Rogon ni Ngan Fanay fare Babyor ni Thin Nib Fel’ Ni Yib Rok Got!
Reb e Brochure nib Beech ni Kan Ngongliy ni Fan e Ngan Sul ni Ngan Tababnag e Fol Bible ko Girdi’
1. Mang fa bin nib beech e brochure ni kan pi’ u nap’an fare District Convention ni kenggin e “Mu Kol Ayuw u Rogon ni Ga Be Lem!” ni kan ngongliy ni nge ayuwegdad u rogon ni ngad sulod ko girdi’, ngad tababnaged e fol Bible ngorad?
1 Nap’an fare District Convention ni kenggin e “Mu Kol Ayuw u Rogon ni Ga Be Lem!”, ma gadad ba felfelan’ ya ke yag fare brochure nra ayuwegdad u rogon ni ngad sulod ngad tababnaged e fol Bible ko girdi’. Re brochure ney e ke yan nga lon fare brochure ni Mang e Ba T’uf ni Ngad Rin’ed ku Got?, ba ngoch e pi guruy ni bay riy mab tamilang. Rayog ni ngam fanay ni ngam tababnag e fol Bible ngak be’ u nap’an ni kam mada’gow u tabinaw rok. Yugu aram rogon ni fare brochure ni Mang e Ba T’uf ni Ngad Rin’ed ku Got?, e be tamilangnag e n’en ni thingari rin’ reb e Kristiano ya nge yag ni nge fel’ u owchen Got, ni yu ngiyal’ e ba mo’maw’ rok be’ ni fin be un ko fol Bible ni nge rin’ e pi n’ey, machane fare brochure nib beech e be tamilangnag murung’agen e thin nib fel’ u Bible.—Acts 15:35.
2. Mang fan ni kan ngongliy fare brochure ni kenggin e Thin nib Fel’ ni Yib Rok Got!?
2 Mang fan ni kan ngongliy e re brochure ney? Pi walag u ga’ngin yang u fayleng e kar ninged e babyor nib mom ma ra k’aring e girdi’ ni ngar adaged ni ngar nanged e tin riyul’, ma yad ra adag ni ngar filed fare babyor ni Mang e Ri Be Fil e Bible?, ni ir e gad ma fanay ni ngad filed e Bible ngak e girdi’. Girdi’ ndabun ni ngar filed e babyor nib dub’ag ken e ba ga’ ni yad baadag ni yad ma fil e Bible ni yad be fanay e brochure. Maku brochure e ba mom rogon ni kan piliyeg u boor mit e thin.
3. Uw rogon nib thil e re brochure ney nga yu ken e babyor ni yima fanay ni ngan fil e Bible ngak be’?
3 Rogon ni Kan Ngongliy: Boor ko pi babyor ni kad fanayed ni ngad filed e Bible ngak e girdi’ e kan yoloy ni fan e nge beeg e girdi’ mi yad nang e tin riyul’ ni yugu aram rogon ndariy be’ nra ayuwegrad. Biney e babyor e ba thil rogon ni kan ngongliy. Kan fal’eg ni fan ko fol Bible ni bay be’ ni nge ayuwegey. Ere nap’an ni ngan pi’ ngak be’, mab ga’ fan ni ngan weliy taareb ara l’agruw e paragraph riy. De n’uw e pi paragraph ni bay riy, ere rayog ni ngan weliy u nap’an ni yira mada’nag be’ u tabinaw rok ara gin ni be maruwel riy. Ba fel’ ni ngan tabab ko bin 1 e guruy, machane demtrug bang u lan fare brochure nrayog ni ngan tabab riy.
4. Uw rogon nra ayuwegdad e re brochure ney ni ngad filed e thin ko Bible ngak be’ ni kad mada’gad?
4 U lan boor e pi babyor rodad ma rayog ni ngad pirieged e fulweg ko pi deer u lan e paragraph. Machane biney e babyor e ba ga’ ni gad ra pirieg e fulweg riy u lan e Bible. Yooren e girdi’ e yad baadag ni ngar filed ban’en ni ke yib u Bible ma gathi u lan e pi babyor rodad. Ere yooren e thin nu Bible riy e dan yoloy e thin riy nga lan e paragraph, ya thingar ni beeg u Bible. Ma re n’ey e ra ayuweg e piin ni yad be fil e Bible ni ngar nanged ni pi n’en ni yad be fil e ke yib rok Got.—Isa. 54:13.
5. Mang nib ga’ fan ni en ni be fil e Bible e nge fal’eg rogon ir u m’on ni nge tababnag e fol Bible?
5 Fare brochure e der weliy fan urngin e thin nu Bible ni bay riy. Mang fan? Ya kan ngongliy ya nge yag rok faen ni yibe fil e Bible ngak ni nge fith boch e deer, ma faen ni ir e be fil e Bible e nge nang rogon ni nge fanay e salap rok u rogon ni nge ayuweg facha’. Aram fan nib ga’ fan ni ngan fal’eg rogoy u m’on ni ngan fil e Bible ngak be’. Mu kol ayuw, ni nge dabi yoor e thin ni nga mog. Ya yu ngiyal’ ma gad baadag ni ngad weliyed fan e thin nu Bible. Machane, ba ga’ angin nfaanra nga dogned ngak e en ni gad be fil e Bible ngak ni nge weliy fan e thin nu Bible. Gad ra fith e deer nib fel’ rogon, ma rayog ni ngad ayuweged be’ ni nge fal’eg i lemnag fan fare thin nu Bible ni kan beeg.—Acts 17:2.
6. Uw rogon ni ngad fanayed fare brochure (a) u nap’an ni gad ra pirieg e girdi’ ni be maruwar lanin’rad u murung’agen Got nge thin rok u Bible? (b) u nap’an ni yibe machib u mit e tabinaw i yan? (c) u nap’an ni ngan fith be’ ko baadag ni nge fil e Bible, fa? (d) u nap’an ni ngan sul ngak be’ ni kan machibnag?
6 Gubin e pul nrayog ni ngan pi’ e re brochure ney, ni bod rogon e n’en ni yima rin’ nga boch e babyor ni yima fanay u nap’an ni ngan fil e Bible ngak be’. Boor e girdi’ ni yad baadag ni ngar fanayed e re babyor ney u nap’an ni ngar fithed e girdi’ ko yad baadag ni ngar filed e Bible fa, danga’. Bod rogon e n’en ni ka nog u nap’an fare district convention, nap’an ni gad ra fanay e re babyor ney u nap’an ni ngad sulod ngak e piin ni yad baadag e machib ma “rib gel e felfelan’ ko re maruwel ney ni ngan sul ko girdi’!”—Mu guy e pi thin ni bay ko kahol ko page 5-7.
7. Uw rogon ni ngam fil e Bible ngak be’ ni ga be fanay fare brochure?
7 Rogon ni Ngan Fil e Bible Ngak Be’: Som’on, ma rayog ni ngad beeged e deer ni bay e namba riy ma kan yoloy nib gel ramaen. Bin migid, ma ngad beeged e thin nu Bible ni kan yoloy nib thig. Ma ngad fanayed boch e deer nib fel’ nra ayuweg be’ ni nge nang fan e pi thin nu Bible. Ma u m’on ni nga darod ko bin migid, ma nga dogned ngak ni nge pi’ e fulweg ko fare deer ni kan yoloy nib gel ramaen, ya nge yag ni ngad nanged ko ke nang fan, fa. Ra ke gaman in yay ni kan sul ngak be’ ma sana ba fel’ ni ngan weliy taareb fare deer ni kan yoloy nib gel ramaen. Ma boch nga m’on, ma sana rayog ni ngan yoornag boch e tayim ya nge yag ni ngan weliy reb e guruy.
8. Mang e nga dogned ngak be’ u m’on ni ngan beeg e pi thin nu Bible, ma mang fan?
8 Pi thin nu Bible ni kan yoloy nga m’on ko fare thin ni “mu beeg” e be pi’ e fulweg ko pi deer ni kan yoloy nib gel ramaen. Nap’an ni nga mog ngak be’ ni ngam beegew reb e thin nu Bible, ma dab mu gaar, “Ke yoloy Paul” ara, “Mu tay fanam i yan e n’en ni yog Jeremiah.” Ya ra lemnag be’ ni thin ko girdi’ e gad be beeg. Ere ba fel’ ni gad ra gaar, “Fare Thin rok Got e be gaar” ara, “Mu guy e n’en ni be tamilangnag e Bible.”
9. Thingar ni beeg urngin e thin nu Bible u nap’an e fol Bible?
9 Thingar ni beeg urngin e thin nu Bible ni bay u reb e paragraph fa kemus ni fare thin nu Bible ni bay ko tungun ni kan yoloy fare thin ngay ni “mu beeg” nga m’on riy? Re n’ey e be yan u rarogon be’. Gathi kemus ni bay e pi’ thin ney ko Bible ko fare paragraph ya nge yag ni ngan nang e gin ni yira pirieg riy u Bible. Ya ra reb e thin nu Bible mab fel’ ni yira weliy fan. Machane, yu ngiyal’ ma de yoor e tayim rok be’, ara gathi ri baadag e machib, ara gathi rib salap ko beeg babyor. Ere, faanra aram rogon ma sana ba puluw ni kemus ni fare thin nu Bible ni bay e “mu beeg” u m’on riy e ngan beeg.
10. Mingiyal’ e rayog ni ngad talgad ko fare brochure min tabab ko fare babyor ni Mang e Ri Be Fil e Bible?
10 Ngiyal’ ni Ngan Tal ko fare Brochure min Tabab ko fare Babyor ni Mang e Ri Be Fil e Bible?: U tomuren ni kad tababnaged e fol Bible, ma rayog ni ngad fanayed fare ke babyor ni Mang e Ri Be Fil e Bible? ara rayog ni ngad ululgad i fil fare brochure ni Thin nib Fel’ ni Yib Rok Got! Pi walag e rayog ni ngar gonopiyed e ngiyal’ ni ngar tababgad i fil fare ke babyor ni Mang e Ri Be Fil e Bible?, ngak e en ni yad be fil e Bible. Machane, nap’an ni yad ra tabab i fil e re ke babyor ney ma gur, thingar sulod nga tabolngin e re babyor ney? Dariy ba motochiyel ni kan tay ni be yog e gin ni ngan tabab riy, ya ba thilthil e girdi’. Machane, yooren e piin ni yibe fil e Bible ngorad e ra yib angin ngorad ni ngan sul u daken e pi n’en ni kan fil ni yibe fanay e re ke babyor ney.
11. Mang fan nthingar da fanayed e re brochure ney nib fel’ rogon?
11 U lan e re fayleng ney ni buchuuw murung’agen e thin nib fel’ ni bay riy, ma gadad ba tow’ath ni ngad weliyed murung’agen e thin nib fel’ ni bay rogon nga Gil’ilungun Got ni be gagiyeg, ma dabki n’uw nap’an ma ra yibnag fa bin nib beech e fayleng ni piin nib mat’aw e yad ra par riy! (Matt. 24:14; 2 Pet. 3:13) Pagan’dad ni boor e girdi’ ni kar rung’aged e re thin ney e ra lungurad: “Ri ban’en nib manigil ni nga ni guy be’ ni kan tay e thin nga l’ugun ke milekag u daken e pi burey ke yib, ni ke fek e thin nib fel’ i yib, ni murung’agen e gapas! Ke yib i yog ni ke gel Somol, me gaar ngak Zion, Got rom e ir e pilung!” (Isa. 52:7) Yibe athapeg ni ngaud fanayed e re ke brochure ney ni ngad feked fare thin nib fel’ i yan ngak e piin ni baadag e machib u lan e pi binaw ni gad ma machib riy!
[Kahol ko page 5]
Girdi’ ni Be Maruwaran’rad u Murung’agen Got nge Bible:
● U lan boch e binaw, ma bay e walag ni kar pirieged ni bay e girdi’ riy ndubrad ni ngan weliy murung’agen “Got” nge “Bible” ngorad. Faanra aram rogon, mab fel’ ni ngan weliy boch ban’en ni ir e ba ga’ ni yad ma lemnag, ni bod rogon ni nge yag reb e am nib fel’ rogon ni ma gagiyeg, nge gin nrayog e ayuw riy ni fan ko tabinaw, nge pi n’en nra buch boch nga m’on. Sana rayog ni ngan pi’ fare brochure ni Thin nib Fel’ ni Yib Rok Got! ngak be’ u tomuren ni kad nonad ngak ni ke yoor yay, ma gad weliy ngak ko uw rogon ni ngad nanged nriyul’ ni bay Got nge mang fan nrayog ni ngan pagan’uy ko Bible.
[Kahol ko page 6]
Nap’an ni Ngan Yan ko Machib u Mit e Tabinaw i Yan:
● “Ku gub ni nggu dag ngom ni gathi rib mo’maw’ ni ngan nang ko mang e n’en nib m’agan’ Got ngay ni fan ko girdi’ gabul nge langlath. Kaam lemnag ko rayog rok Got ni nge chuwegdad u fithik’ e gafgow, fa? [Mmotoyil ko n’en nra yog.] Re brochure ney e ra dag ko uw u Bible e rayog ni ngan pirieg e fulweg riy. [Mu pi’ ba ken ngak, ma gimew beeg e bin som’on e paragraph ko bin 1 e guruy, nge Jeremiah 29:11.] Ere bochan e n’en ni kad filew u roy, mab puluw u wan’um ni baadag Got ni nge pi’ e yafas nib fel’ ngodad boch nga m’on, fa? [Mmotoyil ko n’en nra yog.] Faanra ga baadag, ma nggu pi’ e re ke babyor ney ngom. Bin migid, ma rayog ni ngad beeged e bin l’agruw e paragraph ya nge yag ni ngad pirieged e fulweg ko re deer ni baaray, ‘Uw rogon ni nge chuweg Got lik’ngin e magawon ni ma yib ko girdi’?’” Faanra kam guy ni faen ni ga be machibnag e rayog ni ngam nonow nib n’uw boch nap’an, ma rayog ni ngam beegew ma gimew weliy e bin migid e paragraph nge fa dalip e thin nu Bible ni bay riy. Mu yarmiy ni ngam sul ngak ya ngam weliyew e bin l’agruw e deer ko re guruy nem.
● “Boor e girdi’ e ba ga’ ni yad baadag ni ngar meybilgad u nap’an ni ke yib e magawon ngorad. Bay yu ngiyal’ ni ga ma meybil, fa? [Mmotoyil ko n’en nra yog.] Uw rogon u wan’um, urngin e meybil ni ma motoyil Got ngay, ara bay boch e meybil ndabun? [Mmotoyil ko n’en nra yog.] Bay reb e brochure ni be dag ko uw rogon ni ngan pirieg e fulweg ko pi deer ney. [Mu pi’ ba ken ngak, ma gimew weliy e bin som’on e paragraph ko guruy ni 12 nge fapi thin nu Bible ni bay fare thin ni “mu beeg” ni kan yoloy u m’on riy.] Dabisiy nrib fel’ e re n’ey nib m’agan’ Got ngay ni nge motoyil ngodad, fa? Machane, faanra nge fel’ rogodad ko meybil rodad mab t’uf ni ngad nanged Got nib fel’ rogon. [Ngan yan ko fare guruy ni 2 min dag fapi subheading.] Faanra ga baadag, ma gu ra pi’ e re ke babyor ney ngom, ma yay ni migid ma gadow ra beeg e fulweg ko pi deer ney u Bible.”
● “Ku gub ni ngad weliyew murung’agen e n’en ni be magafan’ e girdi’ ngay ni fan ko re fayleng ney nge n’en nra buch boch nga m’on. Uw rogon u wan’um, rayog ni nge fel’ boch rarogon e fayleng, fa? [Mmotoyil ko n’en nra yog.] Boor e girdi’ e kar gingad ngay u nap’an ni kar nanged ni bay e thin nib fel’ u Bible nrayog ni nge pi’ e athap ngodad. Baaray boch e deer ni be pi’ e Bible e fulweg riy.” Mu pi’ reb e brochure ngak, ma gog ngak ni nge mel’eg reb e deer nri baadag ni bay u keru’ fare brochure. Mag pithig ko fare guruy ngam dag ngak rogon e fol Bible. Mu yarmiy ni ngam sul ngak ngam weliyew e bin migid e deer ko fare guruy.
[Kahol ko page 7]
Mu Guy Rogon ni Ngam Ognag e Fol Bible ngak Be’:
● “Ku gub nggu weliy ngom reb e kanawo’ nib beech u rogon ni ngan fil e Bible ngak be’. Re brochure ney e bay 15 e guruy ni be dag ko uw u lan e Bible e rayog ni ngam pirieg e fulweg riy u boch e deer nib ga’ fan. [Mu dag keru’ fare ke babyor.] Bay ba ngiyal’ ni kam gay rogon ni ngam nang fan e thin nu Bible, fa? [Mmotoyil ko n’en nra yog.] Nggu dag ngom feni rib mom ni ngan fil e pi guruy ni bay riy. [Mu weliyew e bin som’on e paragraph ko bin dalip e deer ko bin 3 e guruy, ma ngam beegew e Revelation 21:4, 5. Faanra rayog, ma ngam beegew e bin migid e paragraph nge pi thin nu Bible ni bay e “mu beeg” riy.] Faanra ga baadag, ma rayog ni nggu pi’ e re brochure ney ngom. Mu athamgil ni ngam fil e Bible taab yay. Faanra ga baadag, ma rayog ni ngam ulul. Ma faanra dabum ma de t’uf ni ngam ulul. Yay ni migid, ma gadow ra weliy e bin som’on e guruy. Mu tay fanam i yan ni kemus ni taareb e page n’umngin.”
[Kahol ko page 7]
Nap’an ni Ngam Sul Ngak Be’ Mag Dag Ngak fare Brochure nib Beech:
● Nap’an ni ngam sul ngak be’ ni baadag e machib, ma rayog ni nga mog ni nge lungum: “Gub felfelan’ ni kad mada’gow bayay. Kug fek e re brochure ney ni bay e fulweg u boor e deer u Bible riy nib ga’ ni ma fith e girdi’. [Mu pi’ ba ken ngak, ma gog ngak ni nge yaliy keru’.] Bin ngan e ri ga baadag? [Mmotoyil ko n’en nra yog. Ma gimew weliy fare guruy ni ke mel’eg.] Nggu dag ngom ko uw rogon ni ngan fanay e re brochure ney ni ngan gay e fulweg u Bible.” Mu dag rogon ni ngan fil ma aram e ngam weliyew taareb ara l’agruw e paragraph riy nge fare thin nu Bible ni bay e “mu beeg” riy. Ireray feni mom ni ngan tababnag e fol Bible! Mu pi’ fare brochure ngak, ma ngam weliyew ko wuin e ngam sul ngam guy. Nap’an ni kam mu’nagew reb e guruy, ma rayog ni ngam weliyew reb ni ke mel’eg ara ngam tababgow u tabolngin fare brochure.