Motoyil mag Fil Ban’en
1. Mang fan nrib t’uf ni ngad motoyilgad nib fel’ rogon u nap’an ni kad uned ko pi convention nib ga’?
1 Dabki n’uw nap’an ma ra tabab fare convention ko duw ni 2013. Boor e maruwel ni kan tay ni ngan yarmiy reb e program ni fan e ngan ayuweg e girdi’ ko tin nib t’uf. Kam fal’eg rogom ni ngam un ko fare convention ni dalip e rran n’umngin nap’an? Pi convention nib ga’ e boor ban’en riy nrayog ni nge magawonnagdad ni nge mo’maw’ rogon ni ngad tedan’dad ngay, ere ba t’uf ni ngad athamgilgad. Bochan nib n’uw boch nap’an e re muulung ney ko pi muulung ni ma tay e pi ulung, ere ba t’uf ni ngad athamgilgad ni ngad tedan’dad nib n’uw boch nap’an. Milekag ni yira tay nge ku boch ban’en e rayog ni nge k’aringdad ni nge aw parowdad. Ere mang e ra ayuwegdad ni ngaud motoyilgad, ma gad fil ban’en?—Deut. 31:12.
2. Uw rogon ni ngad fal’eged rogon lanin’dad ni fan ko convention?
2 U M’on ni Nge Taw fare Rran ko Convention: Web site rodad ni www.jw.org e bay fare convention program riy nib muun ngay e pi kenggin e welthin ni yira pi’ nge taareb ara l’agruw e thin nu Bible nib l’ag rogon ngay. Faanra bay e Internet rodad, ma gad ra guy e pi n’ey u m’on ma ra ayuwegdad ni ngad fal’eged rogodad. (Ezra 7:10) Nap’an e Fol Bible ni Tabinaw, ma gur, rayog ni ngam weliyed chon e tabinaw rom murung’agen fare convention ya ngar adaged ni ngar uned ngay?
3. Mang e rayog ni nge ayuwegdad ni ngad motoyilgad nib fel’ rogon?
3 Nap’an e Program: Faanra rayog mab fel’ ni ngam kolosis u m’on ni nge tabab e convention. Ngam offnag e cellphone rom, ya nge dabi magawonnagem ara dab mu lemnag ni ngam text ngak be’ u nap’an fare muulung. Ma faanra ba t’uf ni ngam onnag e cellphone rom, mag achignag lingan ya nge dabi magawonnag boch e girdi’ u nap’an e muulung. Ma faanra ga ra fanay e electronic tablet, ma ngkum guy rogon ni nge dabi magawonnag boch e walag. Dab ni abich ara ngan unum ban’en u nap’an e muulung. (Ekl. 3:1) Mu tiyan’um ko en ni be pi’ e welthin. Ma nap’an ni yira beeg e thin nu Bible, mag yaliy ko birom e Bible. Mu yoloy boch e thin.
4. Uw rogon nrayog ni nge ayuweg e piin gallabthir e bitir rorad ni ngar motoyilgad mar filed ban’en u nap’an fare convention?
4 Ku gadad baadag ni nge motoyil, me fil e pi bitir rodad ban’en. Proverbs 29:15 e be yog ni gaar: “Faanra fare tir e tin baadag e be rin’, ma ra tamra’nag e chitiningin.” Ere, bfel’ ni nge par chon e tabinaw u taabang ya nge yag ko gallabthir ni ngar ayuwegew e bitir rorow ni ngar tiyan’gad u nap’an e muulung, ma dab ur sabethingad ara ngar textgad ara ngaur yanyangad ndariy fan. Yugu aram rogon ni ku yad ba bitir, ma darur nanged fan gubin ban’en ni yibe weliy, machane rayog ni ngan skulnagrad ni ngar tiyan’rad, ma dabin wagey.
5. Mang nib ga’ fan ni ngan yan u daken e pi n’en ni kan weliy u nap’an fare convention, ma uw rogon ni ngad rin’ed e re n’ey?
5 Tomuren fare Program ni Gubin e Rran: Dab mu od nge n’uw e nep’. Mu gay rogon ni ngam toffan me gaman e chuchuw rom. Ga ra sul u daken e pi n’en ni kan weliy u nap’an e muulung, ma ra mo’maw’ rom ni ngam pagtalin. Ere, ra yib angin ngom nge chon e tabinaw rom nfaanra gimed ra tay buchuuw e tayim ni gubin e rran u tomuren gubin e muulung ni ngam marod u daken e pi n’en ni kan weliy u nap’an fare convention. Ma faanra ngam marod boch e pi walag nga bang ko abich, mab fel’ ni ngam fek e pi n’en ni kam yoloy, mag weliy e pi n’en nri ga baadag ko fare muulung. Nap’an ni ga ra sul nga tabinaw u tomuren fare convention, ma nap’an e Fol Bible ni Tabinaw ma rayog ni ngam weliyed chon e tabinaw rom e pi n’en ni kam filed u nap’an e convention. Maku rayog ni ngam mel’eg reb e rran u lan e wik ni ngam weliyed chon e tabinaw rom murung’agen e pi babyor nib beech ni kan pi’ ko fare convention.
6. Ba gaman ni kemus ni ngam un nga reb e convention, fa? Mu weliy.
6 Dabi yib angin e ggan ni ngan kay u nap’an reb e abich nib ga’, nfaanra dabin yengyeng nib fel’ rogon ya nge yag ni maruwel u fithik’ i dowey. Rayog ni ngad taareb rogonnaged e re n’ey ko fare convention ni ngad uned ngay. Ere, rib ga’ fan ni ngad fal’eged e motoyil, ma gad fol ko pi fonow ni kad filed u nap’an e pi muulung.