Ga Ra Folwok u Rogon nib Pasig Jehovah nge Jesus u M’on ngu Tomuren e Rofen ni Puguran, Fa?
1. Mang e ma athamgil e Pi Mich Rok Jehovah ni ngar rin’ed u m’on ngu tomuren e rofen ni Puguran?
1 Jehovah e ba pasig ni nge lebguy e n’en nib m’agan’ ngay. Be weliy e Isaiah 9:7, NW murung’agen e pi tow’ath nra yibnag Gil’ilungun Got ni gaar: “I Somol ni Gubin ma Rayog Rok e ba pasigan’ ngay ni nge rin’ urngin e pi n’ey.” Ku er rogon Fak Got nnap’an ni immoy u fayleng mab pasig ni nge machibnag e tin riyul’. (John 2:13-17; 4:34) Gubin e duw u m’on ngu tomuren e rofen ni Puguran ma bokum milyon e pi tamachib u ga’ngin yang e fayleng e yad ma athamgil ni ngaur folwokgad rok Jehovah nge Jesus u rogon ni yow ba pasig, ni aram e yad ma yoornag e n’en ni yad ma rin’ ni fan ko fare maruwel ni machib. Gur, ga ra mang bagayad e pi girdi’ ney?
2. Rofen ni March 7 ko re duw ney, ma mang e gad ra rin’ ni bochan e gadad ba pasig?
2 Ngan Pining e Girdi’ ko Puguran: Biney e duw e yira tabab ni ngan wereg fare babyor ni ngan pining e girdi’ ni ngar uned ko fare Puguran ko rofen ni Sabado ko March 7. Mu yarmiy e tayim rom ya nge yag ni ngam un ko machib u fithik’ e pasig. Pi ulung u ga’ngin yang e fayleng e yad ra felfelan’ u nap’an ni yad be athamgil ni ngar pininged gubin e girdi’ ko gin ni yad be machib riy ni ngar uned ko re madnom ney. Ere, aram fan ni ngad athamgilgad ni ngad pininged e piin ni gad be fil e Bible ngorad, nge piin ni gad ma sul ngorad u nap’an e machib, nge girdi’ ni gad ma maruwel u taabang, nge girdi’ rodad, nge piin ni gad nga skul ni aram e ngad pied reb e invitation ngorad ara ngad fanayed fare website rodad ni jw.org.
3. Uw rogon ni ngad yoornaged e tayim rodad ni fan ko machib ko pul ni March nge April?
3 Pioneer ni Ayuw: Bochan ni gad ba pasig ma re n’ey e ra k’aringdad ni ngad yoornaged e tayim rodad ni fan ko machib. Ma bochan nrayog ni ngan un ko pioneer ni ayuw ni kemus ni ngan thognag 30 e awa, ere dariy e maruwar riy nrayog rok boor e walag ni ngar uned ko pioneer ni ayuw ko pul ni March nge April. Ere nap’an ni gimed ra tay chon e tabinaw rom e fol Bible u taabang ara ga be fol Bible ni yigoo gur mab fel’ ni ngam fal’eg i lemnag rogon nrayog ni ngam rin’ e re n’ey. (Prov. 15:22) Bochan ni gab felfelan’ ni ngam un ko re maruwel ney, ma rayog ni ngam k’aring boch e walag ni ngkur pasiggad ni ngar uned ngom ko re maruwel ney. Faanra ga ra yarmiy e tayim rom nge yag ni ngam yoornag e tayim rom ni fan ko machib, ma aram e ga be folwok rok Jesus u rogon nib pasig.—Mark 6:31-34.
4. Faanra gad ra folwok rok Jehovah nge Jesus u rogon ni yow ba pasig, ma mang angin nra yib ngodad?
4 Yira tow’athnagdad ni faan gad ra folwok rok Jehovah nge Jesus u rogon ni yow ba pasig u m’on ngu tomuren e rofen ni Puguran. Ya ireray reb e kanawo’ ni nge yoor boch e girdi’ ni gad ra mada’nagrad u nap’an e machib. Ma aram e gad ra felfelan’ ni bochan e gad be pigpig ngak Jehovah maku gad be ayuweg boch e girdi’. (Acts 20:35) Ma bin th’abi ga’ fan riy e gad ra felfelan’nag e Got rodad nge Fak ni yow ba pasig.