Mange Gil’ilungun Got?

MANG kenggin e machib rok Jesus? Rogon ni yog Jesus, e Gil’ilungun Got. (Luke 4:43) Nap’an nra non ko girdi’, mab ga’ ni boor yay nima uneg murung’agen ere Gil’ilungun nem u fithik’ e sabethin rok. Gur, i balyangan’ e girdi’? Ra fithed ko mange re Gil’ilungun nem, fa? Danga’. Dariy bang u lan e Gospel ni bay riy e deer ni aray rogon. Ere gur, rib naab e girdi’ ko mange re Gil’ilungun Got nem?

Tin nriyul’ riy e, babyor ni bay e thin rok Got riy ni i tay piyu Jew fan kakrom ebe weliy murung’agen ere Gil’ilungun nem, ma be dag ko ri mange re n’em nge n’en nra rin’. Ngiyal’ ney e boor ban’en nrayog ni ngad filed u murung’agen fare Gil’ilungun ni taareb rogon ngak piyu Jew​—ni aram e ngan fanay e Bible. Ngad guyed medlip i ban’en nibe fil e Bible ngodad u murung’agen ere Gil’ilungun nem. Dalip ni m’on riy e manang piyu Jew u nap’an Jesus nge nga m’on riy. Ma dalip ni migid ngay e yibi tamilangnag Kristus ara pi apostal rok u nap’an e bin nsom’on e chibog. Ma bin ntomur e ka fini tamilang ko ngiyal’ rodad ney.

1. Gil’ilungun Got e riyul’ nib am nra par ndariy n’umngin nap’an. Bin nsom’on e yiiy u lan e Bible e dag nra pi’ Got be’ ni nge ayuweg e girdi’. Cha’ney ni kan pining faen “owchen” ngak e ra chuweg urngin e magawon ni tabab nbochan e togopuluw ni tay Adam, nge Efa, nge Satan. (Genesis 3:15, NW) Boch nga tomur riy mi nog ban’en ngak David ni Pilung ni yira gin ngay ni murung’agen e en “owchen” ney ara fare Messiah. Ir e ra gagiyegnag ba Gil’ilungun. Ba thil ere am ney nga yugu boch e am. Ya ra par ndariy n’umngin nap’an.​—2 Samuel 7:12-14.

2. Gil’ilungun Got era chuweg urngin e am ko girdi’. Ni pilyeg e changar ku Daniel nge guy e pi am nibe gagiyegnag e fayleng ni bayi thilthil u nap’an chepin e girdi’ ngeb i mada’ ko chiney. Am guy e n’en ni buch boch nga tungun ere n’em ni guy ni yira gin ngay, ni gaar: “Ngiyal’ ni bay i gagiyeg e pi pilung [ni girdi’] nem, e aram e bayi sunumeg Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.” Ere gubin e am ko re fayleng ney​—nge pi mahl rorad, thin nib gel ni yad be yog, nge sasaliyeb ni yad be tay ko girdi’—​e goo bay nthang ni manemus. Bod ni be dag e yiiy rok Daniel ni, Gil’ilungun Got e sum u tharmiy som’on, ma dabki n’uw nap’an me gagiyegnag e fayleng ni polo’. (Daniel 2:44, 45) Gathi kemus nib riyul’ ere am ney, ya ku aray ere am nra magey nga i gagiyegnag e fayleng.a

3. Gil’ilungun Got era chuweg e mahl, m’ar, uyungol, nge yam’. Yiiy ko Bible e be dag e n’en nra rin’ Gil’ilungun Got u roy u fayleng. Re am nem era rin’ e n’en dawori rin’ ara dabiyog ni nge rin’ e am ko girdi’. Am lemnag​—ni ngam guy urngin mit e talin e cham ni fan ko mahl ni kan gothey ke m’ay! “Be taleg e pi mahl ni yibe tay u fayleng i yan.” (Psalm 46:9) Dakuriy e togta, aspital, ara m’ar ni gubin mit. “Dariy be’ ni be par u lan e nam rodad ni bay ki yog nib m’ar.” (Isaiah 33:24) Dakuriy e uyungol, ma dabki lich e ggan, ara m’ar e girdi’ nbochan e ggan ndariy. “Me par e nam nib sug ko grain.” (Psalm 72:16) Dabkun tayam’, ma dabkun odbeg e yam’, ma dakuriy e teliw ko yam’ ara naun ntafen e yam’, ara kireban’uy nbochan be’ rodad ni kem’. Yam’ ni aram e bin nth’abi ga’ e toogor rodad era chuw ndariy n’umngin nap’an. Got “e bayi ful’ e yam’ ndariy n’umngin nap’an, ma Jehovah ni ir fare Somol nth’abi tolang e ra n’ag e lu’ u owchen e girdi’ ni gubin.”​—Isaiah 25:8, NW.

4. Gil’ilungun Got e bay be’ nike mel’eg ni nge Gagiyegnag. Gathi fare Messiah e mel’eg ir ni nge mang pilung ko re am nem, maku gathi girdi’ nde flont. Jehovah Got e mel’eg. Fagali ngochol ni Messiah nge Kristus e be dag ni Got e ke dugliy. Gali ngochol ney nl’agruw e be yip’ fan ni “Kan Dugliy.” Ere Jehovah e ire ke dugliy ere Pilung ney ni nge rin’ e maruwel rok. I weliy Got murung’agen ni gaar: “Baaray e tapigpig rog ni kug pi’ gelngin, ni faanem ni gag e kug turguy ni ir e ba fel’ u wun’ug. Kug pi’ e kan ni thothup rog ngak, bayi fek e tin nib yal’uw i yib ngak urngin e nam.” (Isaiah 42:1; Matthew 12:17, 18) Mini’ nga bang e ka boor ban’en ni manang ngak e En ni Sunmiydad nra nang e en th’abi fel’ ni nge Gagiyegnagdad?

5. En ni Pilung ko fare Gil’ilungun Got e ke dag fel’ngin u p’eowchen urngin e girdi’. Jesus nu Nazareth e micheg ni ir fare Messiah. Ni gargeleg ko fare tha’ ko tabinaw ni mel’eg Got. (Genesis 22:18; 1 Kronicles 17:11; Matthew 1:1) Nap’an ni immoy u fayleng, ma boor e yiiy u murung’agen ere Messiah nem ni lebguy ni kan weliy nike pag raay e duw. Kun gagiyelnag u tharmiy ni ir fare Messiah. Uw rogon? I non Got u tharmiy nibe gagiyelnag ni Ir Fak; miki dag e pi engel ni Jesus e ir fare Messiah; miki ngongliy Jesus e maang’ang​—nib ga’ ni bokum miriay ara bokum biyu’ e girdi’ ni ur guyed nga owcherad—​ma be m’ug ni bay gelngin Got riy.b Boor yay ni dag Jesus ere miti Pilung nra mang. Gathi kemus ni bay gelngin ni nge ayuweg e girdi’ ya ku baadag. (Matthew 8:1-3) De laniyan’, ma ma runguy e girdi’, ma der rus, mab sobut’an’. Rogon e yafas rok u nap’an ni immoy u fayleng e bay u Bible ni fan e nge beeg urngin e girdi’.

6. Bay 144,000 e girdi’ nra un ngak Kristus ko gagiyeg u tan Gil’ilungun Got. I yog Jesus nra un boch e girdi’ ngak ko gagiyeg u tharmiy nib muun e pi apostal rok ngay. I pining ere ulung ney ni ‘fachi ulung.’ (Luke 12:32) Boch nga tomur riy mi nog ku apostal John nre ulung ney e 144,000 u gubin. Bay e maruwel rorad ni ur gagiyeggad ni yad e pi pilung ma ur pigpiggad ni prist ni yad Kristus.​—Revelation 5:9, 10; 14:1, 3.

7. Gil’ilungun Got, e chiney ebe gagiyeg u tharmiy, make fel’ rogon ni nge gagiyeg u fayleng ni polo’. Bin medlip ney e yiiy e bin nth’abi fel’ ni gadra nang. Boor e mich riy u Bible ni kan pag gafalngin ku Jesus ni nge mang Pilung u tharmiy. Be gagiyeg u rom e chiney, ma dabki n’uw nap’an ma ra gagiyeg u fayleng ni nge lebguy e pi yiiy ni kad weliyed murung’agen.

[Footnotes]