Kar Rin’ed E Tin Nib M’agan’ Jehovah Ngay

Kan Pi’ e Maligach ni ngan Mon’ognag e Liyor nib Machalbog

PIYU Israel e kar guyed gelngin Jehovah u nap’an ni ke ayuwegrad. Kar guyed fare Day ni Row ni ke ruw raba’ ma aram ma ranod nga baraba’ mar milgad rok e pi salthaw nu Egypt. Ma nap’an ni kar tawgad nga baraba’ ma kar guyed e ran ni ke sul me yib nga daken e pi salthaw nem. I ayuweg Jehovah e yafos rorad!​—Exodus 14:21-31.

Machane boor piyu Israel e ke dariy fan u wan’rad e n’en ni ke rin’ Got ni fan ngorad. Nap’an ni immoy Moses u daken fare Burey nu Sinai, mar pied e gol rorad ngak Aaron mar rogned ngak ni nge ngongliy ba liyos ni fan e ngar liyorgad ngay. Nap’an ni sul Moses, me guy e pi girdi’ nem ni yad be abich, ma yad be chingnag, ma yad be churu’, ma yad be siro’ nga ba liyos ni yaan e garbaw! Ma ke yog Jehovah ni ngan li’ 3,000 e pi girdi’ nem ngar m’ad​—dabi siy ni aram e piin ni kar k’aringed e re togopuluw nem. Rofen nem ma ke fil e girdi’ rok Got ni ba t’uf ni kari mus ni goo Jehovah e ngar liyorgad ngak.​—Exodus 32:1-6, 19-29.

De n’uw nap’an u tomren e re n’em, ma ke tabab Moses ni nge rin’ e n’en ni yog Got ngak ni nge toy fare tabernacle, ni aram e tento ni fan ko liyor. Ba t’uf boch ban’en nib tolang puluwon nge piin nib cheg ko maruwel ni fan ni ngan ngongliy e re tento nem. Ere ba uw rogon ni rayog e pi n’en ney? Ma mang e rayog ni ngad filed ko re thin ko Bible ney?

Kan Pi’ e Ayuw nge Chugum

I yog Jehovah ngak piyu Israel u daken Moses ni gaar: “Ngam mog ko urngin e girdi’ ni ngar pied e ayuw ni fan ku Jehovah. Urngin e girdi’ ni yad ba adag e ngar pied ban’en ngak Jehovah.” Miti mang ayuw ni kar pied? Kan pi’ e gol nge silber, nge wasey ni copper, nge tret ni yarn, nge mad ni yu yang, nge bunuen e gamanman, nge ren, nge pi malang nib tolang puluwon.​—Exodus 35:5-9, New World Translation.

Rayog ko piyu Israel ni ngar pied e ayuw ni boor. Ya nap’an ni kar chuwgad u Egypt, mar feked boor e gol nge silber, nge mad. “I fek piyu Israel e machaf rok piyu Egypt.”a (Exodus 12:35, 36) Ma ke pi’ yu Israel e machaf rorad ni ngan ngongliy e liyos ni fan ko liyor ni googsur. Ere yad ra pag farad mi yad pi’ e ayuw ni fan ko bin riyul’ e liyor?

Mu tiyan’um ngay ni de yog Moses ko in e ayuw ni ra pi’ be’, ma de n’igin e girdi’ ni ngar tamra’gad ma aram fan ni kar pied e ayuw. Ya ke pining e “piin ni yad ba adag” ni ngar pied e ayuw. De lemnag Moses ni thingari towasariy e girdi’ rok Got ngar pied ban’en. Ya ke pagan’ ngorad ni ra be’ ma ra pi’ e n’en nrayog rok.​—Mu taarebnag ko 2 Korinth 8:10-12.

Machane gathi ke mus nib t’uf ni ngan pi’ e chugum ni ngan toy fare naun. Ki yog Jehovah ngak yu Israel ni: “Urngin e piin ni yad ba gonop e ngar bad mar rin’ed e n’en nra yog Jehovah ngorad.” Arrogon, ba t’uf e piin nib cheg ko maruwel. Ma rriyul’, ni ba t’uf e piin nib cheg ko urngin mit e maruwel​—ni piin nra maruwel ko ren, nge wasey nge churuwo’—​ni fan ni ngan mu’nag fare maruwel. Ma dabi siy ni ra pow’iy Jehovah e girdi’ ma bay rogon ni ngan nog e sorok ngak ni bochan.​—Exodus 35:10, 30-35; 36:1, 2.

Ma ba adag piyu Israel ni ngar pied e ayuw ni chugum mar uned ko maruwel. Be weliy e Bible ni gaar: “Ke yib urngin e piin ni yad ba adag u gum’ercharad, mar pied e ayuw ni fan ko fare maruwel ni ngan toy fare tento ni fan ko muulung, nge pigpig riy, nge fan ko pi mad nib thothup. Ma yugu ra yib e girdi’ ni piin pumoon nge piin ppin, ni urngin e girdi’ ni ba adag.”​—Exodus 35:21, 22.

Ban’en ni Ngad Filed Riy

Ngiyal’ ney ma yima pi’ e ayuw ni fan ni ngan wereg e thin ko Gil’ilungun Got. Baga’ ni yima pi’ e salpiy. Ma boch e pi walag ni pumoon nge ppin ni yad ba salap u ba mit e maruwel e yad ma toy e pi naun ni Kingdom Hall, nge Assembly Hall, nge pi ofis ko branch. Ma boor ko raay e naun ni Bethel u ga’ngin e fayleng ni yibe maruwel riy, ni boor mit e maruwel. Dabi pag Jehovah talin e maruwel ni be tay e piin ni kar pied e ayuw mar maruwelgad nib elmirin!​—Hebrews 6:10.

Ku arrogon urngin e piin ni be un ko machib ko Kristiano. Yibe pining urngin e girdi’ ni ngar gayed rogon ni nge yoor e machib ni yad be tay. (Matthew 24:14; Efesus 5:15-17) Boch e girdi’ e ma rin’ e re n’ey ni yad e pioneer. Ma boch e girdi’ e dabiyog ni ngar uned ko pioneer. Machane ku be felan’ Jehovah ngorad. Bod rogon e ayuw ni kan pi’ ko fare tento, ma de yog Jehovah ko in e ayuw nra pi’ be’. Machane n’en nib t’uf rok e ngad pigpiggad ngak u polo’ i gum’ercha’dad, ngu polo’ i lanin’dad, ngu polo’ i gelngidad. (Mark 12:30) Faanra gad be yodorom, ma rayog ni nge pagan’dad ni ra taw’athnagdad ni fan ko ayuw ni gad ma pi’ ni ngan mon’ognag e bin riyul’ e liyor.​—Hebrews 11:6.

[Footnote]