‘Nguum Pired Rok Kristus’

“Ke mich u wun’med ni Kristus e ir e Somol romed, ere nguum pired rok.”​—KOLOSE 2:6, New World Translation.

1, 2. (a) Mang e yog e Bible u morngaagen e yafas rok Enok ni i par nib yul’yul’ ku Jehovah? (b) Uw rogon ni ke ayuwegdad Jehovah ni ngad pared rok, ni bod ni be yog u Kolose 2:6, 7?

KAAMU guy be’ nib pagal nge chitamangin ni yow be yan u taabang fa? Fachi pagal e ma folwok rok e chitamangin u gubin ban’en ni ma rin’, ya ri ma tay fan; ma fa en chitamangin e ma ayuweg u fithik’ e t’ufeg ma ke felan’ ngak. Re n’em e bpuluw ku Jehovah nge rogon ni ngan pigpig ngak nib yul’yul’. Susun, be yog e Thin Rok Got ni Enok e be’ nib yul’yul’ ma “ke yan u taabang rok [e bin riyul’ e] Got.”​—Genesis 5:24; 6:9, NW.

² Bod rogon be’ ni matam ni ma ayuweg e bitir rok nga ranow u taabang, maku arrogon Jehovah ni ke pi’ e ayuw nth’abi fel’ ngodad. Ke pi’ Fak ni maagirag rok nga fayleng. Rib flont rogon ni ke folwok Jesus Kristus rok e Chitamangin nu tharmiy u gubin ban’en ni ke rin’ u roy u fayleng. (John 14:9, 10; Hebrews 1:3) Ere ba t’uf ni ngada pired rok Jesus ni aram e gad be par rok Got. I yoloy apostal Paul ni gaar: “Ke mich u wun’med ni Kristus Jesus e ir e Somol romed, ere nguum pired rok. Mu tiyed lik’ngimed nib toar nga fithik’ Kristus, mu ubunged e ngongol romed nga daken yi ir e def romed, mi i gel i yan e michan’ romed ni bod rogon ni kan fil ngomed. Mu um pired nib sug lanin’med ko magar ni gimed be pining ngak.”​—Kolose 2:6, 7, NW.

3. Rogon ni yog u Kolose 2:6, 7, ma mang fan nrayog ni nga dogned ni kab boor ban’en nib l’ag ko par u taabang rok Kristus ni gathi ke mus ni ngan un ko taufe?

³ Piin nib yul’yul’ ni yad be fil e Bible e yad ma un ko taufe ni bochan ni yad ba adag ni ngar folwokgad rok Kristus mi yad par rok. (Luke 3:21; Hebrews 10:7-9) Nap’an e duw ni 1997 ma ke pag 375,000 e girdi’ ni kar uned ko taufe u ga’ngin e fayleng​—aram reb e biyu’ u reb e rran. Rib fel’ rogon ni be yoor e girdi’! Machane pi thin rok Paul u Kolose 2:6, 7 e be dag ni ka bay boch ban’en nib l’ag ngay ni ngan par rok Kristus ma gathi ke mus ni taufe. Fare bugithin ni Greek ni “nguum par” e be sor fan nga ban’en ni yibe rin’ ma be ul’ul’ iyan. Miki weliy Paul ni bay aningeg ban’en nib l’ag ko par rok Kristus ni baaray: ngam tay lik’ngim nib toar nga fithik’ Kristus, ma ngam pag ni nge ubungem, ma nge gel i yan e michan’ rom ngak, ma nge sug lanin’med ko magar ni nga mu pining ngak.

Kam ‘Tay Lik’ngim nib Toar Nga Fithik’ Kristus’?

4. Mang fan fare thin ni ngan ‘tay lik’ngin nib toar nga fithik’ Kristus’?

⁴ Som’on ma be weliy Paul ni ba t’uf ni ngad ‘ted lik’ngidad nib toar nga fithik’ Kristus.’ (Mu taarebnag ko Matthew 13:20, 21.) Uw rogon nrayog ni nge athamgil be’ nge toar lik’ngin nga fithik’ Kristus? Dabiyog ni ngan guy lik’ngin e woldug, machane baga’ fan ko woldug​—ya ma ayuweg nge par nib mudugil ma ma duruw’iy. Ku arrogon e kanawo’ nge machib ni i tay Kristus ni ma yib angin ngodad ni dabiyog ni ngan guy ko som’on, ma ma taw nga lanin’dad ngu gum’ercha’dad. Ma aram ma ma duruw’iydad ma ma gelnagdad. Nap’an ni gad ra pag ni nge gagiyegnag e lem rodad, nge ngongol rodad, nge pi n’en ni gad ma turguy, ma aram e ran mithmithegdad ngad ognaged gadad ku Jehovah.​—1 Peter 2:21.

5. Uw rogon ni rayog ni ngad pared ni “ke yib lamen ngodad” e ggan nib spiritual?

⁵ Ri ba adag Jesus e tamilangan’ rok Got. Ke yog ni gowa ggan rok. (Matthew 4:4) Nap’an ni ke pi’ fare welthin u daken e burey ma 21 yay ni ke weliy e thin ni bay ko meruk e babyor ko Bin ni Hebrew e M’ag ko Bible. Thingarda rin’ed e n’en ni yog apostal Peter ni nge yog ni ngad folwokgad rok​—“gubin ngiyal’ ma be yib lamen e milik ngomed” ni aram e ggan nib spiritual ni bod e “bitir ni ka fin nni gargeleg.” (1 Peter 2:2) Nap’an ni ba adag e bitir ni madway ni ngan duruw’iy, ma ri ma tamilangnag e n’en ni ba adag. Faanra gathi aram rogon ni gad ba adag e ggan nib spiritual ma be yog Peter ni ngad athamgilgad ni nge yib lamen ngodad. Uw rogon? Fare thin ko Psalm 34:8 e ra ayuwegdad: “Mu ri’ lamen ma gguy ma ga ra pirieg feni manigil Jehovah.” Faanra gad ra “ri lamen” e Thin Rok Jehovah ni bay ko Bible u gubin ngiyal’ ma gad bieg u gubin e rran, ma gad ra pirieg ni rib fel’ ni ra duruw’iydad ko tirok Got ban’en ma rib manigil. Munmun, ma ra gel iyan rogon ni gad ra adag.

6. Mang fan ni baga’ fan ni ngad fl’eged i lemnag e thin ni gad ma bieg?

⁶ Machane, baga’ fan ni ngan bilig e ggan nib fel’ rogon u tomren ni kan ful. Ere ba t’uf ni ngad fl’eged i lemnag e n’en ni kad bieged. (Psalm 77:11, 12) Susun, nap’an ni gad ra poy fare ke babyor ni The Greatest Man Who Ever Lived, ma ra ga’ fan u wan’dad e pi guruy ni gad ra poy nfaanra gad ra tal boch ma gad fith ni gaar: ‘Mang felngin Kristus ni be tamilangnag e re thin ney, ma uw rogon nrayog ni nggu folwok rok ko yafas rog?’ Faanra gad ra fl’eg i lemnag e thin ni gad ma fil ni aram rogon ma aram e rayog ni ngad ngongolgad nib puluw ngay. Ma aram e nap’an ni thingarda turguyed ban’en ma rayog ni ngad fithed gadad ko mang e ra rin’ Jesus ko re n’em. Faanra gad ra turguy ban’en nib puluw ngay ma gad be dag ni rriyul’ ni ke yan lik’ngidad nib toar nga fithik’ Kristus.

7. Susun uw rogon u wan’dad e ggan nib el ko tirok Got ban’en?

⁷ Miki yog Paul nib fel’ ni ngad ked e “ggan nib el,” ni aram e tin nib toar e thin nriyul’ ko Thin Rok Got. (Hebrews 5:14) Fel’ ni ngad nameged ni ngad poyed e Bible ni polo’. Ma aram ma bay boch e thin nrayog ni ngad turguyed ni ngad filed u morngaagen, ni bod fare biyul’ ni pi’ Kristus, nge boch e m’ag ni fl’eg Jehovah u thilrad e girdi’ rok, ara boch e thin ko profet u lan e Bible. Ma bay boor ban’en nra ayuwegdad ni ngad ked e ggan nib spiritual nib fel’ rogon ni kan bilig. Mang e gad be nameg ko tamilangan’ ni gad be fil? Gathi fan ni ngad ufgad ngay, ya fan ni ngan ubing rogon fene gel nib t’uf Jehovah rodad ma ngad chuchugurgad ngak. (1 Korinth 8:1; James 4:8) Faanra ra yib e bilig ngodad ko re tamilangan’ ney ma gad kay, ma gad puluwnag ngodad, ma gad fanay ni ngad ayuweged yugu boch e girdi’, ma aram e ri gad be folwok rok Kristus. Aram e n’en nra ayuwegdad ngad ted lik’ngidad nib toar nga fithik’.

Ga Be ‘Ubungem Nga Daken Kristus’?

8. Mang fan fare thin ni ‘ngad ubunged gadad u daken Kristus’?

⁸ Bin migid e n’en nib t’uf ni ngan par rok Kristus, e weliy Paul yugu reb e fanathin nib puluw ngay​—ya ke weliy u morngaagen e woldug ko som’on ma chiney e be weliy u morngaagen e naun. Nap’an ni gad ra lemnag u morngaagen ba naun ni yibe toy, ma gathi ke mus ni gad ma lemnag e def riy ya ku gad ma lemnag e rungrung ni gad be guy, ni yibe toy u daken e maruwel nib gel. Ku arrogon gadad e ba t’uf ni ngad maruwelgad nib elmirin ni ngad ubunged felngin Kristus u fithik’dad. Ma athamgil ni aram rogon e ba tamilang ma yibe guy ni bod rogon ni yog Paul ku Timothy ni gaar: ‘Um rin’ed e pi n’ey ma ga tiyan’um ngay, nge yog ni guy e girdi’ ni gubin ni ga be mon’og iyan.’ (1 Timothy 4:15; Matthew 5:16) Mang boch e ngongol ko Kristiano ni ma ubungdad?

9. (a) Mang boch ban’en nrayog ni ngad nameged ni nge yog ni ngad folwokgad rok Kristus ko machib rodad? (b) Uw rogon ni gad manang ni ba adag Jehovah ni ngad falfalan’gad ko machib ni gad be tay?

⁹ I tay Jesus chilen ngodad ni ngad machibnaged fare thin nib fel’ ngak e girdi’. (Matthew 24:14; 28:19, 20) Ke tay e kanawo’ nib fel’ ni ngad leked, ya ke machibnag e girdi’ nder rus, ma ba angin riy. Machane dabiyog ni ngad machibnaged e girdi’ nib fel’ u rogon ni rin’ Jesus. Machane yog apostal Peter ni ngad nameged e re n’ey ni gaar: “Ngam liyorgad ngak Kristus u lanin’med, mi gimed tay ni ir e Somol romed. Mu fal’eged rogomed ni gubin ngiyal’ ni ngam pied e fulweg ko n’en nra fith be’ ngomed ni ngam weliyed u murung’agen e re n’en ni ir e ke l’agan’med ngay.” (1 Peter 3:15) Dabi maga’fan’um ni faanra ga be lemnag ni gathi ga be par ni “kam fal’eg rogom ni gubin ngiyal’ ni ngam pi’ e fulweg ko n’en nra fith be’ ngom.” Mu nameg e pi n’en nrayog rom ni ngam mon’og iyan me munmun mag taw ko re n’em. Faanra ngam fl’eg rogom u m’on riy ma rayog ni ngam thiliyeg boch ban’en ni ngam weliy ko girdi’ ara ngam uneg reb e thin ko Bible ngay. Rayog ni ngam nameg ni nge yoor e babyor ni ga ma wereg, ara nge yoor e return visit rom, ara ngam tababnag e Bible study. Machane urngin ban’en e gathi aram e n’en nib ga’ fan​—ni in e awa ni kan tay, nge in e babyor ni kan wereg, nge in e study rok be’​—ya n’en nib ga’ fan e rogon ni yibe rin’ nib fel’ rogon. Faanra gad ra nameg boch ban’en nib puluw ma gad athamgiliy ma ra ayuwegdad ngad pared nib falfalan’ ni ngad pi’ed gadad ko machib. Aram e n’en ni ba adag Jehovah​—ni ngad pigpiggad ngak “u fithik’ e falfalan’.”​—Psalm 100:2; mu taarebnag ko 2 Korinth 9:7.

10. Mang boch ban’en ko Kristiano nib t’uf ni ngad rin’ed, ma uw rogon nra ayuwegdad e pi n’ey?

¹⁰ Maku bay e pi n’en ni gad ma rin’ u lan e ulung ni ma ubungdad u daken Kristus. N’en nth’abi ga’ fan e ra bagadad e nge t’ufeg bagadad, ya aram e pow ko tin riyul’ e Kristiano. (John 13:34, 35) Nap’an ni ka be fil be’ e Bible ngodad ma gad ma chugur ko cha’ nem. Machane, chiney e rayog ni ngad folwokgad rok Paul ni “ngad ga’naged lanin’dad” ni aram e ngad guyed rogon ni nge fel’ thildad yugu boch e girdi’ u lan e ulung fa? (2 Korinth 6:13) Ku arrogon e pi piilal ni ba t’uf ni ngan t’ufegrad min tay farad. Faanra gad ra ayuwegrad ma gad fol ko fonow ni yad ma pi’ u daken e Bible ma aram ma ra mom boch e maruwel rorad ni yad be tay nib elmirin. (Hebrews 13:17) Maku ra ubungdad u daken Kristus.

11. Susun uw rogon ni ngad lemnaged e taufe nib puluw?

¹¹ Taufe e aram ba ngiyal’ nib ga’ e falfalan’ riy! Machane susun ndabda lemnaged ni gubin ngiyal’ u tomren e re n’em ma gad ra par ni aram rogon. Ya rogon ni ngan ubungdad u daken Kristus e “nga darod iyan nga m’on ni bod rogon fapi motochiyel ni ud folgad riy ke yan i mada’ ko chiney.” (Filippi 3:16) Machane gathi aram e par ni dariy e falfalan’ riy. Ya fan e re n’em e nguun yan nga m’on nib k’iy kanawoey​—ara ngan ubing e ngongoley nib fel’ ko tirok Got ban’en ma nguun par riy u reb e rran nge reb, nge reb e duw nge reb. Dab mu pag talin ni “en nra athamgil nge mada’ ko tomur e ra yog e yafos ngak.”—Matthew 24:13.

Be “Gel I Yan e Michan’ Rom”?

12. Mang fan fare thin ni “nge gel i yan e mich u wun’med”?

¹² Yog Paul ni bin dalip guruy ko par rok Kristus e “nge gel i yan e mich u wun’dad.” Ba ken e Bible e be weliy e pi thin nem ni gaar, “ba mudugil e mich u wun’uy,” ya fare bugithin ni Greek ni yog Paul e ma sor fan ko “ngan dugliy ban’en, ara ban’en nib mutrug, ara ban’en ni kan m’ag u rogon nib legal.” Nap’an ni be ga’ iyan e tamilangan’ rodad ma yibe tamilangnagan’dad ni bpuluw ni nge mich Jehovah Got u wan’dad, ma rib mudugil e re michan’ nem u rogon nib legal. Wenegan ni ke yib riy e be gel iyan rogon ni gad be par ni rib mudugil. Ma ra mo’maw iyan rok Satan nge re fayleng ney ni nge suwey lanin’dad. Re n’ey e ma pugurannagdad ko n’en ni yog Paul ni “ngad ilalgad iyan.” (Hebrews 6:1, NW.) Par nib ilal mab mudugil e ba puluw reb nga reb.

13, 14. (a) Mang riya’ ni yib ko pi Kristiano u Kolose u nap’an e bin som’on e chibog ni rayog ni nge n’igin nge yoyowol e michan’ rorad? (b) Mang e ke magawonnag laniyan’ apostal Paul?

¹³ Kan magawonnag e par nib mudugil ko pi Kristiano u Kolose u nap’an e bin som’on e chibog. I ginang Paul ni gaar: “Mu guyed rogomed ya ri kolmed be’ ngam manged kalbus rok ni be’ ni be maruwel ko gonop rok e girdi’ nge sabanban ndariy rogon nga bayang, ni yib ko machib ni sum rok e girdi’ ni yibe fil ngak reb e mfen nge reb, ma ki yib ko pi kan ni yad be gagiyeg u lan e gin’en ni ba’ urngin ban’en nu lan e lang riy nib muun e fayleng ngay, ma gathi Kristus e yib rok.” (Kolose 2:8) De adag Paul ni ngan fek yu Kolose nga bayang min chuwegrad ko flaab rorad ya kan “thapegrad ko gin nsuwon e en ni Fak nib t’uf rok [Got].” (Kolose 1:13) Uw rogon ni yibe guy rogon ni ngan bannagrad? Yog Paul ni ran bannagrad u daken e “philosophy” ara “gonop rok e girdi’,” ma kari mus ni aram e ngiyal’ ni ka nog e re bugithin nem u lan e Bible. Ere re thin nem e ma sor fan ko pi philosopher nu Greek ni Plato nge Socrates fa? Aram e riya’ ko tin riyul’ e Kristiano machane ngiyal’ nem ma re bugithin nem ni “philosophy” e boor fan. Ma sor fan ko boor mit e lem ko girdi’ nge boor mit e skul​—nge teliw. Susun, bod boch e piin ni Jew u nap’an e bin som’on e chibog ni Josephus nge Philo ni kar piningew ko teliw rorow ni aram ba philosophy​—sana kar rin’ew ni bochan ni nge adag e girdi’.

¹⁴ Boch e lem ko girdi’ ni philosophy ni ke magawonnag laniyan’ Paul e ba sor fan ko teliw. U lan e babyor ni ke yoloy ngak piyu Kolose ko re guruy nem ma ke weliy morngaagen e piin ni kar filed ko girdi’ ni gaar: “Dabni math ko re n’en ni baaray, dabni limilimiy e re n’en ni baaram, nge dabni math ko tin ni ka ba’” me ere ba tamilang ni be weliy u morngaagen e motochiyel rok Moses ni ke m’ay angin u nap’an ni ke yim’ Kristus. (Roma 10:4) Lem ara philosophy ko fayleng nge yugu boch ban’en e be magawonnag fare ulung nrayog ni ngar wargad ko tirok Got ban’en. (Kolose 2:20-22) I ginangrad Paul u morngaagen e lem ara philosophy ni aram bang ko fayleng. Pi thin nem ni googsur e sum ko girdi’.

15. Uw rogon nrayog ni ngad siyeged ndabi suwey lanin’dad e lem nde puluw ko Bible ni ma yib ngodad?

¹⁵ Rayog ni nge yoyowol e Kristiano nfaanra ran mon’eg e lem ko girdi’ ni der tor nga daken e Thin Rok Got. Ngiyal’ ney ma thingarda ayuwgad ko re riya’ nem. Yog apostal John ni gaar: “Pi tafager rog nri gimed ba t’uf rog, dabi pagan’med ngak urngin e piin ni yad be yog ni ba’ fare kan ni thothup rorad, ya ngam sikengniged yad ngam nanged ko re kan ni ba’ rorad e yib rok Got fa dangay. Ya boor e profet ni yugu ban’en ni kar wergad nga urngin yang.” (1 John 4:1) Ere dab mu tay telim nfaanra be’ ni gimew ma skul e be guy rogon ni nge suwey lanin’um ngam lemnag ni motochiyel ko Bible e de puluw ko ngiyal’ ney fa faanra en buguli yoror rom e be pi’ e athamgil nga lanin’um ni ngam chogownag e chugum, fa faanra be’ ni gimew ma maruwel e be magawonnagem ni ngam th’ab e motochiyel ko Bible, fa faanra be’ ni reb e walag e be thibthibnag e girdi’ ko ulung. Mu gonopiy ma ga palog ko pi n’en nde puluw ko Thin Rok Got. Faan gad ra yodor, ma gad ra par nib mudugil u nap’an ni gad be par rok Kristus.

“Mu um Pared nib Sug Lanin’med ko Magar ni Gimed be Pining”

16. Mang e bin aningeg i n’en nib t’uf ni ngan par rok Kristus, ma mang deer e rayog ni ngad fithed?

¹⁶ Fa bin aningeg e n’en ni weliy Paul nib t’uf ni ngan par rok Kristus e nge “sug lanin’med ko magar ni gimed ma pining.” (Kolose 2:7) Fare bugithin ni “sug” e ma yibnag ngan’uy ba lul’ ni ke sugubur. Ere be tamilangnag ni pi Kristiano e susun ni ngad pared ni ke mecham ngodad ni gubin ngiyal’ ma gad be pining e magar u lanin’dad. Ere fel’ ni ngad fithed gadad, ‘Gu ma pining e magar u lanin’ug fa?’

17. (a) Mang fan ni gad gubin ma boor ban’en nrayog ni ngad pininged e magar riy, ni mus ko ngiyal’ ni gad ba magawon? (b) Mang boch e taw’ath ni pi’ Jehovah ni susun ni ri ga ra pining e magar riy ngak?

¹⁷ Gad gubin ma bay boor fan ni ngad pininged e magar ku Jehovah u gubin e rran. Mus ko ngiyal’ nth’abi gel e magawon riy ma bay boch ban’en ni ma pi’ e toffan ngodad. Ya be’ ni fager rom e ra fl’eg lanin’um. Fa be’ nib t’uf rom e ra math ngom me pi’ e gapas nga lanin’um. Fa mol nib fel’ rogon u reb e nep’ e ra pi’ gelngim. Ma ggan ni kan fl’eg nib fel’ lamen e ma chuweg e bilig. Ba arche’ ni be tang, ba bitir ni be minmin, lan e lang nib fel’ raen, nge nifeng ni be thow e ma chuweg e gawel​—pi n’ey ni gubin nge boch ban’en e rayog ni nge buch ngodad u taareb e rran. Rib mom ni ngan dariy fannag e pi taw’ath ni aram rogon. Machane gathi bay rogon ni ngan pining e magar riy? Pi n’em e ma yib rok Jehovah, ni ir Tapgin “urngin e tin nib fel’ nge urngin e tow’ath nrib manigil.” (James 1:17) Miki pi’ ngodad boch e taw’ath ni kab baga’ fan ko pi n’em​—ni yafas aram reb. (Psalm 36:9) Maku ke bing e kanawo’ nrayog ni ngad pared ni manemus. Ke pi’ Jehovah e bin th’abi fel’ e maligach ni nge yog e re taw’ath ney ngodad, ya ke l’og Fak ni maagirag rok ni ir e en ni “rib t’uf rok.”​—Proverbs 8:30, NW; John 3:16.

18. Uw rogon nrayog ni ngad pininged e magar ku Jehovah?

¹⁸ Ere rib puluw e pi thin ney ko Psalm ni be gaar: “Rib fel’ ni ngan pining e magar ku Jehovah.” (Psalm 92:1) Ku aram e n’en ni yog Paul ko pi Kristiano u Thessalonika: “Demtrug e n’en nra yib ngomed ma gubin ngiyal’ ni nguum pininged e magar ngak Got.” (1 Thessalonika 5:18; Efesus 5:20; Kolose 3:15) Ra bagadad mab fel’ ni nge turguy ni nge gel boch e magar ni be pining u laniyan’. Meybil ni gad be tay e susun gathi ke mus ni ayuw ni gad be ning ku Got ko tin nib t’uf rodad. Machane ku dariy e kireb riy ni ngan ning ban’en. Machane amu lemnag faanra bay e fager rom ni ke mus ni ke non ngom ko ngiyal’ ni ba adag ni ngam pi’ ban’en ngak! Ere mang ni dab mu meybil ku Jehovah ni ke mus ni fan ni ngam pining e magar ngak ma ga yog e sorok ngak? Ra falfalan’ ko meybil ni aram rogon ya re fayleng ney e der pining e magar ngak! Ma meybil ni aram rogon e ra ayuwegdad ni ngad yiluyed owchedad ko pi n’en nib fel’ ko yafas rodad, me puguran ngan’dad ni gad ba flaab.

19. Uw rogon ni tamilangnag Paul u Kolose 2:6, 7 ni gad gubin ma rayog ni ngad mon’oggad iyan u rogon ni gad be par rok Kristus?

¹⁹ Gathi rib fel’ ya ri boor e thin nib gonop ni rayog ni nge yib ko taareb e thin ko Thin Rok Got fa? Fonow ni pi’ Paul ni nguun par rok Kristus e aram ban’en ni susun nge bagadad me adag ni nge tay nga gum’er’cha’en. Ngad dugliyed ni ngad ted ‘lik’ngidad nib toar nga fithik’ Kristus,’ ma “ngad ubunged gadad nga daken,” ma “nge gel i yan e mich u wun’dad ngak,” ma ‘nge sug lanin’dad ko magar ni da pininged.’ Re fonow ney e baga’ fan ko piin nka fin ra uned ko taufe. Machane ku bpuluw ngodad ni gad gubin. Mu lemnag e woldug ni taproot nge rogon ni be yan lik’ngin nib toar nga fithik’ e but’ ma ga lemnag e naun ni yibe toy nge rogon ni be tolang iyan nga lang. Aram rogon e yan rodad u taabang rok Kristus ni der ma mus. Thingarda ilalgad u boch ban’en ko yafas rodad. Ra ayuwegdad Jehovah ma ra flaabnagdad, ya ba adag ni nguu darod u taabang rorow Fak nrib t’uf rok ndariy n’umngin nap’an.

Uw Rogon ni Ga Ra Fulweg?

◻ Mang e ba l’ag ngay ni ngan par rok Kristus?

◻ Mang fan fare thin ni ‘ngan tay lik’ngin nib toar nga fithik’ Kristus?

◻ Uw rogon nrayog ni ngad ‘ubunged gadad u daken Kristus’?

◻ Mang fan ni baga’ fan ni nge “gel i yan e mich u wun’dad”?

◻ Mang boch ban’en ni susun ni ngad pininged e magar riy ni ke ‘sug lanin’dad’ ngay?

[Sasing ko page 22]

Dabiyog ni ngan guy lik’ngin e gek’iy machane ir e ma duruw’iy e gek’iy ma ma n’igin nge par nib mudugil