Fonow ni Ra Pagan’uy Ngay u Rogon e Chugol Bitir

NAP’AN ni ba diyen Ruth ko bin nsom’on e bitir rok me yog ni gaar, “Ragag nge mereb e duw rog, ma gub palog rok girdien e tabinaw rog, ma ri dawor gu fal’eg rogog.” Bochan ni kemus ni yigoo ir e bitir u tabinaw, ma de guy rogon ni i famchewnag e chitiningin e bitir ere gathi ri i lemnag ir u nap’an nra fakay reb e bitir. Ere uw e ra yan ngay me yog e fonow ngak nra pagan’ ngay?

Jan ni chitamangin l’agruw e bitir ni kar ilalgow e lemnag me gaar: “Rib pagan’ug ko som’on. Machane de n’uw nap’an mug nang ni gathi rib ga’ e tamilangan’ rog.” Demtrug ko de nang e gallabthir e bin nib fel’ e kanawo’ u rogon e chugol bitir ara magawon lanin’rad u nap’an ni yad be chuguliy fakrad, ma uw e yad ra pirieg e ayuw riy u rogon ni ngar chuguliyed fakrad?

Ngiyal’ ney, e boor e fonow u rogon i chuguliy e bitir ni yima dag u television nge radio. Sana rayog ni ngam lemnag ko uw feni rayog ni ngan pagan’uy ko pi fonow ni yima pi’ ko gali n’ey. Ireray fan nib fel’ ni ngan kol ayuw. Riyul’ ni ga manang e en ni be pi’ e fonow ngom u rogon ni ngam chuguliy fakam u television ara radio? Ma ga manang feni fel’ rogon ni yad ma chuguliy pi fakrad? Ri dariy e maruwar riy ni ga baadag ni ngam kol ayuw nga boch ban’en nrayog ni nge rin’ ban’en ko tabinaw rom. Rogon ni yog fa bin ni ke yan e article, e mus ko fonow ko piin nib salap ma rayog ni nge kirebnag lanin’uy. Ere uw e rayog ni ngam man ngay?

Gin th’abi fel’ e fonow ni ma yib riy u rogon i chuguliy e bitir e aram Jehovah Got, ni ir e Sunumiy e tabinaw. (Efesus 3:15) Ke mus ni yigoo ir e en nriyul’ nib salap. U lan e Thin rok ni Bible, e bay riy e fonow nri ma yib angin. (Psalm 32:8; Isaiah 48:17, 18) Machane, gadad e ba mil fan ngodad ni ngad folgad riy.

Yu wu’ i mabgol e ka nog ngorad ni nga rogned e n’en ni kar filed u nap’an ni kar chuguliyed fakrad ni ngar pired nib thabthabel ma bay madgun Got u wan’rad. Rogned ni n’en ni ayuwegrad e bochan ni ra folgad ko pi kenggin e motochiyel u lan e Bible. Kar pirieged ni fonow u lan e Bible e ri kab ga’ fan ni nge pagan’uy ngay e ngiyal’ ney ni ku bod feni ga’ fan ko ngiyal’ ni yoloy e Bible riy.

Mu Rin’ed Pi Fakam Boch Ban’en u Taabang

Nap’an nni fith ngak Catherine ni chitiningin l’agruw e bitir ko mang fonow e ba ga’ ni ke ayuweg, ma rib pay ni yog e Deuteronomy 6:7. Re thin nem e be gaar: “Um filed [Kenggin e Motochiyel u Bible] ngak pi fakmed; um weliyed murung’agen ngorad ko ngiyal’ ni gimed bay u tabinaw nge ngiyal’ ni gimed be milekag, nge ngiyal’ ni gimed be toffan nge ngiyal’ ni gimed be maruwel.” Ke nang Catherine ni rogon me yog ni fol ko re fonow nem e ngaur rin’ed fa gali bitir rok boch ban’en u taabang.

Sana ga be lemnag ni re n’ey e ‘ba mom i yog ma ba mo’maw’ i rin’.’ Faanra l’agruw fa gallabthir ma yow be maruwel ya nge yog nra yognagew e tin nib t’uf ko tabinaw, ma uw rogon nrayog ni ngar rin’ed e bitir boch ban’en u taabang ni yugu aram rogon nri boor pa’ u puluwrow? Torlief, ni bay fak nib pagal ni ku bay reb e tabinaw rok, e yog ni n’en nrayog ni nge ayuweg e gallabthir e fare fonow ni bay ko Deuteronomy. Mu fek pi fakam nge un ngom u gubin yang ni ga be yan riy, ma aram e ra yib e tayim ni boor ni ngam nonad. I yog Torlief ni gaar, “Gamow ma ngongliy fakag nib pagal boch e maruwel ni fan ko tabinaw u taabang. Gamad ma yan ko milekag u taabang. Ma gamad ma abich u taabang.” I yog ni angin ni ke yib e, “gubin ngiyal’ ma ba puf rogon fakmow ni nge weliy laniyan’ nib fel’ rogon.”

Ma uw rogon ni faanra dariy e welthin ni be yan u thiliyiy mab mo’maw’ ni ngan sabethin u taabang? Ba ga’ ni ma buch e re n’ey u nap’an ni ke ilal boch fapi bitir. Ku bayay e ram, faani yira rin’ boch ban’en u taabang ma aray e n’en nrayog ni nge ayuwegey. I yib ngan’ Ken ni figirngin Catherine, ni nap’an ni ke fel’ yangaren fakrow ni ppin, mi i non non nbochan e der motoyil e chitamangin ngak. Ireray ban’en nib ta non non e piin fel’ yangaren ni bochan. Mang e nge rin’? I yib ngan’ me gaar: “Kug dugliy ni nggu rin’ew boch ban’en u taabang, ma gamow weliy e n’en ni be lemnag, nge pi n’en ni be chalban ngay. Re n’em e ri pi’ e ayuw ni ba ga’.” (Proverbs 20:5) Machane, ba mich u wan’ Ken ni bochan ni yib angin e biney e kanawo’ ni fol riy e bochan ni numon ni yad ma tay u tabinaw e gathi ban’en nib beech. I gaar, “Rib fel’ e tha’ u thilmow fakag ni ppin ere manang nrayog ni nge weliy laniyan’ ngog nib fel’ rogon.”

Reb e report u murung’agen e piin fel’ yangaren e ke dag ni piin fel’ yangaren e dalip yay ni kab thil ko gallabthir rorad nrayog ni nga rogned ni gallabthir nge bitir e darur ted e tayim nib fel’ urngin ni ngar rin’ed boch ban’en u taabang. Ere mang ni dab mu fol ko fonow ko Bible? Mu rin’ed e bitir rom bochban’en u taabang u gubin e tayim nrayog​—u nap’an ni yibe toffan nge nap’an ni yibe maruwel, u nap’an ni yi ba’ u tabinaw ngu nap’an ni yibe milekag, kakadbul u nap’an ni kan od nge blayal’ u m’on ni ngan mol. Faanra rayog, ma ga fekrad ngar uned ngom u gubin yang ni ga be yan riy. Rogon ni yog ko Deuteronomy 6:7, dariy ban’en ni yira yon’ nga lon e tayim ni gad ma rin’ pi fakdad ban’en u taabang.

Mu Fil Ngorad e Pi N’en nib Ga’ Fan

Mario, ni chitamangin l’agruw e bitir e yog ni gaar: “Mu t’ufeg pi fakam nib gel, mu um beeg e babyor ngorad.” Machane, gathi kemus ni ngam pug laniyan’ e pi bitir rom. Ya kub t’uf ni ngam fil ngorad rogon ni ngar nanged e tin nib fel’ ko tin nib kireb. Miki ul’ul Mario ngay nge gaar: “Mu fol Bible gad u taabang.”

Fan e re n’em, e be fonownag e Bible e pi gallabthir ni gaar: “Dab mu puwan’gad ngak pi fakmed nge pag rogon ngam k’aringed e damumuw ngorad. Machane ngam chuguliyed yad mi gimed llowan’nagrad nrogon, mi gimed fonownagrad nrogon girdien Kristus.” (Efesus 6:4) Yooren e tabinaw e danir ma tamilangnag riy rogon e ngongol nsusun ni nguun dag. Boch e girdi’ e ma lemnag nnap’an nra ilal e bitir, ma aram e ngiyal’ nrayog rorad ni ngar dugliyed ko ba miti mang pangin e ngar daged. Ba puluw e re n’ey u wan’um fa? Taareb rogon ni dowef ko bitir e ba t’uf e ggan nib fel’ ngay ni fan e nge ilal nib fel’ rogon, maku arrogon e lem nge gum’ircha’ ni dawori ilal nib t’uf ni ngan yal’uweg. Faanra dabi fil pi fakam rogon e ngongol nib fel’ rom u tabinaw, ma aram e rayog ni nge mit ngorad e ngongol ni ma dag e pi bitir ni yad nga skul, sensey, ara piin ni yima pag yaarad ko television.

Bible e rayog ni nge ayuweg e pi gallabthir ni ngar filed ngak pi fakrad rogon ni nge pow rorad e tin nib fel’ ara tin nib kireb. (2 Timothy 3:16, 17) Jeff, ni ir e reb e piilal ni bay e salap rok ko chugol bitir ma ki i chuguliy l’agruw e bitir, e yog nib fel’ ni ngan fanay e Bible ni ngan fil ngak e bitir e ngongol nib fel’. I yog ni gaar: “Faan yira fanay e Bible ma rayog ni nge ayuweg e bitir ni ngar nanged rogon e lem rok e En ni Sunmiydad u ban’en, gathi kemus ni Nina’ nge Papa’. N’en ni kad nanged e mang e ma rin’ e Bible ko lem nge gum’irchaen be’. Nap’an ni gamad be pithig e magawon ko ngongol ara lem nde fel’, ma gamad ma tay e tayim ni nggu gayed boch e thin nu Bible nib puluw. Ngemu’, ma gamad yan nga bang ndariy e girdi’ riy, ma gamow pag fare tir nge beeg fare thin nu Bible. Ba ga’ ni ma yib e lu’ u owchen fare tir u tomuren ni ke beeg fare thin nu Bible. Kug gingow. Ba ga’ angin e n’en ni ma fonownag e Bible ko n’en ni gamow ra yog ara gu rin’ew.”

Hebrews 4:12 e be weliy ni gaar: “Ya thin rok Got e ba fos ma ba’ gelngin ni ma maruwel. Ma ma pufthinnag e n’en ni yima yim’ ni bochan nge tin ni yima lemnag.” Machane thin nu Bible e gathi lem rok e piin ni fanayrad Got ni ngar yoloyed e Bible. Ya be yip’ fan e lem rok Got nge rarogon e ngongol rok. Ireray e n’en ni be dareg e thin nu Bible nge yugu boch e fonow. Faanra ga be fanay e Bible ni ngam skulnag pi fakam, ma aram e ga be ayuwegrad ni ngar sapgad nga ban’en u rogon ni ma sap Got ngay. Bay gelngin e skul ni ga be tay, ma rayog rom ni ngam nang e n’en ni bay u laniyan’ fakam.

Catherine ni kan weliy murung’agen boch kafram e ke m’agan’ ko re n’ey. I yog ni gaar: “Gelngin ni be gel e mo’maw’ ko fare magawon ma aram gelngin ni gamad be gay e kanawo’ nib fel’ u lan e Thin Rok Got​—ma ma yib angin!” Rayog ni ngam fanay e Bible nib fel’ rogon ngam fil ngak pi fakam rogon ni nge pow rorad e tin nib fel’ nge tin nib kireb?

Mu Dag e Lem nib Thabthabel

I dag Paul ni apostal reb e motochiyel nib ga’ nrayog ni nge pi’ e ayuw u rogon i chuguliy e bitir. I fonownag e piin Kristiano ni gaar: “Mu sumunguygad ngak urngin e girdi’.” (Filippi 4:5) Riyul’ ni re n’em e ba muun ngay ni ngad daged ngak pi fakdad e lem nib thabthabel. Ma dab mu pag talin, ni lem nib thabthabel e ma m’ug riy e “gonop ni yib u tharmiy.”​—James 3:17.

Ere, uw rogon nib peth e lem rodad nib thabthabel nga rogon ni gad ma skulnag e bitir rodad? Darud ma gagiyegniged gubin e ngongol rorad u nap’an ni gad be ayuwegrad u rogon nrayog rodad. Ni bod ni, Mario, ni kad weliyed murung’agen faram, e ir reb e Pi Mich Rok Jehovah, ma ke yib ngan’ me gaar: “Gamow ma pi’ e athamgil nga laniyan’ pi fakmow ni ngar lemnaged murung’agen e taufe, maruwel ni aram e ngan machib u polo’ e tayim, nge ku boch ban’en nrayog ni ngan nameg ni fan ko tirok Got ban’en. Machane gamow ma dag ngorad nib tamilang ni gubin e pi n’ey e yad rorad e ngar dugliyed ko yad ra un ngay fa danga’ u nap’an nra taw ngal’an.” Mang angin? Fagali bitir ni fakrow e yow l’agruw ni yow be un ko maruwel ko machib u polo’ e tayim rorow.

Be ginang e Bible e pi matam u Kolose 3:21 ni gaar: “Yugu dabi pag rogon e puwan’ ni nguum tiyed ngak pi fakmed ngam k’aringed e damumuw ngorad, ya ri mulan’rad.” Ri ma tay Catherine e re thin nu Bible nem u lan gum’irchaen. Nap’an nra war e k’adan’ ni be tay reb e gallabthir, ma aram e ra mom ngak ni nge damumuw ara towasar. Machane, gaar Catherine, “dab mu towasariy e bitir rom nge pag rogon ni nge bod rogon nrayog rom.” Catherine e ku ir reb e Pi Mich Rok Jehovah, miki ul’ul ngay nge gaar: “Mu tay e pigpig rom ku Jehovah nge par ni ban’en ni gab felfelan’ ngay.”

Jeff ni kan weliy murung’agen faram e ke yog e re n’en ni baaray: “Nap’an ni ilal pi fakmow, me yog reb e fager romow ngomow ni ke nang urngin yay ni ma siyeg e n’en ni be yog pi fak. I chalban pi fak ko re n’em, mar lemnaged ni kan gafgownagrad. Ra nge dabi buch e re n’ey me yog ni nggu gayew boch e kanawo’ ni nga nog riy e ke fel’ ko n’en ni yad be yog.

I yog Jeff ni gaar, “Kug piriegew nib fel’ e re fonow ney. Ere kug gayew rogon ni nge rin’ e bitir romow boch ban’en nib m’agan’mow ngay u taabang nge boch e bitir. Bayi n’en ma gamow yan ngorad ma gamow gaar: ‘Gimed manang ni n’en nge n’en e be rin’ e tiney nge tiney? Mang fan ndab mu uned ko yan?’ Ara faanra ke yog pi fakmow ni nggu fekew yad nga bayang, ma gamow ma athamgil nggu warod ni yugu ra kug magargow. Gamow ma rin’ ni bochan e nge dab gogew e danga’.” Ireray e n’en ni be yip’ fan e lem nib thabthabel​—me taareb rogon e girdi’ u wan’dad, nguud lemnaged laniyan’ e girdi’, ma gad fol u rogon ndab da kirebniged e kenggin e motochiyel u Bible.

Fel’ Rogon ko Fonow ni Ra Pagan’uy Ngay

Yooren e yu wu’ i mabgol ney e kar manged titaw nge tutuw. Yad ma felfelan’ ni yad ma guy e pi kenggin e motochiyel nu Bible ney ni ke ayuweg pi fakrad ni kar manged boch e gallabthir nib fel’. Rayog ni nge fel’ rogom ko fonow ko Bible fa?

Ruth ni kad weliyed murung’agen ko som’on e ke mang reb e gallabthir, ma ir nge pumoon rok e bay yu ngiyal’ ni yow ma lemnag ni gowa dariy be’ ni nge ayuwegrow. Machane gathi riyul’ ni aram rogon. Bay rorow e fonow ko Thin Rok Got, ni aram e Bible. Pi Mich Rok Jehovah e kar ngongliyed boor e babyor nrayog ni nge ayuweg e piin gallabthir. Pi babyor ney e ba muun ngay fare babyor ni Learn From The Great Teacher (Mu Skulgad ko fare Sensey ni Ga’), Babyor Rog Ni Chep Nu Bible, Questions young People Ask​—Answers That Work, (Deer ni Ma Fith e Fel’ Yangaren​—Fulweg ni Bay Angin) nge fare The Greatest Man Who Ever Lived (Re Moon ni Th’abi Ga’ ni i par u Fayleng). Torlief, ni pumoon ku Ruth e gaar: “Ngiyal’ ney e boor e fonow ni bay u Bible ni fan ko piin gallabthir. Faan yad ra fanay nib fel’ rogon, ma rayog ni nge ayuwegrad u nap’an ni yad be ayuweg pi fakrad ni yad be ilal i yan.”

[Picture on page 5]

Gallabthir nib gonop e ma yarmiy boch e fafel ni yima felfelan’ ngay ni fan ko bitir rorad