LIBRARY U ONLINE ni fan ko Wulyang ko Damit
Wulyang ko Damit
LIBRARY U ONLINE
Waab
  • BIBLE
  • PI BABYOR
  • PI MUULUNG
  • w14 10/1 pp. 10-15
  • Ngari Mich Gil’ilungun Got u Wan’um

Dariy e video ko n'en ni kam mel'eg.

Wenig ngom, dabiyog ni nge load e re video ney.

  • Ngari Mich Gil’ilungun Got u Wan’um
  • Fare Wulyang ko Damit Ni Be Weliy Morngaagen Gil’ilungun Jehovah—2014
  • Pi Subheading
  • Boch Ban'en ni Ku Taareb Rogon Ngay
  • BAN’EN NNI MICHEG NI BE DAG ROGON NRA LEBUG E N’EN NIB M’AGAN’ GOT NGAY
  • BA M’AG NRA TAMILANGNAG KO MINI’ FAEN OWCHEN FARE PIN
  • BA M’AG NI BE MICHEG NRA PAR E RE AM NEY NDARIY N’UMNGIN NAP’AN
  • BA M’AG NI FAN NGAK BE’ NRA MANG PRIST
  • PI M’AG NI KE NGONGLIY GOT E IR E DEF KO RE AM NEY
  • Bay Mmanged “Ba Nam ni Gimed Be Pigpig Ngog ni Kam Manged Pi Prist”
    Fare Wulyang ko Damit Ni Be Weliy Morngaagen Gil’ilungun Jehovah—2014
  • Jehovah E Ir Ba Got Ko Pi M’ag
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—1998
  • Pi Flaab Ni Kab Fel’ U Daken E Bin Nib Biech E M’ag
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—1998
  • Reb e M’ag ni Bay Rogon Ngom
    Pi N’en ni Ma Rin’ e Piin Kristiano nge Machib ni Yad Ma Tay—Babyor ni Fan ko Muulung—2020
Fare Wulyang ko Damit Ni Be Weliy Morngaagen Gil’ilungun Jehovah—2014
w14 10/1 pp. 10-15

Ngari Mich Gil’ilungun Got u Wan’um

“Ra nge michan’dad ma aram e ke pagan’dad ko pi n’en ni ir e ke l’agan’dad ngay.”​—HEB. 11:1.

RAYOG NI NGAM WELIY?

Mu Fanay Fare Chatr Ni Kenggin E “Rogon Nra Lebguy Got E N’en Nib M’agan’ Ngay” Ni Ngam Weliy Fan . . .

  • fare thin ni micheg Got u Eden.

  • fare m’ag rok Abraham nge fare m’ag rok David.

  • fare m’ag ni fan ngak be’ nra mang prist ni bod Melkizedek.

1, 2. Mang e ra ayuwegdad ni ngari mich u wan’dad nra lebguy Gil’ilungun Got e n’en nib m’agan’ ngay ni fan ko girdi’, ma mang fan? (Mu guy e sasing ni bay u tabolngin e re article ney.)

GADAD e Pi Mich Rok Jehovah e ba ga’ ni gad ma yog ni kemus ni yigoo Gil’ilungun Got e rayog ni nge chuweg urngin e magawon rodad, mab ga’ ni gad ma weliy e pi n’ey ko girdi’. Maku reb e, pi n’en ni gad be athapeg ni nge yibnag Gil’ilungun Got ni fan ngodad e ri ma fal’eg lanin’dad. Machane, uw feni gel e michan’ rodad nga Gil’ilungun Got ni ir e ra lebguy e n’en nib m’agan’ ngay? Ma mang fan ni ngari mich Gil’ilungun Got u wan’dad?​—Heb. 11:1.

2 Gil’ilungun fare Messiah e aram reb e am ni ke sunmiy Got ni Gubin Ma Rayog Rok ni nge lebguy e n’en nib m’agan’ ngay ni fan ko pi n’en ni ke sunmiy. Ma mat’awun Jehovah ni nge gagiyeg e aram e n’en nra tay e re Am nem nib mudugil ndariy ban’en nra buch riy. Bay boch ban’en nib ga’ fan ko re Am nem ni bod rogon e en nra mang pilung riy, nge piin ni yad ra un ngak ko gagiyeg, nge n’en ni yad ra gagiyegnag ara piin ni yad ra gagiyegnagrad. Ma gubin e pi n’ey ni ke yag ni ngan dugliy ni bochan e pi m’ag ni i ngongliy Got nge Jesus Kristus ni Fak. Faan gad ra fal’eg i fil murung’agen e pi m’ag ney, ma rayog ni ngari tamilang u wan’dad rogon nra riyul’ e pi n’en nib m’agan’ Got ngay, maku ra ayuwegdad ni nge mich u wan’dad nre n’ey ni kan yarmiy rogon kan tay e ban’en nra par nib mudugil ndabi thil.​—Mu beeg e Efesus 2:12.

3. Mang e gad ra weliy ko re article ney nge bin migid?

3 Be weliy e Bible murung’agen nel’ i m’ag nni ngongliy kakrom ni bay rogon nga Gil’ilungun fare Messiah nra gagiyegnag Kristus Jesus. Re nel’ i m’ag nem e aram (1) fare m’ag rok Abraham, (2) fare m’ag ko Motochiyel, (3) fare m’ag rok David, (4) fare m’ag ni fan ngak be’ nra mang prist ni bod Melkizedek, (5) fa bin nib beech e m’ag, nge (6) fare m’ag ni fan nga Gil’ilungun Got. Chiney e ngad weliyed ko uw rogon ni bay rogon e pi m’ag ney nga Gil’ilungun Got nge rogon nra lebguy e n’en nib m’agan’ Got ngay ni fan ko fayleng nge girdi’.​—Mu guy fare thin ni kenggin e “Rogon Nra Lebguy Got e N’en nib M’agan’ Ngay.”

BAN’EN NNI MICHEG NI BE DAG ROGON NRA LEBUG E N’EN NIB M’AGAN’ GOT NGAY

4. Mang e yog Jehovah nra rin’ ni fan ko girdi’ nrogon ni bay ko Genesis?

4 Tomuren ni ngongliy Jehovah rogon e fayleng nge tay ni nge par e girdi’ riy, me yog: Nra sunmiy e girdi’ ni bod yaan, ma ra ga’nag e girdi’ e Paradis nge yan i taw nga ga’ngin yang e fayleng me sugnag pi fakrad, maku dabi kay e girdi’ wom’engin fare ke gek’iy ni ma tamilangnagan’uy ko tin nib fel’ nge tin nib kireb. (Gen. 1:26, 28; 2:16, 17) Kari mus e n’en nib m’agan’ Got ngay ni fan ko fayleng nge girdi’. Ma tomuren ni sunmiy e girdi’, me yan i par ni ka l’agruw ban’en e ka bay nib t’uf ni ngan fol riy, ya nge yag ni lebug e n’en nib m’agan’ ngay. Ere, mang e rin’ me t’uf ni nge ngongliy Got e m’ag u thilrad boch e girdi’?

5, 6. (a) Uw rogon ni guy Satan rogon ni nge taleg Got ni nge dabi lebguy e n’en nib m’agan’ ngay? (b) Mang e rin’ Jehovah ko togopuluw ni tay Satan u Eden?

5 Satan ni Moonyan’ e ir e som’on ni togopuluw ya nge dabi lebug e n’en nib m’agan’ Got ngay. I guy rogon ni nge mo’maw’nag ko girdi’ ni ngar folgad rok Got ni aram e waliy Efa ni nge kay wom’engin fare ke gek’iy ni ma tamilangnagan’uy ko tin nib fel’ nge tin nib kireb. (Gen. 3:1-5; Rev. 12:9) Bochan e n’en ni rin’ Satan, ma aram me togopuluw nga mat’awun Got ni nge gagiyegnag e pi n’en ni Ke sunmiy. Boch nga tomuren, miki yog Satan ni fan ni be pigpig e girdi’ ngak Got e bochan e pi n’en ni be yag riy ngorad.​—Job 1:9-11; 2:4, 5. 

6 Ere, mang e nge rin’ Jehovah ko togopuluw ni ke tay Satan u Eden? Rayog ni nge thang e piin ni kar togopuluwgad. Machane, faanra rin’ e re n’ey maku dabiyog ni nge lebug e n’en nib m’agan’ ngay ni aram e nge diyen Adam nge Efa nge yoor pi fakrow ngar wergad nga gubin yang u fayleng. Ere, n’en ni rin’ e pi’ reb e yiiy ni fan e nge yag ni lebug urngin ban’en ni ke micheg ni fan ko fayleng nge girdi’. Re yiiy nem e yima yog e n’en ni micheg Got u Eden ngay.​—Mu beeg e Genesis 3:15.

7. Mang e be tamilangnag fare thin nni micheg u Eden u murung’agen fare porchoyog nge piin owchen?

7 I micheg Got u daken e thin ni yog u Eden nra thang fare porchoyog ni be yip’ fan Satan nge piin owchen ni be yip’ fan urngin e piin ni kar chagilgad ngak yad be togopuluw nga mat’awun Got ni nge gagiyeg. Ki pi’ Got mat’awun fak ara owchen fare ppin rok u tharmiy ni ir e nge thang Satan. Ere, fare thin nni micheg u Eden e gathi kemus ni be tamilangnag ni yira thang e en ni tababnag e togopuluw u lan fagi milay’ nu Eden min chuweg wenegan e togopuluw ni tay, ya ku be yog rogon ni yira rin’ e re n’ey.

8. Mang e kad filed u murung’agen fare pin nge faen owchen?

8 Ere, mini’ fak ara owchen fare pin? Faanra nge bilbilig faen owchen fare pin lolugen fare porchoyog, ni aram e be yip’ fan ni nge “thang” fare kan nib kireb ni ka nog Satan ni Moonyan’ ngak, me ere ba mudugil ni faen owchen fare pin e ku ir reb e kan ndabiyog ni ngan guy. (Heb. 2:14, NW) Maku arrogon fare pin ni ku dabiyog ni ngan guy. Yugu aram rogon nib papey ni yoor e piin owchen fare porchoyog, machane, tomuren ni micheg Got fare thin u Eden mab chugur ko 4,000 e duw ni par ndariy be’ ni manang ko mini’ fare pin nge faen owchen. Nap’an e pi duw nem me ngongliy Jehovah boch e m’ag ni be tamilangnag ko mini’ faen owchen fare pin, miki ayuweg e pi tapigpig Rok ni ngar nanged ni ireray e en nra fanay ni nge yal’uweg urngin ban’en ni ke kireb ni bochan e togopuluw ni tay Satan.

BA M’AG NRA TAMILANGNAG KO MINI’ FAEN OWCHEN FARE PIN

9. Mang fare m’ag rok Abraham, ma wuin e tabab ni nge riyul’ e re thin nem?

9 Sogonap’an 2,000 e duw nga tomuren fapi thin ni micheg Jehovah u Eden, me yog ngak Abraham ni nge digey tafen u Ur nreb e binaw ni bay u Mesopotamia nge yan nga Kanaan. (Acts 7:2, 3) I gaar Jehovah ngak: “Mpag e nam rom, nge girdi’ rom, nge tabinaw rok e chitamam ngam man nga ba nam ni bay fin gu dag ngom. Bay gu gagiyeg nge yib owchem ni pire’ ni pire’, ni yad e bay ra manged girdien ba nam ni pire’ girdien. Bay gu fal’eg waatham mu gu gagiyeg nge gilbuguwan fithingam, nguu nog ko ngiyal’ ni yibe yibil ngak Got ni nge fal’eg waathan be’. Gu ra fal’eg waathan e piin ni yad ra fal’eg waatham, ma gu ra bucheg waathan e piin ni yad ra yibiliyem ni nge kireb waatham. Urngin e nam nu fayleng e bay i fel’ waathrad ni bocham.” (Gen. 12:1-3) Ireray e yay nsom’on nni weliy murung’agen e re m’ag ney ni ngongliy Got u thilrow Abraham u Bible. Re m’ag ney e yima yog fare m’ag rok Abraham ngay. Dariy be’ ni manang ko wuin e som’on ni ngongliy Jehovah e re m’ag nem u thilrow Abraham. Machane, i tabab e re m’ag nem u nap’an e duw ni 1943 B.C.E., u nap’an ni chuw Abraham u Haran nge yan i th’ab fare Lul’ nu Eufrates nga barba’ u nap’an ni ke gaman 75 e duw rok.

10. (a) Uw rogon ni dag Abraham ni kari mich u wan’ e pi n’en ni ke micheg Got ngak? (b) Mang boch ban’en ni tamilangnag Jehovah u murung’agen faen ni owchen fare pin ni buchuuw ma buchuuw?

10 Ku boor yay ni i sul Jehovah ngi i puguran ngak Abraham e pi thin nem ni micheg ngak, ma urngin yay nra sul u daken e pi thin nem ma kki uneg boch ban’en ngay ni nge tamilangnag. (Gen. 13:15-17; 17:1-8, 16) Ma nap’an ni m’agan’ Abraham ngay ni nge pi’ fak nrib t’uf rok ni maligach, me m’ug nrib mich u wan’ e n’en ni ke micheg Got ngak. Ere, ki sul Jehovah u daken fapi thin ni yog ngak ni bochan e nge micheg nra riyul’ e re m’ag nem u thilrow. (Mu beeg e Genesis 22:15-18a; Hebrews 11:17, 18.) Tomuren ni tabab fare m’ag ni ngongliy Jehovah u thilrow Abraham, ma aram me tabab Jehovah ni nge tamilangnag boch ban’en u rarogon faen nra yib ni owchen fare pin ni buchuuw ma buchuuw. I yog nra yib owchen fare pin ko tabinaw rok Abraham, ma ra munmun ma ra un boor e girdi’ ngay, ma yad ra mang pilung, mar thanged e pi toogor rorad, ma ra tow’ath boor e girdi’ ni bochrad.

11, 12. Uw rogon ni be tamilangnag e Bible ni ku bay reb e kanawo’ nra lebug fare m’ag riy ni ngongliy Got u thilrow Abraham? Mang rogon e re n’ey ngodad?

11 Pi n’en ni micheg Got ngak Abraham ko fare m’ag ni fal’eg u thilrow e lebug ko yay nsom’on u nap’an ni tafanay pi fak Abraham fare Nam ni Kan Micheg. Machane, be tamilangnag e Bible ni bay bayay ni ku ra lebug e pi thin nem. (Gal. 4:22-25) Nni thagthagnag nga laniyan’ apostal Paul nge weliy rogon nra lebug e pi thin nem ko yay ni migid. I yog ni en som’on nra yib ni owchen Abraham e aram Kristus, ma tin ni ka bay i owchen Abraham e aram fare 144,000 i Kristiano ni kan dugliyrad nga gelngin Got nib thothup. (Gal. 3:16, 29; Rev. 3:21; 14:1, 4) Fare pin nra yib owchen e aram e “bin ba’ u tharmiy e Jerusalem,” ara ulung rok Got u tharmiy ni be yip’ fan urngin e pi tapigpig rok Got u tharmiy ni yad ba yul’yul’ ngak. (Gal. 4:26, 31) Rogon nni micheg ngak Abraham e, faen owchen fare pin e ir e ra tow’athnag e girdi’ nu fayleng.

12 Fare m’ag rok Abraham e aram reb e ban’en ni be micheg nra riyul’ fare Am nu tharmiy, maku aram e n’en ni ke bing e kanawo’ ngak fare Pilung nge piin ni yad ra un ngak ko gagiyeg ni nge milfan e re Am nem ngorad. (Heb. 6:13-18) Uw n’umngin nap’an nra par e re m’ag nem? Be yog e Genesis 17:7 nra “par nib m’ag ni dabi m’ay.” Ere, ra par e re m’ag nem nge mada’ ko ngiyal’ ni ke thang Gil’ilungun fare Messiah urngin e pi toogor rok Got me tow’athnag urngin e girdi’ nu fayleng. (1 Kor. 15:23-26) Bin riyul’ riy e, urngin e piin ni yad ra par u fayleng e ngiyal’ nem e ra yib angin e re m’ag nem ngorad ndariy n’umngin nap’an. Ere, fare m’ag ni ngongliy Jehovah u thilrow Abraham e be micheg ni ke dugliy u wan’ ni nge lebguy e n’en nib m’agan’ ngay me “wer” e piin ni yad mat’aw nga gubin yang u fayleng!​—Gen. 1:28.

BA M’AG NI BE MICHEG NRA PAR E RE AM NEY NDARIY N’UMNGIN NAP’AN

13, 14. Mang e be micheg fare m’ag rok David u murung’agen e gagiyeg nra tay fare Messiah?

13 Gad be fil ko fare thin ni micheg Got u Eden nge fare m’ag rok Abraham ni be tor e gagiyeg rok Jehovah nga daken e pi motochiyel rok nib mat’aw. Ere, Gil’ilungun fare Messiah ni ke ngongliy e ku be tor nga daken e pi motochiyel rok nib mat’aw. (Ps. 89:14) Ere gur, bay ba ngiyal’ nra taw ngay me t’uf ni ngan chuweg e re am ney nra gagiyegnag fare Messiah ni bochan e ke kireb? Ku bay reb e m’ag ni ngongliy Got u thilrow be’ ni be micheg ndabi buch e re n’ey.

14 Am lemnag e n’en ni micheg Jehovah ngak David ni ir e Pilung nu Israel kakrom. Re n’em e yima yog fare m’ag rok David ngay. (Mu beeg e 2 Samuel 7:12, 16.) I ngongliy Jehovah e re m’ag nem u thilrow David u nap’an ni ir e pilung u Jerusalem, me micheg ngak nra yib fare Messiah ko tabinaw rok. (Luke 1:30-33) Aray rogon ni tamilangnag Jehovah ko kun tabinaw e ra yib fare Messiah riy. I yog ni bay be’ nra yib ko tabinaw rok David ni ir e ‘ke mel’eg’ ni nge mang pilung u Gil’ilungun fare Messiah. (Ezek. 21:25-27) Ra par e gagiyeg rok David “ndabi m’ay” u pa’ Jesus, ni ir e en nra yib ni owchen David. Ma ra par e gagiyeg rok Jesus “u n’umngin nap’an ni bay e yal’ ni be mat ramaen.” (Ps. 89:34-37) Arrogon, dabi kireb e gagiyeg rok fare Messiah, ma ra par angin ndariy n’umngin nap’an!

BA M’AG NI FAN NGAK BE’ NRA MANG PRIST

15-17. Ku mang reb e maruwel nra rin’ faen owchen fare pin, nrogon ni kan micheg ko fare m’ag ni kan ngongliy ni fan ngak be’ nra mang prist ni bod Melkizedek? Mang fan?

15 Yugu aram rogon ni fare m’ag rok Abraham nge fare m’ag rok David e be micheg nra gagiyeg faen owchen fare pin nib pilung, machane faanra kemus ni nge par nib pilung ma dabiyog ni nge tow’athnag girdien urngin e pi nam. Ya faanra ngari fel’ rogon girdien e pi nam ko gagiyeg nra tay, ma thingari chuweg e denen rorad me fekrad ni ngar manged bang ko tabinaw rok Jehovah u tharmiy ngu fayleng. Ere, faanra nge rin’ faen ni owchen fare pin e re n’ey, ma thingar ki par ni ir reb e prist. Ireray e n’en ni rin’ Jehovah u nap’an ni ngongliy fare m’ag ni fan ngak be’ nra mang prist ni bod Melkizedek.

16 I tamilangnag Jehovah u daken David ni Pilung Nra ngongliy ba m’ag u thilrow Jesus nib muun l’agruw ban’en ngay, ni aram e: ra ‘par u ba’ ni mat’aw rok’ Got nge mada’ ko ngiyal’ ni ke thang urngin e pi toogor rok, ngemu’ miki mang “ba prist ndariy n’umngin nap’an, ni bod rogon Melkizedek.” (Read Psalm 110:1, 2, 4.) Mang fan nra mang Jesus e prist “ni bod rogon Melkizedek”? Ya kakrom u m’on ni nge tafanay pi fak Abraham fare Nam ni Kan Micheg, me Melkizedek, ni ir e pilung nu Salem e i pigpig ni ir reb e “prist rok Got ni th’abi tolang.” (Heb. 7:1-3) Jehovah e ir e mel’eg ni nge mang pilung nge prist. Ma kemus ni yigoo ir e bay murung’agen ko Pi Babyor ko Bible nni Yoloy Som’on ni Thin ni Hebrew ni mang pilung miki mang prist u taab ngiyal’. Maku reb, e bochan nder weliy e Bible murung’agen be’ ni immoy nga m’on ara nga tomuren Melkizedek ni aray rogon, ma aram fan nrayog ni nga nog ni ir e “prist ndariy n’umngin nap’an.”

17 I mel’eg Jehovah Jesus ni nge mang prist u daken e re m’ag nem ni ngongliy u thilrow, ma ra par ni ir e prist “ndariy n’umngin nap’an, ni bod rogon Melkizedek.” (Heb. 5:4-6) Ere, re m’ag ney e be tamilangnag ni ke micheg Jehovah nra fanay Gil’ilungun fare Messiah ni nge lebguy e n’en nib m’agan’ ngay ni fan ko girdi’ nge fayleng.

PI M’AG NI KE NGONGLIY GOT E IR E DEF KO RE AM NEY

18, 19. (a) Mang e be tamilangnag fapi m’ag ni kad weliyed u murung’agen Gil’ilungun fare Messiah? (b) Mang deer e ka bay ni ngan weliy e fulweg riy?

18 Faan gad ra sul ngad lemnaged fapi m’ag ni kad weliyed murung’agen, ma gad ra guy rogon nib peth nga Gil’ilungun fare Messiah nge rogon ni ke yan i par ni ir e def ko re Am ney. Fare thin ni yog Jehovah u Eden e be micheg nra lebguy e n’en nib m’agan’ ngay ni fan ko fayleng nge girdi’ u daken owchen fare pin. Ma mini’ e en owchen fare pin, ma mang e maruwel ni yira pi’ ni nge milfan ngak? Kad filed ni yira nang e en nra yib ni owchen fare pin nge maruwel rok u daken fare m’ag ni ngongliy Got u thilrow Abraham.

19 Kud filed ni fare m’ag ni ngongliy Got u thilrow David e be tamilangnag ko kun tabinaw e ra yib faen owchen fare pin riy. Re m’ag nem e kki pi’ mat’awun e cha’nem ni nge gagiyegnag e fayleng ndariy n’umngin nap’an. Ma fare m’ag ni fan ngak be’ nra mang prist ni bod Melkizedek e kun ngongliy ni nge micheg ni ku ra pigpig faen owchen fare pin nib prist. Machane, gathi kemus ni yigoo Jesus e ra ayuweg e girdi’ ni ngar sulod ngkur flontgad bayay. Ya ku bay boch e girdi’ ni kan dugliyrad ni ngar manged pilung nge prist. Uw e ra yib e pi girdi’ ney riy? Ireray e n’en ni gad ra weliy ko bin migid e article.

[Boch e thin nra tamilangnag murung’agen]

a Genesis 22:18, NW: “Ma urngin e nam nu fayleng ni bayi fel’ waathrad u daken e piin ni owchem, ni bochan e kam fol ko tin ni ku gog ngom ni ngam rin’.”

Rogon Nra Lebguy Got E N’en Nib M’agan’ Ngay

Fare thin ni micheg Got u Eden e be tamilangnag nra fanay Gil’ilungun ni nge lebguy e n’en nib m’agan’ ngay ni fan ko fayleng nge girdi’. Re nel’ i m’ag ni baaray e ra lebguy e n’en nib m’agan’ Got ngay:

M’AG ROK ABRAHAM

THILIN: Jehovah nge Abraham

FAN: Kan ngongliy ni nge micheg ni “fak” ara owchen fare “pin” ni bay ko Genesis 3:15 e ir e ra gagiyegnag Gil’ilungun Got

FARE M’AG KO MOTOCHIYEL

THILIN: Jehovah nge piyu Israel

FAN: Kan ngongliy ni nge ayuweg “fak” ara owchen fare pin, me ayuweg e girdi’ ni ngar nanged ko mini’ fare Messiah

M’AG ROK DAVID

THILIN: Jehovah nge David

FAN: Kan ngongliy ni nge micheg ni en nra mang Pilung u Gil’ilungun fare Messiah e ra yib ko tabinaw rok David, ma pi n’en nra rin’ e re Am ney e ra par ndariy n’umngin nap’an

FARE M’AG NI FAN NGAK BE’ NRA MANG PRIST NI BOD MELKIZEDEK

THILIN: Jehovah nge Jesus

FAN: Kan ngongliy ni nge micheg ni en som’on nra yib ni “fak” ara owchen fare pin, ni aram Jesus, e ra mang pilung nge prist ndariy n’umngin nap’an

FA BIN NIB BEECH E M’AG

THILIN: Jehovah nge pi Kristiano ni kan dugliyrad

FAN: Kan ngongliy ni nge micheg nra mel’eg Got 144,000 e Kristiano ni ngar manged pi fak mu kur manged “fak” ara owchen fare pin

M’AG NI FAN NGA GIL’ILUNGUN GOT

THILIN: Jesus nge pi Kristiano ni kan dugliyrad

FAN: Kan ngongliy ni fan e nge chagiy e pi Kristiano ni kan dugliyrad nge Kristus nga taabang ni ngar gagiyeggad u tharmiy ni yad e pilung nge prist

    Yapese Publications (1984-2025)
    Mu Log Out
    Mu Log In
    • Waab
    • Mu Sharenag
    • Pi N'en Nrayog ni Ngam Mel'eg
    • Copyright © 2025 Watch Tower Bible and Tract Society of Pennsylvania
    • Rogon ni Ngan Fanay
    • Privacy Policy
    • Privacy Settings
    • JW.ORG
    • Mu Log In
    Mu Sharenag