Re Fel’ngin Nth’abi Ga’ Fan ni Nga i Dag Reb e Sensey nib Manigil
1. Mang e re fel’ngin nra ayuweg be’ ni nge mang reb e sensey nib manigil?
1 Mang e re fel’ngin nra ayuweg be’ ni nge mang reb e sensey nib manigil? Skul nib tolang? Fa urngin ban’en ni manang? Fa salap rok? Bin riyul’ riy e aram fare fel’ngin ni ke lebguy fare Motochiyel, ma ir e i tay pi gachalpen Jesus ni yad ba gagiyel u fithik’ e girdi’, ma aram e bin th’abi ga’ i fel’ngin Jehovah. (John 13:35; Gal. 5:14; 1 John 4:8) Re fel’ngin nem e aram e t’ufeg, ma aram e n’en ni ma dag e sensey nib manigil.
2. Mang nib ga’ fan ni ngaud t’ufeged e girdi’?
2 Mu T’ufeg e Girdi’: Jesus ni ir fare Sensey Nth’abi Fel’ e ma t’ufeg e girdi’, ma aram e n’en ni k’aringrad ni ngar motoyilgad ngak. (Luke 5:12, 13; John 13:1; 15:13) Faanra gad ma lemnag e girdi’, ma gubin ngiyal’ nra mab e kanawo’ ngodad ni ngad machibgad, ma gad ra rin’. Dab da talgad ni bochan e togopuluw nge moning ni yibe tay ngodad. Ma gad ra dag ni gad be lemnag e piin ni gad be machibnagrad, maku gad ra thilyeg rogon ni ngad nonad ngorad ya nge m’ag ngorad. Maku ra m’agan’dad ngay ni ngad pied e tayim ni fan ngorad nge ku nap’an ni gad be fal’eg rogodad ni fan ko fol Bible ni gad ra tay.
3. Uw rogon nra ayuwegdad e t’ufeg rodad ko tin riyul’ ni bay u Bible u nap’an e machib?
3 Nge T’uf Rom e Tin Riyul’ ni Bay u Bible: Kub t’uf rok Jesus e tin riyul’ ni bay u Bible ma rib ga’ fan u wan’. (Matt. 13:52) Faanra ba t’uf e tin riyul’ rodad, ma ra ud weliyed nib pasigan’dad ngay, ma re n’ey e ra k’aring e girdi’ ni ngar adaged ni ngar motoyilgad ngodad. Re t’ufeg ney e ra ayuwegdad ni ngad tedan’dad ko pi n’en nib ga’ fan ni gad be weliy ko bin ni nga i magafan’dad ko tin ndabiyog rodad. Maku rayog ni nge ayuwegdad ni nge war e marus rodad u nap’an e machib.
4. Uw rogon nrayog ni ngad maruweliyed e t’ufeg?
4 Mmaruweliy e T’ufeg: Uw rogon ni ngad maruweliyed e t’ufeg rodad ngak e girdi’? Susun e ngad lemnaged e t’ufeg ni ke dag Jehovah nge Jesus ngodad, nge rarogon e girdi’ ni yad bay ko gin ni gad ma machib riy. (Mark 6:34; 1 John 4:10, 11) Ra ud filed e Bible ni gubin ngiyal’ ma gad be fal’eg i lemnag, ma aram e rayog ni nge gel e t’ufeg rodad ko tin riyul’. T’ufeg e aram bang u wom’engin gelngin Got nib thothup. (Gal. 5:22) Ere, rayog ni ngad ninged ngak Jehovah gelngin nib thothup ma gad wenig ngak ni nge ayuwegdad ni nge gel e t’ufeg rodad. (Luke 11:13; 1 John 5:14) Faan gad ra dag e t’ufeg ma rayog ni ngad manged sensey nib manigil ndemtrug tolngin e skul rodad, ara urngin ban’en ni gad manang u murung’agen e tin riyul’, ara salap rodad.