Ngan Conductnag e Bible Study u Langan e Mab nge Telefon
1. Mang fan ni gad ma conductnag e Bible study?
1 Bay e falfalan’ riy ni ngan tababnag e Bible study! Machane ngan pirieg be’ ni ba adag ni nge fil e Bible ma ke mus ni aram tabolngin. Fan ni ngan fil e Bible ngak be’ e ngan ayuweg ni nge mang reb e gachalpen Kristus. (Matt. 28:19, 20) Uw rogon nge yog ngodad e re n’em?
2. Mang e Bible study u langan e mab ko tabinaw ko girdi’ ara study ko telefon?
2 Girdi’ ni Boor Pa’ u Puluwrad: Ngiyal’ ney ma boor pa’ u puluwon e girdi’. U yu yang ma dabun e girdi’ ni ngar filed e Bible ko taareb e awa. Rogon ni ngan ayuweg e pi girdi’ nem ma ngan tababnag ma ngan fil e Bible ko girdi’ u langan e mab ko tabinaw rorad ara ko telefon. Som’on ma ngan fil e Bible nib ngoch nap’an ma ke mus ni taareb fa l’agruw e paragraph u lan e babyor ni Knowledge ara Ngam Par ni Gab Fas ma ngan bieg boch e thin ko Bible. Rib fel’ ya boor e publisher ni yad be conductnag e Bible study u langan e mab u tafen e girdi’ ara telefon!
3. Mang fan ni susun ni ngad guyed rogon ni nge yoor e tayim ni ngan fil e Bible ngak be’ u langan e mab ko tabinaw rok?
3 Machane susun ni nge felan’dad ni ngad filed e Bible ko girdi’ u langan e mab ko tabinaw rorad ara telefon u gubin ngiyal’? Danga’. Dariy e gonop riy ni ngad pared nib n’uw nap’an ko ngiyal’ ni gad ra tababnag e study, machane be weliy fare babyor ni Machib Rodad Ni Fan Ko Gil’ilungun Got ko May 1990, page 8 ni gaar: “Nap’an ni kan dugliy e study ma kan pug e tafinay rok facha’ ma rayog ni ngan machibnag nib n’uw boch nap’an.” Ri baga’ fan e re n’ey. Susun: Ba bitir ni ke gafgow ko ggan ma ke mus ni buch uw e ggan ni ngan pi’ ngak nge k’ay nge mada’ ko ngiyal’ ni ke sul nga rogon, machane dabiyog ni nge sul gelngin ma nge ga’ iyan ni faanra ke mus ni buch uw e ggan ni ngan pi’ ngak in e pul. Ku arrogon be’ ni be fil e Bible ma ba t’uf ni nge fil e Bible nib fel’ rogon nge gubin ngiyal’ ni fan ni nge mon’og iyan me mang reb e tapigpig rok Got nib ilal. (Heb. 5:13, 14)
4. Mang boch angin nra yib ni ngan fol babyor u lan e naun ku be’?
4 Ngan Conductnag e Bible Study u Lan e Naun: Kab fel’ ni ngan conductnag e study u gin ni dariy e wagey—u tafen be’ ara gin nib m’ag. Ya aram rogon ma rayog ni nge tiyan’ ko fol babyor ma nge nang fan e Thin Rok Got. (Matt. 13:23) Ku ra ayuweg fare tamachib ni nge puluwnag e thin ni ngan fil ko tin nib t’uf rok fare student. Maku, ngan fol babyor nib n’uw boch nap’an ma rayog ni ngan fil e Thin Rok Got nib fel’ rogon ma nge gelnag e michan’.—Rom. 10:17.
5. Uw rogon ni ngan ayuweg be’ nge yog ni ngan fol babyor nga lan e naun ma gathi langan e mab?
5 Mang e ngam rin’ ndabkum filew be’ e Bible u langan e mab ya ngam filew e Bible u lan e naun rok? Tomren ni kam studygow boch e ngiyal’ nib ngoch nap’an, ma mang ni dabmu weliy ngak ni nge yoor e tayim ni ngam filew e babyor ko ngiyal’ ni ngan dugliy? Fa rayog ni ngam fith ngak ni gaar: “Bay boch e tayim rom e daba’ ni ngad parew nga but’ ngad filew e re n’en ney u taabang? Ara “Uw n’umngin nap’an ni ga ba adag ni ngad filew e babyor e daba’?” Faanra dabun ni ngan rin’ ni aram rogon, ma nguum filew e babyor u langan e mab nib ngoch nap’an. Ma ngiyal’ nib puluw ma ngam guy rogon ni ngam filew e babyor u lan e naun.
6. Mang e susun ni ngad nameged u nap’an ni gad ma un ko machib, ma uw rogon nrayog ni nge ayuwegdad e pi thin ney ngad thapgad ko re n’em?
6 Gad ra ul’ul’ i gayiy e piin ni ba adag e machib, ere dabda paged talin ni gad be nameg ni ngad tababnaged ma ngad conductnaged e Bible study. Gad be nameg ni ngad ayuweged e piin nib yul’yul’ ngar ognaged yad ku Jehovah mar uned ko taufe. Nge flaabnag Jehovah e athamgil ni ngad ted ni ngad namged e re n’ey u nap’an ni gad ma wereg e machib.—2 Tim. 4:5.