Ngan Par nib Mudugil u Nap’an ni Ra Togopuluw Reb e Bitir

BE’ NI ppin nib Kristiano ni nga dogned ni Joy fithingan e i guy rogon ni nge chuguliy fak ni nge t’uf Got rok. Machane nap’an ni chugur ni nge mus fene fel’ yangaren fare pagal ni fak ma daki fol me n’ag e tabinaw. I gaar Joy, “Aram e bin th’abi ga’ e kireban’ ni kug pirieg. Kug pirieg ni kan dariyfannageg, kari kireban’ug ma kug kankanan’. Ma kug sug ko kireban’.”

Sana ku arrogon ni kum guy rogon ni ngam chuguliy pi fakam ni nge t’uf rorad mar pigpiggad ku Got mag guy bagayad ara boch i yad ni ke pi’ keru’ ngak. Uw rogon ni ngam athamgil u fithik’ e kireban’ ni aram feni gel? Mang e ra ayuwegem ngam par ni kargom ​ko pigpig ngak Jehovah?

Nap’an ni Daki Fol Pi Fak Jehovah

Bin som’on e ngam lemnag ni manang Jehovah e gin ke taw e lem rom ngay. U Isaiah 49:15, e gad ra beeg riy ni gaar: “Gur rayog rok be’ ni ppin ni nge pag talin fak ni kabran ma dabi t’uf rok e re tir nem ni ir e gargeleg? Gomanga ra pag be’ ni ppin talin fak, machane gag e dab gu pag talimed.” Arrogon, manang Jehovah rogon e lem ni ba ga’ ni ma yib ko matam nge matin. Ere, mu lemnag rogon e felfelan’ ni ma tay u nap’an ni urngin pi fak ni engel e yad be pining e sorok ngak ma yad be pigpig ngak. Nap’an ni be fulweg Jehovah lungun fare tapigpig rok ni Job u “fithik’ fagi nifeng,” me yib ngan’ e yu ngiyal’ i n’en nib felfelan’ ni yib chon e tabinaw rok ni bogi kan me gaar: “Um moy ko ngiyal’ ni gu sunumeg e fayleng riy? . . . Rofen nem ni be puf e woch e tang e pi t’uf u taabang, ma pi fak Got e ur tolulgad u fithik’ e felfelan’.”​—Job 38:1, 4, 7.

De n’uw nap’an, me guy fare Got nib riyul’ reb engel ni fak nib flont ni daki fol ke togopuluw ngak me mang Satan ni be yip’ fan e “Tatogopuluw.” Ma ki guy Jehovah e bin som’on e pumoon ni fak nib girdi’ ni Adam nge ppin rok nib flont ni Efa, nra unew ko fare togopuluw. (Genesis 3:1-6; Revelation 12:9) Me taaboch riy, ma boch i fak e “pag e gin ni yad ma par riy” mar togopuluwgad ngak Got.​—Jude 6.

Fare Bible e der yog ngodad rogon e lem rok Jehovah u nap’an ni boch i fak nib flont e ra leked kanawoen e togopuluw. Machane fare Bible e ba tamilang ni ke ta’ ni ke gaar: “Faani guy Somol ni kari gel e kireb rok e girdi’ u gubin yang, ni gubin ngiyal’ ma ba sug lanin’rad ko tin nib kireb, me taganan’ ngay ni ke sunumegrad ke ta’rad nga daken e fayleng. Me par ni kari kolngan’ riy.” (Genesis 6:5, 6) Ere togopuluw ni tay e girdi’ rok Jehovah ni ke mel’egrad ni piyu Israel e ki ‘kireban’nag’ me ‘amith’ riy.​—Psalm 78:40, 41.

Ere dariy e maruwar riy ni Jehovah e ma kireban’ ko pi gallabthir ni yad ma gafgow ko amith nge kireban’ ni bochan e ngongol ni togopuluw rok e bitir. U fithik’ e thin rok, ni fare Bible e ke pi’ riy e fonow nib puluw ma ma pi’ e athamgil ni nge ayuweg e pi gallabthir nem ni nge yog nra athamgilgad ko n’en ni ke buch rorad. Be ta’ Got ir ngorad ni nga ra paged fan e magafan’ rorad nga daken mar sobut’nagged yad mar togopuluwgad ngak Satan ni fare Moonyan’. Ngad guyed rogon ni yira fol ko re fonow ney me ayuwegem nge yog nim par ni gab mudugil u nap’an nra togopuluw fakam.

Mpaged Fan’ e Magafan’ Romed Ngak Jehovah

Manang Jehovah ni in e ban’en ni bay ni ma k’aring e magafan’ nib gel ko gallabthir ko magafan’ ngak pi fakrad ko riya’ ni yad ra maad’ad ngorad ara maad’ad be’ ngorad. I yog apostal Peter reb e kanawo’ nrayog ni ngan athamgil riy ko re n’ey nge ku boch e magafan’. I yoloy ni gaar: “Mpaged fan urngin e magafan’ romed ngak [Jehovah], ya be lemnag rogomed.” (1 Peter 5:7) Mang fan e re n’ey ni yibe yog ni ngan rin’ ma yibe micheg e rib fel’ ngak e pi gallabthir ni dakir fol fakrad?

Nap’an ni kab bitir fakam, ma ri ga ma tiyan’um i ayuweg ko riya’, ma sana i fol ko fonow rom u fithik’ e t’ufeg. Machane, nap’an ni ra ilal, ma ke mo’maw’ ni nge fol ko thin rom, machane lem rom ni ngam ayuweg ko maad’ad e der war. N’en rogon, e sana ke gel boch.

Angin nra yib, u nap’an nra dabki fol fakam me gafgow ko tirok Got ban’en, kireban’ nib gel, ara i maad’ad e rayog ni ngam lemnag ni gur e nga nog e kireb ngom. Joy, ni kan weliy ko som’on e aray rogon ni lemnag. I gaar: “Gubin e rran, ni ri gu ma gafgow ko tafinay nde yog e maruwel rog, ugu sul nguugu lemnag e kireb ni kug rin’ kafram.” Ni ba ga’ ni ngiyal’ i n’en ni baaram ni baadag Jehovah ni ngam “pagfam urngin e magafan’ rom ngak.” Faan ga ra rin’ ni aram rogon ma ra ayuwegem. I gaar fare psalmist, “Mu paged e pi n’en ni ke tomalnagmed nga daken Jehovah, me ir e bayi ayuwegmed. Ya ri dabi pag e piin nib mat’aw nga u ra yoyowolgad.” (Psalm 55:22, NW) Ke buch rok Joy ban’en ni aram rogon. Me yog ni gaar: “Gu non ngak Jehovah u murung’agen e pi n’en ni be buch u lanin’ug. Ma pi n’en ni ugu lemnag e ri chuw ni aram e bin th’abi ga’ e baudan’.”

Bochan ni gur reb e gallabthir ni dam flont ma rayog ni mu oloboch u rogon i chuguliy fakam. Machane, mang fan ni ngar um lemnag e pi n’ey? Jehovah e ba mudugil nde rin’, ya fare psalmist e i tang ni gaar: “Faan mang e mu tay ngan’um e kireb ni gamad be rin’, me mini’ e rayog rok ni nge thay ndab ni gechignag?” (Psalm 130:3) Ku ra ga ba gallabthir ni dariy e kireb rom ma fakam e ku rayog ni nge dabi fol. Ere mog ngak Jehovah e pi lem rom u fithik’ e meybil, me ayuwegem ngam athamgil. Machane, faanra gur rom e ngam par ni gab mudugil ko pigpig ngak Jehovah ma ga be pilo’ nge dab mu mang reb i k’on Satan ma thingar mu rin’ boch ban’en.

Mu Sobut’nagem

I yoloy Peter ni gaar: “Mu sobut’niged lanin’med u tan pa’ Got nib gel gelngin, me fal’eg lanin’med ko ngiyal’ ni be finey.” (1 Peter 5:6) Mang fan ni sobut’an’ e ba t’uf u nap’an nra dabki fol fakam? N’en nib chag ko lem ni gur e gab kireb nge amith ni bay e bitir rom ni be togopuluw ngom e rayog ni k’aring e tamra’ ngom. Rayog ni mu lemnag e n’en ke rin’ fakam e ke kirebnag thin e tabinaw romed, nrib ga’ nfaanra ngan tharbog ko ulung ni Kristiano. Lem ni gur e gab kireb nge tamra’ e rayog ni chag nge mulegan’um ni ngam un ko pi muulung ko Kristiano.

Ra buch rom ni aram rogon, mab t’uf rom ni ngam gonop nib puluw. I yog e Proverbs 18:1 (NW) ni gaar: “Be’ ni be par ni goo ir e be lemnag e tin ni baadag ban’en; ma ra ngongol nib togopluw ko gonop.” Ra uni un ko pi muulung ko Kristiano ni gubin ngiyal’ nyugu aram rogon e kireban’ rom, ma rayog ni ngam rung’ag boch e thin nib ga’ fan ma ra pi’ gelngim. I gaar Joy, “Bin som’on dabug ni nggu sap ku be’. Machane me yib u ran ngan’ug feni ga’ fan e pigpig rog ni gu ma ta’ ku Got. Maku reb e faan go manga gu par u tabinaw, ma goo magawon rog e ru ugu lemnag. Fapi muulung e ke ayuwegeg ni nggu tiyan’ug ko pi n’en ni ra gelnag e michan’ rog. Kari gu felan’ ni da gu tay ni nggu par rog ni goo gag nge dabiyog ngog e pi ayuw u fithik’ e t’ufeg rok e pi walageg ni ppin nge pumoon.”​—Hebrews 10:24, 25.

Kum lemnag, nra be’ u lan e tabinaw ma “ba’ gilban ni be fek” ko maruwel ko Kristiano. (Galatia 6:5) Baadag Jehovah e pi gallabthir ni ngar t’ufeged mar llowan’naged pi fakrad. Maku arrogon ni baadag e piin ni bitir ni ngar folgad mar ted fan e gallabthir rorad. Faan ra gallabthir e kar guyed rogon ni ngar chuguliyed fakrad “nrogon ni ma fonownigey Jehovah nge rogon ni ma pow’iy e lem,” ma ra fel’ thilrad Got. (Efesus 6:1-4) Ma faanra togopuluw reb e bitir ko fonow u fithik’ e t’ufeg rok e gallabthir, ma ra kireb thin fare tir. “N’en ni ma rin’ ba pagel e be dag ko n’en ni be rin’ e ba machalbog ma ba yal’uw fa,” rogon ni yog e Proverbs 20:11. Togopuluw rok Satan e ba mudugil ni de kirebnag thin Jehovah u fithik’ e piin ni baaram ni yad manang e tin riyul’.

Mu Togopuluw ko fare Moonyan’

I gaar Peter, “Mu tedan’med mi gimed ayuwegmed! Yi moonyan’ ni ir e toogor romed e yugu be yan ni bod ba layon ni be tolul, ni be gayiy be’ ni nge longuy.” (1 Peter 5:8) Bod ba layon, fare Moonyan’ e ma gay e piin fel’ yangaren ndawori tamilangan’rad. Kakrom, e pi layon e yad ma yan yan u Israel nib riya’ ko gamanman. Faanra palog reb e saf nga orel ma ra mom ni ngan kol. Ba chitiningin e saf e ra gafgownag e yafas rok ni bochan ni nge ayuweg fak. Machane, ku ra ba saf ni kemus ga’ngin ma dabi taareb gelngin nga ba layon. Arfan, ni pi tachugol saf ni yad ba gel e ba t’uf ni ngar ayuweged fare ulung i saf.​—1 Samuel 17:34, 35.

Rogon ni nge ayuweg Jehovah e pi saf rok nib fanathin ko fare “layon ni be tolul,” e ke yarmiy e pi tagafaliy e saf nib fanathin ni ngar ayuweged fare ulung i saf u tan pa’ e “Cha’ ni ir Pilungen e piin ni yad ma gafaliy e saf” ni Jesus Kristus.” (1 Peter 5:4) I ta’ ir ngak e piin ni kan dugliyrad ni gaar: “Nguum gafaliyed e pi saf rok Got ni gimed be ayuweg, ni gathi bochan e towasar, ya bochan nib m’agan’med ngay, maku gathi bochan ni gimed baadag ni nge yog ngomed ban’en u fithik’ e sasalap, ya bochan ni ri gimed baadag.” (1 Peter 5:1, 2, NW) Ra bay e ayuw romed e gallabthir, ma pi tagafaliy e saf ney e sana rayog ni ngar ayuweged reb e bitir ni nge yal’uweg kanawoen ko tirok Got ban’en.

Nap’an nra t’uf ni nge fonownag e pi Kristiano ni tachugol saf e bitir rom ndakir fol, ma rayog ni ngam dabuy ni ngan fonownag. Machane, yira lek e re kanawo’ ney ma ba maalifath nib ga’. I gaar Peter: “Mi gimed togopluw ngak [fare moonyan’]”​—gathi ngan togopuluw ngak e pi tachugol saf rok Got.​—1 Peter 5:9.

Nap’an ni Ra Gel e Fonow

Faanra fakam e der kalngan’ ma ba Kristiano ni ke taufe ma rayog ni nge yib ngak e tin th’abi gel e fonow​—ngan tharbog ko ulung. Ma rogon nrayog ni kuum puruy’gow e be yan u rogon yangaren nge ku boch ban’en.

Faanra fare tir e kab bitir ndawori gaman 18 e duw rok ma be par u tabinaw ma raum ayuweg ko tin nib t’uf ko dowef rok. Maku ba t’uf rok boch e fonow nge ngan skulnag u rogon e ngongol ni gur e ba milfan ngom ni ngam rin’ e pi n’ey. (Proverbs 1:8-18; 6:20-22; 29:17) Rayog ni ngam lemnag ni ngam tababnagew e fol Bible ni nge un ko numon. Rayog ni ngam guy rogon ni nga i guy boch e thin nu Bible nib thilthil nge pi babyor ni be pi’ “fare tapigpig nib yul’yul’ ma ba gonop.” (Matthew 24:45) Ku rayog ni ngaum fek nga i un ko pi muulung ko Kristiano ni nga i par u toobem. Urngin e pi n’en ney e rayog ni ngan rin’ ni yibe athapeg ni nge fol ko pi fonow nu Bible.

Bathil rarogon ni faanra faen ni kan tharbog e ke pag 18 e duw rok ma ma par u bang. Apostal Paul e tay chilen ngak e Kristiano kakrom u Korinth ni gaar: “Dab um chaggad ngak be’ ni be yog ni ir reb i walagey ni girdien Kristus machane be ngongliy e ngongol ko darngal, ara ba chogow, ara ma ta’ fan ma ma meybil ngak e liyos ni ma meybil boch e girdi’ ngay, ara ma t’ar e thin nga daken e girdi’, ara be’ nib tamuun rrum, ara ma th’ab e motochiyel. Mus ni ngam par nga but’ ngam un ngak e mit i girdi’ nem ko abich ma dab mu rin’.” (1 Korinth 5:11) Yu ngiyal’ ma bay boch ban’en ko tabinaw nra t’uf ni ngan non ngak faen ni kan tharbog, ma gallabthir ni Kristiano e thingari athamgil ni nge dabi chag ngak ni yugu dariyfan.

Nap’an ni ra fonownag e pi Kristiano ni tachugol saf ba bitir ni ke oloboch, ma de fel’ ni nge dab mu adag ara mu darifannag e fonow rorad. Ngam fol ngak fakam ni dakir fol e dabi pi’ e ayuw ni ngan ayuweg rok fare Moonyan’. Bin riyul’ riy, e ku kum tay e michan’ rom nga thatharen e riya’. Ma faan ga ra ayuweg e maruwel rok e pi tachugol saf, ma ga ra par ni gab “mudugil u fithik’ e michan’” ma ga ra pi’ e bin th’abi fel’ e ayuw ni fan ngak fakam.​—1 Peter 5:9.

Ra Ayuwegem Jehovah

Faanra dabki fol fakam, ma ngam lemnag ni gathi goo gur e ke buch rom. Ku bay boch e gallabthir ni Kristiano ni ke buch rorad. Demtrug rogon e pi skeng ni gad ra yan u fithik’ ma ra ayuwegdad Jehovah.​—Psalm 68:19.

Mu pagan’um ngak Jehovah u fithik’ e meybil. Mu um un ko ulung ko Kristiano. Ma ga pi’ e ayuw ko pi fonow ni be pi’ e pi tachugol saf ni kan mel’egrad. Ga ra rin’ ni aray rogon, ma rayog nim par ni gab mudugil. Ma ngongolem nib fel’ e rayog ni ayuweg fakam nge fel’ u wan’ fare pong rok Jehovah u fithik’ e t’ufeg ni nge sul ngak.​—Malaki 3:6, 7.

[Pictures on page 30]

Ngan fek gelngiy ko meybil nge ulung ko Kristiano