“Mog Nge Muulung e Girdi’”
1. Mang e ba taareb rogon ko pi district nge international convention ni gad ma tay nge fare muulung ni tay piyu Israel u tomuren ni kar chuwgad u Egypt?
1 De n’uw nap’an nga tomuren ni ke chuw piyu Israel u Egypt, me yog Jehovah ngak Moses ni nge yog ko girdi’ ni ngar ‘muulunggad’ nga daken e Burey ni Sinai ni ngar motoyilgad ko thin Rok, ya nge yag ni yib Madgun u wan’rad mi yad fil e thin Rok ngak pi fakrad. (Deut. 4:10-13) Dariy e maruwar riy nde pagtalin e girdi’ rok Got e re ngiyal’ i n’em ma ke ayuwegrad ni nge gel e michan’ rorad! Nap’an e tin ni bay yib e pul, ma ra muulung e pi tapigpig rok Jehovah nga taabang u nap’an e pi district nge international convention ni yad ra tay ni fan e nge skulnagrad Jehovah. Ere, mang e thingar da rin’ed me yib angin e re muulung ney ngodad?
2. Mang e thingar da rin’ed ya nge yag nda ‘fal’eged rogodad’ ni fan ko convention rodad?
2 ‘Ngam Fal’eged Rogomed’: I yog Jehovah ngak piyu Israel ni “ngar fal’eged rogorad” ni fan ko re muulung nem ni ngar ted u daken e Burey ni Sinai. (Ex. 19:10, 11) Ku er rogon e piin ni yad ra un ko pi convention ney nib t’uf ni ngar fal’eged rogorad, ma gathi kemus ni yigoo piin ni bay e n’en ni yad ra rin’ u nap’an e pi muulung nem. Bod ni, boor e walag nib t’uf ni ngar feked e matal rorad ko maruwel. Dabisiy ni taareb rogom ngak Nehemiah, ya baadag ni nge tal ko maruwel rok ni ir e en ni ma fek e kap rok Artaxerxes ni Pilung ya nge sul nga Jerusalem ni nge pi’ e ayuw ko maruwel ni ngan tay ni ngan toy e yoror ko re mach nem bayay, machane manang nrayog ni nge yog e re pilung nem ngak ndabi yan. Ere, meybil Nehemiah ma aram me yan i yog ko fare pilung e n’en ni baadag ni nge rin’. Ma aram me pag fare pilung ni nge yan miki pi’ boch ban’en ni ngan fanay ko re maruwel nem! (Neh. 2:1-9) Kam ning e matal rom ko en nib ga’ ko maruwel rom, ma kam yarmiy rogon e chur ni ngam tay nge gin ni ngam par riy, fa? Ba felfelan’ e piin piilal ni ngar ayuweged e piin nib t’uf e ayuw rorad. Mu guy rogon ni ngam taw nib papey ko pi muulung ney, ma ga fal’eg rogom ni ngam ‘chichiiy paam ko fapi thin nib riyul’ ni kam rung’ag.’—Heb. 2:1.
3. Mang e ra ayuwegdad ni ngad fal’eged rogodad ni fan ko pi welthin ni yira pi’ u nap’an e convention?
3 Ku reb e ban’en nib t’uf ni ngad rin’ed e aram e ngad fal’eged rogodad ni ngad motoyilgad ko pi welthin ni yira pi’ ma gad fil boch ban’en riy. (Ezra 7:10) Yira tay e program ko re convention ney ko fare Web site ni jw.org, ma bay kenggin e pi welthin riy ni yira pi’ nge taareb ara l’agruw e thin nu Bible nib puluw ngay. Ireray boch ban’en nib fel’ ni ngan weliy u nap’an e Fol Bible ni Tabinaw ko pi wik u nap’an ni ke chugur ko convention rodad. Bay boch e walag ni yad ma printnag e re program ney ni ngar yoloyed boch ban’en ngay ni kan weliy u nap’an e convention.
4. Uw rogon nrayog ni nge fil e gallabthir ban’en ngak pi fakrad u nap’an e convention?
4 ‘Mu Filed ngak Pi Fakmed’: Reb i fan nni tay fare muulung u daken e Burey ni Sinai e bochan ni nge ‘fil’ e pi gallabthir nu Israel ban’en ngak pi fakrad. (Deut. 4:10) Pi convention ni yima tay e aram reb e kanawo’ nrayog ni nge rin’ e piin gallabthir e re n’ey riy. Ere, susun ni nge par e piin bitir u tooben e gallabthir rorad u nap’an e re muulung ney, min ayuwegrad ni ngar motoyilgad. Ma tomuren ni ke m’ay e muulung ngu nap’an ni kar ted e fol Bible ni tabinaw, ma rayog ni ngar sulod u daken e pi n’en ni kan weliy u nap’an e re muulung ney.
5. Uw rogon nra yib angin fare convention ngodad?
5 Fare muulung ni tay piyu Israel u daken fare Burey ni Sinai e ke ayuwegrad ni nge ga’ fan u wan’rad e tow’ath rorad ni yad e girdi’ rok Got. (Deut. 4:7, 8) Fare convention rodad ni bay ni tay e kan fal’eg rogon ni ngki yib angin ngodad. Ireray reb e rran nrayog ni ngad fanayed ni ngad felfelan’gad ko pi n’en ni yira rin’ riy nra gelnag e michan’ rodad ma gad chag pi walagdad u taabang. (Isa. 35:7-9) Bochan ni ke chugur fare rran rok Jehovah, ma susun ndab da paged e biney e muulung ni yima tay ni fan e nge bagadad me pi’ e athamgil nga laniyan’ bagadad!—Heb. 10:24, 25.