‘Ngan Rin’ e Tin nib M’agan’ Got Ngay’

1. Mang kenggin e special assembly rodad ko duw ni 2012, ma mang fan nrib puluw ni ngad weliyed murung’agen e re n’ey?

¹ Kan sunmiydad ni bochan e ireray e n’en nib m’agan’ Jehovah ngay. (Rev. 4:11) Ere ba mo’maw’ ni nge yib fan e yafas rodad nfaanra dab da filed ma dab da rin’ed e tin nib m’agan’ Got ngay. Ba mo’maw’ e re n’ey ni bochan e thingar da togopuluwgad ko pi meewar rodad ya nge yog ni ngad paloggad ko “pi n’en ni ir e ba m’agan’ dowdad nge lanin’dad ngay” nge pi n’en ni “baadag e piin ni dar nanged Got” ni ngad rin’ed. (Efe. 2:3; 1 Pet. 4:3; 2 Pet. 2:10) Faanra dabi ayuwegdad Got ma rayog ni nge koldad Moonyan’ mu ud ‘folgad ko tin ni baadag.’ (2 Tim. 2:26) Fare special assembly rodad ni fan ko duw ni 2012 e ra ayuwegdad ni nge puluw e ngongol rodad ko n’en ni yog Jesus ko fare kenggin e meybil ni fil ngak pi gachalpen ni aram e ‘ngan rin’ e tin nib m’agan’um ngay.’​—Matt. 6:9, 10.

2. Mang boch e deer ni yira pi’ e fulweg riy u nap’an e pi welthin ni yira pi’?

² Boch e Deer ni Yira Pi’ e Fulweg Riy: Nap’an ni ga be motoyil ko pi welthin ni yira pi’, ma ngam gay e fulweg ko pi deer ni baaray: Mang e kub ga’ fan ni ngad rin’ed ko bin ni kemus ni ngaud motoyilgad ko Thin rok Got? Uw rogon ni ngad nanged e tin nib m’agan’ Got ngay ni fan ngodad? Mang fan nib t’uf ni nge m’agan’dad ngay ni ngad ayuweged urngin mit e girdi’? Uw rogon ni ngad pirieged e felfelan’? Piin fel’ yangaren, mang e ba t’uf ni ngam micheged ngak Jehovah? Mang boch e tow’ath nra yog ngak be’ nfaanra i rin’ e tin nib m’agan’ Got ngay? Mang nrib ga’ fan ni ngad pied e athamgil nga laniyan’ boch e girdi’?

3. Uw rogon ni nge yib angin ngodad e pi n’en ni yira weliy u nap’an e re muulung nem?

³ Mu un ko re muulung nem ma ga motoyil nib fel’ rogon ko pi welthin ni yira pi’. Dabisiy nra yib reb e walag ni ma maruwel u Bethel ara reb e piilal ni ma lekag e ulung ni nge pi’ e welthin. Mu guy rogon ngam non ngak u m’on fa tomuren e muulung. Ma faanra ke mabgol mu kum non ko ppin rok. Nap’an ni ga ra sul nga tabinaw, ma dab mu “pag talin” e pi n’en ni ka um motoyil ngay, ya ngam weliyed chon e tabinaw rom, mu kum weliyed rogon nrayog ni nge puluw e ngongol romed ko tin nib m’agan’ Got ngay.​—Jas. 1:25.

4. Mang nib ga’ fan ni nge m’on e tin nib m’agan’ Got ngay u wan’dad?

⁴ Dabki n’uw nap’an ma yira thang e piin ni yad be rin’ e pi n’en ni yad be yim’ ni bochan ma dubrad ni ngar rin’ed e tin nib m’agan’ Jehovah ngay. (1 John 2:17) Ere gad be pining e magar ngak Jehovah ni ke pi’ ngodad e pi thin ney nrib m’ag ko ngiyal’ ney, ya rayog ni nge ayuwegdad ni ngari ga’ fan u wan’dad e tin nib m’agan’ ngay.