Flaab Ni Ma Yib Rok Jehovah E Ma Taw’athnagdad

“Flaab ni ma yib rok Jehovah−aram e n’en ni ma taw’athnagey, ma de uneg e amith ngay.”​—Proverbs 10:22.

1, 2. Mang fan ni dabiyog e falfalan’ ni bochan e chugum?

BOKUM million e girdi’ e ngiyal’ ney ni yad ma lek e chugum. Ma falfalan’ e pi girdi’ nem ko chugum, fa? Be gaar fare ke babyor ni The Australian Women’s Weekly: “Da gu nang ba ngiyal’ ni de falfalan’ e girdi’ u rarogorad.” Miki gaar: “De puluw e re thin ney. Ya yima yog ni ke fel’ rogon yu Australia ko Salpiy, ma ba fel’ e par ko girdi’. . . . Machane baga’ ni dariy e athap rok e girdi’. Manang e piin ni pumoon nge piin ni ppin ni bay ban’en ni dariy ko yafas rorad machane dar nanged ko mang.” Riyul’ fare Thin Nib Thothup ni ma yog ni chugum e der ma yognag e falfalan’ ara yafas!​—Ecclesiastes 5:10; Luke 12:15.

² I yog e Bible ni bin baga’ e falfalan’ e ma yib ni bochan e flaab rok Got. Arrogon e thin ko Proverbs 10:22 ni gaar: “Taw’ath ni yib rok Jehovah−aram e n’en ni ma flaabnagey, ma de uneg e amith ngay.” Baga’ ni bay e amith ni bochan chogowen e chugum. Bpuluw e thin rok apostal Paul ni gaar: “Machane piin ni yad a adag ni nge yoor e salpiy rorad e yad ma pagrad ngak e pi n’en ni ma pingeg e girdi’ nge denen, mi yad aw ko wup ko ar’ar ni aram e yibe ar’arnag e tin dariy fan nge tin nra kirebnigey, ni ir e ma girngiy e girdi’ ko tagan mi yad malog. Ya chogowen e salpiy e ir lik’ngin urngin mit e kireb. Boch e girdi’ e ri yad ba adag ni nge yog ngorad ni aram tapgin ma kar mal’afgad u rogon ni nge mich Kristus u wun’rad, ma ke m’ingan’rad ke yib e kireban’ ni pire’ ngorad.”​—1 Timothy 6:9, 10.

3. Mang fan ni ma yib e magawon ngak e pi tapigpig rok Got?

³ Machane ra pirieg e flaab e piin ni yad ma “motoyil ko thin rok Jehovah” ma de un e amith ngay. (Deuteronomy 28:2) Ma sana ra fith be’, “Faanra dariy e amith ni be un ko pi flaab ni ma yib rok Jehovah, mang fan ni ba gafgow boor e pi tapigpig rok Got?” Be dag e Bible ni ke pag Got ni nge yib e skeng ngodad, machane pi skeng ney e ma yib rok Satan ara m’ag rok nib kireb, ara ma yib ko denen ni bay u fithik’dad. (Genesis 6:5; Deuteronomy 32:4, 5; John 15:19; James 1:14, 15) “Urngin e tin nib fel’ nge urngin e taw’ath nrib manigil” e ma yib rok Jehovah. (James 1:17) Ere dariy e amith ni be un ko pi flaab ni ma pi’ Got. Ngada weliy boch e pi taw’ath ni rib fel’ ni ma pi’ Got.

Thin Rok Got​—Ba Taw’ath Nrib Tolang Puluwon

4. Mang taw’ath nge flaab ni ma falan’ e pi girdi’ rok Jehovah ngay e ngiyal’ ney ni “ngiyal’ ko tomur”?

⁴ I weliy Daniel ni profet morngaagen e “ngiyal’ ko tomur” ni gaar: “Bay I ga’ e llowan’ iyan.” Machane ki gaar: “Girdi’ nib kireb e bay dab ra nanged fan, nguur pired ni yad be ngongliy e kireb; ma piin ni yad ba gonop e bay ra nanged fan.” (Daniel 12:4, 10) Amu lemnag! Thin Rok Got​−ara thin rok e pi profet—​e bay e gonop rok Got riy ma dabiyog ni nge nang e piin nib kireb fan, machane rayog ni nge nang e girdi’ rok Jehovah fan. I meybil e ani Fak Got ni gaar: “Chitamag ni gur e Somol u tharmiy ngu but’! kari mmagar ya kam dag ngak e piin ndar sukulgad e n’en ni kam mithag rok e piin ni yad ba llowan’ nge piin ni yad ba sukul.” (Luke 10:21) Ri gad ba flaab ni bochan e bay rodad e Thin Rok Got ni Bible, ma gad bay u fithik’ e piin ni ke pi’ Jehovah e tamilang ngorad!​—1 Korinth 1:21, 27, 28; 2:14, 15.

5. Mang e gonop, ma ra diin me yog e gonop ngodad?

⁵ Ri dabiyog ni ngada nanged e tirok Got ban’en ni faanra dariy fare “gonop ni yib u tharmiy.” (James 3:17) Gonop e aram e salap ni ngan maruweliy e tamilangan’ ara llowan’ ni ngan pithig e magawon, ara ngan liyeg e riya’, ara ngan yognag e pi n’en ni gad be athapeg, ara ngan pi’ e fonow nib fel’. Uw rogon ni nge yog e gonop rok Got ngodad? Be gaar Proverbs 2:6: “Ma pi’ Jehovah e gonop; ma yib e tamilangan’ nge llowan’ u l’ugun.” Arrogon, ra pi’ Jehovah e gonop ngodad ni faan gad ra yibilay, ni bod rogon ni pi’ ngak Solomon ni Pilung “ba gumerchaey ni tamafol.” (1 Kings 3:11, 12; James 1:5-8) Faanra nge yog e gonop ngodad, thingar da motoyilgad ku Jehovah ni gad be fil e Thin Rok ma gad fol riy.

6. Mang fan ni ba gonop ni ngada folgad ko pi motochiyel rok Got?

⁶ Rayog ni ngan guy e gonop rok Got u lan e pi motochiyel nge kenggin e riyul’ u lan e Bible. Pi motochiyel ney e ma ayuwegdad u gubin e kanawo’​−ma ayuweg fithik’ i dowef rodad, nge lanin’dad, nge michan’ rodad. Bpuluw e thin rok e ani yoloy e psalm ni be tang ni gaar: “Motochiyel rok Somol e rib yal’uw; ra pasignag lanin’uy me pi’ gelngin; ma tin ni be yog ni murung’agen Somol e ba riyul’ ma ma pi’ e gonop ngak e piin ndariy rorad. Tin ni ke yog Somol ni ngan rin’ e mmat’aw; piin ni be fol riy e ke felan’rad. Tin ni ke yog ni ngan rin’ e ba yal’uw, ma ma ayuwegey nge tamilangan’uy. Madgun Somol ni bay u wun’uy e ba fel’, ya ra par ndabi m’ay biid; urngin e tin ni ma turguy Somol e ba yal’uw, ya gubin ngiyal’ ni ma yan i aw nrogon. Ya motochiyel rok e kab fel’ u wun’ug ko gol, ni mus ko tin th’abi fel’ e gol.”​—Psalm 19:7-10; 119:72.

7. Mang wenegan e togopuluw ko pi motochiyel rok Got?

⁷ Machane piin ni ma dariy fannag e pi motochiyel rok Got nib mat’aw e dar pirieged e falfalan’ nge puf rogoy ni yad ba adag. Ra munmun ma yad ra pirieg ni dabiyog ni ngan bannag Got, ya yad ra t’ar waamngin e pi n’en ni kar yunged. (Galatia 6:7) Bokum million e girdi’ ni dariy fan e pi motochiyel rok Got u wan’rad e ke yib ngorad wenegan e kireb rorad ni yad be diyen ni dawor ra mabgolgad, miki yib e m’ar nib kireb ngorad, ma kar mitgad ko drugs. Faan manga dab ra kalgadngan’rad mar thilyeged rogon e yafas rorad ma kanawo’ rorad e ra yan i taw ko yam’ ma rayog ni nge thangrad Got.​—Matthew 7:13, 14.

8. Mang fan ni ba falfalan’ e piin ni rib t’uf e Thin Rok Got rorad?

⁸ Machane piin nib t’uf e Thin Rok Got rorad mi yad fol riy e ra piriegrad e flaab e chiney nge ku gabul nge langleth. Motochiyel rok Got e ke pithigrad ke puf rogorad mab riyul’ e falfalan’ rorad ni yad be sonnag e ngiyal’ ni ngan pithigrad ko denen nge wenegan riy ni yam’. (Roma 8:20, 21; James 1:25) Rib mudugil e re athap ney ni bochan e ma par u daken e bin th’abi fel’ e taw’ath ni pi’ Got ngak e girdi’ nu fayleng​−ni aram e biyul’ rok Fak ni maagirag rok ni Jesus Kristus. (Matthew 20:28; John 3:16; Roma 6:23) Re taw’ath ni th’abi fel’ ney e ma micheg gelngin e t’ufeg rok Got ngak e girdi’ nu fayleng miki micheg e flaab ni manemus ni fan ngak e piin ni ka ma motoyil ku Jehovah.​—Roma 8:32.

Gad Ma Pining e Magar ni Bochan e Taw’ath ni Kan ni Thothup

9, 10. Uw rogon ni ke fel’ rogodad riy ni bochan e taw’ath rok Jehovah ni kan ni thothup rok? Mu weliy.

⁹ Ku reb e taw’ath ni yib rok Got ni gad ma pining e magar riy e aram e kan ni thothup rok. Rorran ni Pentecost ko 33 C.E. e ke machibnag apostal Peter ba ulung i girdi’ u Jerusalem ni gaar: “Nge bigimed me pi’ keru’ ko denen ni be rin’, min taufenag nga fithngan Jesus Kristus, ma aram me n’ag Got fan e denen romed; me yog e taw’ath rok Got ngomed, ni aram fare kan ni thothup.” (Acts 2:38) Ngiyal’ ney e ma pi’ Jehovah e kan ni thothup rok ngak e pi tapigpig rok ni kar ognaged yad ngak ni yad be yibilay ni nge yog e kan ni thothup ngorad ma yad ma rin’ e tin nib m’agan’ Got ngay. (Luke 11:9-13) Kakrom ma re gelngin ney ni bin th’abi gel e gelngiy​−ni aram e kan ni thothup ara gelngin Got−​e ke gelnag e piin ni pumoon nge piin ni ppin nib mich Got u wan’rad, nib muun e tin somm’on e Kristiano ngay. (Zechariah 4:6; Acts 4:31) Ku rayog ni nge gelnagdad ni yugu aram rogon ni boor e magawon ni be ning e kanawo’ rodad ni gad e girdi’ rok Jehovah.​—Joel 2:28, 29.

¹⁰ Amu lemnag morngaagen be’ ni ppin ni Laurel fithngan ni bay e m’ar rok ni polio ma i par ni 37 e duw u lan ba masin ni ma pogofan rok.a Yugu aram rogon ni kari gafgow, i pigpig ku Got ni kari pasigan’ ngay nge mada’ ko ngiyal’ ni yim’. Nap’an e yafas rok, flaab rok Jehovah e ke pirieg Laurel. I ayuweg Laurel 17 e girdi’ ni nge tamilang e machib nu Bible u wan’rad, ni yugu aram rogon ni thingar i par u lan fare masin ni 24 e awa u gubin e rran! Rarogon Laurel e ma puguran ngodad e thin rok apostal Paul ni gaar: “Ngiyal’ ni gub meewar, e aram e ngiyal’ ni gub gel.” (2 Korinth 12:10) Arrogon, flaab ni gad ra pirieg u nap’an ni gad ma machib e gathi ma yib u salap rodad ara gelngidad, ya ma yib ni bochan e ayuw rok Got u daken e kan ni thothup ni ma pi’ Got ngak e piin ni ma motoyil ko thin rok.​—Isaiah 40:29-31.

11. Mang pi felngin e kan ni thothup ni ma m’ug rok e piin ni ke yog ngorad e “bin nib biech e pangiy”?

¹¹ Faan gad ra motoyil ku Got ma gad fol rok, ma aram e ra maruwel fare kan ni thothup rok u fithik’dad me yog pi felngin ni t’ufeg, falfalan’, gapas laniyan’, gum’an’, nge gol, nge michan’, nge fel’ ngak e girdi’, nge sobut’an’ nge t’ar laniyan’. (Galatia 5:22, 23) Pi felngin ney ni “waamngin e kan ni thothup” e aram bang ko “bin nib biech e pangiy” ni bay ko pi Kristiano ni yad ma tay u lon e bin kakrom e pangirad ni bod rogon pangin e gamanman. (Efesus 4:20-24; Isaiah 11:6-9) T’ufeg e ir e bin ni baga’ fan u fithik’ waamngin e kan ni thothup ya “ir e ma chugumiy urngin ban’en nga taabang nge par ni ke fel’ rogon.”​—Kolose 3:14.

T’ufeg Rok e Pi Kristiano ​—⁠Ba Taw’ath ni Ngan Chaariy

12. Uw rogon ni ke dag Tabitha nge tin somm’on e Kristiano e t’ufeg rorad?

¹² Ku reb e taw’ath ni ma yib rok Jehovah e aram e t’ufeg ni bay ko Pi Kristiano​−ni reb e taw’ath ni rib t’uf rodad. Re t’ufeg ney e ma yan u rogon e motochiyel ma bay e runguy u fithik’ ni ma chagiliy e piin nib mich u wan’rad nga taabang nge taareban’rad. Ma dariy e tha’ ko girdi’ nrayog ni nge taarebnag e girdi’ ni aram rogon. (John 15:12, 13; 1 Peter 1:22) Amu lemnag be’ ni ppin ni Kristiano ni i par ko bin somm’on e chibog ni Tabitha fithngan. “Ma par ni tin nib fel’ e be rin’ ma be ayuweg e piin ni gafgow” ni baga’ ni piin ni ppin ni yim’ e pumoon rorad. (Acts 9:36) Bay girdien e tabinaw rok e pi ppin nem, machane ba adag ni nge pi’ Tabitha e ayuw ngorad nge pi’ e gel nga lanin’rad. (1 John 3:18) Rib fel’ e kanawo’ ni ke pi’ Tabitha ngodad! Bochan ni kari t’uf pi walag ni girdien Kristus rok Prisca nge Aquila, “ra pagew fan e pogofan rorow” ni bochan Paul. Epaphras nge Luke, nge Onesiphorus nge yugu boch e girdi’ e ur ayuweged fare apostal u nap’an ni immoy nib kalbus u Roma ni bochan e t’ufeg rorad. (Roma 16:3, 4; 2 Timothy 1:16; 4:11; Filemon 23, 24) Arrogon, bay e pi Kristiano ni aram rogon e t’ufeg rorad e ngiyal’ ney ni aram e taw’ath ni yib rok Got ni ma lingagilnagrad ni yad e tin riyul’ i gachalpen Jesus.​—John 13:34, 35.

13. Uw rogon ni rayog ni ngada daged ni gad ma tay fan e walag ni gad ma tay e pi Kristiano?

¹³ Ri ga ma chaariy fare t’ufeg ni bay u lan e ulung ni Kristiano, fa? Ga ma tay fan e walag ni gad ma tay u ga’ngin yang e fayleng, fa? Ya pi n’en ney e ku bang fapi taw’ath ni ma yib u tharmiy ngodad. Uw rogon nrayog ni ngada daged ni rib t’uf e pi taw’ath ney rodad? Gad ra rin’ u nap’an ni gad ma pigpig ku Got, ara gad be un ko muulung rok e pi Kristiano, ara gad be dag e t’ufeg nge tin ni ka bay e waamngin e kan ni thothup rok Got.​—Filippi 1:9; Hebrews 10:24, 25.

“Pi Taw’ath Ni Ba Girdi’”

14. Mang e thingari rin’ be’ ni Kristiano ni faanra nge pigpig ni ir reb e piilal ara ministerial servant?

¹⁴ Pi pumoon ni Kristiano ni yad ba adag ni ngar manged e piin ni piilal ara pi ministerial servant u lan e ulung ya ngar pigpiggad ngak girdien e ulung e yad ba adag ban’en nib fel’. (1 Timothy 3:1, 8) Be’ ni nge bung rogon ya nge un ko pi ayuw ney e thingari gel e michan’ rok, ma nge nang e Bible, ma nge pasig ko machib u mit e tabinaw. (Acts 18:24; 1 Timothy 4:15; 2 Timothy 4:5) Thingari dag ni ir be’ nib ba sobut’an’, ma ma t’ar laniyan’ ya taw’ath ni yib rok Got e der ma pirieg e piin nib tolangan’ nge piin nib ufanthin. (Proverbs 11:2; Hebrews 6:15; 3 John 9, 10) Ma faanra ba mabgol ma thingari gagiyegnag chon e tabinaw rok nrogon. (1 Timothy 3:4, 5, 12) Ya faanra ma tay fan e tirok Got e taw’ath ma ra yib e flaab rok Got ngak.​—Matthew 6:19-21.

15, 16. Chon mini’ e yad e “taw’ath nib girdi’”? Mu weliy.

¹⁵ Nap’an ni ra athamgil e piin ni piilal u lan e ulung ni yad ma machib u mit e tabinaw, mi yad ayuweg e saf u lan e ulung, mi yad fil e machib ngorad, ma bay fan ni ngada ted fan e “pi taw’ath ni yad ba girdi’.” (Efesus 4:8, 11) Yu ngiyal’ ma piin ni ke ayuwegrad e piin ni piilal e dar pininged e magar ko ayuw ni ke yib ngorad, machane ma guy Jehovah e maruwel rok e piin ni piilal. Ma dabi pag talin e ayuw ni kar pied ngak e girdi’ rok ni bochan e t’ufeg.​—1 Timothy 5:17; Hebrews 6:10.

¹⁶ Amu lemnag e n’en ni reb e piilal ko ulung ni i yan nga aspital nge guy reb e rugod u ni be n’en ni ngan soweg lolgen. I yol be’ ni fager rok e re tabinaw nem u morngaagen fare piilal ni gaar: “Rib gol ma ke pi’ e ayuw u fithik’ e runguy. I fith ko rayog ni nge yibilay Jehovah ni fan ngodad. Ma nap’an ni i meybil, fare matam ko re tabinaw nem [ni gathi ir reb e Mich Rok Jehovah] e ke yor me map’ e luw u owchen urngin e girdi’ u lan e re senggil nem. Rib sumunguy e meybil rok fare piilal, ma rib gel e runguy rok Jehovah ni nge l’og fare piilal nge pi’ e ayuw ko ngiyal’ nem!” Yugu reb e Mich Rok Jehovah ni immoy u yugu reb e aspital e ke weliy morngaagen e piin ni piilal ni kar bad nga aspital ngar guyed. I gaar fare ppin: “Nap’an ni kug guyrad ni yad be chugur ko bet rog u aspital ni kari gu ubchiya’, kari mich u wan’ug ni yugu demutrug e n’en nra buch ma rayog rog ni nggu athamgiliy. Ke yib e gel ngog ma ke gapas lanin’ug.” Rayog ni ngan chuw’iy e t’ufeg ni aram rogon, fa? Ri dabiyog! Ya aram e taw’ath ni ma yib rok Got ma bay u lan e ulung ni Kristiano.​—Isaiah 32:1, 2.

Fare Taw’ath Ni Ngan Machib U Mit E Tabinaw

17, 18. (a) Mang taw’ath ni ke pi’ Jehovah ngak urngin e girdi’ rok? (b) Mang ayuw ni ke pi’ Got ya nge yog ni ngada machibgad?

¹⁷ Dariy yugu reb e tay fan ni ngan tay ngak e girdi’ ni ka baga’ ko bin ni ngan pigpig ngak Jehovah ni ir e Ani Th’abi Tolang. (Isaiah 43:10; 2 Korinth 4:7; 1 Peter 2:9) Ma re taw’ath ney ni ngan machib u mit e tabinaw e rayog ngak urngin e girdi’​−ni piin nib fel’ yangaren ara piin ni ke pilibthir, piin ni pumoon ara piin ni ppin−​ni yad ba adag ni ngar pigpiggad ku Got. Kam fanay e re taw’ath ney nib fel’, fa? Boch e girdi’ e ma lemnag ni dabi bung ni ngar machibnaged e thin rok Got machane dab mu pag talin ni ma pi’ Jehovah e kan ni thothup ngak e piin ni ma pigpig ngak, ma ra pi’ e ayuw ko gini gad meewar riy.​—Jeremiah 1:6-8; 20:11.

¹⁸ Ke pi’ Jehovah fare maruwel ni ngan machibnaged morngaagen Gil’ilungun ngak e pi tapigpig rok ni yad ba sobut’an’, ma gathi ngak e girdi’ ni yad ba tolangan’ ni ma pagan’ ko salap rorad. (1 Korinth 1:20, 26-29) Piin ni yad ba sobut’an’ e yad manang ni bay e gini ma mus e salap rorad riy mi yad taga ko ayuw rok Got u nap’an ni yad ma machib u mit e tabinaw. Ku yad ma tay fan e ayuw ni ma yib rok Got u daken fare “tapigpig nib yul’yul’ mab gonop.”​—Luke 12:42-44; Proverbs 22:4.

Falfalan’ U Tabinaw−Ba Taw’ath Nib Fel’

19. Mang boch ban’en ni ra ayuwegdad ni ngada chuguliyed pi fakdad?

¹⁹ Mabgol nge falfalan’ u tabinaw e ku boch e taw’ath ni yib rok Got. (Ruth 1:9; Efesus 3:14, 15) Bitir e ku boch e “taw’ath ni yib rok Jehovah” ni yad ma falan’nag e pi gallabthir ni yad ma ayuweg e bitir ni nge yog pi felngin Got ngorad. (Psalm 127:3) Faanra gur reb e gallabthir, ku mu motoyil ko thin rok Jehovah ni ga be fil pi fakam nrogon e Thin Rok. Piin ni ma rin’ e ra pirieg e ayuw nge flaab rok Jehovah.​—Proverbs 3:5, 6; 22:6; Efesus 6:1-4.

20. Mang e ra ayuweg e pi gallabthir ni ke tay pi fakrad ko bin riyul’ e machib?

²⁰ Yugu aram rogon ni ra athamgil e pi gallabthir ni ma liyor ku Got, boch pi fakrad e ra thay u nap’an ni yad ra ilal. (Genesis 26:34, 35) Faanra arrogon ma rib gel e kireban’ rok e gallabthir. (Proverbs 17:21, 25) Machane fel’ ni ngar athapeged ni nge sul pi fakrad ma dab ra paged talin e fanathin rok Jesus u morngaagen fare pagal ni chuw u tabinaw. Yugu aram rogon ni ke chuw fare pagal u tabinaw me un ko ngongol nib kireb, munmun me sul nga tafen chitamangin, ma chitamangin e sulweg fak u fithik’ e falfalan’ nge t’ufeg. (Luke 15:11-32) Yugu demutrug rogon, ma rayog ni nge mich u wan’ e pi gallabthir ni Kristiano ni manang Jehovah rogorad ma be runguyrad ma ra ayuwegrad.​—Psalm 145:14.

21. Mini’ e ngada motoyilgad ngak, ma mang fan?

²¹ Ere nge bagadad e nge turguy e n’en ni ir e ka baga’ fan ko yafas rodad. Gad be lek e chugum ni boor ni ma un e amith ngay ngodad nge chon e tabinaw rodad, fa? Ara gad be lek “urngin e tin nib fel’ nge urngin e pi taw’ath nrib manigil ni be yib u tharmiy ngodad,” fa? (James 1:17) Satan ni ir “chitamangin e malulfith,” e ba adag ni ngada maruwel ni fan ko salpiy ma nge dabiyog e yafas nge falfalan’ ngodad. (John 8:44; Luke 12:15) Machane ba adag Jehovah e tin th’abi fel’ ni fan ngodad. (Isaiah 48:17, 18) Ere nguuda motoyilgad ko thin rok e Chitamangidad nu tharmiy nge mang ir e falfalan’ rodad. (Psalm 37:4) Ma faan gad ra rin’ ma pi taw’ath rok Jehovah e ra flaabnagdad​−ma buchuw e amith ma dabi un ngay.

[Footnotes]

Ka Ga Manang?

• Uw e gini ngan pirieg e bin th’abi ga’ e falfalan’ riy?

• Mang boch e taw’ath ni ke pi’ Jehovah ngak e pi girdi’ rok?

• Mang fan nrayog ni ngan nog ni fare machib ni gad ma tay u mit e tabinaw e ir reb e taw’ath?

• Mang e rayog ni nge rin’ e piin ni gallabthir u nap’an ni yad be chuguliy pi fakrad ya nge yog e flaab rok Got ngorad?

[Picture on page 14]

Ga ma tay fan e taw’ath rok Got ni Thin Rok, fa?

[Picture on page 15]

Yugu aram rogon ni kari gel e magawon rok Laurel Nisbet, i pasig ko liyor rok ngak Got

[Pictures on page 16]

Ba gilbuguwan e pi Kristiano e ngiyal’ ney ni bochan e t’ufeg rorad ni bod rogon ni ke gilbuguwan Tabitha

[Picture on page 17]

Piin ni piilal ni Kristiano e yad ma runguy e piin ni yad