T’ufeg e Ra Ayuwegdad ni Ngad Athamgilgad u Nap’an ni Yibe Fanenikaydad

1. Mang fan nsusun e dab da gingad ngay ni faanra fanenikaydad e girdi’ ko re fayleng ney nrogon ni bay ko Matthew 24:9?

KE SUNMIYDAD Jehovah nrayog ni ngad t’ufeged e girdi’, mu kud adaged ni ngan t’ufegdad. Ere nap’an nra fanenikaydad be’, ma ri ma kireban’dad maku rayog ni ngkud rusgad. Reb e walag nib pin ni ka nog Georgina ngak ni ma par u Europe e yog ni gaar: “Nap’an ni ke gaman 14 e duw rog, mi ri fanenikayeg e chitinag ni bochan e gu be pigpig ngak Jehovah. Gu lemnag ndakunir t’ufegeg, ma gathi gag be’ ni gub manigil.”b Ku bay reb e walag ni pumoon ni ka nog Danylo ngak ni yoloy ni gaar: “Nap’an ni toyeg e pi salthaw, mi yad yog boch e thin nib kireb ngog, ma yad be gafgownageg ni bochan e gag reb e Pi Mich Rok Jehovah, ma aram mug rus miki yib e tamra’ ngog.” Riyul’ ni ma kireban’dad u nap’an nra fanenikaydad e girdi’, machane dab da gingad ko re n’ey. I yog Jesus u m’on riy ni yira fanenikaydad.​—Mu beeg e Matthew 24:9.

2-3. Mang fan ni yima fanenikay pi gachalpen Jesus?

² Girdi’ ko re fayleng ney e yad ma fanenikay pi gachalpen Jesus. Mang fan? Bochan ni gathi gadad e “girdi’ nu fayleng” ni bod Jesus. (John 15:17-19) Ere yugu aram rogon ni gad ma tayfan e am ko re fayleng ney, machane darud liyorgad ngorad, ara ud liyorgad nga boch ban’en nib l’ag rogon ko am ni ma tay e girdi’ fan ni bod e flak. Ya yigoo Jehovah e gad ma liyor ngak. Gad ma tayfan mat’awun Got ni ir e nge gagiyegnag e girdi’, ni ban’en ni yog Satan nge “pi fak” ndariy mat’awun Got ni nge rin’. (Gen. 3:1-5, 15) Gad ma machibnag ni kemus ni yigoo Gil’ilungun Got e rayog ni nge chuweg urngin e magawon ko girdi’, ma dabki n’uw nap’an ma bayi thang urngin e piin yad be togopuluw ngay. (Dan. 2:44; Rev. 19:19-21) Re n’ey e ra k’aring e felfelan’ ngak e piin nib sobut’an’rad, machane piin nib kireb e dab ra felfelan’gad ngay.​—Ps. 37:10, 11.

³ Ku yima fanenikaydad ni bochan e gad ma fol ko pi motochiyel rok Got. Rogon e motochiyel rok Got u murung’agen e tin nib fel’ nge tin nib kireb e rib thil nga rogon e tin nib fel’ nge tin nib kireb u wan’ e girdi’ ko re fayleng ney. Bod ni, boor e girdi’ e ngiyal’ ney e darur lemnaged nib kireb e ngongol ndarngal ni yibe rin’ ni aram e re miti ngongol ni i rin’ e girdi’ nu Sodom nge Gomorrah ma aram fan ni thangrad Got! (Jude 7) Bochan ni gad ma fol ko pi motochiyel nu Bible nib l’ag rogon ko pi ngongol ney, ma aram fan ni ma moningnagdad e girdi’, ma yad ma yog nder ma m’agan’dad nga rogon e lem ko girdi’ nge boch ban’en ni yad ma rin’ nde puluw u wan’dad.​—1 Pet. 4:3, 4.

4. Mang l’agruw e fel’ngin nrayog ni nge ayuwegdad ni ngad athamgilgad u nap’an ni be fanenikaydad e girdi’?

⁴ Mang e rayog ni nge ayuwegdad ni ngad athamgilgad u nap’an ni be fanenikaydad e girdi’ ma yad be yog e thin nib kireb ngodad? Ba t’uf ni ngari mich u wan’dad nra ayuwegdad Jehovah. Michan’ rodad e bod fa gin’en ni yima mith nga fon nrayog ni ngad “piliged ngay urngin gan e gat’ing ni be yik’ ni be pag Faanem nib Kireb” ngodad. (Efe. 6:16) Machane gathi kemus ni yigoo michan’ e ba t’uf rodad, ya kub t’uf e t’ufeg rodad. Mang fan? Bochan ni be’ ni bay e t’ufeg rok e de “papey e damumuw ngak.” Be’ ni bay e t’ufeg rok e rayog ni nge athamgil u fithik’ urngin mit e gafgow ni yibe tay ngak. (1 Kor. 13:4-7, 13) Ere chiney e ngad weliyed rogon nrayog ni nge ayuwegdad e t’ufeg rodad ngak Jehovah, nge pi walagdad, nge pi toogor rodad ni ngad athamgilgad u fithik’ e fanenikan ni yibe tay ngodad.

T’UFEG RODAD NGAK JEHOVAH E RA AYUWEGDAD NI NGAD ATHAMGILGAD U NAP’AN NI YIBE FANENIKAYDAD

5. Mang e yag ni nge rin’ Jesus ni bochan e ba t’uf e Chitamangin rok?

⁵ Fare nep’ u m’on ni nge thang e pi toogor rok Jesus e fan rok me yog ngak pi gachalpen nra pared ni yad ba yul’yul’ ngak ni gaar: “[Ba] t’uf rog e en ni Chitamangiy; aram fan ni kug rin’ urngin ban’en ni bod rogon ni ke yog ngog.” (John 14:31) Bochan nib t’uf Jehovah rok Jesus, ma aram fan ni yag ni nge athamgil u fithik’ e pi skeng nib mo’maw’ ni i mada’nag. Ere ku arrogodad ni t’ufeg rodad ngak Jehovah e rayog ni nge ayuwegdad ni ngad athamgilgad.

6. Uw rogon u wan’ e pi tapigpig rok Jehovah e athamgil ni yad be tay u fithik’ e fanenikan ni be tay e girdi’ nu fayleng ngorad nrogon ni bay ko Roma 5:3-5?

⁶ Bochan nib t’uf Jehovah rok e pi tapigpig rok, ma aram e n’en ma ayuwegrad ni ngar athamgilgad u fithik’ e gafgow ni yibe tay ngorad. Bod nnap’an ni yog e bin th’abi tolang e tagil’ e puf oloboch rok e pi Jew ngak e pi apostal ni ngar talgad ko machib, mar dugliyed ni ngar ‘folgad rok Got ko bin ni ngar folgad rok e girdi’’ ni bochan e ba t’uf Got rorad. (Acts 5:29; 1 John 5:3) Ku ireray e re t’ufeg ni ma ayuweg pi walagdad ni ngar pared ni yad ba yul’yul’ u fithik’ e gafgow ni be tay e pi am ngorad nib kireb mab gel lungurad. Nap’an nra fanenikaydad e girdi’ ko re fayleng ney ma susun e dabi kireban’dad, ya bin riyul’ riy e ngad felfelan’gad ngay.​—Acts 5:41; mu beeg e Roma 5:3-5.

7. Mang e susun ni ngad rin’ed u nap’an nra togopuluw girdien e tabinaw rodad ngodad?

⁷ Rayog ni bin th’abi gel e skeng ni gad ra mada’nag e nap’an nra togopuluw girdien e tabinaw rodad ngodad. Nap’an ni yad ra guy ni gad baadag ni ngad filed murung’agen Jehovah, ma bay boch i yad nra lemnag ni kan bannagdad. Ma boch i yad e ra lemnag ni ke balyangan’dad. (Mu taarebrogonnag ko Mark 3:21.) Ku rayog ni ngar gafgownaged gadad ko thin nge ngongol rorad. Susun e dab da gingad ko togopuluw ni yad ra tay ngodad. I gaar Jesus: “Pi toogor rok be’ nth’abi ga’ e ra yan i aw ni girdi’ nu lan e tabinaw rok.” (Matt. 10:36) Bin riyul’ riy e, demtrug e n’en nra rin’ e girdi’ rodad ngodad, ma dab da fanenikayed yad. Ya faanra gel e t’ufeg rodad ngak Jehovah, ma aram e ku ra gel e t’ufeg rodad ngak e girdi’. (Matt. 22:37-39) Machane dab da togopuluwgad ko pi motochiyel nge pi kenggin e motochiyel u Bible ni bochan e ngad felfelan’naged be’.

8-9. Mang e ayuweg reb e walag nib pin ni nge par nib mudugil ni yugu aram rogon nib gel e togopuluw ni un tay ngak?

⁸ Georgina ni faan kan weliy murung’agen e yag ni nge par nib mudugil ni yugu aram rogon nib gel e togopuluw ni i tay e chitiningin ngak. I gaar Georgina: “Gu tababgow e chitinag ni nggu unew ko Pi Mich ko fol Bible. Machane nel’ e pul nga tomuren ni kug adag ni nggu un ko muulung, ma aram me tabab ni nge togopuluw ngog. Boch nga tomuren mug nang ni yad ma non e piin kar digeyed e bin riyul’ e liyor ma kar chelgad kar togopuluwgad ngay. Ya nap’an nra non ngog ma ma sul u daken boch ban’en nde riyul’ u murung’agen e bin riyul’ e liyor ni ka rogned ngak. Ma yog e thin nib kireb ngog, ma ma teltel piyan lolugeg, ma ma dun’uf k’angag ni be guy rogon ni nge dabkiyog ni nggu pogofan, maku ma n’ag e pi babyor rog. Tomuren ni ke gaman 15 e duw rog, ma aram mug un ko taufe. I guy e chitinag rogon ni nge talegeg ndab kug pigpig ngak Jehovah, ere yan i teg nga bang ni yima yan ni tay e pi rugod ngay ni kab fel’ yangarrad ni bay e magawon rorad ya nge yag nni ayuwegrad. Bay boch e fel’ yangaren u rom ni yad ma fanay e falay ni kireb ma boch i yad e ma rin’ boch ban’en nib togopuluw ko motochiyel ko am. Rib mo’maw’ ni ngam athamgil u fithik’ e togopuluw ni yibe tay ngom nib ga’ ni faanra be yib rok be’ nsusun e nge t’ufegem me ayuwegem.”

⁹ Mang e ayuweg Georgina ni nge athamgil? I gaar: “Rofen ni togopuluw e chitinag ngog e ku aram e rofen ni kafin gu mu’ i beeg e Bible rog ni polo’. Kari mich u wan’ug ni kug pirieg e tin riyul’, ma kari chugur e tha’ u thilmow Jehovah. Ba ga’ ni gu ma meybil ngak, ma ma motoyil ngog. Nap’an ni ug moy ko fa gin’en ni yima yan ni tay e pi rugod ngay ni kab fel’ yangarrad ni bay e magawon rorad, me yib reb e walag nib pin i guyeg me piningeg nga tabinaw rok, ma aram mu ug filew e Bible romow u taabang. Ngiyal’ nem e nap’an nug ra yan nga Tagil’ e Liyor, ma pi walag u rom e yad ma pi’ e athamgil nga lanin’ug. Ra daged ngog ni gag bang ko tabinaw rorad. Kari tamilang u wan’ug ndemtrug ko mini’ e toogor rodad, ma kab gel Jehovah ngak.”

10. Mang e rayog ni nge pagan’dad nra rin’ Jehovah ni Got rodad?

¹⁰ I yoloy apostal Paul ndariy ban’en nrayog “ni nge daregdad u rogon ni gadad ba t’uf rok Got ni ke yog ngodad u daken Kristus Jesus ni ir e Somol rodad.” (Rom. 8:38, 39) Ere yugu aram rogon ni yu ngiyal’ e ra ud gafgowgad, machane gubin ngiyal’ ni bay Jehovah rodad ni nge fal’eg lanin’dad me pi’ gelngidad. Ku be m’ug ko n’en ni buch rok Georgina ni ku ma ayuwegdad Jehovah u daken e pi walag u lan e ulung.

T’UFEG RODAD NGAK PI WALAGDAD E RA AYUWEGDAD NI NGAD ATHAMGILGAD U NAP’AN NI YIBE FANENIKAYDAD

11. Uw rogon ma fare t’ufeg ni weliy Jesus murung’agen ko John 15:12, 13 e ra ayuweg pi gachalpen? Mu weliy ban’en ni ke buch.

¹¹ Fare nep’ u m’on ni nge yim’ Jesus, me puguran ngak pi gachalpen ni ngaur t’ufeged yad. (Mu beeg e John 15:12, 13.) Manang ni faan yad ra pag farad ngar daged e t’ufeg ngorad, ma ra ayuwegrad ni ngar pared nib taareban’rad mar athamgilgad u nap’an nra fanenikayrad e girdi’ nu fayleng. Am lemnag e n’en ni buch ko ulung nu Thessalonika. Ka nap’an ni sum e re ulung nem ma aram me tabab e girdi’ ni ngar gafgownaged e pi walag riy. Yugu aram rogon, me par e pi walag nem ni yad ba yul’yul’ ma yad be dag e t’ufeg ngak e girdi’, ni ban’en nrayog ni ngad folwokgad riy. (1 Thess. 1:3, 6, 7) I pi’ Paul e athamgil nga lanin’rad ni ngar ululgad ngar gelnaged “boch” rogon ni yad be dag e t’ufeg. (1 Thess. 4:9, 10) T’ufeg e aram e n’en nra k’aringrad ni ngar pied e athamgil nga laniyan’ e piin ke kireban’rad, mar ayuweged e piin nib meewar. (1 Thess. 5:14) Ere riyul’ ni kar folgad ko n’en ni yog Paul ngorad, ya u lan e gin migid e babyor ni yoloy nge pi’ ngorad u tomuren sogonap’an reb e duw, me yog ni gaar: “Rogon nib t’uf bigimed rok bigimed e be ga’ i yan.” (2 Thess. 1:3-5) T’ufeg rorad e aram e n’en ni ayuwegrad ni ngar athamgilgad u fithik’ e magawon nge gafgow nra mada’naged.

12. Uw rogon ni dag boch e walag e t’ufeg ngorad u nap’an ni yibe mahl ko nam rorad?

¹² Am lemnag e n’en ni buch rok Danylo ni faan kan weliy murung’agen nge ppin rok. Nap’an ni taw e mahl ko binaw rorow, mu kur ululgow ngaur unew ko muulung nge machib u rogon nrayog rorow. Ku yow ma pi’ e ggan ni bay rorow ngak e pi walag. Ere yan i reb e rran me yib boch e salthaw ni bay e boyoch rorad nga tafen Danylo. I yog ni gaar: “Rogned ngog ni nggu tal ndab kug mang reb e Pi Mich! Nap’an ni gog ngorad ndab gu rin’ e re n’ey, ma aram mar pirdiiyed gag mar foleged e boyoch ngog ni gowa ngar boyochnaged gag, machane mi yad chubeg u daken lolugeg. U m’on ni ngar chuwgad ma rogned ngog ni bay kur sulod ni ngar koled e ppin rog u gelngirad. Machane i gur e pi walag u rom ngar ayuweged gamow nggu warow u train nga yugu reb e binaw. Ri dab gu pagtalin rogon e t’ufeg ni dag e pi walag nem ngomow. Nap’an nug tawgow ko fare binaw, ma aram me yib e pi walag u rom ni ngar pied e ggan romow, mi yad ayuwegeg nggu pirieg e maruwel nge bang ni nggu parew riy! Angin ni yib riy e ki yag ni nggu ayuwegew yugu boch e Pi Mich ni kar milgad ko gin yibe mahl riy ma kar bad ko re binaw nem.” Re n’ey ni ke buch e be dag ni t’ufeg ni bay u thilin e piin Kristiano e rayog ni nge ayuwegdad ni ngad athamgilgad u nap’an ni be fanenikaydad e girdi’ ko re fayleng ney.

T’UFEG RODAD NGAK E PI TOOGOR RODAD E RA AYUWEGDAD NI NGAD ATHAMGILGAD U NAP’AN NI YIBE FANENIKAYDAD

13. Uw rogon ni ma ayuwegdad gelngin Got nib thothup ni ngad athamgilgad ko pigpig rodad ngak Jehovah ni yugu aram rogon ni be fanenikaydad e girdi’?

¹³ I yog Jesus ngak pi gachalpen ni nge t’uf rorad e pi toogor rorad. (Matt. 5:44, 45) Ba mom ni ngan rin’ e re n’ey, fa? Danga’! Machane rayog ni ngad rin’ed u daken e ayuw ni be pi’ gelngin Got nib thothup ngodad. T’ufeg e aram bang u wom’engin gelngin Got nib thothup ni kub muun ngay e gum’an’, nge gol, nge sumunguy, nge t’ar laniyan’. (Gal. 5:22, 23) Pi fel’ngin ney e ma ayuwegdad ni ngad athamgilgad u nap’an ni yibe fanenikaydad. Boor e piin ur togopuluwgad ngodad ni kar talgad ko togopuluw ni bochan e ke dag figirngirad, ara leengirad, ara bitir rorad, ara en buguli yoror rorad e pi fel’ngin ney ngorad. Ma boor i yad e kar manged boch i walagdad. Ere faanra ba mo’maw’ ni ngam dag e t’ufeg ngak e piin yad be fanenikayem ni bochan e ga be pigpig ngak Jehovah, ma aram e ngam yibilay gelngin nib thothup. (Luke 11:13) Ma ngari mich wan’um ni birok rok Got e kanawo’ e gubin ngiyal’ nib fel’.​—Prov. 3:5-7.

14-15. Uw rogon ni ayuweg e Roma 12:17-21 Yasmeen ni nge dag e t’ufeg ngak figirngin ni yugu aram rogon ni be togopuluw ngak?

¹⁴ Am lemnag e n’en ni buch rok Yasmeen ni ma par u Middle East. Nap’an ni mang reb e Pi Mich Rok Jehovah, ma aram me lemnag e pumoon rok ni kan bannag, ere guy rogon ni nge taleg ndab ki pigpig ngak Got. I yog e thin nib kireb ngak, me yog ko girdi’ rorow nib muun ngay reb e tayugang’ ko teliw nge be’ ni ma pig ni nga rogned ngak Yasmeen ni faanra dabi tal ma yad ra rin’ ban’en nib kireb ngak, ma ngku rogned ngak ni be ruw raba’nag girdien e tabinaw rok. Ki tolul figirngin ngak e pi walag u nap’an e muulung ni be yog boch e thin nib kireb ngorad! Ba ga’ ni ma yor Yasmeen ni bochan e ba kireb e ngongol ni un tay ngak.

¹⁵ Nap’an nra yib Yasmeen nga Tagil’ e Liyor, ma ma fal’eg e pi walag laniyan’ mar pied e athamgil ngak. Ki pi’ e piin piilal e athamgil nga laniyan’ ni nge fol ko fonow ni bay ko Roma 12:17-21. (Mu beeg.) I gaar Yasmeen: “Rib mo’maw’ ngog ni nggu fol ko re thin ney. Machane gu ning e ayuw ngak Jehovah ni nge ayuwegeg mug guy rogon ni nggu fol ko n’en be yog e Bible u rogon nrayog rog. Ere nap’an ni yib i wereg e pumoon rog e but’ nga lan e taang romow ni lem rok, ma aram mug klinnag. Ma nap’an nra yog boch e thin nib kireb ngog, ma gu ma fulweg u fithik’ e sumunguy. Ma nap’an nra m’ar, ma gu ma ayuweg.”

16-17. Mang e ga be fil ko n’en ni buch rok Yasmeen?

¹⁶ I yib angin e t’ufeg ni dag Yasmeen ngak e pumoon rok. I gaar: “I tabab ni nge gel boch e pagan’ rok e pumoon rog ngog ni bochan e manang ni gubin ngiyal’ ni gu ra yog e tin riyul’. Ki tabab ni nge motoyil ngog u fithik’ e tayfan u nap’an ni gamow ra weliy murung’agen e teliw, miki m’agan’ ngay ni nge awnag e gapas u lan e tabinaw romow. Ma chiney e ma pi’ e athamgil nga lanin’ug ni nggu wan ko muulung. Chiney e ke fel’ boch e tha’ u thilmow, ma ke gapas lan e tabinaw romow. Gu be athapeg ni nge m’agan’ e pumoon rog ngay ni nge fil e tin riyul’ me un ngog ko pigpig ni gu be tay ngak Jehovah.”

¹⁷ Ke m’ug ko n’en ni buch rok Yasmeen ni t’ufeg e rayog ni nge ayuwegdad ni ngad athamgilgad u fithik’ urngin ban’en ni gad be mada’nag. Ma faanra bay e t’ufeg rodad ma dabiyog ni ngad pared ‘ndab ki l’agan’dad, ma dab kud gum’an’gad.’ (1 Kor. 13:4, 7) Fanenikan e ban’en nib gel gelngin ma rayog ni nge gafgownagey, machane kab gel gelngin e t’ufeg. Faan gad ra dag e t’ufeg ngak e girdi’, ma rayog ni nge thil rogon ni yad be lemnagdad nge Jehovah. Ma t’ufeg e ku ma felfelan’nag Jehovah. Yugu aram rogon nra ulul e pi toogor rodad ni ngar togopuluwgad ngodad, machane rayog ni ngad pared ni gad ba felfelan’. Ni uw rogon?

NGAD FELFELAN’GAD U NAP’AN NI YIBE FANENIKAYDAD

18. Mang fan nrayog ni ngad felfelan’gad u nap’an ni yibe fanenikaydad?

¹⁸ I gaar Jesus: “Ngam felan’gad ko ngiyal’ nra fanenikaymed e girdi’ riy.” (Luke 6:22) Gathi gadad e kad mel’eged ni ngan fanenikaydad. Darud felfelan’gad u nap’an ni yira gafgownagdad ni bochan e michan’ rodad. Ere mang fan nrayog ni ngad felfelan’gad u nap’an ni yibe fanenikaydad? Am lemnag dalip i fan. Bin som’on e, nap’an ni gad ra athamgil ma aram e gad ra fel’ u wan’ Got. (1 Pet. 4:13, 14) Bin l’agruw e, ra gel e michan’ rodad i yan. (1 Pet. 1:7) Ma bin dalip e, ra yag e tow’ath ngodad ni aram e yafos ndariy n’umngin nap’an.​—Rom. 2:6, 7. 

19. Mang fan ni felfelan’ e pi apostal u nap’an ni kan toyrad?

¹⁹ De n’uw nap’an nga tomuren nni faseg Jesus ko yam’, ma aram me thamiy e pi apostal rok fare felfelan’ ni i weliy murung’agen. Tomuren nni toy e pi apostal mi nog ngorad ni ngar talgad ko machib, ma aram ma ranod ni kar felfelan’gad. Mang fan? “Bochan e ke tafinaynag Got ni ba’ rogorad ni ngar gafgowgad ni fan nga fithingan Jesus.” (Acts 5:40-42) Ri kab gel e t’ufeg rorad ngak e Masta rorad ko marus ni yad be tay ni bochan e be fanenikayrad e pi toogor rorad. Kur daged e re t’ufeg ney ni aram e ra “ul’ulgad” i machibnag fare thin nib fel’ ndar talgad. Boor e pi walagdad e ngiyal’ ney ni ku yad be pigpig ngak Got u fithik’ e yul’yul’ ni yugu aram rogon ni yad be mada’nag e magawon. Yad manang ndabi pag Jehovah talin e maruwel ni kar rin’ed nge rogon ni kar daged nib t’uf fithingan rorad.​—Heb. 6:10.

20. Mang e gad ra weliy ko bin migid e article?

²⁰ Girdi’ ko re fayleng ney e yad ra ulul ngaur fanenikayed gadad nge mada’ ko ngiyal’ ni kan thang e re m’ag ney. (John 15:19) Machane dariy rogon ni ngad rusgad. Aram e n’en ni gad ra fil ko bin migid e article ni be weliy rogon nra ‘gelnag’ Jehovah e girdi’ rok ni yad ba yul’yul’ me ayuwegrad. (2 Thess. 3:3) Ere ngad ululgad ngaud t’ufeged Jehovah, nge pi walagdad, nge pi toogor rodad. Faan gad ra fol ko re fonow ney, ma aram e gad ra par nib taareban’dad, mab gel e michan’ rodad, ma gad pining e sorok ngak Jehovah, ma gad micheg ni kab gel gelngin e t’ufeg ko fanenikan.