“Ngam Chichiiyed Nga Lukungumed Nge Par Nib Sobutan’med”

“Ma togopuluw Got ko piin nib tolangan’, machane ma runguy e piin nib sobut’an’rad.”​—1 PETER 5:5, New World Translation.

1, 2. Mang l’agruw e lem ko girdi’ nib math keru’ ni ri ma gagiyegnag e ngongol rorad’?

BAY l’agruw mit e lem ni be dag e thin rok Got ngodad nib math keru’. Ma gali lem n’ey e ma gagiyegnag e ngongol ko girdi’. Reb e kan weliy ni aram e “sobut’ lanin’uy’.” (1 Peter 5:5) Reb e Jibiki e be weliy fan fare thin ni “sobut’ lanin’uy’” ni aram be’ ni be “ngongol rogon nib sobutan’: be par nib palog ko lem nib tolang ma der ma yog e sorok ngak.” Ngan par nib sobut’ laniyan’uy (lowliness) e taabrogon ko ngan sobut’nagey (humility), ma aram e ngongol ni rib fel’, rogon ni be finey Got e re n’ey.

² Tolangan’ e ir e ngongol nib math keru’ ko re n’ey. Ma kan weliy e re n’ey ni aram be’ ni “ri ma sap ngak” ma be par nib “tolang e lem rok.” Kemus ni ir e ma lemnag ir, ma ir be’ nib chogow, be’ nib siin, ma yugu boch ban’en nib fel’ e baadag ni nge yog ngak ni yugu demtrug ni ra gafgow yugu boch e girdi’ ni bochan. Be weliy e Bible u murung’agen reb e wenegen: “Be’ e be gagiyegnag be’ ni ngeb e gafgow riy ngak.” Biney e be weliy murung’agen “be’ ni ma athamgil ni nge gel ku yugu be’” ni bod ni be “lo’log e nifeng” ma nap’an ni ra yim’ ma “dariy ban’en nrayog ni nge fek.” Ri dabun Got e re ngongol ni tolangan’ney.​—Ecclesiastes 4:4; 5:15; 8:9.

Nifengin e Fayleng e Be Par nib Gel

3. Mang nifengin e fayleng ni be par nib gel?

³ Bin ngan ko fa l’agruw mit e ngongol ni kan weliy faram ni bay u fayleng e chiney? Mang e ngongol ni be par nib gel ko re fayleng n’ey? Fare World Military and Social Expenditures 1996 e be gaar: “Dariy yugu reb e chibog faram ni taabrogon ko fa bin reliw e chibog ya ke yoor e . . . cham riy.” Bochan ni ma athamgil e girdi’ ni nge yog gelngirad ko am nge economic​—nge nam, nge teliw, nge ganong, nge mfen—​ma ke pag 100 million e girdi’ ni kar m’ad. Ma ke yoor e girdi’ ni kemus ni yad e yad ma lemnagrad. Fare Chicago Tribune e ke gaar: “M’ar ko girdi’ e ba muun ngay e cham nib gel, ngan gafgownag e bitir, mabgol ni ma dar, nge chingnag, m’ar ni AIDS, piin ni fel’ yangaren ni ma li’ ir, nge drug, nge girdi’ nib kireb u kanawo’, nge kol ppin u fithik’ e yargel, nge diyen ndan mabgol, nge ma li’ bitir u meyal, nge puwlag, . . . malulifith l’ugu, nge sasalap, political corruption . . . Kan chuweg e lem u murung’agen e tin nib mat’aw nge tin nib kireb.” Arfan, ni fare UN Chronicle e ke ginang e girdi’ ko: “Par ko girdi’ ni be kireb iyan.”

4, 5 Mang e be weliy e thin nu Bible ni kan yiiynag nib tamilang u murung’agen e nifengin e fayleng ko ngiyal’ ney?

⁴ Aram rogon e par ko girdi’ u gubin yang u fayleng. Ba puluw ko thin ni kan yiiynag u lan e Bible ni fan ko par rodad e ngiyal’ n’ey: “Tin tomren e rran e bayi mo’maw e par ko girdi’. Ya bayi par e girdi’ ni kemus ni yad e yad ma lemnagrad, ma ke gel e chogow rorad, ma kar ufanthingad, ma ke tolangan’rad, yad ma gathibthib, ma bay dabkur folgad rok e gallabthir rorad, ma bay dabkur pininged e magar ngak be’, ma bay dabkur yul’yul’gad, ma bay dabkur runguyed e girdi’, ma mo’maw’ ni ngan pagan’uy ngorad, ma bay ur t’ared e thin nga daken yugu boch e girdi’, ma bay dabra t’ared lanin’rad, ma yad ba damumuw, ma bay ra dabuyed e tin nib fel’, ma bay ra sasalpiyed yugu boch e girdi’, ma yad ra par ni yad ba gelan’, ma ke par nib tolang e lem rorad.”​—2 Timothy 3:1-4.

⁵ Ba puluw e pi thin n’ey nga rarogon e re fayleng n’ey e ngiyal’ n’ey ni ke gel e kireb riy. Gag-e som’on aram rogon e lem ko girdi’ nib siin e chiney. Fapi nam e chiney e yad be lemnag ko uw rogon ni ngar gagiyegnaged yugu boch e nam ma rayog ni ngan guy e re ngongol n’ey u fithik’ e girdi’ ni yad ma athamgil ni ngar gelgad ko yugu reb e nam. Bod e tagenging ko gosgos, ma boor e piin ni be lemnag ko uw rogon ni nge gel ko re gosgos nem ni yugu demtrug ni ke gafgownag e lem rok ara downgin. Ma kan skulnag e re ngongol n’ey ngak e piin ni bitir ma be par ni aram rogon e lem rorad nge mada’ ko ngiyal’ ni kar ilalgad. Ma wenegen e aram e be par e girdi’ ni “yad ba toogor, yad ma cham, nge awan’, nge damumuw nib pag rogon, yad ma tugthin, ma yad be wer ngar yurba’gad.”​—Galatians 5:19-21, NW.

6. Mini’ e be ayuweg ni nge gel e lem nib siin, ma uw rogon ni be thamiy Jehovah u murung’agen e ngongol ni aram rogon?

⁶ Be dag e Bible ni be par e girdi’ ko re fayleng ney ni kemus ni yad e yad be lemnagrad ma re n’ey e ri be dag ni “fa en ni kan nog Moonyan’ nge Satan ngak, e ir e be bannag e girdi’ nu fayleng ni polo’.” Fare Bible e ke weliy ko uw rogon ni nge gagiyegnag Satan e girdi’ nu fayleng ko biney e tayim ni kan nog e tin tomren e rran ngay nib mo’maw’: “Ri bayi gafgow e fayleng . . . ya ke yib fare Moonyan’ ngomed ni kari damumuw, ya manang ni daki n’uw nap’an ni nge par.” (Revelation 12:9-12) Ere ir nge fapi moonyan’ rok e kar athamgilgad ni ngar ted nga gum’ercha’en e girdi’ e lem nib siin. Ma uw rogon e re ngongol n’ey uwan’ Jehovah? Thin Rok e begaar: “Ke dabuy Jehovah urngin e girdi’ nib ufanthin.”​—Proverbs 16:5.

Piin nib Sobut’an’rad e Bay Jehovah Rorad

7. Uw rogon uwan’ Jehovah e piin nib sobutan’rad, ma mang e be skulnagrad?

⁷ Machane, ma flaabnag Jehovah e piin ni yad ba sobut’an’. Reb e tang ni fan ku Jehovah, ma David ni Pilung e i gaar: “Piin nib sobut’an’rad e ga ma ayuwegrad; machane ga ma togopuluw ngak e piin nib tolangan’rad, ma ga ma sobut’nagrad.” (2 Samuel 22:1, 28, NW) Arfan, e fonow ni Thin rok Got ni be gaar: “Ngam gayed Jehovah, gimed e piin nib sobut’an’med u fayleng . . . Ngam mu gayed rogon athamgilgad ni ngam pared ni gimed ba mat’aw, nge ngam mu athamgilgad ni ngam pared ni gimed ba sobut’an’. Ma dabi siy yira mithagmed nga bang ndariy e riya’ riy u nap’an e damumuw nra yib ko rran rok Jehovah.” (Zephaniah 2:3) Piin ni kar gayed Jehovah u fithik’ e sobut’an’ e kan skulnagrad ni ngar manged e girdi’ nib thil e lem rorad ko girdi’ ko re fayleng n’ey. “Ra fil ngak e piin nib sobut’an’rad murung’agen kanawoen.” (Psalm 25:9; Isaiah 54:13) Re kanawo’ n’ey e aram e kanawo’ ko t’ufeg. Ni aram ngan rin’ e tin nib mat’aw nib puluw ko motochiyel rok Got. Rogon ni yog e Bible, re t’ufeg n’ey e “de uf, ma der ma lemnag ni ir e baga’fan, . . . ara ke mus ni ir e ma lemnag ir.” (1 Corinthians 13:1-8) Ku rayog ni ngan guy e re n’ey rogon ni yibe dag e ngongol nib sobut’ lanin’uy’.

8, 9. (a) Fare t’ufeg nib m’ag ko kenggin e motochiyel i yib u uw? (b) Uw feni ga’ fan ni ngan folwok rok Jesus rogon ni i dag ni ir be’ nib t’uf e girdi’ rok nge ir be’ nib sobut’an’?

⁸ Nap’an e bin som’on e chibog ma Paul nge tin som’on e Kristiano e kar filed e re t’ufeg ney u rogon e machib ni tay Jesus. Ma ke nang Jesus e re n’ey ya Jehovah ni Chitamangin e ke fil ngak, ma be gaar e Bible: “Got e t’ufeg.” (1 John 4:8) Manang Jesus ni m’agan’ Got ngay ni nge par ni be fol ko fare motochiyel u murung’agen e t’ufeg. (John 6:38) Aram fan ni ma runguy e piin ni kan gafgownagrad, nge piin nib gafgow, nge piin ni ta denen. (Matthew 9:36) Ke yog ngorad ni gaar: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed. Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’.”​—Matthew 11:28, 29.

⁹ I dag Jesus ngak pi gachalpen ni baga’ fan ni ngar folwokgad rok nrogon ni ke dag e t’ufeg nge sobut’an’ u nap’an ni ke non ngorad: “Ma ra nang e girdi’ ni gimed e pi gachalpeg, nfaanra bay e t’ufeg u fithik’med.” (John 13:35) Ba tamilang ni yad bathil ko girdi’ ko re fayleng n’ey ni ke mus ni yad e yad ma lemnagrad. Aram fan ni ke yog Jesus ngak pi gachalpen: “Gathi yad girdien e fayleng.” (John 17:14) Danga’, dar folwokgad rok girdien e fayleng rok Satan ni yad ba ufanthin, ma yad ba siin. Kara folwokgad rok Jesus nrogon ni ke dag e t’ufeg nge sobut’an’ ngak e girdi’.

10. Mang e ma rin’ Jehovah ngak e girdi’ nib sobut’an’rad ko ngiyal’ ney?

¹⁰ Thin rok Got e ke weliy ni chiney ni gad be par ko tin tomren e rran, ma piin nib subut’an’rad e yira ulunguyrad nrogon ni yad ba taareb u ga’ngin yang u fayleng nbochan e t’ufeg nge subut’an’. Aram fan, ni yugu demtrug ko yad be par u fithik’ e girdi’ ni be gel iyan e ngongol rorad nib tolangan’, ma girdien Jehovah e yad be dag e ngongol nib math keru’​—yad be par nib subut’an’rad. Yad be yog: “Nga darod ko fare burey rok Jehovah [liyor nib riyul’ ni fan ngak ni kan tolangnag], . . . ma ra fil ngodad u murung’agen kanawoen, ma nga darod riy.” (Isaiah 2:2, 3, NW) Pi Mich rok Jehovah u ga’ngin e fayleng e yad be yan u kanawoen. Yad gubin nib muun ngay fare “ulung ni baga’, ndariy be’ nrayog ni nge theegrad, ni kar bad u urngin e nam, nge ganong, nge gubin mit e girdi’,nge gubin e thin.” (Revelation 7:9) Re ulung ni baga’ n’ey e bay bokum i million e girdi’ riy. Uw rogon ni be skulnagrad Jehovah ni ngar manged e piin nib subut’an’rad?

Yibe Fil Rogon ni Nge Sobut’ Lanin’uy

11, 12. Uw rogon ni ma dag e pi tapigpig rok Got ni yad e piin nib sobut’ laniyan’rad?

¹¹ Gelngin Got e be maruwel ko girdi’ rok ni ngar filed rogon ni ngar gelgad ko fare nifengin e fayleng nib kireb ma yad ra dag fare womngin e kan ni thothup rok Got. Ma ra m’ug e biney ko “t’ufeg, nge felfelan’, nge gapas laniyan’, nge gum’an’, nge gol, nge fel’ ngak e girdi’, nge yul’yul’, nge sobut’an’, nge t’ar laniyan’.” (Galatians 5:22, 23) Ra ngan ayuwegrad ni ngar ga’naged e pi ngongol n’ey u fithik’rad, ma yima fonownag e pi tapigpig rok Got ndab ra “ufanthingad, ara i k’aring bagayad e damumuw ngak bagayad, ara i awan’ bagayad ngak bagayad.” (Galatians 5:26) Paul ni apostal e ke yog nib chuchugur ko fa binem ni gaar: “Nggog ngomed ni gimed gubin ndab mu tolangniged gimed u lanin’med nge pag rogon e lem nsusun e nguum tiyed; machane nguum lemgad u fithik’ e lem nib sobut’.”​—Romans 12:3.

¹² Thin rok Got e be fil ngak e tin riyul’ e Kristiano ni “dab ra rin’ed ban’en nbochan ni yad baadag ni ngar tugthingad ara bochan ni ke tolangan’rad, machane bochan ni yad be par nib sobut’an’rad ma yad be lemnag ni yugu boch e girdi’ [pi tapigpig rok Got] e kab tolang ngorad, ma ngam sapgad ko n’en, ni gathi goo gimed e ra fel’ rogomed riy ara ke mus ni fanam e ngam lemnaged, machane ku mu rin’ed ban’en ni nge fel rogon yugu boch e girdi’ riy.” (Philippians 2:3, 4) “Ra be’ ma gathi go’ ir e ngi i tafinaynag e tin nib fel’ ngak, ya ngki tafinaynag e tin nib fel’ ngak boch e girdi’.” (1 Corinthians 10:24) Arrogon, “t’ufeg e ma ubung” yugu boch e girdi’ ndariy e thin ni ngan nog nge n’en ni ngan rin’ ni bay e lem nib siin u fithik’. (1 Corinthians 8:1) Ma ra pi’ athamgil nga laniyan’ e girdi’ ni ngar ayuweged yad, ma der ma lemnag rogon ni nge fel’ boch e par rorad ko yugu boch e girdi’. Fare lem ni gag-e som’on e dariy u fithik’ e girdi’ ni yad e pi tapigpig rok Jehovah.

13. Mang fan ni thingarni fil rogon ni ngan sobut’nag lanin’uy, ma uw rogon ni nge fil be’ e re n’ey?

¹³ Machane, bochan ni daworda flontgad, ma aram kan gargelnagdad ni gathi ba sobut’ lanin’dad (Psalm 51:5) Thingarda filed rogon ni nge yog ngodad e re fel’ngin ney. Ma susun mo’maw’ e re n’ey ko girdi’ ni dan fil ngorad kanawoen Jehovah u nap’an ni ka yad ba bitir machane kar filed e re n’ey u nap’an ni kar ilalgad. Ma immoy ni af ngorad e pi ngongol ney nib puluw ko nifengin e fayleng. Ere thingara filed rogon ni ngar “n’iged pangirad ni kakrom ni ir e [kar] pared riy” ma ngar “ron’ed nga dakenrad e bin nib biech pangirad ni Got e sunumeg nib puluw ko tin nib m’agan’ Got ngay nib mat’aw ma ba yul’yul’.” (Ephesians 4:22, 24) U daken e ayuw rok Got ma piin nib yul’yul’ e rayog ni ngar rin’ed e n’en ke tay chilen ngorad ni gaar: “Ngam mon’ed nga dakenmed e runguy, nge gol, ngam pared nib sobut’an’med, ma ngam pared ni gimed ba sumunguy, ma nge gum’an’med.”​—Colossians 3:12.

14. Mang i weliy Jesus u murung’agen fa en ni baadag ni nge tolangnag ir?

¹⁴ Pi gachalpen Jesus kakrom e thingara filed e re n’ey Nap’an ni kar ilalgad ma kefin ra manged e pi gachalpen ma ngiyal’ nem ke af ngorad e nifengin e fayleng ma aram yad ma lemnag rogon ni nge par nib tolang e liw rorad ngak yugu boch e girdi’. Ba ngiyal’ me yib e chitiningin fa gali gachalpen i dag ni baadag fak ni nge yog ngorow e liw nib tolang, me gaar Jesus: “Pi pilung ko pi nam e baga’ lungurad u puluwon [e girdi’] ma piin ni yad be yog e thin rorad e yad be gagiyegnagrad. Machane gimed e gathi ereram rogon e n’en ni ngam rin’ed; faanra ba adag bigimed ni nge mang ir e ba tolang, ma ir e thingari mang tapigpig romed, ma faanra baadag bigimed ni ir e nge m’on, me ir e thingari mang sib romed. Bod e en ni Fak e Girdi’ [Jesus] nde yib ni ngan pigpig ngak, machane yib ni nge pigpig me pi’ e pogofan rok nge biyuliy boor e girdi’ ngay.” (Matthew 20:20-28) Nap’an ni yog Jesus ngak pi gachalpen ni dabra fanayed e liw rorad ni ngar guyed rogon ni ngar pared nib tolang ngak yugu boch e girdi’, miki yog ni: “Gimed gubin nra bigimed ma walagen bigimed.”​—Matthew 23:8.

15. Girdi’ ni yad baadag ni ngar manged e piin ni piilal ma mang e ngongol nib t’uf ni nge yog ngorad?

¹⁵ Tin riyul’ e gachalpen Jesus e ir reb e tapigpig, arrogon, tapigpig rok yugu reb e Kristiano ni walagen. (Galatians 5:13) Ri aram rogon e n’en ni thingari rin’ fa en ni baadag ni nge yog ngak boch e maruwel ni nge ayuweg e ulung. Thingar dabra guyed rogon ni nge ga’ boch e liw ara mat’awrad ngak yugu boch e girdi’; ma dabra guyed rogon ni ngar ‘suweyed e piin ni kan pi’rad ngorad ni ngar gafaliyed yad machane ngar pared nib fel’ pangirad ya nguur folwokgad rorad.’ (1 Peter 5:3) Riyul’, ni fa en ni ke mus ni ir e ma lemnag ir e be dag ni dariy rogon ni nge ayuweg ara nge mang piilal u lan e ulung. Cha’ nem e ra kirebnag e ulung. Riyul’, ffel’ ni nge ‘guy rogon ni nge yog ngak boch e taw’ath nge mang piilal ko ulung,’ machane susun ni n’en ke k’aring be’ ni nge un ko re maruwel ney e aram baadag ni nge pigpig ngak yugu boch e girdi’ ni Kristiano. Re maruwel ney e gathi liw ni nge gelbuguwan be’ ara nge yib gelngin ya girdi’ ni kan tayrad ni ngar ayuweged e ulung e susun yad e piin nib sobutan’rad u lan e ulung.​—1 Timothy 3:1, 6.

16. U lan e thin rok Got ma mang fan ni kan puwan ngak Diotrefes?

¹⁶ I John ni apostal e ke piningdad ni ngad tiyan’dad ku fa en ni ke oloboch rogon ni be lemnag ban’en, ma be gaar: “Kug yoloy bangi babyor ngak girdien e galesiya, machane Diotrefes, ni be’ ni ba adag ni ir e nge yog e thin rorad, e dabun ni nge yog ngak boch ban’en ni tiromad ma de defamed.” Cha’ ney e der ma tay fan yugu boch e girdi’ ya be guy rogon ni nge yan e liw rok nga lang. Ere gelngin Got e ke k’aring John ni nge tay nga Bible boch e thin ni be yal’uweg Diotrefes nbochan bay rok fare lem ni gag-e som’on.​—3 John 9, 10.

Fare Lem nib Mat’aw

17. Uw rogon ni Peter, nge Paul, nge Barnabas e kar sobut’niged lanin’rad?

¹⁷ Bay boor e thin nu Bible ni be weliy murung’agen rogon ni dag boch e girdi’ kakrom ni yad ba sobut’an’. Faani yan Peter nga lan e naun rok Cornelius, me yib “i pag ir nga but’ u p’eowchen u tooben e rifrif u ay [Peter] me siro’ ngak.” Machane de felfelan’ ko siro’ ni pag rogon nni pi’ ngak, me “sak’iynag Peter Cornelius, ni be gaar: ‘Mu sak’iy; ya gag e ke mus ni gub girdi’.’ ” (Acts 10:25, 26) Nap’an ni ur moyew Paul nge Barnabas u Lystra, ke golnag Paul be’ nib mogutgut ni i par ni aram rogon ka nap’an ni kan gargelnag. Ma girdi’ ni boor ni ur moyed ko ngiyal’ nem e kar rogned ni yow e got. Machane, Paul nge Barnabas “e kar guchthiyew e mad rorow ngar milgow iyan nga fithik’ fapi girdi’, ni yow be non ni baga’ lamrow ni be lungurow: ‘Pi cha’, mang ni ngam rin’ed e biney e pa’? Ya gamow l’agruw i girdi’ ni bay thibngimow ni bod gimed.’ ” (Acts 14:8-15) Pi cha’ nem ni yad e piin nib sobut’an’rad e dubrad ni nge siro’ boch e girdi’ ngorad.

18. Mang e ke yog fare engel ngak John nrogon nib sobut’ laniyan’?

¹⁸ Faani pi’ ngak John ni apostal boch e thin ni “Jesus Kristus i weliy,” reb e engel e ke fek e re nem nge pi’ ngak. (Revelation 1:1) Bochan reb e engel ma bay gelngin nib gel, gad manang ko mang fan ni ke rus John, ya ke mus ntaareb e engel ma ke li’ e 185,000 e girdi’ ni piyu Assyria u lan taareb e nep. (2 Kings 19:35) Be gaar John: “Faani gu rung’ag ma kug guy e re nem, mu gu paraw u tooben i ay fare engel ni faani ir e ke dag e pi n’ey ngog ni nggu siro’ ngak. Machane me gaar: ‘Ngam kol ayuw’! Dab mu rin’ e re nir! Ya gadow l’agruw ma tapigpig ma taareb rogog ngak pi walagem . . . mu siro’ ma ga meybil ngak Got.’ ” (Revelation 22:8, 9) Riyul’ ni re engel nem nib gel gelngin e ba sobut’ laniyan!

19, 20. Ngam weliy u murung’agen rogon ni be dag e pi salthaw nu Roma ni kan nog general ngorad ni yad ba ufanthin mab math keru’ ku Jesus ni ri be’ nib sobut’an’.

¹⁹ Rib fel’ rogon ni ke dag Jesus ni ir be’ nib sobutan’. Ir Fak got ni kari maagirag rok, ma ir e ra mang Pilung ko Gil’ilungun Got u tharmiy. Faani dag Jesus ir ngak e girdi’ nriyul’ ni aram rogon e liw rok, de rin’ e n’en ni ma rin’ e pi salthaw nu Roma ni kan nog general ngorad kakrom. Yima yarmiy e thelap ni baga’ ni fan ngorad​—nge procession—​ma yad ma un ko karrow ni kan tay e gol nge ivory riy, ni os nib wech wech ramaen e be giringiy, ara elephant, ara lion, fa tiger. Nap’an fare thelap ma bay boch e girdi’ ni be yon’ e tang ni fan ko girdi’ ni kar gelgad ko mahl, ma yad ma fek boch e cart ni kan ta’ ngay boch e chugum ko toogor rorad ni kar feked nge boch e float ni ba gagang’ ni aram e pi n’en ni be yip fan e mahl. Maku be un ngorad e pi pilung, nge fak e pilung, nge pi general, ni kar manged kalbus rorad ni be un ngorad chon e tabinaw rorad, ma baga’ ni kan chuweg e mad rorad ni ngan tamra’nagrad. Binem e be dag e lem nib tolang nge ufanthin.

²⁰ Ba thil e n’en ni ke rin’ Jesus Kristus u nap’an ni dag Jesus ir kakrom ngak e girdi’. De maruwaran’ ni nge fol ko boch e thin ni kan yiiynag u murung’agen, ni be gaar: “Mu sapgad! pilung romed e be yib ngomed. Ir e ba mat’aw, arrogon, kan ayuweg; ma ba sobutan’, ma ke yib ni ke af nga daken ba donkey.” Bochan ir be’ nib sobut’an’ ma aram ke yib ni ke af nga daken ba gamanman ni yima fanay ko maruwel, ma de un ko reb e karrow ni pi gamanman ni yima fanay ko parade e ir e be giringiy. (Zechariah 9:9; Matthew 21:4, 5) Uw feni felfelan’ e girdi’ nib sobut’an’rad ni Jehovah era turguy ni Jesus e ra mang pilung u ga’ngin yang u fayleng ko bin nib biech e fayleng, ni ir be’ ni riyul’ ni ba sobut’ laniyan’, ma ba sobut’an’, ma ba t’uf e girdi’ rok, ma ba gol, ma ba runguy!​—Isaiah 9:6, 7; Philippians 2:5-8.

21. Ngan sobut’nag lanin’uy e de m’ag ko mang?

²¹ Bochan ni Jesus, nge Peter, nge Paul, nge boch e pumoon nge ppin ni kar daged e michan’ rorad kakrom ma yad e piin nib sobut’an’rad ma aram ke m’ay fare lem ni be’ nib sobut’an’ e ir be’ nib war laniyan’. Gathi aram rogon, re n’ey e be dag ni fa cha’ nib sobut’an’ ir be’ nib mudugil laniyan’, ya pi cha’ nem e ba gel lanin’rad ma ba pasig. Bochan ni ba mudugil e lem rorad nib puluw ko tin nib mat’aw, arfan ni kar k’adedan’rad ko pi skeng nib gel ni yib ngorad. (Hebrews, chapter 11) Ma chiney, faanra ra par e pi tapigpig rok Jehovah nib sobut’an’rad, ma bay gelngirad ni aram rogon ya ma fanay Got e kan ni thothup rok nib gel ni nge ayuwegrad. Aram fan ni kan fonownagdad: “Ma gimed gubin nthingar mon’ed madan e sobut’ laniyan’ nge bigimed me pigpig ngak bigimed, ya Got e ma togopuluw ngak e piin nib tolangan’rad, machane ma dag ni ir ba gol ngak e piin nib sobut’an’rad. Ere mu sobut’niged lanin’med, u tan pa’ Got nib gel gelngin, ni nge tolangnagmed ko ngiyal’ ni be finey.”​—1 Peter 5:5, 6; 2 Corinthians 4:7.

22. Mang e yira weliy ko bin migid e article?

²² Bay yugu reb e lem nib sobut’ nib t’uf ni nge fol e pi tapigpig rok Got riy. Ma aram e n’en nrayog ni ngan ubung e lem ko t‘ufeg u lan e ulung nge rogon ni nge fel’ thilrad ma ngar ayuweged yad. Arrogon, aram e n’en ni ma ayuweg rogon ni ngan par nib sobut’ lanin’uy. Yira weliy e re n’ey ko bin migid e article.

In Review

◻ Ngam weliy murung’agen e nifengin e fayleng ni be par nib gel ko ngiyal’ n’ey.

◻ Uw rogon ni be dag Jehovah nib fel’ e piin nib sobut’an’rad uwan’?

◻ Mang fan ni thingarni fil rogon ni ngan sobut’nag lanin’uy?

◻ Mang e be weliy e Bible rogon ni ke dag boch e girdi’ ni yad e piin nib sobut’ lanin’rad?

[Picture on page 25]

Ke yog fare engel ngak John: “Dabmu rin’ e re nir! Ya gadow l’agruw ma tapigpig”