ngongol rom nib fel’ ngak yugu boch e girdi’? Ngongol rodad nib fel’ e ra felan’nag Jehovah ma rayog ni ngad dogned e n’en ni yog apostal Paul ni gaar: “Um folwokgad rog, ni bod rogon ni gu be folwok rok Kristus.”—1 Kor. 11:1.