“Ke Tabab e Yay Nsom’on”​—e Fas ko Yam’!

“Ma piin ni kar m’ad ni yad ba muun ngak Kristus e bay ni fasegrad ko yam’ ni som’on.”​—1 THESSALONIKA 4:16, NW.

1, 2. (a) Mang e athap ni bay ko piin ni kar m’ad? (b) Mang fan ni ke mich u wan’ um ni bay e fas ko yam’? (Mu guy e footnote.)

“PIIN ni kab fas e yad manang ni yad ra yim’.” Riyul’ ni arrogon, ya ke denen Adam. Aram nap’an ma urngin e girdi’ ni ran gargeleg ma manang nra yim’, ma boor e ma lemnag ko: ‘Mang e migid nra yib? Mang rarogon e piin kar m’ad?’ I yog e Bible ni gaar: “Piin ni kar m’ad, e dariy e chi n’en ni yad manang.”​—Eklesiastes 9:5, NW.

² Bay e athap ko piin ni kar m’ad fa? Arrogon. Riyul’, ni bay e athap rorad ni faanra tin ni mm’agan’ Got ngay ko tabolngin e nge lebug. Boch e chibog ni ke yan, ma boor e tapigpig rok Got ni immoy ni yad ba yul’yul’ ni i michan’rad ko faen ni Owchen ni ke micheg Jehovah nra li’ Satan me chuweg urngin ban’en nib kireb ni ke rin’. (Genesis 3:15) Boor i yad e ke yim’. Faanra ngar guyed e pi n’em ni micheg Jehovah ni ke lebug, nge ku boch ban’en ni ke fal’eg Jehovah mab t’uf ni ngar fas gad ko yam’. (Hebrews 11:13) Gur rayog ni riyul’ e pi n’em? Arrogon, rayog. I gaar apostal Paul: “Bay ni faseg urngin e girdi’ ko yam’, ni tin nib mat’aw nge tin de mat’aw.” (Acts 24:15, NW) Ki faseg Paul reb e pagel ni Eutykus fithingan, ni mul ko thal ndalip thal e naun nga but’ me yan i “fek ni ke yim’.” Biney e tomur ko fa mereb i fas ko yam’ ni kan yoloy nga Bible.​—Acts 20:7-12.a

3. Mang e ke fal’eg lanin’um ko thin rok Jesus ni bay ko John 5:28, 29, ma mang fan?

³ Mereb i fas ko yam’ nem e be pi’ e mich ko n’en ni yog Paul. Ma gelnag e pagan’ rodad ko thin rok Jesus ni gaar: “Ba’ ba ngiyal’ ni be yib ni bayi taw ngay ma gubin e yam’ ni bay u lan e low ni bayi rung’ag laman [Jesus], mi yad yib u lan e low rorad nga wuru’.” (John 5:28, 29) Riyul’ ni rib fel’ fare thin! Uw feni ra fal’eg laniyan’ bokum milyon e girdi’ ni ke yim’ e piin ba t’uf rorad!

4, 5. Mang e miti fas ko yam’ ni be yog e Bible murung’agen, ma bin ngan e gad ra weliy ko re article ney?

⁴ Boor e piin ni yira fasegrad ngar pared u fayleng u fithik’ e gapas u tan Gil’ilungun Got. (Psalm 37:10, 11, 29; Isaiah 11:6-9; 35:5, 6; 65:21-23) Machane, immoy boch e fas ko yam’ u m’on ko binem. Som’on, e thingar ni faseg Jesus Kristus ko yam’ ni nge yan i dag fel’ngin e maligach rok ngak Got ni fan ngodad. Ke yim’ Jesus min faseg ko yam’ ko duw ni 33 C.E.

⁵ Yay ni migid, ma “fare Israel rok Got” ni kan dugliyrad e thingar ra uned ngak Somol ni Jesus Kristus ko flaab u tharmiy, ma aram e “gubin ngiyal’ ni bay ur pired rok Somol.” (Galatia 6:16; 1 Thessalonika 4:17) Re n’em e ka nog e yay “nsom’on e fas ko yam’” ngay. (Filippi 3:10, 11; Revelation 20:6) Nap’an nra mus ere fas ko yam’ nem, ma aram e ke taw nga nap’an bokum milyon e girdi’ ni ngar fosgad u fayleng nge yog e yafos ni manemus ngorad u Paradis. Demtrug rogon, ko bay e athap rodad ko par u tharmiy ara fayleng, ma ri gad baadag ni ngad nanged murung’agen e yay “nsom’on e fas ko yam’.” Miti mang fas ko yam’ e ram? Wuin e ra buch?

“Mmiti Mang Dowef?”

6, 7. (a) U m’on ni nge yan e pi Kristiano ni kan dugliyrad nga tharmiy, ma mang e thingari buch? (b) Yad ra fas ko yam’, ma mmit i mang dowef e bay rorad?

⁶ Bin som’on e babyor rok Paul ngak piyu Korinth, e fith reb e deer ni murung’agen e fas ko yam’: “Ra diin mi ni faseg e yam’? Arrogon, miti mang dowef e bay yog ngorad?” Me fulweg fare deer ni gaar: “Ra mu yung ba awoch nga fithik’ e but’ ma dabi tugul ni faanra dabi pil nge wod . . . i Got e re dowef nib m’agan’ ngay e ke pi’ ngak . . . Ma ba’ fel’ngin e tin nu tharmiy e dowef ma yugub reb fel’ngin e tin nu fayleng e dowef.”​—1 Korinth 15:35-40.

⁷ Thin rok Paul e be dag ni fapi Kristiano ni kan dugliyrad ko kan ni thothup e thingar ra m’ad u m’on ni nge yog e tow’ath ngorad u tharmiy. Ma tomuren ni kar m’ad, ma dowef rorad e ra sul ko but’. (Genesis 3:19) Ngiyal’ ni ke dugliy Got, e ra fasegrad ko yam’ nga reb e dowef nib m’ag ko yafas u tharmiy. (1 John 3:2) Ma ke tow’athnagrad Got ni dab ku ra m’ad biid. Biney e gathi ban’en ni yog ngorad ko ngiyal’ nni gargelegrad, ni bod ni yima yog ni yaal e dabi yim’. I gaar Paul, “N’en ni bay yim’ e thingari yin’ nga daken e n’en ndabiyog ni nge yim’ ni bod e munmad.” N’en ndabiyog ni nge yim’ e aram e tow’ath ni yib rok Got, ni ngan “yin’ nga daken” e pi cha’ ni bay e athap rorad ko yay nsom’on e fas ko yam’.​—1 Korinth 15:50, 53; Genesis 2:7; 2 Korinth 5:1, 2, 8.

8. Uw rogon ni kada nanged ni de mel’eg Got fare 144,000 u boch e teliw nib thilthil?

⁸ Ka ri mus ni goo fare 144,000 e yad ra un ko yay nsom’on e fas ko yam’. Ke tabab Jehovah i mel’egrad u nap’an e Pentekost ko 33 C.E, ndawori n’uw nap’an ni ke faseg Jesus ko yam’. Yad urngin ni bay fithingan “[Jesus] nge Chitamangin ni kan yoloy nga peri’rad.” (Revelation 14:1, 3) Arfan, nde mel’egrad u yugu boch e teliw nib thilthil. Ya yad urngin ma Kristiano, ni pi gachalpen Kristus ni yad be fek fithingan e Chitamangin​—ni Jehovah. Nap’an ni yad ra fas, min pi’ reb e maruwel ngorad u tharmiy. Pigpig ni yad ra tay ngak Got e riyul’ ni ba gel e felfelan riy.

Ke Tabab e Chiney Fa?

9. Uw rogon nra ayuwegdad e Revelation 12:7 nge 17:14 ngad gonopiyed e ngiyal’ ni tabab e yay nsom’on e fos ko yam’?

⁹ Wuin e ke tabab e yay nsom’on e fas ko yam’? Ri bay e mich riy ni ke tabab. Baaray rogon, ngan taarebnag l’agruw e guruy ko Revelation. Som’on, mu guy e Revelation guruy ni 12. Gad ra beeg u rom ni ka fini par Jesus Kristus nga tagil’ e pilung, ni yad fapi engel rok nib thothup ni ngar mahlgad ngak Satan nge pi moonyan’ rok. (Revelation 12:7-9) Ke yoor yay ni be m’ug ko re babyor ney, ni ke tabab fare mahl ko duw ni 1914.b Machane, mu guy ndariy bagayad e pi gachalpen Kristus ni kan dugliyrad ni un ngak Jesus ko re mahl nem ni tay u tharmiy. Chiney e ngada guyed e Revelation guruy ni 17. Gad ra beeg u rom, ni tomuren fare magothgoth ni yira tay ko “Babylon nib Gilbuguwan,” ma fare Fak e saf e ra gel ngak e pi nam. Miki gaar: “Piin ni ke piningrad ni ke mel’egrad, ni piin ni yad ba yul’yul’ ma yad be un ngak e bay ra gelgad ngorad.” (Revelation 17:5, 14) “Piin ni ke piningrad ni ke mel’egrad ni yad ba yul’yul’” e dabisiy ni kan mu’ i fasegrad ko yam’ nfaanra nga ra uned ku Jesus ko bin tomur e mahl ngar gelgad ngak Satan nge fayleng rok. Ba puluw ni piin ni kan dugliyrad ni be yim’ u m’on ko Armageddon e yira fasegrad ba ngiyal’ u thilin e 1914 nge Armageddon.

10, 11. (a) Mini’ fapi piilal ma mang e ke dag bagayad ngak John? (b) Mang e rayog ni nga dogned ko re n’ey?

¹⁰ Rayog ni nga dogned ko wuin e som’on ni tabab e fas ko yam’ fa? Ban’en ni ra micheg e yira pirieg ko Revelation 7:9-15, aram e gini weliy apostal John riy murung’agen e pi n’en ni pig e changar rok me “guy e girdi’ ni ke muulung ni pire’ ni pire’ ndariy be’ nrayog ni nge theegrad!” Bagayad fa 24 i piilal e ke dag ku John ko mang fare ulung nib ga’, pi piilal ney e be yip’ fan fare 144,00 nra un ngak Kristus nga tharmiy.c (Luke 22:28-30; Revelation 4:4) Athap rok John e tharmiy; machane bochan ni ka bay u fayleng ko ngiyal’ ni be non e re piilal nem ngak, ma aram e John ko re changar rok ni baaram ni piliyeg e be yip’ fan e piin ni kan dugliyrad ni ka yad bay u fayleng ndawori yog ngorad e tow’ath rorad ni nga ranod nga tharmiy.

¹¹ Mang fan nrayog ni nga dogned ni bagayad fa 24 i piilal e ke tamilangnag ngak John murung’agen fare ulung nib ga’? Bod ni piin ni kan fasegrad ko fare 24 i piilal e yad ma un i weliy e thin riyul’ e ngiyal’ ney. Mang fan ni rib ga’ fan e re n’em? Bochan ni ke tamilangnag Got ngak e piin ni kan dugliyrad u fayleng ko 1935 ko mini’ fare ulung ni ba ga’. Faanra bagayad fare 24 i piilal e kan ta’ ni nge weliy e tin riyul’ nem nib ga’ fan, ma ba t’uf ni ngan faseg nge yan nga tharmiy ko duw ni 1935 fa m’on riy. Biney e be dag ni yay nsom’on e fos ko yam’ e ke tabab ba ngiyal’ u thilin e duw ni 1914 nge 1935. Rayog ni ngan tamilangnag boch fa?

12. Mu weliy ko mang fan ni April, 1918 e aram e ngiyal’ ni ke tabab e yay nsom’on e fos ko yam’.

¹² Re n’ey, e rayog ni nge ayuwegdad ni ngada lemnaged e n’en ni buch rok Jesus nrogon u Bible. Kan dugliy Jesus Kristus ni nge mang Pilung u Gil’ilungun Got ko October 29 C.E. Dalip nge baley e duw nga tomuren ko April 33 C.E., min faseg ko yam’ me par ni reb e kan nib gel. Ere rayog ni nga dogned ni nap’an ni ke pilung Jesus ko October 1914, min tabab i faseg ko yam’ e pi gachalpen nib yul’yul’ ni kan dugliyrad u dalip nge baley e duw nga tomren, ni aram e April ko duw ni 1918? Rayog ni nge buch ni aram rogon. Yugu aram rogon nder yog e Bible nib tamilang, ma gathi ban’en nde puluw nga yugu boch e thin nu Bible ni be dag ni yay nsom’on e fos ko yam’ e ke tabab nde n’uw nap’an u tomren ni ba’ Kristus.

13. Uw rogon ni weliy 1 Thessalonika 4:15-17 ni fa yay nsom’on e fos ko yam’ e tabab u nap’an ni ka fini tabab Kristus ko gagiyeg?

¹³ Baaray rogon, ni yoloy Paul: “Gadad e piin ni ka gadad ba fos ko chirofen nra sul Somol riy [gathi tomur ko ngiyal’ ni bay] e dab da m’onod rok e piin ni kar m’ad. Bay nrung’ag ba lam ni ba ga’, min rung’ag laman pilungen e engel, min rung’ag laman e rappa rok Got, ma aram me yib Somol u tharmiy nga but’! Ma piin ni kar m’ad nib mich Jesus u wan’rad e bay ni fasegrad ko yam’ ni som’on; ma gadad e piin ni ka gadad ba fos ko ngiyal’ i n’em e bay ni kunuydad ngorad nga fithik’ e manileng ngad mada’gad Somol u fithik’ e nifeng. Ma aram e gubin ngiyal’ ni bay ud pired rok Somol.” (1 Thessalonika 4:15-17) Thin nu Greek, ni fare bugithin “nra sul Somol” e be yip’ fan ni “bay Somol.” Machane gathi be weliy Paul murung’agen tomuren e ngiyal’ ni bay. Arfan, ni pi Kristiano ni kan dugliyrad nra yim’ bagayad u m’on ko ngiyal’ ni bay Kristus e yira faseg nge yan nga tharmiy u m’on ko piin ni ka yad ba fas ko ngiyal’ ni bay Kristus riy. Fan ere n’ey yay nsom’on e fos ko yam’ e thingari tabab u nap’an ni ka fini tabab Kristus ko gagiyeg, ma ra ul’ul u nap’an e ngiyal’ ni bay. Gathi urngin ni ngar fosgad taab yay, ya yay nsom’on e fos ko yam’ e bay n’umngin nap’an.

“Ra Bagayad Min Pi’ Reb e Mad nib Wechwech Ngak”

14. (a) Wuin e ke lebug e pi n’en ni pig e changar ngan guy ni bay ko Revelation guruy ni 6? (b) Mang e be yip’ fan e n’en ni yog e Revelation 6:9?

¹⁴ Kum lemnag e mich riy ni bay ko Revelation guruy 6. Kan guy Jesus ni be yan nrogon be’ nib Pilung ni ke gel. (Revelation 6:2) Pi nam e yad ra un ko fare mahl nib ga’. (Revelation 6:4) Ra yib e uyungol u gubin yang. (Revelation 6:5, 6) M’ar nib machreg ni ma af e ke gafgownag e girdi’. (Revelation 6:8) Urngin e pi yiiy ney e rib tamilang ni ke m’ag nga rarogon e fayleng ni ka nap’an e 1914. Machane bay ban’en ni buch. Ngada sapgad nga ba altar ko maligach. Ni tanggin e bay e “yaal rok e piin nli’rad ngar m’ad ni bochan e thin rok Got nge machib ni ur tiyed ko girdi’ i yan.” (Revelation 6:9, NW) Bochan ni “yaal [ara, yafas] ko ufin e bay u fithik’ e racha’,” ma n’en ni be yip’ fan ni bay u tanggin fare altar e rachaen e pi tapigpig rok Jesus nib yul’yul’ ni kan li’rad nbochan ni yad e pi tamachib nib pasig.​—Levitikus 17:11, NW.

15, 16. Mu weliy ko mang fan ni fapi thin ni bay ko Revelation 6:10, 11 e fan ko yay nsom’on e fos ko yam’.

¹⁵ Bod rachaen Abel ni be’ nib mat’aw, rachaen e pi Kristiano ni kan li’rad nbochan e michan’ rorad e be tolulnag e tin ba mat’aw. (Genesis 4:10) “Mi yad tolul ni ba ga’ lamrad ni be lungurad, ‘Somol ni Gubin ma Rayog Rom, ni gab thothup ma gab yul’yul’! Uw n’umngin nap’an mfini mpufthinnag e girdi’ nu fayleng ma ga gechignagrad ni bochan e ra thanged e fan romad?’” Mang e migid ni buch? “Ra bagayad min pi’ reb e mad nib wechwech ngak; mi nog ngorad ni nga yigu ra songad nge yan i mada’ urngirad ko re matheeg ni kan finey, ni piin ni ka yad be pigpig ngak Got ni ku boch i walagrad ni bay fin nli’rad ngar m’ad ni bod yad e bay ra gamanniged e re matheeg nem.”—Revelation 6:10, 11.

¹⁶ Pi mad nib wechwech ney e kan nin’ nga fithik’ e racha’ ni bay u tan e altar fa? Danga’! Fapi mad e kan pi’ ngak fapi cha’ ni kan puog e racha’ rorad nga daken e altar. Kar pied e yafas rorad ni fan nga fithingan Jesus ma chiney e kar fosgad ni bod e kan. Uw rogon ni kad nanged? Kad beeged ko Revelation, ni gaar: “Piin ni yad ra gel ndar paged yad ko kireb e yira yin’ e mad nib wechwech nga dakenrad ni ara’ rogon, ma dab gu chuweg fithingrad u lan babyoren e piin ni kar fosgad.” Kum lemnag fa 24 i piilal “ni ka ron’ed e mad nib wechwech, ma kar teeliyawgad ko teeliyaw [ni] gol.” (Revelation 3:5; 4:4) Tomren ni ke tabab e mahl, nge uyungol, nge m’ar nib machreg ni ma af ni nge kirebnag e fayleng, ma boch ko fare 144,000 ni kar m’ad, aram e pi cha’ ni fare racha’ u tan e altar e be yip’ farad, ni kan fasegrad ko yafas u tharmiy ni kar chuwgad ko mad nib wechwech nib pow u ban’en.

17. Uw rogon ni nge “toffan” e piin ni ke yog e mad ni wechwech ngorad?

¹⁷ Pi cha’ nem ni ka fin ra fosgad e thingar ra “toffangad.” Thingar ra sonnaged fare rran rok Got u fithik’ e gum’an’. Boch e “tapigpig” ni Kristiano ni kan dugliyrad e ka yad bay u fayleng ni dawora micheged e yul’yul’ rorad u fithik’ e skeng. Nap’an nra taw e ngiyal’ ni ngan pufthin, me mus e “toffan”. (Revelation 7:3) Ngiyal’ nem, ma piin ni kar fosgad e yad ra un ngak Somol Jesus Kristus ngar thanged e piin nib kireb nib muun ngay e pi cha’ nra puoged rachaen e pi Kristiano ndariy ban’en ni kar bucheged.​—2 Thessalonika 1:7-10.

Mang Fan e Re N’ey Ngodad

18, 19. (a) Mang fan nrayog ni nga dogned ni ke tabab e yay nsom’on e fos ko yam’? (b) Ke uw rogon e lem rom ni ka manang fan e yay nsom’on e fos ko yam’?

¹⁸ Thin rok Got e de yog e rorran nra fas e yam’ ko yay nsom’on, machane ke dag nra buch ni dabki n’uw nap’an ko ngiyal’ ni bay Kristus. Som’on e ra fos e pi Kristiano ni kan dugliyrad nra m’ad u m’on ndawori tabab Kristus ko gagiyeg. Nap’an ni be mon’og e gagiyeg rok Kristus, ma pi Kristiano ni kan dugliyrad ni kar mu’gad ko maruwel rorad u fayleng ni yad ba yul’yul’ e yad ra thil ni bod “machregin lan mit be’ ni talab” nge ngal’ ni kan nib gel gelngin. (1 Korinth 15:52) Rayog rok urngin e piin kan dugliyrad ni ngar feked e tow’ath rorad u m’on ko fare mahl ni Armageddon fa? Dawor da nanged. Machane, gad manang nra taw ko ngiyal’ ni ke dugliy Got ma urngin fare 144,000 ma yad ra sak’iy nga daken fare Burey nu Zion ni bay u tharmiy.

¹⁹ Maku gad manang ni tin boor ko fare 144,000 e kar uned ngak Kristus. Ke mus ni ka buchuuw i yad e ka bay u fayleng. Rib gel ni kan micheg ni fare tayim ko pufthin rok Got e rib pey ni be yib! Dabki n’uw nap’an ma fayleng rok Satan ni ga’ngin e yira thang. Mi nin’ Satan nga lan fare low nib toar. Ma aram me tabab e fos ko yam’ ni fan ngak yugu boch e girdi’, bochan fare biyul ni ke pi’ Jesus, ma urngin e girdi’ nib yul’yul’ e ra fos nib flont ntaareb rogon ko n’en ni ke mul u pa’ Adam. Yiiy ni ke yog Jehovah ni bay ko Genesis 3:15 e rib fel’ rogon ni ke lebug. Rib tow’ath nib ga’ ni ngan par ko ngiyal’ ney!

[Footnotes]

Rayog ni Ngam Weliy?

Uw rogon nra ayuwegdad e pi thin ko Bible ney ngada nanged ngal’an e yay “nsom’on e fos ko yam’”?

• Revelation 12:7; 17:14

• Revelation 7:13, 14

• 1 Korinth 15:23; 1 Thessalonika 4:15-17

• Revelation 6:2, 9-11

[Pictures on page 24]

Mang e fos ko yam’ ni tabab u m’on ni nge fos yugu boch e girdi’?

[Picture on page 27]

Uw rogon ni kan pi’ e mad ni wechwech ngak boch e girdi’ ndawor ni fasegrad?