Piin Gallabthir, E mu Falfalan’gad Ko Bitir Romed

“Ngam guy rogon ngi i par e chitamam nge chitinam ni yow ba felan’ ngom.”​—PROVERBS 23:25.

1. Ra diin me yog ni nge falfalan’ e gallabthir ko bitir rorad

UW fene fel’ ni ngan guy bochi ke gek’iy ni be ga’ iyan nge mang ba ke gek’iy nib ga’ mab fel’ yaan ma ma pi’ e tagalul ko girdi’​—ma ri ga ra falfalan’ ngay nfaanra gur e kam yung ma kam ayuweg! Ku arrogon e piin gallabthir ni ri yad ma falfalan’ nfaanra kar ayuweged e bitir rorad mar ilalgad mi yad pigpig ku Got ma aram rogon ni be yog ko Bible ko proverb ni gaar: “Chitamangin be’ nib mat’aw e ba’ tapgin ni nge falfalan’. Rayog ni ngam falfalan’ ngak be’ nib moon ni fakam nib gonop. Ngam guy rogon ngi i par e chitamam nge chitinam ni yow ba falan’ ngom; ngam pi’ e re falfalan’ nem ngak e chitinam.”​—Proverbs 23:24, 25.

2, 3. (a) Uw rogon ni nge siyeg e gallabthir e kireban’ nge chalban’? (b) Mang e ba t’uf ko nochi ke gek’iy nge bitir ni fan ni ngar manged tapgin e falfalan’?

² Ma gathi yugura par reb e bitir me “mat’aw” mab “gonop.” Ya ba t’uf e athamgil nib gel ni ngan ayuweg e bitir ndabra k’aringed e “kireban’” nge “chalban” ni bod rogon nib t’uf e athamgil ni ngan ayuweg bochi ken e gek’iy nge mang ba ke gek’iy nib fel’ yaan. (Proverbs 17:21, 25) Yima reg baley i ren u charen u nap’an ni kab achig fachi ke gek’iy ni fan ni nge ga’ iyan nib k’iy mab gel. Ma kub t’uf ni ngan puog e ran ngay u gubin ngiyal’ maku ba t’uf ni ngan ayuweg ko nochi chachngag nra kirebnag. Ma ra un th’ab yu yang riy ma ra ayuweg nge par nib fel’ yaan.

³ Thin rok Got e ma tamilangnag ni ba t’uf ko bitir ni ngan fonownagrad ko tirok Got ban’en min pi’ e ran ni thin ko Bible ngorad, ma ngan ayuwegrad ngar siyeged e ngongol nib kireb, ma ra un gechignagrad u fithik’ e t’ufeg ni fan ni ngan chuweg e tin nra kirebnagrad. Yibe yog ko pi matam ni ngar chugliyed e bitir rorad “mi yad llowan’nagrad nrogon mi yad ayuweg lanin’rad nrogon girdien Jehovah.” (Efesus 6:4) Uw rogon ni ngan yodorom?

Nga Un Tamilangnag e Thin rok Jehovah

4. Mang e maruwel ko gallabthir ko bitir rorad, ma mang e ba t’uf ni nge yog e re n’ey?

⁴ Fapi thin ni ngan “ayuweg lanin’rad nrogon girdien Jehovah” e ma sor fan ko ngan yal’uweg e tafinay rodad nge puluw ko tin nib m’agan’ Jehovah ngay. Ere ba t’uf ko piin gallabthir ni ngar ayuweged e bitir rorad ngar lemnaged ban’en ni bod rogon ni ma lem Jehovah. Maku thingara folwokgad rok Got rogon ni ma pi’ e fonow u fithik’ e t’ufeg ni ma yal’uwegey. (Psalm 103:10, 11; Proverbs 3:11, 12) Machane u m’on riy ma ba t’uf ko piin gallabthir ni nge tamilangan’rad ko thin rok Jehovah, ni bod rogon ni yog Moses ngak piyu Israel kakrom ni gaar: “Pi thin ney [rok Jehovah] ni gu be pi’ ngomed e daba’ e thingari taw nga gumerchamed.”​—Deuteronomy 6:6.

5. Wuin nge uw rogon ni nge fil e gallabthir nu Israel ban’en ko bitir rorad ma mang fan fare thin ni “ngan fil”?

⁵ Faanra ra fil e piin gallabthir e Bible u gubin ngiyal’ mi yad fl’eg i lemnag fan mar meybilgad u gubin ngiyal’ ma aram e rayog ni ngar ngongolgad ni rogon ni yog Moses ni gaar: “Um filed [e thin rok Jehovah] ngak pi fakmed; um weliyed morngaagen ngorad ko ngiyal’ ni gimed bay u tabinaw nge ngiyal’ ni gimed be milekag, nge ngiyal’ ni gimed be toffan nge ngiyal’ ni gimed be maruwel.” Fare bugithin nu Hebrew e ni piliyeg ni “fil” e ma sor fan ko “ngan sul nga daken,” “ngan nog ban’en biyay nge biyay,” ma “ngan n’igin ngari tamilang u wan’uy.” Mu tiyan’um ngay nga rogon ni tamilangnag Moses nib t’uf ni ngi i par e thin rok Jehovah u lanin’uy me gaar: “Mm’aged nga daken pa’med nge nga daken peri’med nge par ni be puguran ngomed. Mu yoliyed nga daken e ren u ruw raba’ i langan e mab ko naun romed nge nga daken ruw raba’ i langan e garog romed.” Ere rib tamilang ni ba t’uf ku Jehovah ni nge tiyan’ e piin gallabthir ko bitir rorad u gubin ngiyal’ u fithik’ e t’ufeg!​—Deuteronomy 6:7-9.

6. Mang e thingari fil e gallabthir ko bitir rorad, ma mang angin riy?

⁶ Be mang e “pi thin” rok Jehovah ney ni thingari fil e piin gallabthir ko bitir rorad? Ka fini sul Moses nga daken fa Ragag i Motochiyel nib muun ngay e motochiyel ndab nli’ be’ ngem’, ma dabn par ku be’ ni gathi kan mabgol, ma dabn moro’ro’, ma dabn lifith l’iginey, ma dabn chogow. Kan tay chilen ko pi gallabthir nu Israel ni ngar filed ko bitir rorad e pi motochiyel ney nib sor fan ko ngar filed ngorad fare motochiyel ni gaar: “Ngari t’uf romed Jehovah ni Got romed u polo’ i gumercha’med ngu polo’ i lanin’med, ngu polo’ i gelngimed. (Deuteronomy 5:6-21; 6:1-5) Gathi ereram e simit i fonow nib t’uf ko bitir ko ngiyal’ ney?

7. (a) U lan e Bible ma be mang e kan taarebnag e bitir ngay? (b) Mang e gad ra fil morngaagen e chiney?

⁷ Ka nog ko pi matam nu Israel ni gaar: “Ppin rom e bod e grape ni boor waamangin u lan e naun rom. Ma pi pagal ni fakam e yad bod papangin e olive ni ke liyeg e tebel rom.” (Psalm 128:3) Machane ra nge falan’ e piin gallabthir ko “fa nochi ke gek’iy” rorad ni gathi nge kireban’nagrad, ma aram e thingara tiyan’rad ko bitir rorad u gubin e rran. (Proverbs 10:1; 13:24; 29:15, 17) Gad ra fil ko uw rogon nrayog ko piin gallabthir ni ngar fonownaged e bitir rorad mar pied e ran nib spiritual ngorad, mar ayuweged yad ko kireb, ma ngar gechignaged yad nrogon mi yad pirieg e bin riyul’ e falfalan’ ni bochrad.

Ngan Skulnag e Bitir ni Kab Madway

8. (a) Mini’ e bod baley i ren ni fan ni nge ayuweg Timothy? (b) Wuin ni kan tabab i fil ban’en ngak, ma mang angin ni ke yib?

⁸ Immoy l’agruw ley e ren nib mudugil ni ke ayuweg Timothy ke ilal​—aram e chitingin nge titaw rok. Chitamangin Timothy e girdi’ ni Greek ma de mich Kristus u wan’, ere Eunice ni chitingin ni girdi’ ni Jew nge Lois ni titaw rok e ur filew ngak e ‘thin ni bay u lan e babyor nib thothup u nap’an ni kab madway’ Timothy. (2 Timothy 1:5; 3:15; Acts 16:1) Bochan ni ur passiggow i fil ngak Timothy e “tin nib fel’ ni i ngongliy [Jehovah]”​—ni mus u nap’an ni kab madway​—ma aram ma ke yib angin ni rib fel’. (Psalm 78:1, 3, 4) Ya kab fel’ yangaren Timothy me un ko missionary u boch e binaw nib palog ma ke un i ayuweg e tin som’on e ulung ko Kristiano.​—Acts 16:2-5; 1 Korinth 4:17; Filippi 2:19-23.

9. Uw rogon nrayog ni ngan fil ngak e bitir ni ngar siyeged i chogownag e chugum?

⁹ Piin gallabthir, gimed bod e miti mang ren ni kan reg? Susun, ga ba adag ni nge ilal e lem ko bitir rom ma ba thebthebel u morngaagen e chugum fa? Me ere thingar mu tay e kanawo’ nib fel’ ma dab mu chogownag urngin e tin nib biech e chugum nge yugu boch ban’en ni de t’uf ko par rom. Faanra ga ra lek e chugum ma dab mu gin ngay u nap’an nra folwok fakam rom. (Matthew 6:24; 1 Timothy 6:9, 10) Arrogon, faanra de yal’uw fa ley i ren ni be ayuweg fa chi ke gek’iy ma uw rogon nra ilal nib yal’uw?

10. Piin gallabthir e susun ni ngar sapgad ku mini’ ni nge pow’iyrad, ma susun uw rogon e lem rorad?

¹⁰ Pi gallabthir ni ma felan’ ko bitir rorad e ra ning e ayuw rok Got ni nge ayuwegrad ngar skulnaged yad ma gubin ngiyal’ ma yad ra lemnag e n’en nra rin’ min ayuweg e bitir rorad ko tirok Got ban’en. Reb e matin ni bay aningeg e bitir rok e gaar: “Mus ko ngiyal’ u m’on ni daworni gargelnag e bitir romow ma gubin ngiyal’ gamow ma meybil ku Jehovah ni nge ayuwegmow nggu mangew gallabthir nib fel’, ma nge pow’iymow ko Thin Rok, ma nge n’igin nggu folgow riy.” Miki gaar: “‘Pi thin ney ni Jehovah e som’on’ e gathi yugu boch e thin u wan’mad ya aram rogon e par romad.”​—Judges 13:8.

Nga Un “Ran”nag ni Gubin Ngiyal’

11. Mang e ba t’uf ni ngan rin’ ko nochi ke gek’iy nge bitir ni fan ni ngar ilalgad iyan?

¹¹ Ba t’uf ni ngan pi’ e ran ko fachi ke gek’iy ni gubin ngiyal’, ya aram fan ni ma tugul e gek’iy u tooben e lul’ nib fel’ rogon. (Mu taarebnag ko Revelation 22:1, 2.) Ku arrogon e bitir ni ra fel’ yaarad ko tirok Got ban’en nfaanra ran fil e thin riyul’ ko Bible ngorad u gubin ngiyal’. Machane ba t’uf ko piin gallabthir ni ngar lemnaged ko uw n’umngin nap’an nrayog ni nge tiyan’ e bitir rorad nga ban’en. Sana ffel’ ni ngan fil boch ban’en ngorad u ba ngiyal’ nib ngoch nap’an ni boor yay ma gathi taab yay nib n’uw nap’an. Dab mu lemnag ndariy felngin ni ngan fil ban’en ngorad u lan bochi ngiyal’ nib ngoch nap’an. Ya rib baga’ fan ni ngan par u taabang ya ra sum e m’ag nib fel’ u thilin e gallabthir nge bitir, ma aram rogon nib puluw ko Bible.​—Deuteronomy 6:6-9; 11:18-21; Proverbs 22:6.

12. Mang fan nib baga’ fan ni ngan meybil u taabang nge bitir?

¹² Balayal’ e aram ba ngiyal’ ni rayog ni ngan fil ban’en ngak e bitir. Begaar reb e fel’ yangaren: “Gubin e rran ko balayal’ ma ra par e gallabthir rog u daken e bet romad mar motoyilgow ngomad u nap’an ni nggu meybilgad.” Rib baga’ fan e re n’ey ya gaar reb e fel’ yangaren: “Aram fan ni gubin ngiyal’ ma ke mecham ngog ni nggu meybil ku Jehovah gubin e rran ko balayal’ u m’on ni nggu mol.” Faanra gubin e rran ma ra rung’ag e bitir ni be weliy e gallabthir rorad morngaagen Jehovah mar meybilgad ngak, ma aram e ra riyul’ u wan’rad ni ir be’. Gaar reb e pagal: “Gu ra unguy owcheg u nap’an ni gu be meybil ku Jehovah ma gu ra guy u lanin’ug ni ir be’ ni bod yaan be’ ni riyul’ ni tutuw. Gallabthir rog e ur ayuwegew gag nggu nang ni ma un Jehovah ko urngin ban’en ni gad ma yog nge urngin ban’en ni gad ma rin’.”

13. Mang e rayog ni ngan rin’ u nap’an ni yibe fil e Bible u taabang?

¹³ Boor ban’en ni ra fil e gallabthir ko bitir ni ngar ayuweged yad ngar filed e thin riyul’ ko Bible ni bod e ran. Weliy l’agruw e gallabthir u morngaagen l’agruw e bitir rorow ni gaar: “U nap’an ni ka fin ni gargelnagrow ni in e wik rorow ma kan fil ngak fagali bitir romow ni ngar parew u lan e Kingdom Hall ndabra wageygow.” Ma reb e matam e ke weliy e n’en ni rin’ e tabinaw rok ni gaar: “Kug yoloyed nga daken bochi babyor fithingan urngin e babyor ko Bible ma gamad ma fil nib yaram ni ke m’on reb nga reb, ma ra bagamad ma reb. Ri ba adag e bitir e re n’ey.” Boor e tabinaw e yad ma fil ban’en u m’on fa tomren e abich. Gaar be’ ni matam: “Ngiyal’ ni gamad ma abich ko balayal’ e aram e ngiyal’ ni gamad ma weliy e thin ko fare daily Bible text.”

14. (a) Ku mang boch ban’en nib sor fan ko tirok Got ban’en nrayog ni ngan rin’ ko bitir? (b) Uw fene yoor ban’en nrayog ni nge fil e bitir?

¹⁴ Ma piin bitir e yad ba adag ni ngar motoyilgad ko thin ko Bible ni bay ko Babyor Rog ni Chep nu Bible.a Gaar ba wu’ i mabgol: “Nap’an ni ka yad bbitir ma yad ra fil reb e guruy ko fare babyor ni Chep nu Bible, nge mu’ ma ra munmad e bitir ni bod e piin ni bay ko re chep nem mi yad yan u yaan e n’en ni buch riy. Ri yad ba adag e re n’ey ma boor yay ma boor ko taareb e chep nu Bible e yad ra fl’eg.” Dab mu lemnag ni ke mus ni buch uw ban’en ni rayog ni nge fil e bitir rom! Bay boch e bitir ni aningeg e duw rorad ni ke mit ngorad e thin ko pi guruy ko fare babyor ni Chep nu Bible ma boch iyad e rayog ni ngar poyed e Bible! Ke weliy reb e fel’ yangaren ni nap’an ni dalip nge baley e duw rok ma dabiyog ni nge yog fare bugithin ni “judicial decisions,” nrogon machane ke pi’ e chitamangin e athamgil nga laniyan’ ni nge athamgil nge yog nrogon.

15. Mang boch ban’en nrayog ni ngan weliy ko bitir ma mang fan ni ba’ felngin e re n’ey?

¹⁵ Ku rayog ni ngam fil ngak e bitir rom ni nge weliy e thin riyul’ ngak yugu boch e girdi’, ma nge pi’ e fulweg u nap’an e muulung. (Hebrews 10:24, 25) Gaar reb e fel’ yangaren: “Nap’an ni gamad ra practice ma thingar gu pi’ e fulweg ko thin rog. Dan pag ni ke mus ni nggu poy e fulweg u lan e babyor ma dabgu weliy fan.” Maku rayog ni ngan fil ngak e bitir ni ngar uned ko machib mi yad rin’ ban’en. Reb e ppin e ke weliy rogon ni skulnag e gallabthir rok ni gaar: “Gathi ke mus ni nggu uned ko gallabthir romad ya aram e maruwel rorow ko machib. Ya kug uned ngay, kug tugtuguyed e mab ma kug wereged boch e babyor ni handbill. Gamad ra fl’eg rogomad ko machib u m’on ko Sabado nge Madenom, ni nggu nanged ko mang e gamad ra weliy morngaagen. Dariy biyay ni kug odgad u reb e Sabado ni kakadabul mu gu fithed ko gamad ra un ko machib fa danga’. Ya kug nanged ni gamad ra un ngay.”

16. Mang fan ni baga’ fan ni ngan fil e Bible u taabang u gubin ngiyal’?

¹⁶ Rib baga’ fan ni ngan pi’ e ran ko thin riyul’ ko Bible ngak e bitir u gubin ngiyal’, me ere baga’ fan ni ngan fil e Bible u taabang u gubin e wik. Yog reb e matam ni bay l’agruw e bitir rok ni “ban’en ni ma k’aring e bitir nge chachalbarad e faanra dabni tay ban’en nib mudugil ni ngan rin’ u gubin niyal’.” (Efesus 6:4) Ki gaar: “Gamow leengig e kug turguyew reb e rran nge ngiyal’ ni nggu filed e Bible u taabang ma ug yul’yul’gow ngay ni dabni pag. Ma aram ma de n’uw nap’an nga tomren me mecham e bitir ngay ni yad ra fil e Bible ko ngiyal’ nem.” Rib baga’ fan ni ngan fil ban’en ngak e bitir u nap’an ni kab madway ma rriyul’ e pi thin ney ni baaray, ‘Rogon ni kan ayuweg fa chi ke gek’iy ma aram rogon ni ra ga’ iyan me mang ba ke gek’iy nib baga’.’

17. Ku mang e baga’ fan ni gathi ke mus ni ngan fil e thin riyul’ ko Bible ngak e bitir?

¹⁷ Baga’ fan ni ngan fil e thin riyul’ ko Bible ngak e bitir, machane ku baga’ fan ko gallabthir ni ngar daged rogon ko ngongol rorad. Ma guy e bitir rom ni ga ma fil e Bible, ma ga ma un ko pi muulung u gubin ngiyal’, ma ga ma un ko machib u mit e tabinaw, ma gab falfalan’ ni ngam rin’ e tin nib m’agan’ Jehovah ngay fa? (Psalm 40:8) Rib baga’ fan ni ngar guyed e re n’ey. Bay reb e ppin ni chitamangin e ke togopuluw ngak e chitingin machane ke chugliyrad ni yad nel’ e bitir mar manged Pi Mich nib yul’yul’ me yog fare ppin u morngaagen chitingin ni gaar: “N’en ni rib baga’ fan u wan’mad e aram e kanawo’ ni dag e Nina romad ngomad​—ma re n’em e kab baga’ fan ko thin ni ngan nog.”

Ngan Ayuweg e Piin Bitir ko Riya’

18. (a) Uw rogon nrayog ni nge ayuweg e gallabthir e bitir rorad ndabi buch ban’en ngorad? (b) Mang e kan fil ngak e bitir nu Israel u morngaagen e yu yang nib mith u dowey?

¹⁸ Ba t’uf ni ngan ayuweg nochi ke gek’iy u boch e chachngeg ni rayog ni nge li’, maku arrogon e bitir ma ba t’uf ni ngan ayuwegrad u lan e re m’ag nib kireb ney ko “piin nib kireb.” (2 Timothy 3:1-5, 13) Uw rogon nrayog ni nge ayuweg e gallabthir e bitir rorad ko re n’ey? Ngar ayuweged yad nge yog e gonop nu tharmiy ngorad! (Eklesiastes 7:12) Ke tay Jehovah chilen ko piyu Israel​—nib muun e “pi bitir nib achig” ngay​—ni ngar motoyilgad u nap’an ni ran bieg fare Motochiyel, ma bay riy boch e thin u morngaagen e ngongol nib yalen nge ngongol nde yalen ko par ko pumoon nge ppin. (Deuteronomy 31:12; Levitikus 18:6-24) Boor yay ni kan weliy u morngaagen e yu yang u downgiy nib mith nib muun ngay morngaagen e “testicles” nge “genital organ.” (Levitikus 15:1-3, 16; 21:20; 22:24; Numbers 25:8; Deuteronomy 23:10) Kari kireb e fayleng ko ngiyal’ ney me ere ba t’uf ni ngan fil ngak e piin bitir morngaagen rogon nib mat’aw ni ngan rin’ nga downgiy nge rogon nde mat’aw ma ngar nanged ni sunumiy Got e pi n’en nem me yog ni “rib fel’.”​—Genesis 1:31; 1 Korinth 12:21-24.

19. Mang boch ban’en nib puluw ni ngan fil ko bitir u morngaagen yungin baaram nib mith u dowey?

¹⁹ Fel’ ni gallabthir ni yow l’agruw ara fagali cha’ ni yow be ayuweg e bitir e ngar weliyew ngak e bitir rorow yu yang u downgin nib mith. Ma ra weliyew ngak ni dariy be’ ni bay mat’awun ni nge math ngay. Piin ni yad ma kol e bitir e ma skengnag e bitir ko mang e yad ra rin’ mfini guy rogon ni nge rin’ ban’en nib golong ngak me ere ngan fil ngak e bitir ni nge togopuluw ngay nge gaar, “Nggu gognem!” Mu fil ngak e bitir rom ni susun gubin ngiyal’ nra guy be’ rogon ni nge math ngak rogon nde mat’aw, ma nge yog ngom, ndemtrug ko kan nog ngak ndabi yog ku be’ fa kan k’aring e marus ngak.

Ngan Gechignagey u Fithik’ e T’ufeg

20. (a) Uw rogon ma gechig ko bitir e taareb rogon ko gek’iy ni yima th’ab papangin? (b) Uw rogon e gechig u wan’uy machane mang angin riy?

²⁰ Ma yib angin ko bitir ni nga un gechignagrad u fithik’ e t’ufeg ni bod rogon ni ma yib angin ko ba ke gek’iy ni nga un th’ab yu pa’ riy ni fan ni nge tugul nib fel’ rogon. (Proverbs 1:8, 9; 4:13; 13:1) Nap’an ni ngan chuweg e tin nib kireb papangin, ma ra tugul e tin nib fel’ nib fel’ rogon. Ere faanra be tiyan’ e bitir rom ko chugum ni kayigi pag rogon fa yad be chag ko piin nib kireb fa yad ba adag e fafel ara entertainment nde fel’ ma aram e pi n’en ni bod papangin e gek’iy nib t’uf ni ngan th’ab min chuweg. Faan yira chuweg, ma ra ilal e bitir rom ko tirok Got ban’en. Som’on ma dabi falfalan’ e bitir ko re n’ey ni bod rogon ni ra maadad e gek’iy ni kan th’ab yu yang riy. Machane bay angin nib fel’ riy ya ra tabab ni nge ilal e bitir rom rogon ni ga ba adag.​—Hebrews 12:5-11.

21, 22. (a) Mang e ma dag ni dariy e falfalan’ ni ngan pi’ e gechig fa ngan gechignagem? (b) Mang fan ni susun ndabi tel e gallabthir e gechig ko bitir?

²¹ Rriyul’ ni dariy e falfalan’ riy u nap’an ni yibe gechignagey. Gaar reb e matam: “Ke chag fakag ni pumoon ku reb e fel’ yangaren ni ke yog e piilal ko ulung ni gathi rib fel’ ni ngan chag ko cha’ nem.” Susun nggu rin’ ban’en nib pay boch nggu ayuweg. De un fakag ko ngongol nib kireb machane thingari thiliyeg e lem rok ma aram ban’en ni kan athamgiliy nib n’uw nap’an.” Begaar fak: “Nap’an ni kan tay chilen ngog ndabkugu chag ko cha’ nem ni ir e tafager rog ma kari kireban’ug ngay.” Miki gaar: “Machane ffel’ ni kan rin’ e re n’ey ya de n’uw nap’an nga tomren ma kan tharbog e cha’ nem ko ulung.”

²² Thin rok Got e begaar: “Puwan’ nge gechig e aram kanawoen e yafas.” Ere demtrug ko uw fene mo’maw ni ngan gechignag e bitir machane dabmu tel rorad. (Proverbs 6:23; 23:13; 29:17) Ya ra munmun ma yad ra pining e magar ngom ya kam yal’uwegrad. Gaar reb e fel’ yangaren: “Kafram ma kari gu damumuw ko gallabthir rog u nap’an ni kar gechignagew gag. Ma ke chiney ma faan go manga dar gechignagew gag ma gu ra damumuw nib gel.”

Wenegan e Athamgil Ba Taw’ath

23. Mang fan ni rib puluw urngin e athamgil ni kan tay ni ngan tiyan’uy ko bitir u fithik’ e t’ufeg?

²³ Dariy e maruwar riy ni bitir ni gallabthir rorad nge yugu girdi’ e ba adag dakenrad e aram rogorad ni bochan e kan tayan’iy ngorad u fithik’ e t’ufeg u gubin ngiyal’. Ma urngin e athamgil ni kan tay riy​—ni ngan ayuweg e bitir ni kan diyennag fa bitir nib spiritual​—e ri ra yib angin ma yira falfalan’ ngay. Arrogon ni yog apostal John faani gaar: “Dariy ban’en nrib gel’ e falfalan’ nra pi’ ngog ko bin ni nggu rung’ag morngaagen pi fakag ni yad be fol ko tin riyul’.”​—3 John 4.

[Boch e Thin nra Tamilangnag Murung’agen]

Ka Ga Manang?

◻ Mang e ba t’uf ko nochi ke gek’iy nge bitir ni fan ni nge aw ni ngan pining e sorok ngorad?

◻ Uw rogon nrayog ni nge mang e gallabthir baley i gek’iy ni ma ayuweg nge par nib yal’uw?

◻ Mang e rayog ni ngan fil ngak e bitir, ma susun ni ngan fil rogon ngorad ni ngar togopuluwgad ko mang?

◻ Uw rogon ni ra yib angin ko bitir ni faanra ran gechignagrad, ni bod rogon ni yima th’ab yu yang u papangin e gek’iy?

[Credit Line]

Courtesy of Green Chimney’s Farm