Ngan Mon’og ko Tirok Got u Nap’an ni Ke Manna’ Chugey

“Piin ni kan yungrad nga lan e naun rok Jehovah . . . e bay ra mon’oggad i yan, ma bay ku ur mon’oggad i yan nge taw nga nap’an nra manna chugurad.”​—PSALM 92:13, 14, NW.

1, 2. (a) Ba ga’ ni uw rogon ni yima weliy murung’agen e pilibthir? (b) Mang e ke micheg e Thin rok Got ni fan ko pi magawon ni keb nbochan e denen rok Adam?

PILIBTHIR​—mang e ga ra lemnag ko re thin nem? Biyach ni ke muuduldul fa? Kan biling? Ke war paey nge ayiy? Ara yugu boch e ‘magawon ko pilibthir’ ni bay ko Eklesiastes 12:1-7? Faanra arrogon, ma ba ga’ fan ni ngam tay ngan’um rarogon e pilibthir ni bay ko guruy 12 ko Eklesiastes, ni gathi aram rogon ni lemnag e An Tasunumiy ni Jehovah Got, aram ko tabolngin, ya bochan wenegan e denen rok Adam ni ke af ko girdi’.​—Roma 5:12.

² Ngan pilibthir e gathi ba buch waathan, ya ra nguun par nib fas mab t’uf ni ngi i yan e duw. Rogon riy, e ngan ilal nge mus yangarey e ka ban’en nib fel’ngin urngin ban’en nib fas. Ma tin ke kireb u lan nel’ e biyu’ e duw nbochan e denen nge dan flont ni gad be guy u chardad i yan e dabki n’uw nap’an ma ra chuw ma gubin e girdi’ ni ma fol e yad ra felfelan’ ko yafas ni bod rogon nni lemnag ndariy e kireban’ nbochan e kan pilibthir nge yam’. (Genesis 1:28; Revelation 21:4, 5) Re ngiyal’ i nem, e “dakuriy be’ nra gaar: ‘Kug m’ar.’” (Isaiah 33:24) Piin pilibthir e ra sul nga rogon ko ngiyal’ ni kab “fel’ yangarrad,” ma dowrad e ra “sul nga rogon ni ka yad ba pagel.” (Job 33:25, NW) Ma ngiyal’ ney, e bay e gafgow nbochan e denen ni af rok Adam. Machane, pi tapigpig rok Jehovah e kan fal’eg waathrad u boch e kanawo’ ni yugu ba thil u nap’an ni yad be pilibthir i yan.

3. Mang boch e kanawo’ nrayog ni i mon’og e Kristiano riy u “nap’an ni ke manna’ chugurad”?

³ Thin rok Got e be micheg ni “piin ni kan yungrad nga naun rok Jehovah . . . yugu yad be par ni yad be mon’og u nap’an ni ke manna’ chugurad.” (Psalm 92:13, 14, NW) U fithik’ e fanathin, e weliy fare psalmist riy e tin riyul’ ni piin ni yad be pigpig ku Got ni yad be yul’yul’ e rayog ni nguur mon’oggad, ma yad be k’uf nib fel’ rogon ko tirok Got, nyugu aram rogon ni ke meewar e dowef rorad. Boor i yad ni bay murung’agen u Bible maku arrogon e ngiyal’ ney.

“Der Pag”

4. Uw rogon ni dag Anna ni fare profet nib ppin ni ke pilibthir e yul’yul’ rok ngak Got, ma uw rogon ni kan tow’athnag?

⁴ Ngan lemnag fare profet ni ppin ni immoy ko bin som’on e chibog ni Anna fithingan. Ke 84 e duw rok, “nder pag e wub nga tempel ni nep’ nge rran, ni be meybil ma be pag e abich.” Re pin nem e gathi ba Levite e chitamangin ya reb e “ganong rok Asher,” ere Anna e dabiyog ni nge un ko par u tempel. Mu lemnag gelngin e maruwel ni ma tay ni ngi i yib nga tempel ni gubin e rran u ngal’an e pigpig ni kakadbul nge mada’ ko ngal’an e pigpig ni blayal’! Machane, bochan e yul’yul’ rok nib gel, min tow’athnag Anna nib gel. Ba tow’ath, ya bay me taw Josef nge Maria ni kar fekew Jesus i yib nga tempel ni ngan pi’ ngak Jehovah nrogon ko Motochiyel. Nap’an ni guy Anna Jesus, me tabab “i pining e magar ngak Got me weliy murung’agen e re tir ney ngak urngin e girdi’ ni yad bay u rom ni yad be sonnag Got ni nge chuweg yu Jerusalem u pa’ e toogor rok.”​—Luke 2:22-24, 36-38; Numbers 18:6, 7.

5, 6. Mang boch e kanawo’ ni boor e pilibthir e ngiyal’ ney ni ma dag riy ni taareb laniyan’rad Anna?

⁵ Bay boch e pilibthir u fithik’dad e ngiyal’ ney ni bod Anna ndarur paged e muulung, ma ri yad ma meybil nib gel ni nge mon’og e bin riyul’ e liyor, ma ri yad ba adag ni ngaur machibniged fare thin nib fel’. Reb e walag ni ke pag 80 e duw rok ni yow ma un leengin ko muulung ndarir talgow e gaar: “Kug mechamegew ngomow ni nguug warow ko urngin e muulung. Ya dabmow ni nggu warow nga bayang. Gamow baadag ni nguug pirew ko gin bay e girdi’ rok Got riy. Ya aram e gin ba pagan’mow riy.” Ri be pi’ e athamgil nga laniyan’ urngin e girdi’!​—Hebrews 10:24, 25.

⁶ “Faanra bay ban’en nib l’ag ko tirok Got, ma rayog ni nggu mang bang riy, ma gu baadag ni gu ra rin’.” Aram e thin rok Jean, reb e Kristiano ni 80 e duw rok ni kem’ figirngin. Me ul’ul ngay ni gaar, “Riyul’ ni yu ngiyal’ e ma kireban’ug, machane mang fan ni nge gubin e girdi’ u toobeg i yan ma nge kireban’ ni bod gag?” I weliy u fithik’ e felfelan’ rok, u nap’an ni ke yan nga boch e nam ni fan ni nge gel ko tirok Got. U reb e milekag rok ndawori n’uw nap’an, e gaar ngak e piin yad, “Kug dabuy ni nggu guy e pi n’en ni baadag e tourist; ya gu baadag ni nggu wan ko machib!” Yugu aram rogon nde nang Jean e thin rorad, machane me yog ni pug laniyan’ e girdi’ ko thin nu Bible. Maku reb riy, e ke yoor e duw ni ke maruwel u reb e ulung nib t’uf e ayuw riy, yugu aram rogon ni ngki fil reb e thin nib beech ma reb e awa ni nge yan fini taw ko gin ngan muulung riy maku aram nap’an nra sul.

Nge Par nib Pasig Lanin’uy

7. Uw rogon ni yog Moses ni rib adag ni nge gel e tha’ u thilrow Got ko ngiyal’ ni ke pilibthir?

⁷ Ma yoor e tamilangan’ u nap’an ni ke yoor e tayim ni ke yan. (Job 12:12) Machane, mon’og ko tirok Got e gathi yugu ma yib ni ma un ko duw. Arfan, ni gathi ke mus ni ngan taga’ nga daken e tin yimanang kakrom, ya pi tapigpig rok Got ni ba yul’yul’ e yad ma athamgil ni ngi i “yoor ban’en ni nge mit ngorad” u nap’an ni be yan e duw. (Proverbs 9:9) Ngiyal’ ni pi’ Jehovah e maruwel ngak Moses, ma ke gaman 80 e duw yangaren. (Exodus 7:7) Ngiyal’ nem u nap’an Moses, e yira par nge aram yangarey ma yima lemnag ni ban’en ni gathi ri ma buch, ya i gaar: “Ya ke mus ni medlip i ragag e duw n’umngin nap’an, ma be mada’ ko meruk i ragag ni faanra ba gel fithik’ i downgin bagamad.” (Psalm 90:10) Machane, de lemnag Moses ni kaygi pilibthir ni nge fil ban’en. Tomuren bokum e duw ni i pigpig ku Got, ni boor e maruwel ni fan ku Got, nge maruwel nib ga’ fan ni i rin’, me wenig Moses ngak Jehovah ni gaar: “Faanra gub fel’ u wan’um, me ere gu be wenig ngom ni ngam weliy ngog e tin ni kam lemnag ni ngam rin’.” (Exodus 33:13) Ere rib adag Moses ni nge gel e tha’ u thilrow Jehovah.

8. Uw rogon ni ayuweg Daniel laniyan’ nga i par nib pasig nge yan i mada’ ko 90 e duw rok, ma mang angin ni yib?

⁸ Fare profet ni Daniel ni ke gonap’an 90 e duw rok, ma ka yugu ma fal’eg i lemnag e thin nib thothup ni kan yoloy. N’en ni ke tamilangan’ riy u nap’an ni be fil “fapi babyor”​—ni ba muun ngay e Levitikus, nge Isaiah, nge Jeremiah, nge Hosea, nge Amos—​aram e n’en ni k’aring nga i meybil nib gel ngak Jehovah. (Daniel 9:1, 2) Min fulweg taban fare meybil rok u daken e thin ni kan thagthagnag ni murung’agen e wub rok fare Messiah nge bin nib machalbog e liyor gabul nge langlath.​—Daniel 9:20-27.

9, 10. Mang e ke rin’ boch e girdi’ ma kar pared ni yad ba pasig?

⁹ Bod rogon Moses nge Daniel rayog ni ngada athamgilgad nga i par lanin’dad nib pasig nfaanra uda tayedan’dad ko tirok Got u n’umngin nap’an nrayog rodad. Boor e girdi’ ni be rin’ ni aram rogon. Worth ni reb e piilal ni Kristiano ni ke gaman 80 e duw rok, e i par ni be fol ko machib ni ma pi’ “fare tapigpig nib yul’yul’ mab gonop.” (Matthew 24:45) Ke gaar, “Ri gu baadag e thin riyul’ ma kari gu felfelan’ ni ku guy rogon ni be tamilang e tin nriyul’ i yan.” (Proverbs 4:18) Taareb rogon ngak Fred, ni ke pag 60 e duw ni i pigpig ni polo’ e tayim, me pirieg ni ra ngan guy rogon ni ngan weliy e thin nu Bible ngak boch e girdi’ ma ra i pug lanin’uy ko tirok Got. I gaar, “Thingar u gu tay e Bible ni be maruwel u lanin’ug. Faan rayog ni mu tay e Bible ni be maruwel​—ma ga ta’ nib ga’ fan—​ma faanra rayog nim taarebnag e tin ni ga be fil ko ‘thin riyul’ ni kam fil, ma aram dabi par ni de gaman e tamilangan’ rom. Ma aram e ga ra guy nra bang ma be par u tagil’ ni be gal ramaen.”​—2 Timothy 1:13.

¹⁰ Ra un pilibthir i yan ma gathi aram e dabkiyog ni ngan fil ban’en nib beech fa ba mo’maw’. Girdi’ ni ke gaman 60, fa 70, ara 80 e duw rorad e ke yog ni ngar beeged e yol ara ra filed reb e thin nib beech. Boch e Pi Mich rok Jehovah e kar rin’ed ni aram e yad be nameg ni ngar machibniged fare thin nib fel’ ngak boch e girdi’ ni ba thil e nam rorad. (Mark 13:10) Harry nge leengin ni ke gaman 60 e duw rorow e kar turguyew ni nga ranow ko nam nu Portugal ngar piew e ayuw. I gaar Harry, “Ngada nangew ndemtrug e maruwel ma ma mo’maw’ nfaanra kan pilibthir.” Machane, bochan gelngin e athamgil rorow me yog rorow ni ngar filew e Bible ngak be’ ko thin nu Portugal. Ma ke yoor e duw e chiney, ni ma pi’ Harry e welthin ko district convention ni thin ni Portuguese.

11. Mang fan ni ngan lemnag e pi n’en ni ke rin’ fapi pilibthir ni yad ba yul’yul’?

¹¹ Riyul’, ni gathi gubin e girdi’ mab fel’ fithik’ e dowrad, ara nge rin’ ban’en ni aram rogon. Ere mang fan ni ngan lemnag e tin ni ke rin’ boch e pilibthir? Riyul’ ni gathi nga nog ni nge taareb rogon e tin thingari rin’ urngin e girdi’. Ireray fan e n’en ni yoloy Paul ni apostal nge yan ngak e pi Kristiano nu Hebrew ni murung’agen fapi piilal ko ulung ni yad ba yul’yul’ ni gaar: “Ngiyal’ ni gimed ra lemnag rogon e n’en ni rin’ pangirad mi gimed folwok ko michan’ rorad.” (Hebrews 13:7, NW) Nap’an ni gad ra lemnag rogon farad pasig ma rayog ni nge pi’ gelngidad ko fare michan’ nib gel ni i k’aring e pi pilibthir ney ni rib gel ko pigpig rorad ngak Got. Harry, ni 87 e duw rok e chiney, e weliy ko mang e ke ayuweg ni gaar, “Ri gu baadag ni nggu fanay e tin ka bay e duw rog u fithik’ e gonop ni fan ko pigpig ngak Jehovah.” Me Fred, ni kaan weliy murung’agen faram e ke pirieg e felfelan’ ko maruwel ni kan pi’ ngak u Bethel. I yog ni gaar, “Thingar mu gay rogon ni nge yog ni nguum pigpig ngak Jehovah nib fel’ rogon ma ga par riy.”

Yul’yul’ ni Yugu Demtrug ko Mang e Be Thil

12, 13. Uw rogon ni dag Barzillai nib yul’yul’ ku Got ni yugu aram rogon ni ke thil rarogon?

¹² Thil thil ni ma ta’ dowey e rayog ni nge mo’maw’. Machane, ra yog ni ngan dag e yul’yul’ ngak Got ndariy fan ni be thil e pi n’en ney. Barzillai reb e Gileadite e ke dag rogon e re n’ey ni rib fel’. Nap’an ni ke 80 e duw yangaren, me dag ni rib gol ngak David nge salthaw rok, i pi’ garad me ayuwegrad ko gin ni ngan par riy u nap’an ni be togopluw Absalom. Nap’an ni sul chon David nga Jerusalem, me un Barzillai ngorad nge mada’ ko fare Lul’ nu Jordan. Me ognag David ngak Barzillai ni nge un ko par u tafen e pilung. Uw rogon ni fulweg Barzillai? “Ke 80 e duw rog. . . . Ma dab kug nang lamen e tin bay ug way nge tin bay ug garbod ngay, ma dabkiyog ni gu rung’ag laman e piin ni yad ba tang. . . . Baaray e tapigpig rom i Chimham ni fakag; mfek nge un ngom, ma ga ayuweg nrogon ni ga be finey nib fel’.”​—2 Samuel 17:27-29; 19:31-40.

¹³ Demtrug feni ke thil rarogon Barzillai, me rin’ e tin rayog rok ni nge ayuweg fare pilung ni ke dugliy Jehovah. Yugu aram rogon ni ke nang ni ke thil rogon e thamtham rok ko ri’ lamen ban’en nge rung’ag lingan ban’en e gathi ka bod kafram ma de kireban’ ngay. De siin ni tay chilen ni Chimham e nge fek e tin kan ognag ngak, ere Barzillai e dag feni rib gol nib fel’ laniyan’. Boor e pilibthir e ngiyal’ ney, ni yad bod Barzillai ni be dag e lem nde siin ma rib gol. Yad ma rin’ e tin nrayog rorad nga ra ayuweged e liyor nriyul’ ya yad manang ni aram e “maligach nib m’agan’ Got ngay.” Rib fel’ waathdad ni bay e pi cha’ nem u fithik’dad ni yad ba yul’yul’!​—Hebrews 13:16.

14. Uw rogon ni yangaren David ni ke pilibthir e ke pi’ fan fapi thin ko Psalm 37:23-25?

¹⁴ Yugu demtrug rogon e thilthil ni i tay rarogon David, ma be par nib pagan’ ngak Jehovah nra ayuweg e pi tapigpig rok nib yul’yul’ ndabi thil. Ke chugur ni nge mus e yafas rok David, me tunguy fare tang ni goo yimanang e ngiyal’ ney ni bay ko Psalm 37. Amu lemnag David ni i fal’eg i lemnag ma be chubeg e harp ma be tang ni baaray thin riy: “I Somol e ma pow’iy be’ ngi i yan faanem ko kanawo’ nib fel’ ni ir e nge yan riy, ma ba felan’ ko ngongol rok faanem; ra chey ni dol’, ma dabi par u luwan u but’, yi Somol e ra ayuweg nge sak’iy nga lang. Chiney e kug pilibthir, ni gathi ku gub pagel, machane dawor gguy be’ nib fel’ ni gomanga ke pag Somol faanem, ara gguy pi fak ni yad be man ggan.” (Psalm 37:23-25) Ke guy Jehovah nib m’ag ni ngan uneg yangaren David ko fare tang ni kan thagthagnag. Kari yib u gum’irchaen e pi thin nem!

15. Uw rogon ni dag John ni apostal rogon e yul’yul’ ni yugu demtrug rogon ni be thil thil boch ban’en nge be pilibthir i yan?

¹⁵ Apostal John e ku bagayad e piin ba fel’ e n’en ni ke rin’ u rogon e yul’yul’ ni yugu aram rogon ni be thil boch ban’en ma be pilibthir i yan. Tomren 70 e duw ni ke pigpig ku Got, min chuweg ko nam rok ngan tay nga daken bochi donguch ni Patmos fithingan “nbochan ni i weliy e thin rok Got nge thin riyul’ ni i weliy Jesus ngan nang.” (Revelation 1:9) Machane, dawori m’ay e maruwel rok. Riyul’, ya urngin e tin ni ke yoloy John u Bible e yoloy ko tin tomuren e duw rok. Nap’an ni bay u Patmos, me pig e changar rok nge guy bogi ban’en nra buch ni bay ko Revelation, me fal’eg i yoloy nga but’. (Revelation 1:1, 2) Un lemnag ni kan chuweg u kalbus u nap’an ni Nerva ni Pilung e be gagiyegnag e nam nu Roma. Tomur riy, ni gonap’an 98 C.E., ni sana 90 ara 100 e duw rok John, me yoloy fare gospel nge fa dalip nem e babyor ni bay fithingan riy.

K’adan’ ni Dab ni Pagtalin

16. Uw rogon e piin ni kar wargad ndabkiyog nra uned ko sabethin ma ka yad be dag e yul’yul’ rorad ngak Jehovah?

¹⁶ Ma yib e magawon ni boor mit mab thil thil gelngin. Bod ni, boch e girdi’ e ke meewar ma dabkiyog ni ngar uned ko sabethin. Machane, dawor ra paged talin e runguy rok Got nge feni gol nrib gel. Yugu aram rogon ni buchuuw e thin nrayog ni nga rogned, ma laniyan’rad e be lungurad riy ngak Jehovah: “Rib t’uf rog e motochiyel rom! Gu ma par ni gu ma lemnag ni polo’ e rran.” (Psalm 119:97) Me Jehovah e manang e piin e yad ma “lemnag fithingan,” ma felfelan’ nga feni thil e pi cha’ nem ko yug girdi’ ni darur lemnaged e pi kanawo’ rok. (Malaki 3:16; Psalm 10:4) Ri ma fal’eg laniyan’uy ni yira nang ni ba felan’ Jehovah ngay ni ma guy ni gad ma fal’eg i lemnag!​—1 Kronicles 28:9; Psalm 19:14.

17. Mang e ke yog ngak e piin ke n’uw nap’an ni kar pigpiggad ngak Jehovah ni riyul’ ni yugu ba thil?

¹⁷ N’en ni dab ni pagtalin e fare n’en ni piin ke n’uw nap’an ni kar pigpiggad ku Jehovah ni yad ba yul’yul’ e bay ban’en ni ke yog ngorad nib thil ndabiyog ni ngan fek u yugu reb e kanawo’​—ni aram e k’adan’ ndab ni pagtalin. I gaar Jesus: “Ere mpired ni gimed mmudugil, ya ereray rogon me yog e yafos ngomed.” (Luke 21:19) K’adan’ e ba ga’ fan ko nge yog e yafas ni manemus. Pi aromed ni ‘ke rin’ e tin m’agan’ Got ngay’ ma kam micheged e yul’yul’ romed ko ngongol romed e rayog nim sonnaged e “tin ke yog Got nra pi’ ngomed.”​—Hebrews 10:36.

18. (a) Mang e ma felan’ Jehovah ngay ni ma guy ko piin ni kar pilibthirgad? (b) Mang e gad ra weliy ko bin migid e article?

¹⁸ Ma chaariy Jehovah e pigpig rom ni polo’ ndemtrug feni yoor ara feni lich e tin rayog rom. Ni demtrug ko mang e ra buch ya yugu ‘be meewar dowdad i yan’ ma ‘laniyan’dad e yibe beechnag’ u reb e rran ngu reb. (2 Korinth 4:16) Dariy e maruwar riy ni be tay Jehovah fan e pi n’en ni kam rin’ ko tin baaram e rran ni ke yan, machane ba tamilang ni be tay fan e tin ga be rin’ e chiney nbochan fithingan. (Hebrews 6:10) Bin migid e article, e gad ra weliy murung’agen e gin ni ma yan i taw angin e yul’yul’ ngay.

Uw Rogon ni Ngam Fulweg?

• Mang e ke rin’ Anna nrib fel’ ni nge fol e piin pilibthir riy e ngiyal’ ney?

• Mang fan ni pilibthir e gathi ri ir e nge taleg e n’en nrayog ni rin’ be’?

• Uw rogon nra dag e piin pilibthir ni ka yad be ul’ul ko pigpig ku Got?

• Uw rogon u wan’ Jehovah e pigpig ni ma tay e piin pilibthir ngak?

[Picture on page 13]

Daniel ni ke pilibthir e ke nang fan ko “fapi babyor” n’umngin nap’an ni kalbusnag piyu Judah

[Pictures on page 15]

Boor e piin kar pilibthirgad ni yad be dag e kanawo’ nib fel’ ni yad ma un ko muulung, nge ferad pasig ko machib, ma yad baadag ni ngar filed boch ban’en